Read ejagham Mak, echî 9 Bible Online

Mak, echî 9 - ejagham bible

Mak, echî 9

¹A sə́re mân ábho se, “Deê ń sə́ré ên bəre etʉ̂ ane á rî mfá ngyím mba tîk á bhó kpo ta á yên otúi Obhasi ó bhak na eyúp.”

²Nji mfín eságasá a chíŋi, Jisos a bhîŋ Pita na Jems na Jon, a kô ábho á jak ka ósô ekpatə́m egúí, kpe nne etat á ka tóp ábho. Á kpó to á sí ágo, Jisos a kpíghi ngu.

³Ḿfô nnyi a kaghê ka biji, a kpíghi ébháré, a kə̂t a kímá mənam-mənam, kpe nne ka ngun nnyo kə́n a sû éfô é bhât ekpak áji cháŋ.

⁴BaPita á kpó to á yén, Erayija na Mosis á fâp ka eji áji á róghe ekubhi ekubhúm na Jisos.

⁵Kən Pita a sə́re Jisos se, “Ńsé, é nop êt e ri mfá. Deê é gbê ntəm ésá. Jə́t mbâ eya, nji tat mbâ Mosis, nji ngá mbâ Erayija.”

⁶Efup é súi Pita na atem abhê ka biji, kpe nji a kí chot á ka məŋé.

⁷Átʉ́k í ngurobhú á bhúi ábho áfo. Eyum é fâp ka átʉ́k áma se, “Ḿfa a ri Mmon okot omé, yûk ên yê.”

⁸BaPita na atem abhê á nîk, á kêp á fáre, kən kpe nne yót á ká kpo yen təm Jisos átíŋ.

⁹Nji á bhə́ra egúí á chəbhe njəm, Jisos a káre ábho ebhín se á kâ sə́re kpe nne yót ejûm nji á yéne kpát ta ebhú nji Mmon-i-ntem-nne á nyəmé ka ekʉ̂.

¹⁰Á ká səre fə́ne ane ejûm nji ábho á yéne, a ri á kə̂t á bhəbha atem sê, “Enyəmə́m ka ekʉ̂ nâ jen kpá títí?”

¹¹Á bhə̂p mân Jisos sê, “Jen é yími kən atóŋá-ebhín á kí chot sê Erayija tîk a râŋ mbá a bhák?”

¹²A táme se, “Ka etʉri, Erayija a fonê ka ebháám ndaŋa-mbá a bhá tʉrí chénchén achot a kí. Kən á yími nan á sêŋ ka nwet Obhasi sê Mmon-i-ntem-nne tîk a yên oseŋe etî-etî, ane ngun á jîŋ yê.

¹³Kən n kí səre ên bəre Erayija ta a bhâ, kən ane á yîm nji-nji á kóre na yê noŋ fə́ne á séŋe ka nwet Obhasi.”

¹⁴Nji Jisos á chə́bhe njəm á bhâ kpúghi atóbhá abhê mba á ka kó á jî ka ósô egúí, á yên ekpatə́m ekam ane é rî na ábho. Etʉ̂ atóŋá-ebhín á rî áfo fə́ne á fira áfírí na atóbhá abhê mbá.

¹⁵Etʉri-étʉ́ri nji ane á yéne Jisos, biji í mân ábho, á bhéne fə́ne ntə̂m yə́t á jí kûp yê.

¹⁶Jisos a bhə̂p atóbhá abhê se, “Ó fira ên jen na ábho?”

¹⁷Kən nne yót ka ekam njí a táme se, “Ńsé, ń ko mmon omé nnyo ojê ó kára oseŋe ta a gbô ochí, ḿ ba mbâ eya bəre ó yîm yê a chot nchot.

¹⁸Kpe bhaghé ebhú nji ojê mbí ó ruí ngyím, ó kí yim yê a gbô ka nsi, a kə̂t edíím akek, a tə́ne gbaŋŋ, mfî a fábhá yê ka nnyo fup-fup. Ń gore bəre ágbán abhâ á yíghi ojê mbí, kən á ká məŋé ekpak eyimím.”

¹⁹Jisos a róghe mân atóbhá abhê efámám, a bhə̂p ábho se, “Abhon ebhú njí, echî ó bhó ki ên ḿbə́ŋé na Obhasi a ri jen? Ó woma ên sê ta ń ká nan na ên? Ń kúmi na ên ka nyâ é bhík? Kô ên mmon ányo bhák.”

²⁰Á kô yê á bhak. Ka ngyím ányi nji ojê mbí ó yéne Jisos, ó yîm mmon nnyó a nîk nnyam, a gbô ka nsi, a chə́bhe a síŋá, mfî a fábhá yê ka nnyo.

²¹Jisos a bhə̂p ńsé mmon nnyó se, “Emaŋé njí é ka nan?” A táme se, “É róghe yê ta ka obhonche.

²²Ntə̂m etî-etî emaŋé njí é wóma mmon nnyó eyúúm, ka é yíma yê a gbok ka ngûn na ka ayép. Kən ájoé ó məŋe ekpak eyimím, ítəbhé, deê ó fôn nsôn na êt, ó nyáŋé êt.”

²³Jisos a táme se, “Se, ‘Ḿ məŋé ekpak eyimím a?’ Məŋê se n kí yim kpe bhaghé ejûm n káre nne kpe nnyón nnyo a kíi ḿbə́ŋé na Obhasi.”

²⁴Ńsé mmon nnyó, kpe ebhú á ka bhíbhí, a táme Jisos se, “Ń ki ḿbə́ŋé na Obhasi, kən okíghá-ḿbə́ŋé obhámé ó ká son. Ń gore, yim ḿbə́ne ó sôn.”

