Read ejagham Mak, echî 8 Bible Online

Mak, echî 8 - ejagham bible

Mak, echî 8

¹Kpe mfín á ka chíŋ arap, ekpatə́m ekam ane nji tat é kpô chəmé mbâ Jisos. Nji a yéne se ane mbá á ká fon édî nji díím, a bhîŋ atóbhá abhê a sə́re se,

²“Ḿ fon nsôn kpe-eji na ekam ane njí. Á ka na mme mfín ésá égyé, á ká kpo fon édî nji díím.

³Ń səre ábho bəre á kʉ́rí, édî á ká di, tîk á kêt njaé ka mbá, ka etʉ̂, obhâ ábho ó rap.”

⁴Atóbhá abhê á bhə̂p mân yê sê, “Kən nne a foná édî fan ka etə́m njí, nji é kí bhik ane mbá chénchén?”

⁵Jisos a bhə̂p ábho se, “Ó fon ên nsûm i brêt ébhík?” Á táme yê sê á fon enígisá.

⁶Jisos a sə́re mân ane mbá se á kúmi okumí ka nsi. Nji á kúmi, a kô nsûm i brêt nnyí enígisá, a káre ekûp mbâ Obhasi. A bhêk, a káre mbâ atóbhá abhê se á kíri á káre ane mbá. Á kô fə́ne á kíri á káre ábho.

⁷Ágbán í Jisos á fôn fə́ne akpât osí áfo. Jisos a kô ḿbə́ne, a káre ekûp mbâ Obhasi, a káre mbâ ábho se á kíri á káre ane mbá.

⁸Chénchén ane á dî édî njí, á gyʉ́ri. Ane mba á díi á rî ejûm noŋ ane ntem-esam ntə̂m-ntə̂m ófó (4,000). Nji á díi édî njí, atóbhá abhê á chə́me nji é kə́re, á kâk ka bikáé enígisá, í súi. Jisos a bhâ sə́re mân ane mbá se á kʉ́rí.

¹⁰Nkúbhi ebhú áji, yê ḿfoné na atóbhá abhê á gyê ka okpi á yáŋe á jak ebhat í Damanuta.

¹¹Etʉ̂ ane echəme Farasi á bhak mbâ Jisos á róghe áfírí na yê, ka á wóma sê á gáe yê a gbo. Á sə́re yê sê a tóŋé kpá eriŋ Obhasi ábho á yén.

¹²Kən Jisos a sóme chóót, a bhə̂p ábho se, “Jen é yími kən abhon ebhú njí á kí wom sê ta á tóŋé eriŋ Obhasi kən á kâm nchot? Deê ń sə́ré ên bəre nne nnyo a kí toŋe ên eriŋ kpe jə́t cháŋ.”

¹³Nji a chorê áno, a mághe ábho áfo a jî gyê okpi, á yáŋe njəm aya.

¹⁴Atóbhá Jisos á gyíni á ká kən édî é tí, é ká chiŋi nsûm i brêt yə́t nnyi a ri ka okpi.

¹⁵Nji á kí bhughi á jak, Jisos a tʉ̂ ábho obhô ka otûŋ se, “Kó ên ebhú na yîs nnyi Erot na ane echəme Farasi á kágha ka brêt ábho.”

¹⁶Nji a chorê nchot nnyí, atóbhá abhê á róghe echoróm kəma-kəma sê, “Kən nâ ka é ka kə́n édî é tí nâ ńjə́ne á chorá nná eé?”

¹⁷Kən Jisos a mə́ŋe nji á chóra, a bhə̂p ábho se, “Nchot édî a dʉ nan mfá? Nâ-ngá o nyə́ne ó ka jáé ên a? Ó nəma ên jen kpá títí?

¹⁸Ó fon ên amə̂t echî okum mma mbá ó bhó yen ên tîk? Ó kak ên atûŋ ebhák mma ó bhó yuk ên mbá a? Ó gyini ên tîk

¹⁹ofú mbi n kóe nsûm i brêt érôn n kíri n káre ane ntem-esam ntə̂m-ntə̂m ófó na ébháe na ejûm (5,000) a? Nji o bhúbhi ên akpât mma á kə́re o kâk ên ka bikáé, í súi í bhík?” Á táme sê, “Í súi ófó na íbháe.”

²⁰A kpô bhə́p ábho se, “Ebhú nji n kóe nsûm i brêt enígisá n gyê ane ntem-esam ntə̂m-ntə̂m ófó (4,000), o bhûp ên akpât mma á kə́re á súi bikáé í bhík?” Á táme sê, “Inígisá.”

