Read ejagham Luk, echî 10 Bible Online

Luk, echî 10 - ejagham bible

Luk, echî 10

¹Nji achot mmá á chíŋi, Ńtâ Jisos a kpô sáŋ ane, kən ka ntə̂m nnyí a ri nsam ane ésá njəm ane ófó na ábháe. A tûm ábho ábháe-ábháe á râŋ mbá á jên á fáre chénchén nték nnyi yê eróŋ a kí jen.

²A sə́re ábho se, “Etûm ebhin efʉʉ́m é ti, kən ayimá-etûm á ká ti. Gorê ên sê mfone ebhin a túm ane-etûm á tí.

³Choŋ ên! Mme nâ n túmi ên bəre ó jî ên noŋ kpe ojo-obhúi mbi á túmi ka ekam onyam obhí.

⁴Ka fî ên ntí, kpe ntâk-ejen, kpe ákúmá-akát. Ka jî ên o bhíbhá ebhú sê o kúbhá ên ane.

⁵“O kí gye ên njû, raŋ ên mbá kûp ên ane áfo sê, deê Obhasi a karé ekone ka njû ányi.

⁶Nne ekone á joé áfo, deê ekûp ejə́né é kə́t na njû nnyí. Kən se cháŋ, chəbhê ên njəm tabhê ekûp ejə́né.

⁷Njû nnyi nne ekone a ri, kumî ên áfo, dî ên gwô kpe jen nji á káre ên, ka nne nnyo a kí yim etûm, é nóbhe sê a fon ekəp. O kâ jî ên o kumá ojû o yóŋá.

⁸“Ó si ên eték, á fi ên nono, dî ên kpe jen nji á káre ên.

⁹Yim ên ane bimaŋé mba á rî ka eték áji á son, o sə́re ên ane áfo sê, otúi Obhasi ó bha chén.

¹⁰Kən ó gye ên ka eték nji á ká fi ên, gyími ên ka ndûm mbá sə́re ên ábho sê,

¹¹kpe ebhəm eték ábho nji é yághe ên ka akát, o kí yighí ó mághe ên na oyámá-ḿbə́ŋé, kən deê á mə́ŋe sê otúi Obhasi ó bha chén.

¹²N kí səre ên bəre ofú Obhasi a kí taŋ ngun, a kí fon nsôn na ane eték í Sodom a chíŋi ane eték áji.”

¹³Jisos se, “Eték í Korasi, tîk é bhîp na ên é tî é chîŋ. Ên ane Besayida eróŋ, tîk é bhîp na ên é chîŋ. Echî aŋ? Ekpatə́m í ntûm okpógha-biji nnyi á yími ka nték eyəné, á yími ka nték i Taya na Sidon eê, kə́n ebhú njí ane nték ányi á kûn na ányaghé-ḿfô, á jóme atôŋ ka biji noŋ eriŋ sê ábho á maghe obhí ábho.

¹⁴Ka ofú Obhasi a kí taŋ ngun, a kí fon nsôn na ane Taya na Sidon a chíŋi ên.

¹⁵Ên ane Kapanom, o kérá ên tîk sê á kí ko ên sê ó faŋ ên ó chiŋ ochíŋ? Baram! Á kí ko ên ńgô sê ó ka bhik ên kpe ebhighím.”

¹⁶Jisos a sə́re mân atóbhá abhê se, “Nne nnyo á yuk ên, nâ a yûk ə̂m. Nne nnyo á jiŋ ên, nâ a jîŋ ə̂m. É ká joé fə́ne sê mme-ḿmê nâ a jiŋî, a jîŋ yê nnyo a túmi ə̂m.”

¹⁷Nsam ane ésá njəm ane ófó na ábháe mbá, á jak ejen nji Jisos a túmi ábho, á chə́bhe njəm na ekpatə́m ogyebhá-ḿbə́ŋé. Á bhâ sə́re yê sê, “Ntûfâm, é chot e bhîŋ mbiŋ eya, kpe ojê ó kí yim nji e wóme.”

¹⁸Jisos a táme se, “Ń yen noŋ ikom í Satan í gbóe bhuúp noŋ nyaŋanya nâ a yaŋê.

¹⁹Yûk ên mân, ń kare ên ikom bəre ó jên ên ka onyô na ányaŋkíŋ, bəre chénchén ikom í Satan í jóe ka óséré obhə́né, kən kpe ejûm jə́t é bhó yim ên.

²⁰Kən deê o kâ gyébhe ên ḿbə́ŋé sê ó nyan ên ojê ó yuk ên. Gyebhê ên ḿbə́ŋé sê ka ngun Obhasi, á seŋ obhiŋ obhə́né ka nwet eye.”

²¹Ka ebhú njí mân, Obhasi Ebhare Ntʉgantʉ a yîm Jisos a gyébhe ḿbə́ŋé ta a chôt se, “Ńsé, Ntûfâm ósô na nsi, ń kup wâ kpe-eji ka ó bhət iyîm mbí mbâ ane mba á kera sê á məŋe, kən ó rəbhe ó toŋe mbâ ane mba á ká məŋé. Ńsé, ḿ məŋe bəre chénchén é dʉ̂ ka okorá-ḿbə́ŋé obhâ.

