Read ejagham Matiyu, echî 4 Bible Online

Matiyu, echî 4 - ejagham bible

Matiyu, echî 4

¹Obhasi Ebhare Ntʉgantʉ a kô mân Jisos a jak ka etə́m, Satan a gaé yê.

²Jisos a kâ nsam i mfín ébháe, atʉ́ na efín, édî á ka dí, njaé a róghe yê eyámám.

³Satan a bhâ sə́re yê se, “Ájoé we a ri Mmon Obhasi, yim atáé mmá á kpíghí édî ó kó, ó dí.”

⁴Kən Jisos a táme se, “Á séŋe sê, ‘Édî asík átíŋ nâ é kára nne ekpin, kən ekpin í nne é kí dʉ fə́ne ka nchot Obhasi.’ ”

⁵Satan a kô mân Jisos a jak ka Eték Achot Obhasi. Á gyʉ̂t á gyími ta ka ńchí ókʉ́rí achot Obhasi.

⁶A sə́re Jisos se, “Ájoé we a ri Mmon Obhasi, nyə̂p gbo ka nsi, ka á séŋe sê, ‘Tîk Obhasi a káre wâ ka obhô baénjel abhê, á kí fi wâ ka abhô ka abhô, ó bhó sum kpe ekát ejâ ka ntáé yə́t.’ ”

⁷Jisos a táme se, “Á séŋe fə́ne sê, ‘Deê o kâ gáe Ńtâ Obhasi nnyo a fonê wâ.’ ”

⁸Satan a kpô kó yê á jak ka ósô ekpatə́m egúí etat, a jî tóŋe yê nték i ngun chénchén na ono ábho.

⁹A sə́re yê se, “Ó təm arúŋ ka nsi o jíghi ə̂m, tîk n káre wâ iyîm mbí chénchén.”

¹⁰Kən Jisos a nyân yê se, “Satan, duî ə̂m ka ochî. Á séŋe sê, ‘Jíghi Ńtâ Obhasi nnyo a fonê wâ. Tʉ̂k yê átíŋ.’ ”

¹¹Satan a bhâ mághe mân Jisos, baénjel á bhâ jíghi yê.

¹²Ebhú Jisos a yúghi se á kak Jon ka ókúmí, a mághe a jak ebhat í Gariri.

¹³Á ka kumí Nasaret, kən a jak ka Kapanom. Kapanom a ri ka mkpe aya Gariri ka ebhat í Seburun na Natari.

¹⁴Ńji é fábhe, é yîm nchot nnyi nkara-otîp Obhasi éməné nnyo á kamá se Asaya, a joé ka echî. Asaya a chorê se,

¹⁵“Nsi Seburun na Natari, nték nnyi o kí ji mbâ aya, njəm aya Jodan, ebhat i Gariri, nték ane mba á ká məŋé Obhasi!

¹⁶Ane mba mbôp nnyí á rî ka ejírim, á yen ekpatə́m ebhát. Ebhát é gbo mbâ ane mba ekʉ̂ é ko ábho osʉ́ŋ.”

¹⁷É róghé ka ebhú áji, Jisos a jená a sə́rá ane se á yóŋé ḿbə́ŋé, á mághe obhí, ka otúi Obhasi ó bha.

¹⁸Nji Jisos a kí jen ka mkpe aya Gariri, a yên ayúá-osí ábháe, a ri abhon-í-nnyen atem. Yót á kamá se Simun nnyo á bhíŋa fə́ne sê Pita. Mmon-i-nnyen owe á kamá se Andru. Ábho mbá ábháe á rî á yúa osí ka aya na ntûfúk.

¹⁹Jisos a sə́re ábho se, “Tôp ên ə̂m. Tîk m kpî ên noŋ o kí yim ên ane á tóp ə̂m.”

²⁰Ka ngyím ányi, á mághe ntûfúk ábho á tôp Jisos.

²¹Jisos a kpô ji ochî, a jî yên abhon-í-nnyen mba tat ábháe, Jems na Jon, abhon í Sebedi. Á rî na ńsé ábho ka okpi á tʉrá atû-ofúk ábho. Jisos a bhîŋ ábho.

²²Ka ngyím ányi, á mághe ńsé ábho ka okpi, á tôp Jisos.

²³Jisos a jená a fará nték i Gariri, a kpík ane ka óchâm Obhasi, a sə́rá otîp ogyebhá-ḿbə́ŋé otúi Obhasi, a yimá ane-emaŋé ka mkpak ka mkpak á soná.

²⁴Esə́re ejê é jábhe ebhát í Siriya ndə́m. Ka obhô mbí, ane á kəna ane-emaŋé ábho á bhak se a yim ábho á sôn. Ane mba ojê ó kára oseŋe, mba á gbôk ichʉk, abhə́né, mba á fóne bimaŋé ka mkpak ka mkpak, Jisos a yîm ábho á sôn.

²⁵Ane ka nkam ka nkam, á tôp yê. Ane mbá á dʉ̂ nnyi Gariri, mba tat ebhat í Ntek Ofo, mba tat eték í Jerusarem, mba tat ebhat í Judiya na ebhat í njəm aya, ngûm i Jodan.