²⁵Nji Jisos a yéne se ane mba á rî áfo á kí bhene á bhak, a nyân ojê mbí mbâ mmon nnyó se, “We, ojê oyagha-atûŋ, ojê ochí, n kí səre wâ bəre fáp, maghê mmon nnyó, ka kpó gye yê ka biji.”

²⁶Ojê mbí ó kûk, ó yîm mmon nnyó a nîk nnyam, ó mághe yê áfo noŋ ékpoê nne. Ane etî-etî mba á rî áfo á chə́bhe á səra sê mmon ányo a kpô.

²⁷Kən Jisos a fî mmon nnyó ka obhô, a yûŋ yê a rúi ngyím.

²⁸Nji Jisos na ágbán abhê á jî gyê ka njû á kúmi ábho-ábhô, á bhə̂p yê sê, “Jen é yími kən é ka məŋé oyighí ojê mmon ányo?”

²⁹A táme ábho se, “Obhasi egoróm átíŋ nâ ó kí yighí nne ntʉ́ghi ojê mbí, kpe ejûm etat cháŋ.”

³⁰Á mághe mân áfo, a jên á chîŋ ebhat í Gariri. Jisos á ka kam se kpe nne yót a məŋé ebhat nji yê a ri,

³¹ka a ri a sə́rá ágbán abhê se, “Tîk á fî Mmon-i-ntem-nne, á káre mbâ ane mba tîk á yúí yê. Kən á kən yê, ka osúí mfín ésá, tîk a chə́bhe njəm ka ekpin.”

³²Nchot nnyí á ka jáé ágbán abhê, kən á kí fup ebhə́bhə́m yê sê a sə́ré echî.

³³Jisos na atóbhá abhê á jen kpáát á si eték í Kapanom. Nji á gyée njû á kúmi, a bhə̂p ábho se, “Éyughí ka mbá ó fira ên kpá jen?”

³⁴Kən á ká tame yê, ka á rî á fira nchot i nne ábho nnyo a ri noŋ nne-echî.

³⁵Jisos a kúmi okumí, a bhîŋ ábho ófó na ábháe. A sə́re ábho se, “Nne owəné nnyo á woma a joé nne-echî, deê a kép biji se kpe ejûm yê á ka fáp. A kí biji noŋ ḿgbán mbâ atem chénchén.”

³⁶A bhîŋ mân mmonche a bhâ gyími ka ochî ábho. A fî mmon nnyó a kâk ka biji, a sə́re ábho se,

³⁷“Kpe énê nnyo á fi mmon ntʉ́ghi nnyó a kâk ka biji ka mbiŋ amé, a fiî ə̂m áno. Nne nnyo á fi ə̂m, á ka fi ə̂m, mme átíŋ, a fî fə́ne yê nnyo a túmi ə̂m ka nsi nnyí.”

³⁸Jon a sə́re yê se, “Ńsé, e yên nne nnyo á bhima ojê a yighá ka biji ane ka mbiŋ eya. Kən e sə́re yê sê a kâ kpô yim, ka yê nne owəré asík.”

³⁹Kən Jisos a táme se, “Ka kpó taŋé ên yê, ka kpe énê nnyo á yimá iyîm okpógha-biji ka mbiŋ amé, á bhó chot iyîm ibhí a kpe na mme.

⁴⁰Echî aŋ? Kpe énê nnyo á ka fon áfírí na êt, a ri nne owəré.

⁴¹Deê ń sə́ré ên bəre kpe énê nnyo á karé ên ńkôp ayép o gwô ên, tîk a fôn ekəp. A kí karé ên ka o kí top ên ə̂m, mme Krayis, nne nnyo Obhasi a túmi se a yim ngun á sém.”

⁴²Jisos se, “Kpe énê nnyo á choe mmonche ntʉ́ghi nnyó a yíghi ḿbə́ŋé nnyi a kíi na mme, é nôp é chîŋ á kô ekpatə́m í ntáé isú á bhôp ntʉ́ghi nne ányo ka ntuŋ, á bhî ka aya.

⁴³Ájoé obhô obhâ ó kí kak wâ ka obhí, gbût bhum. É nóbhe sê ó gyé ka ekpin ótúm-ótúm na obhô bhə́t, na nji ó gyé ka erəmta-ngûn na abhô amâ ábháe. Erəmta-ngûn nji é rî ágo, é bhó tan ka ótúm-ótúm. [

⁴⁴Ka eji áji, adʉ mma á kí di ábho á kət á bhó kpo, erəmta-ngûn nnyi é kí righi ábho é bhó tan.][3]

⁴⁵Ájoé ekát ejâ é kí tum wâ ka obhí, gbût ńjə́ne yighî. É nop é chiŋ sê ó gyé ka ekpin na ekát jə́t na nji ó fôn akát ábháe, á kâk wâ ka erəmta-ngûn. [

⁴⁶Ka eji áji, adʉ mma á kí di ábho á kət á bhó kpo, erəmta-ngûn nnyi é kí righi ábho é bhó tan.][4]

⁴⁷Ájoé eyə̂t ejâ é kí kak wâ ka obhí, kpaghê ńjə́ne yighî. É nop é chiŋ sê ó yén otúi Obhasi na eyə̂t jə́t na nji ó fôn amə̂t ábháe á kâk wâ ka erəmta-ngûn.

⁴⁸Ka eji áji, adʉ mma á kí di ábho á kət á bhó kpo, erəmta-ngûn é bhó tan.

⁴⁹“Ka etʉri, tîk á gáe kpe énê na ngûn noŋ á kágha akâŋ ka édî sê é gyébhe.

⁵⁰Akâŋ á gyebhá, kən ájoé ogyep akâŋ ó man, akâŋ mmá á ro kpó gyebhé. Fon ên amə́né akâŋ ka biji, o jóe ên ka ekone na atem.”