Read ejagham Mak, echî 12 Bible Online

Mak, echî 12 - ejagham bible

Mak, echî 12

¹Jisos a tûp mân egan se, “Nne yót a fôn ebhin-í-nkap ejê. A gbê ebhám a fáre ńjə́ne, a gbê etə́m nji á kí kumí á bhabha nkap eye ka ebhin, a tʉ́ri eji aməm eyámám. Kən a kô ane a kâk se á yimá ebhin njí á kará yê eye nkiri. A bhâ mághe a jak ejen.

²“Nji ebhú nkap é síi, mfone ebhin nnyó a yíghi ḿgbán owe yót a tûm se a ji mbâ ane mba á yíma ebhin ejê a jí ko eye nkiri ebhin.

³Kən ane mbá, á kpó yen ḿgbán nnyó, á fî yê á tə̂m, á bhîm a chə́bhe njəm abhô-ábhô.

⁴Mfone ebhin nnyó a kpô túm ḿgbán nnyo tat. Kən ane mbá á tə̂m mân nnyó é chíŋi obhô, á kâk yê bifú ka echî, á káre yê ekpatə́m ísonê, á bhîm yê.

⁵Mfone ebhin nnyó a kpô yighí nnyo tat a tûm. Ane mbá mân á yúi nnyó mfá oyúí. Mfone ebhin a yighá ágbán a túmá, kən ane mbá á yua etʉ̂ oyúí, á təmá mba tat otəm.

⁶“Nne nnyó a bhâ yíghi mân mmon okot owe a tûm. Íkíkéré ifê a ri se tîk ane mbá á jíghi mmon owe.

⁷Kən á kpó to á yén mmon nnyó, á sə́re atem sê, ‘Ńgyê ndígha-ekʉ̂. Bhák é yúí yê, iyîm í ńsé í kə́t ibhə́ré.’

⁸Á bhâ fî mmon nnyó á yúi, á kə̂n ékpoê ejê á bhûm ka etə́m.”

⁹Jisos a bhə̂p mân se, “Ó kere ên sê mfone ebhin nnyó kə́n a yîm jen na ane mbá? To a kí yui ábho a tábhe ebhin ejê a káre ane etat?

¹⁰“Ó ka yúk ên tîk egan nji á túbhi ka nwet Obhasi sê, ‘Isôk mfi agbeghá-ojû á bhúmi sê í ká nop njû egbeém, ḿfə́ne nâ í bhâ chə́bhe mfoné-mfoné isôk mfi í fíi njû.

¹¹Ńtâ Obhasi nâ a yimî áno se é jóe ka ekpak njí. A ri okpógha-biji nchot.’ ”

¹²Nji atúi-ofâm ane Jus á yúghi egan njí, á mə́ŋe sê Jisos a túbhi áno a kpê na ábho. Á dâŋ sê á fî yê, kən á kí fup ekam ane nji é rî áfo, á mághe á kʉra.

¹³Á bhâ yíghi mân etʉ̂ ane echəme Farasi na etʉ̂ mba á tóbha Erot, á tûm sê á jí wáp Jisos ka akát.

¹⁴Nji ane mbá á bháe mbâ Jisos, á bhə̂p yê sê, “Ńsé, é məŋe sê we áfúbhí ó bhó chot, ó bhó kep nne ka ochî. Ńgyímí nne ó bhó koŋ. Ó səra ane ka etʉri ejûm nji Obhasi a wóme nne a yîm. Kən sə́ré êt kpá, nâ-ngá é rî nono sê é káre ntí-echî mbâ Ntûfâm i Rom, kən é ká nop!”

¹⁵É káre kən e kâ káre! Kən Jisos a yên oka nchot ábho a táme ábho ka ebhə̂p se, “Ó gaá ên kpá énê? Kô ên ntí bhák ên, mme ń yén.”

