Read ejagham Matiyu, echî 9 Bible Online

Matiyu, echî 9 - ejagham bible

Matiyu, echî 9

¹Jisos a chə́bhe njəm a gyê okpi a yáŋe aya, a jî sî eték ejê.[4]

²Ane etat á kə̂n mbə́né yót ka ekpa, á bhak sê a yim yê a son. Nji Jisos a yéne se ane mbá á ki ḿbə́ŋé na yê, a sə́re mbə́né nnyó se, “Mmon omé, ka fûp, ń di nsôn ń su obhí obhâ.”

³Kən etʉ̂ atóŋá-ebhín á kpó to á yúk ejûm nji Jisos a chorê nná, á róghe ebhə́bhə́m ka ḿbə́ŋé sê, “Jen kən nne nnyó a kí chot noŋ yê a ri Obhasi.”

⁴Jisos a mə́ŋe nji ábho á kéra, a bhə̂p ábho se, “É yími nan kən o kí fon ên ntʉ́ghi íkíkéré ibhí mfí?

⁵Jen nji é rî wát, esə́rə́m nne se, ‘Ń di nsôn ń su obhí obhâ,’ kən nji ń sə́ré yê bəre, ‘Duî ngyím, jen ejen?’

⁶Kən n kí yim ên ó mə́ŋe sê Mmon-i-ntem-nne a fôn ikom ka nsi nnyí mfi a kí ri nsôn a sû obhí ane.” A sə́re mân mbə́né nnyó se, “Duî ngyím, kə̂n ekpa ejâ, choŋ kʉ́ri.”

⁷A rúi fə́ne ngyím a kʉ́rá.

⁸Nji ane á yéne nchot nnyí, efup é gyê ábho kpe-eji. Á róghe nkat ekarám mbâ Obhasi nji a karê ikom ntʉ́ghi mfí mbâ ane ka ngun.

⁹Nji Jisos a maghê eji áji, a jî yên mbə́bha-ntí-echî etat nnyo á kamá se Matiyu. Matiyu a kun ka njû etûm eye. Jisos a bhîŋ yê se, “Tôp ə̂m.” Matiyu fə́ne a rúi ngyím a kí top Jisos.

¹⁰Ebhú Jisos a kun ka njû Matiyu a kí di édî, abhə́bhá-ntí-echî etî-etî é kpê na ane mba á bhó top ebhín í Mosis nono, á kûn áfo á dik édî na Jisos na atóbhá abhê.

¹¹Kən ane Jus mba echəme Farasi á yéna nchot nnyí, á bhə̂p ane mba á tóbha Jisos sê, “Jen é yími kən ńsé owəné a kí di édî na abhə́bhá-ntí-echî na ane abhí?”

¹²Jisos a yûk ebhə̂p ábho, a táme ábho ka egan se, “Nne emaŋé nâ á woma nne-njân. Nne á ro maŋé omaŋé, á bhó wom nne-njân.

¹³Choŋ onok ên məŋê echî nchot nnyi Obhasi a chorê. A chorê se, ‘Onobhá-eji na ntem-nne ó faŋ ó chiŋi eyúúm onyam sê á yîm efin á káre ə̂m.’ Məŋê ên mân sê ń ka bhá ka ngun nnyí mbâ anyen-ane, m báe ane abhí.”

¹⁴Atóbhá Jon nnyo mfúgha-ane-ayép á bhak mbâ Jisos á bhâ bhə̂p yê sê, “Jen é yími kən êt na ane echəme Farasi e kí kaghâ njaé sê é jíghí Obhasi kən ane mba á tóbha wâ á bhó yim erû njí?”

¹⁵Jisos a táme ábho se, “Ó kere ên sê ajéné mba á bháe erom ebháé á fôn nsae nji nne-ndûm nnyo a yaghê ábho a ri áfo na ábho a? Eji á kí fon cháŋ. Kən ofú tîk ó sî mbi á kí yighí nne-ndûm nnyó. Nâ ebhú mân nji ane mba á bháe ebháé njí á kí ka njaé, á saa.

¹⁶“Kpe nne yót cháŋ nnyo kə́n a kô éfô efê a kû etəm í nkʉ̂. Nne á yim áno, nkʉ̂ ányi a kí kpere a wáre, mfúk ḿ fâŋ mân ń chíŋi mmi ndaŋa-mbá.

¹⁷Nne fə́ne kpe yót cháŋ nnyo a kí kak aməm afê ka itə́n mfi í fək í man oman. Nne á yim áno, itə́n í kí kpere í wâ aməm mmá á fûk, itə́n í bhîp. Deê mân nne a kak aməm afê ka itə́n ifê. Nne á yim ka ekpak njí, aməm é kpê na itə́n í kí joé nono.”

