Read ejagham Luk, echî 18 Bible Online

Luk, echî 18 - ejagham bible

Luk, echî 18

¹Jisos a tûp mân egan a tóŋé ábho se deê nne a kâ yíghi ḿbə́ŋé, nne a kə́t a gorá Obhasi chénchén ebhú.

²Se, “Ntáŋa-esup a ri mfá ka eték jə́t. Obhasi, yê á bhó fup; ntem-nne, yê á bhó jighi.

³Nne-nkáé ekə́t yót a ri fə́ne ka eték áji nnyo a kə̂t a jená mbâ ntáŋa-esup nnyó chénchén ebhú a gorá se a táŋ esup tə́níní a yighí yê ka obhô ane-ebhan abhê.

⁴Chénchén ofú ka agore mmá, mfín a chíŋá a jak, kən ntáŋa-esup nnyó á ka wóm a yúk. Kən ofú bhə́t a kúmi a kére se, kpe noŋ yê a rok áno Obhasi ofup, ntem-nne yê á bhó jighi,

⁵ka obhô njok i ńtə́mé nnyi nne-nkáé nnyó á kará yê, tîk yê a tâŋ esup tə́níní a káre nne-nkáé nnyó. Áno asík, tîk á bhó re ebháám. Se ńtə́mé nnyí tîk a káre yê oseŋe a yimá yê a kérá.”

⁶Ńtâ Jisos a bhə̂p mân se, “Ó yuk ên ejûm mân nji nne-amoe noŋ ntáŋa-esup nnyó a chorê a?

⁷Ájoé nne ntʉ́ghi nnyó kə́n a chôt ntʉ́ghi nchot nnyí, ó kam ên mân sê Obhasi á bhó taŋ esup tə́níní a káre ane abhê mba á góra atʉ́ na efín sê a nyáŋé ábho. Ó kam ên sê tîk a bhíbhi ebhú ka enyáŋám ábho a?

⁸Deê ń sə́ré ên mân bəre a kí taŋ esup a káre ábho, ebhú á bhó bhibhi. Ebhú Mmon-i-ntem-nne á bha áfo, nâ-ngá tîk a yên ane ngun noŋ á ki ḿbə́ŋé na Obhasi a?”

⁹Jisos a tûp fə́ne egan a káre ane mba á kéra sê ábho á fon nnyen erû, mba ngá á ká fon.

¹⁰Se, “Ofú bhə́t, ane ábháe á jak ka ókʉ́rí achot Obhasi á jî góre yê. Nne yót a ri nne echəme Farasi, nnyo tat a ri mbə́bha-ntí-echî.

¹¹Nne echəme Farasi a gyími ejê ebhat a kí goré Obhasi se, ‘Ń kup wâ Obhasi nji ń ka joé noŋ ane etat mba á nyə́ma ofî, á moá amoe, á gbok ekun. Ń kup wâ nji mme cháŋ noŋ mbə́bha-ntí-echî nnyó.

¹²Ń kak njaé mfín ébháe ka ogəm bəre ń jíghí wâ, n kí kiri chénchén nji ḿ foná ka etûm ka ngûm ófó, n káre wâ eji jə́t noŋ ebhín é fíi.’

¹³“Kən mbə́bha-ntí-echî nnyo a gyím ńgô nyáŋé-nyáŋé, ósô á ka kép, a bhî echî ka nsi na nsôn, a kí goré Obhasi se, ‘Obhasi, ri ə̂m nsôn, nyima-obhí noŋ mme.’

¹⁴“N kí səre ên bəre Obhasi a kô mbə́bha-ntí-echî nnyó se ekpin ejê é rî ka nnyen-i-mbá, á ka kó nne echəme Farasi nnyó. Echî aŋ? Kpe énê nnyo á ko biji se yê a fâŋ a chíŋi ochíŋ, á kí ko yê sê kpe ejûm á ka fáp. Kən nne nnyo á ko biji se yê á ka fáp ejûm, á kí ko yê sê yê nâ a faŋê a chíŋi ochíŋ.”

¹⁵Ane etat á kô abhon ábho á bhak sê Jisos a kuní ábho obhô ka echî a yórá ábho. Kən atóbhá Jisos á nyân ane sê á kâ kpô yim.

¹⁶Kən Jisos a bhîŋ abhon mbá a kâk ka biji, a chôt se, “Deê abhonche á bhá mbâ amé, ka kpó taŋé ên ábho. Echî aŋ? A ri ane mba á fóne ḿbə́ŋé jáé noŋ abhon ntʉ́ghi mbá, nâ á gyêk ka otúi Obhasi.

¹⁷Deê ń sə́ré ên bəre nne nnyo á ka gbíŋí otúi Obhasi noŋ mmonche á gbiŋa ńsé, tîk á bhó yen ḿbə́ne.”

