Read ejagham Luk, echî 13 Bible Online

Luk, echî 13 - ejagham bible

Luk, echî 13

¹Ka ebhú njí, etʉ̂ ane á bhâ sə́re Jisos nchot á kpê na ane Gariri mba Piratus a yúi. A yúi ane mbá ka ebhú nji á rî á yua onyam sê á káre Obhasi.

²Kən Jisos a bhə̂p ábho se, “Ó kere ên sê á yúi ábho ka obhí ábho ó tî ó chiŋi mbi ane Gariri chénchén mba á ká yui a?

³Áno asík! Kən deê ń sə́ré ên bəre ó ka maghé ên obhí obhə́né, o kí kpo ên fə́ne chénchén noŋ ábho.

⁴Ane Siroyam ekû na ásá mba enyóŋ é gbóe é yúi ábho, o kí chot ên mân sê jen? Ó kere ên sê nji é fábhe na ábho é toŋe sê ábho á bhip á chiŋi chénchén ane mba á kúma ka eték í Jerusarem a?

⁵Áno asík! Kən deê ń sə́ré ên bəre ó ro maghé ên obhí obhə́né, o kí kpo ên fə́ne noŋ ábho.”

⁶Jisos a tûp mân ane egan se, “Nne yót a bhê étí fîk ka ebhin ejê. Nji é kúi, a jená a gúmá ájoé é tup kpe nkap. Kən kpe ejûm á ka yén.

⁷A bhâ sə́re nyima-ebhin ejê njí se, ‘Nyâ a sî ésá nnyi ń jen ń wom nkap ka étí njí kən kpe ejûm ń ka yén. Gbût ńjə́ne yighî, é kâ kúmi mfá é bhibha nsi chichi.’

⁸Kən nyima-ebhin nnyó a sə́re yê se, ‘Títá, maghê ńjə́ne ka eyâ njí jə́t. N kí səm ndə́p eye n kâk njân mmi n kí yim ńjə́ne é kúí nono.

⁹Ebhú mân é kap ka eyâ nji é bhâk áno, nâ onono, kən é ro kap, o gbût mân ńjə́ne ó yíghi.’ ”

¹⁰Ofú oyoá-biji bhə́t Jisos a ri, a kí kpi ane achot Obhasi ka óchâm Obhasi.

¹¹Nne-nkáé yót a ri áfo nnyo ojê ó kára oseŋe, ó yîm yê a máŋe ka nyâ ekû na ésá. A máŋe a kə̂t nkə́p, á bhó kpo jen tə́níní.

¹²Ebhú Jisos a yéne nne-nkáé nnyó, a bhîŋ, a sə́re yê se, “Mmá, ń yim wâ ó sem ka emaŋé ejâ.”

¹³A kúni yê obhô ka biji, njəm i nne-nkáé nnyó a tə́ne ntə̂m yə́t, a róghe nkat ekarám mbâ Obhasi.

¹⁴Nji Jisos a yimî nne-nkáé nnyó a sôn ka ofú oyoá-biji, é yâm ntûfâm nnyo á kebha óchâm Obhasi mbí kpe-eji. A sə́re ane áfo se, “Mfín a ri eságasá nnyi é yimá etûm. Nne á fon emaŋé, deê a bhá ka mfín nnyí. Nne a kâ kpô bhá á yîm emaŋé ejê ka ofú oyoá-biji.”

¹⁵Ńtâ Jisos a táme nne-ndûm nnyó se, “Ane baram! Nne owəné kpe nnyón a kí kpat mfoŋ eye, kpe nnyi abhaŋ, kpe anyanyâ ka eji á bhóbha, a jak a jí karé ńnyə́ne ayép a gwó ka ofú oyoá-biji.

¹⁶Kən ńgyê eyábhé-mmon Abraham nnyo Satan a káre oseŋe ka nyâ ekû na ésá. Ó ka wóm ên sê ń yîm yê a sém ka oseŋe mbí ka a ri ofú oyoá-biji a?”

¹⁷Otáma-ejûm í Jisos ó yîm ane-ebhan abhê chénchén á fôn ekpatə́m ísonê. Mba ngá chénchén á fôn ogyebhá-ḿbə́ŋé ka iyîm okpógha-biji mbi yê á yimá.