²²“Ńsé omé a mághe iyîm chénchén ka obhô obhámé. Kpe nne yót nnyo a məŋê ekpin í Mmon cháŋ, é ká chiŋi Ńsé átíŋ. Nne fə́ne kpe yót nnyo a məŋê ekpin í Ńsé cháŋ, é ká chiŋi Mmon na ane fə́ne mba Mmon a sáŋe se á mə́ŋe Ńsé owe.”

²³A kpíghi mân mbâ atóbhá abhê a sə́re ábho kəma-kəma se, “Deê ogyebhá-ḿbə́ŋé ó jóe na ên, ka ó yen ên achot mmá.

²⁴Deê ń sə́ré ên bəre akará-otîp Obhasi na atúi-ofâm etî-etî á wom sê á yén kən á ká yen, sê á yúk, kən á ká yuk.”

²⁵Ka ebhú etat, ntóŋa-ebhín yót a bhák Jisos ogaé. A rúi ngyím a bhə̂p yê se, “Ńsé, n kí yim jen kən m fôn ekpin ótúm-ótúm?”

²⁶Jisos se, “Á séŋe ka nwet Obhasi sê jen? Ó bhiŋá ó səra echî se jen?”

²⁷Nne nnyó se, “Á séŋe sê deê nne a kot Ńtâ Obhasi owe na ḿbə́ŋé eye chénchén, na ńtʉgântʉ eye chénchén, na ikom ifê chénchén, na íkíkéré ifê chénchén. Sê nne a kot ntem-nne noŋ a korê biji ibhê.”

²⁸Jisos a sə́re yê se, “Ó məŋe otámé. Nâ yim mân ka ekpak njí, tîk o fôn ekpin.”

²⁹Kən ntóŋa-ebhín nnyó a wóm a tóŋé se yê a mə́ŋe, a bhə̂p Jisos se, “Énê mân a ri ntem-nne?”

³⁰Jisos a táme na egan se, “Ofú bhə́t, nne yót a mághe Jerusarem a kí ji Jeriko. Nji a síi ka mbá, anyághá-ajʉ̂ á fî yê á tə̂m, á jûk ḿfô ka biji, á mághe yê áfo á jak, nne nnyó a kə̂t kpít na ekpóóm.

³¹“Ka ebhú njí, nkara-agore Obhasi a kí chiŋ ka mbá nnyí. Nji a yéne nne nnyó a nuŋ, a kéme ebhat í mkpe mbá etat a chîŋ a jak.

³²Nne yót ka ndə́p-i-njû Libhayi, a bhák ka eji njí, a yên fə́ne nne nnyó, a jî gyími áfo a kêp yê nyamḿ, kən a kéme fə́ne ebhat etat a jak.

³³“Kən nne Samariya[7] yót, a kí ji ejen ejê, a sî ka eji njí, a yên nne nnyó enuŋ, nsôn a yîm yê kpe-eji.

³⁴A jak a jî gyími, a fôn bifú nne nnyó chénchén, a kâk akʉ́ na aməm, a bhôp ḿbə́ne. A yûŋ yê a kúni ka mfoŋ eye, á jak ka njû nnyi ajéné á sʉ́a. A kâ na nne nnyó ta ó chê, a nyáŋá yê ka emaŋé ejê.

³⁵“Ntem-ofú, nne Samariya nnyó a yíghi ntí etûm í mfín ébháe[8] a káre mbâ nne nnyo á bhabha njû nnyí. A sə́re yê se, ‘Kép nne emaŋé omé nono. Ebhú ń chəbhé njəm, tîk m fê wâ kpe bhaghé ejûm nji o bhíbhi ka echî ejê.’ ”

³⁶Jisos a bhə̂p mân ntóŋa-ebhín nnyó se, “Ka ifâ íkíkéré, énê ka ane mbá ásá nâ a kóe nne nnyo anyághá-ajʉ̂ á tə́me nná noŋ ntem-nne?”

³⁷Ntóŋa-ebhín nnyó a táme se, “A ri nne nnyo a riî yê nsôn.” Jisos a sə́re yê mân se, “Choŋ mân choŋ oyim ekpin njí jə́t.”

³⁸Nji Jisos na atóbhá abhê á kí jen á jak, á jî sî ka eték jə́t. Nne-nkáé yót a kamá se Mata, a kô Jisos abhô ábháe se a gyé ka njû eye.

³⁹Nne-nkáé nnyó a fonê mmon-i-nnyen nnyo á kamá se Meri. Meri a jî kúmi Ńtâ Jisos ka akát a yúghá okpígha-ejûm obhê.

⁴⁰Mata a yên se etûm é ti é chiŋ ka njû, é chíŋi yê ekpak nji yimím. A bhâ sə́re Jisos se, “Ntûfâm, ó bhó yen se mmon-i-nnyen omé a mághe ntûm chénchén ka obhô obhámé mme átíŋ a? Sə́re yê a bhá kak ə̂m obhô.”

⁴¹Kən Ńtâ Jisos se, “Mata! Mata! O kí karé biji ibhâ oseŋe ka iyîm etî-etî.

⁴²Kən ejûm jə́t nâ é fáŋe é chîŋ ochíŋ. Ńjə́ne nâ Meri a sáŋe áno. Kpe nne nnyo a kí tabhé mbâ eye cháŋ.”