¹⁶Á bhak yê na ntí a kô, a kêp. A bhə̂p mân ábho se, “Efóŋé énê na mbiŋ énê nâ a ri áno ka ntí mmí?” Á táme sê, “Ntûfâm i Rom.”

¹⁷A sə́re mân ábho se, “Karê ên mbâ Ntûfâm i Rom iyîm í Ntûfâm i Rom, o káre ên mbâ Obhasi iyîm Obhasi.” É jóe ane mbá a ri ejûm okpógha-biji kpe-eji ka ekpak nji Jisos a kóe a táme ebhə̂p njí.

¹⁸Ka ofú ábhi bhə́t, etʉ̂ ane echəme Sadusi, á bhak á bhá bhə́p Jisos ebhə̂p. Ane mbá nâ á ká kam sê nne á kpo, tîk a nyə́me ka ekʉ̂.

¹⁹Á bhə̂p yê sê, “Ńsé, Mosis nâ a séŋe ebhín a káre êt se, ‘Ebhú nne á ko nkáé kən a kpô, kpe mmon á ka maghé, deê mmon-i-nnyen i ndûm a kó nne-nkáé ányo a jí abhon ka mbiŋ i mmon-i-nnyen.’

²⁰Kən ofú bhə́t abhon-í-nnyen á rî mfá anígisá. Nnyo nne-nkúí a kô nkáé a núŋi a kpô, kpe mmon á ka maghé.

²¹Enyeré a bhâ kô nkáé nnyó yót. Yê fə́ne a kpô, mmon á ka maghé. Osúí ásá a kpô fə́ne, mmon á ka maghé.

²²Chénchén abhon-í-nnyen mbá anígisá á kô nne-nkáé nnyó, á kpô kpe nnyo a maghé mmon cháŋ. Nne-nkáé nnyó fə́ne a jéghe okpó.

²³Ka ofú mbi ane chénchén á kí nyəmé ka ekʉ̂, nne-nkáé nnyó a kí joé nnyo énê, ka ábho anígisá á kô yê ebhú á rî mbít.”

²⁴Jisos a táme ábho se, “Íkíkéré ifə́né cháŋ ka mbá. Nan? Nne owəné kpe yót nnyo a məŋê achot mma á séŋe ka nwet Obhasi cháŋ. Ó ka məŋé ên fə́ne ikom mfi Obhasi a fonê.

²⁵Echî aŋ? Ebhú ane á nyəmé ka ekʉ̂, á kí joé noŋ baénjel ka ósô, nchot ebháé á ro kpó chot.

²⁶Sê nne á kpo a nyəmé ka ekʉ̂, ó ka nok obhiŋ ên tîk ejûm nji Mosis a séŋe a kpê na erəmta-ngûn nji é rûk ka ájé? Á séŋe sê Obhasi a sə́re yê se, ‘Mme a ri Obhasi Abraham na Obhasi Isak na Obhasi Jakop.’

²⁷Nâ é tóŋe sê Obhasi á ka joé Obhasi ekʉ̂, kən a ri Obhasi ekpin. Íkíkéré ifə́né í tan mbá nnyen etánám.”

²⁸Ntóŋa-ebhín yót a ri áfo nnyo a yúghi noŋ ane á chóra na Jisos. A yên se a táme ane echəme Sadusi mbá nono, a bhâ bhə̂p yê se, “Bhaghé ebhín Obhasi nâ é fáŋe é chíŋi atem?”

²⁹Jisos a táme nne-ndûm nnyó se, “Ḿfa nâ ebhín Obhasi nji é fáŋe é chîŋ ochíŋ. Á séŋe sê, ‘Ane Isrel, yûk ên! Ńtâ Obhasi, yê nnyo a fonê êt chénchén, a ri yót.

³⁰Deê nne a kot Ńtâ Obhasi owe na ḿbə́ŋé eye chénchén na ńtʉgântʉ eye chénchén na íkíkéré ifê chénchén na ikom ifê chénchén.’