¹⁸Jisos a bhə̂p mân se, “Sê otúi Obhasi, ḿbə́ne ó rî nan? N kí ko jen ń gáe na ḿbə́ne?

¹⁹Otúi Obhasi ó rî noŋ nkap nnyi á kamá se mósta. Nne a kí ko a bhê ka ebhin ejê. Nkap nnyí a kúi a chə́bhe étí, nnón ḿ gbê ojû ka arâp amê.”

²⁰Jisos a kpô bhə́p se, “N kí ko jen kən ń gáe na otúi Obhasi?

²¹Otúi Obhasi ó rî noŋ yîs nnyi nne-nkáé a kí ko a kpê na fráwa brêt, ta a nʉ̂t a súi ngûm.”

²²Nji Jisos a yəbhê a kí ji nnyi Jerusarem, a gyímá ka nték i nyúp na abhon í nték, a kpík ane achot Obhasi.

²³Nne yót a bhə̂p yê ka eji etat se, “Ńsé, nâ-ngá ane mba Obhasi a kí yim ábho á sém á bhó ti a?” Jisos a táme se,

²⁴“Kpe énê, deê a nok ka nnyen onogha-ejûm a chíŋ ka mbá nnyi a chébhe ochép, ka n kí səre ên bəre ane etî-etî tîk á nôk sê á chíŋ á gyé, kən á bhó gye.

²⁵Mfone tîk a rúi ngyím a bhâm itə̂m ifê. Ebhú ó gyimi mân ka éré o súmá, sê, ‘Ńsé, rəbhê êt njû,’ a kí tame ên se, ‘Ń ka məŋé mbá nnyi ên o dʉ.’

²⁶Tîk o táme ên yê sê, ‘É kumi, é di é gwo na we eji jə́t, ó jen ó kpi ka nték eyəré.’

²⁷A kí kpo tame se, ‘Ń ka məŋé mbá nnyi ên o dʉ, duî ên ə̂m ka nnyo njû, chénchén ên, ayimá-obhí.’

²⁸“Ekʉ̂ nji o kí rʉri ên, o dík ên akek, tîk é chíŋi obhô ebhú ó yen ên Abraham na Isak na Jakop na akará-otîp Obhasi chénchén ka otúi Obhasi, kən tîk á bhîm ên á tûp njəm éré.

²⁹Ajéné tîk á dʉ̂ ka nték ka nték, mbá-ochî na mbá-njəm, obhô-okáé na obhô-orûm, á bhâ kúmi na ejík ka erom ka otúi Obhasi.

³⁰Etʉ̂ ane mba á rî ochî, tîk á chə́bhe mbá-njəm, etʉ̂ mba á rî njəm tîk á chə́bhe ochî.”

³¹Ka ebhú njí, etʉ̂ ane echəme Farasi á bhâ sə́re Jisos sê a bé a yóŋé eji, ka Erot a kí wom a yúí yê.

³²Kən Jisos a táme ábho se, “Choŋ osə́ré ên ńkí ányo na oka obhê sê mme n di ngá m bímá ojê n yighá ka ḿbə́ŋé ane. N di ngá n yimá ane á son ka égyé na ójô, mfín égyé ébháe etûm ejámé tîk é mân.

³³Kən kpe noŋ é rî áno, n di ń jóe ka mbá nnyi jiím Jerusarem ka égyé na ójô na mfín égyé ébháe. Echî aŋ? Ájoé á kí yui nkara-otîp Obhasi, deê á yúí ka Jerusarem.”

³⁴A kí saé mân Jerusarem se, “Oô, Jerusarem! Jerusarem! Ó yua ên akará-otîp Obhasi, o túbhá ên ágbán mba Obhasi a túmi mbâ eyəné na atáé. Ntə̂m é bhík nnyi ń wom kə́n bəre ń chúi ên chénchén ń kâk ka biji noŋ nkok abhon á bhuá abhon abhê na afabhe, kən ên ó bhó kam.

³⁵Mfá-mfá Obhasi a yíghi ên abhô. Deê ń sə́ré ên bəre tîk ó bhó yen ên ə̂m, ta ebhú é bhak nji o kí to ên sê, ‘Deê enare Obhasi é jóe na nne nnyo a kə́ bha ka mbiŋ eye.’ ”