¹⁸Nji Jisos a nyə́ne áno a chorá, ntûfâm ane Jus yót a bhák mbâ eye, a bhə́ne yê ka akát, a chôt se, “Mfá-mfá nâ mmon omé nnyo nne-nkáé a kpóe áno. Bhák, ń gore ogoré, bhá kəmê yê obhô ka biji a chəbhé njəm a fon ekpin ejê.”

¹⁹Jisos a tə̂m fə́ne a rúi ngyím a jak na nne-ndûm nnyó. Atóbhá abhê á tôp yê á jak.

²⁰Nji á jâk áno, nne-nkáé yót a jak a jî kə́me otûŋ í nkʉ́ nnyi Jisos a kaghê. Ka nyâ ófó na ébháe nne-nkáé nnyó á maŋá emaŋé etat nji agyʉ́ŋ á fabha yê ka biji.

²¹Kən a jí kəmé nkʉ̂ nnyí, a sə́re biji se, “Ń nok n kə́me kpe nkʉ̂ eye, tîk n sôn.”

²²Nji Jisos a kpíghi a yên nne-nkáé nnyó, a sə́re yê se, “Mmon omé, ka fûp. Ḿbə́ŋé eya nnyi o kíi, a yîm wâ ó son.” Ka ngyím ányi, emaŋé nne-nkáé nnyó é mân.

²³Jisos a jî sî njû ntûfâm nnyó, a gyê. A yên ekpatə́m ejok nji é rî ka eji njí, etʉ̂ ane á fik mbaŋ.

²⁴Kən Jisos a sə́re ane se, “Fáp ên ka eyâ-eték, nsop nnyó á ka kpó okpó, á yaá a ri eyô.” Ane á gyê yê a ri amə̂ŋ eyoóm.

²⁵Kən nji ane á fábhe ka éré, Jisos a gyê ka etím í mmon-i-njû, a fî mmon nnyó ka obhô. Mmon nnyó a rúi ngyím.

²⁶Esə́re njí é jên é jábhe ebhat í nték ányi chénchén.

²⁷Nji Jisos a maghê eji áji a kí ji ochî, atáná-amə̂t ábháe á róghe etóbhóm yê á gyʉá sê, “Mmon i Debhit, ri êt nsôn.”

²⁸Kən Jisos a kpo to a gyé njû etat, ane mbá á gyê á tôp yê. Jisos a bhə̂p ábho se, “Ó kam ên sê kə́n n yîm nji o wóme ên a?” Á táme sê, “Ntûfâm, é kam.”

²⁹Jisos a kô mân obhô obhê a râŋ amə̂t ábho a chôt se, “Deê é fáp na ên ka ekpak nji o kamê ên.”

³⁰Amə̂t ane mbá á bhâ rə́bhe. Jisos a tʉ̂ ábho obhô ka otûŋ se, “Ka sə́ré ên kpe nne yót nchot nnyí.”

³¹Kən ane mbá á mághe á jak, á jî sə́re nchot nnyí ebhat áji ndə́m.

³²Nji ane mba Jisos a yimî nná á sôn á kí fap, ane mba tat á kô nne nnyo tat á bhak mbâ Jisos. Nne nnyó, nchot á bhó chot, ka ojê ó kára yê oseŋe.

³³Ebhú Jisos a yighî ojê mbí, nne nnyó a róghe nchot echoróm. Biji í mân ane mba á rî áfo kpe-eji. Á róghe echoróm sê, “Ntʉ́ghi ejûm njí é ka nok oyén kpe ofú bhə́t ka nsi Isrel.”

³⁴Kən ane echəme Farasi sê a ri Satan nâ á kará Jisos ikom kən a kí yim ojê ó maghá ḿbə́ŋé ane.

³⁵Jisos a jená mân a fará nték na nték, a kpík ane ka óchâm Obhasi, a sə́rá otîp ogyebhá-ḿbə́ŋé otúi Obhasi. A yimá ane-emaŋé ka mkpak ka mkpak á soná.

³⁶Nji a yéne nkam ane noŋ á chə́ma, a fôn nsôn kpe-eji na ábho ka oseŋe mbi á yéna, nnyáŋá ábho cháŋ. Á rî noŋ ojo-obhúi mbi ó ká fon nne nnyo á bhabha ábho.

³⁷A sə́re ane mba á tóbha yê se, “Etûm é ti, kən ayimá-etûm á ká ti.

³⁸Gorê ên Ńtâ Obhasi nnyo a fonê ebhin sê a túm ane á tí, mba á kí ji oyim etûm.”