³¹Osúí íbháe é rî sê, ‘Deê ó kôt ntem-nne ka ekpak nji o korê biji ibhâ.’ Bibhín mbí íbháe nâ í fáŋe í chîŋ ochíŋ, mbi tat kpó cháŋ.”

³²Ntóŋa-ebhín nnyó a sə́re mân Jisos se, “Nchot eya a gyébhe kpe-eji. É rî ka etʉri sê Ńtâ Obhasi a ri yót, nnyo tat kpó cháŋ təm yê átíŋ.

³³Nne a ri a kot Obhasi na ḿbə́ŋé eye fép na íkíkéré ifê fép na ikom ifê fép, a ri a kot ntem-nne noŋ a korê biji ibhê. Nji nne a kí ki bibhín mbí íbháe, é faŋ é chiŋ onyam eyúúm na ekəp ekarám.”

³⁴Nji Jisos a yéne se ntóŋa-ebhín nnyó a mə́ŋe okéré nono, a sə́re yê se, “É kət wâ kpít ó yen otúi Obhasi.” Ta ka ebhú áji, nne á ka kpó gaé a bhə́p Jisos ebhə̂p.

³⁵Nji Jisos a kí kpi ane achot ka ókʉ́rí achot Obhasi, a bhə̂p ebhə̂p se, “Jen é yími kən atóŋá-ebhín á kí səre sê Krayis, nne nnyo Obhasi a túmi se a bhá yim ngun á sém, a ri eyábhé-mmon í Debhit?

³⁶Ka ikom mfi Ntʉgantʉ Obhasi, Debhit a chôt ka nnyo imê se, ‘Ńtâ Obhasi a sə́re ntûfâm omé se, “Kumî ə̂m mfá mkpe obhô-orûm ta n yîm ane-ebhan abhâ á jóe ka óséré obhâ.” ’

³⁷Debhit yê ḿfoné a kí bhiŋ Krayis se, ‘Ntûfâm.’ Krayis a kí kpo yim nan a jóe mmon i Debhit?” Ekam ane é chəme, é yugha okpígha-ejûm mbi Jisos na ogyebhá-ḿbə́ŋé.

³⁸Kən a kí kpi se, “Kô ên ebhú na atóŋá-ebhín abhə́né mba á kóra á kaghá awubha-wubha okʉ̂, á kóra sê ane á kubha ábho na ejík ka ndûm éré.

³⁹Á korá ekumúm ka ngûm ekumi nnyi ejík ka erom na ka óchâm Obhasi.

⁴⁰Á móa ane-akáé ekə́t amoe, kən ngun á yen sê á kí saé ábho. Á yim mân á gyê Obhasi egoróm ntə̂m cháŋ. Na ntʉ́ghi ekpin njí, Obhasi tîk a kpə́re ábho nnyen ekpərə́m.”

⁴¹Jisos a kúmi a kpíri eji nji á kágha ntí ka nkop i ntí ka ókʉ́rí achot Obhasi, a kébhá noŋ ane á túbha ntí. Ane-ntí etî-etî á tûp ntí mmi ń tóŋe fə́ne sê ábho a ri ane-ntí.

⁴²Kən nne-nkáé ekə́t yót na okpák obhê, a bhák á bhâ tûp áfu ábháe ka péne yə́t.

⁴³Nji nne-nkáé nnyó a túbhi ntí mmí, Jisos a bhîŋ atóbhá abhê a chôt se, “Deê ń sə́ré ên bəre nne-nkáé ekə́t nnyó na okpák obhê, a tûp ntí ń ti ń chiŋi mmi ane chénchén á túbhi.

⁴⁴Echî aŋ? Ntí mmi ane mba ngá á kághe ka nkop i ntí nnyi a ri mkpât ka mmi á fóne. Kən yê ka okpák obhê, a kâk chénchén ntí mmi a fonê ka ekpin ejê.”