²¹Jisos a bhə̂p mân ábho se, “O nyə́ne ó ka jáé ên mân a?”

²²Nji Jisos na atóbhá abhê á síi ka eték í Besayida, ane etat á kô ntána-amə̂t á bhak mbâ eye, á góre yê sê a raŋ yê na obhô, a yim yê a yén mbá.

²³Jisos a fî ntána-amə̂t nnyó ka obhô, á jak ka echî-mbá eték. Nji á jíi, Jisos a fə̂m nne-ndûm nnyó oson ka amə̂t, a râŋ yê na obhô. A bhə̂p mân yê se, “O ri ágo o yéná kpe ejûm a?”

²⁴Nne nnyó a yûŋ echî ka ósô, a táme se, “N kí yen ane á jená, kən á rî ə̂m noŋ átí.”

²⁵Jisos a kpô raŋ yê ka amə̂t. Ntána-amə̂t nnyó a náre amə̂t, a náre, amə̂t á bhâ rə́bhe. A chə́bhe a yéná mbá nono.

²⁶Jisos a sə́re mân nne nnyó se, “Choŋ kʉ́ri, o kâ yáre ka eték.”

²⁷Jisos na atóbhá abhê á jak mân ka nték i Sesariya Firipi. Nji á síi ka mbá, a bhə̂p ábho se, “Ane á kí səre sê mme nâ énê?”

²⁸Á táme sê, “Etʉ̂ ane á kí səre sê we a ri Jon nnyo mfúgha-ane-ayép, mba tat sê we a ri Erayija, kən etʉ̂ sê we a ri nkara-otîp Obhasi yót nnyo éməné.”

²⁹Kən a bhə̂p mân ábho se, “Ên áfoné, ó məŋe sê mme a ri énê?” Pita a táme se, “We a ri Krayis, nne nnyo Obhasi a túmi se a bhá yim ngun á sém.”

³⁰Nji Pita a chorê áno, Jisos a káre ábho ebhín se á kâ sə́re kpe nne yót.

³¹Jisos a róghe mân atóbhá abhê esə́rə́m se, “Mmon-i-ntem-nne a ri a yén ekpatə́m oseŋe. Ane-akúí na ane-echî akará-agore Obhasi na atóŋá-ebhín á rî á jîŋ yê, á yúi yê. Kən á kən yê, a kâ mfín ésá, tîk a nyə́me ka ekʉ̂.”

³²Jisos a sə́re atóbhá abhê nchot nnyí, kpe ejûm á ka bhə́t. Kən Pita a bhîŋ yê mbá-njəm a fáme yê se, “Ka kpo chot ntʉ́ghi nchot nnyí.”

³³Nji Pita a chorê áno, Jisos a fáre a kêp atóbhá abhê, a kpíghi mân mbâ Pita, a nyân yê se, “Satan, duî ə̂m ka ochî. Íkíkéré ifâ a ri mfi ane ngun, mfi Obhasi asík.”

³⁴Jisos a bhîŋ ekam ane nji é rî áfo a kpê na atóbhá abhê, a sə́re ábho se, “Ájoé nne a kí wom a tóp ə̂m, deê a kép biji ibhê se kpe ejûm á ka fáp, a kə́n achî-achot, kpe é rî nji ekʉ̂, a tóp ə̂m.

³⁵Echî aŋ? Kpe énê nnyo á woma se a nyáŋé ekpin ejê, a kí tane ńjə́ne. Kən nne nnyo á tane ekpin ejê ka obhô obhámé na ka obhô otîp ogyebhá-ḿbə́ŋé obhámé a kí chəbhé njəm a fon ńjə́ne.

³⁶Orʉrí obhâ a ri jen nji ó fon ngun ndə́m kən ó ka fon ekpin ejâ?

³⁷Ka etʉri, ó kam ên sê kə́n nne a kô jen a yóŋe na ekpin ejê ka ngun nnyí? Nâ məŋê ên mân sê,

³⁸ájoé nne a kí be nsôn nji á chəm na mme, é kpê na okpígha-ejûm obhámé ka ngun obhí nnyí, mme, Mmon-i-ntem-nne, tîk m bê nsôn fə́ne n kâ chə̂m na ntʉ́ghi nne ányo ebhú ḿ ba na ejík í Ńsé omé ka ósô na baénjel abhê.”