¹⁸Nne-echî ane Jus yót a bhə̂p Jisos se, “Nyima-ono ńsé, n kí yim jen kən ḿ fôn ekpin ka ótúm-ótúm?”

¹⁹Jisos a bhə̂p yê se, “É yími nan o kí bhiŋ ə̂m se nyima-ono? Kpe nyima-ono yót cháŋ ka nsi nnyí, é ká chiŋi Obhasi átíŋ.

²⁰Ó məŋe se bibhín Obhasi í rî sê, o kâ gbô ekun, o kâ yúi nne, o kâ jʉ̂ ejʉ̂, o kâ gyími ntî-isê áfúbhí, jíghi ńsé owa na nnyen owa.”

²¹Kən nne nnyó a táme se, “Bibhín mbí chénchén, n dóghe ekíím ka obhóné obhámé”

²²A kpo to a yúk a sə́re yê se, “É kət ejûm jə́t nji o kí jeghé oyim. Choŋ ogurî chénchén iyîm ibhâ mbi o fonê, kirî ntí mbâ akpák, tîk o fôn efaŋ ka ósô. Ó jeghé oyim, top ə̂m mân.”

²³Nji nne nnyó a yúghi nji Jisos a sə́re yê, nsae a súi ḿbə́ŋé, ka a fonê iyîm kpe-eji.

²⁴Kən Jisos a yên noŋ nsae a súi nne nnyó ka ḿbə́ŋé, a chôt se, “Tîk é yúŋi kpe-eji kən ane-efaŋ á yén otúi Obhasi.

²⁵É bhó yuŋi mfoŋ echóé a chíŋ ka mfúk i ḿbíabə́n noŋ é kí yuŋi nne efaŋ a yén otúi Obhasi.”

²⁶Ane mba á yúghi nchot nnyí á bhə̂p sê, “Kən énê mân tîk a sêm?”

²⁷Jisos a táme ábho se, “Ejûm nji nne á ka məŋé oyim, Obhasi a kí yim ńjə́ne.”

²⁸Pita a chôt se, “Ńgyê êt, é maghe chénchén nji e fonê e kí top wâ.”

²⁹Jisos a kâm, kən a sə́re ábho se, “Deê ń sə́ré ên bəre nne owəné nnyo á maghé eték ejê, na kpe nkáé owe, na kpe mmon-i-nnyen owe, kpe ásé, kpe abhon, ka obhô otúi Obhasi,

³⁰tîk a fôn í tî í chîŋ ka ngun nnyí mfá-mfá na ekpin ótúm-ótúm ka ngun nnyi a kə́ bha mba-ochî.”

³¹Jisos a bhîŋ ágbán abhê ófó na ábháe mbá-njəm, a sə́re ábho se, “Yûk ên, é jak áno nnyi Jerusarem, eji achot fép mma akará-otîp Obhasi á séŋe á kpê na Mmon-i-ntem-nne á kí fap.

³²Tîk á gbîp yê á káre mbâ ajéné. Ajéné mbá tîk á kâk yê ntuŋ, tîk á tû yê atû, á chô yê ason ka biji. Tîk á tə̂m yê, á yúi yê,

³³kən ka osúí mfín ésá tîk a nyə́me ka ekʉ̂.”

³⁴Kən nji Jisos á chorá, kpe nchot yə́t á ka jáé ágbán abhê. Á ká məŋé nji á chóra, ka echî nchot nnyi é nyə́ne ka ebhə̂t.

³⁵Nji Jisos a jenê a kí si Jeriko, ntána-amə̂t etat a kun ka mkpe mbá, a gyéŋá egyéŋé.

³⁶Ebhú a yúghi ane á kí chiŋ, a bhə̂p se, “Ńga jen?”

³⁷Á sə́re yê sê a ri Jisos nnyo nne Nasaret nâ á chiŋa áno.

³⁸Nji á sə́re nne nnyó, a kûk se, “Jisos, mmon i Debhit, ri ə̂m nsôn.”

³⁹Ane mba á rî mbá-ochî ka ekam njí á nyân yê sê a maghé ejok. Kən á ka maghé, a kpére a kûk na ikom-ikom se, “Mmon i Debhit, ri ə̂m nsôn.”

⁴⁰Jisos a gyími a sə́re se á kó nne nnyó á bhá. Nji á kóe yê a bhák, a bhə̂p yê se,

⁴¹“Ó woma ń yîm jen ń káre wâ?” Nne nnyó a táme se, “Ntûfâm, n kí wom ḿ kpó yen mbá.”

⁴²Jisos a sə́re yê mân se, “Yên mbá, ḿbə́ŋé eya nnyi ó kíi na Obhasi a yîm wâ ó son.”

⁴³Ka ngyím ányi, amə̂t amê á rə́bhe, a róghe Jisos etóbhóm, a kará nkat mbâ Obhasi. Nji ekam ane njí é yéne nji é fábhe, á káre fə́ne ekûp mbâ Obhasi.