Read ejagham Luk, echî 20 Bible Online

Luk, echî 20 - ejagham bible

Luk, echî 20

¹Ofú bhə́t Jisos a ri ka etím ókʉ́rí achot Obhasi, a kí kpi ane, a sə́rá ábho otîp ogyebhá-ḿbə́ŋé Obhasi. Nji á kpik áno, ane-echî akará-agore Obhasi na atóŋá-ebhín á chə̂m na ane-akúí eték,

²á bhâ bhə̂p yê sê, “Sə́re êt kpá, o yimî nan o kí yim iyîm mbí? Énê a karê wâ ikom?”

³Jisos a táme ábho se, “Deê ó táme ên ə̂m kpá ebhə̂p njí. Sə́re ên ə̂m,

⁴ikom mfi Jon a fonê a fúghá ane ayép, í dʉ̂ mbâ Obhasi kən mbâ atem-ane?”

⁵Nji a bhə́bhe nná ebhə̂p njí, ane mbá á róghe echoróm ábho-ábhô sê, “Ájoé é tame sê Obhasi nâ a karê Jon ikom, a ri a bhə́p echî nji e rô kam na Jon.

⁶Kən é tame sê í dʉ̂ mbâ atem-ane, ekam ane njí ndə́m tîk á tûp êt na atáé. Ábho chénchén á kâm sê Jon a ri nkara-otîp Obhasi.”

⁷Á táme mân sê, “É ka məŋé.”

⁸Jisos a táme ábho fə́ne se, “Mme eróŋ, ḿ bó səre ên mbâ ikom ifámé í dʉ̂ kən n yimá ntûm nnyí.”

⁹Jisos a bhâ sə́re mân ane egan etat se, “Nne yót a fôn ebhin í nkap ejê, a kô a káre ane se á yîm á kará yê obhê orʉrí. A yə̂p mân a jak ejen nji a kí ka.

¹⁰Nji ebhú nkap é síi, mfone ebhin nnyó a yíghi ḿgbán owe yót a tûm se a ji mbâ ane mba á yíma ebhin ejê, a jí ko eye nkiri ebhin. Kən nji ane mbá á yéne ḿgbán nnyó á fî yê á tə̂m, a jak abhô-ábhô.

¹¹Mfone nnyó a kpô yighí ḿgbán nnyo tat a tûm, kən ane mbá á tə̂m nnyó, á káre yê ekpatə́m ísonê, á bhîm a jak, abhô-ábhô.

¹²Ka osúí ágbán ásá, ane etûm mbá á tə̂m, á kâk bifú, á bhîm a jak.

¹³“Mfone nnyó a bhâ kére se, n kí yim nan eé? Tîk n tûm mmon okot omé. Ebhú ane mbá á yen yê, tîk á káre yê ejík.

¹⁴“Kən a kpo to a túm mmon, ayimá-etûm mbá á yên yê, á kúbhi sê, ‘Ńgyê ndígha-ekʉ̂, é yúí yê. Tîk iyîm í ńsé í kə̂t ibhə́ré.’

¹⁵Á bhâ fî mmon nnyó á yúi, á bhûm ka etə́m.” Jisos a bhə̂p mân ane se, “Ó kere ên mân sê mfone ebhin nnyó a kí yim jen mbâ ane mbá?”

¹⁶A táme yê ḿfoné se, “A kí yui ane mbá a tábhe ebhin njí a káre mbâ ane etat.” Nji ane á yúghi nchot nnyí, á chôt sê, “Deê ntʉ́ghi ejûm njí é kâ fâp.”

¹⁷Jisos a kêp ábho nyamḿ, a bhə̂p se, “Echî esə́re njí a ri jen mân? Á séŋe sê, Isôk mfi agbeghá-ojû á bhúmi sê í ká nop njû egbeém, ḿfə́ne nâ í bhâ chə́bhe mfoné-mfoné isôk mfi í fíi njû.

¹⁸Kpe énê nnyo á gbo ka isôk mfí, a kí bhom biji í mân oman, kən isôk áfi í gbo nne ka biji, nne a kí joghe a mân oman.”

¹⁹Nji Jisos a chorê achot mmá, atóŋá-ebhín na ane-echî akará-agore Obhasi á nôk ekpak nji á kí wubhi yê ka ngyím ányi, ka á məŋe sê a túbhi egan njí a káre ábho. Kən á fôn efup na ane eték.

²⁰Á fî biji ábho á chighá mfoné ebhú é bhîk. Á chîŋ obhô-njəm á káre ane etat sê á yîm noŋ ábho á fon ḿbə́ŋé jáé na Jisos, kən tîk á wáp yê ka akát. Ebhú yê á gbo, tîk á fî yê mân á káre mbâ ntûfâm nnyo a fonê ikom eték.

²¹Ane mba á túmi nná sê á bhá gáe Jisos á sə́re yê sê, “Ńsé, é məŋe sê nji ó chorá o kpík ane, é rî ka echî. É məŋe sê ó bhó kep nne ka ochî, ó səra ane ka etʉri ejûm nji Obhasi a wóme nne a yim.

²²Sə́re êt kpá, ebhín ejə́ré é kam kən é ká kam sê é káre ntí-echî mbâ Ntûfâm i Rom?”

²³Kən Jisos a yên oka nchot ábho, a sə́re ábho se,

²⁴“Kó ên ntí bhá tóŋé ə̂m.” Nji á kóe á bhak, a bhə̂p ábho se, “Efóŋé énê na mbiŋ énê nâ í rî áno ka ntí mmí?” Á táme sê, “Ntûfâm i Rom.”

²⁵A sə́re mân ábho se, “Karê ên mbâ Ntûfâm i Rom iyîm í Ntûfâm i Rom, o káre ên mbâ Obhasi iyîm Obhasi.”

²⁶Nji Jisos a táme áno, kpe ekpak nji á kí fi yê áfo ka ochî ane eték sê a gbô cháŋ. Biji í mân ábho, kpe eyum á ká kpo rəbhé.

²⁷Etʉ̂ ane echəme Sadusi á bhak á bhá bhə́p Jisos ebhə̂p. Ane mbá nâ á ká kam sê nne á kpo, tîk a nyə́me ka ekʉ̂.

²⁸Á bhə̂p yê sê, “Ńsé, Mosis nâ a séŋe ebhín a káre êt se ebhú nne á ko nkáé kən a kpô, kpe mmon á ka maghé, deê mmon-i-nnyen i ndûm a kó nne-nkáé ányo a jí abhon ka mbiŋ i mmon-i-nnyen.

²⁹Kən ofú bhə́t abhon-í-nnyen á rî mfá anígisá. Nnyo nne-nkúí a kô nkáé, kən a kpô, kpe mmon á ka maghé.

³⁰Enyeré a bhâ kô nne-nkáé nnyó, a kpô fə́ne, kpe mmon á ka maghé.

³¹Osúí ásá a yîm ekan-ékân. Áno-áno, tata chénchén ábho anígisá á kpô, kpe mmon á ká maghé.

³²Nne-nkáé ányo a bhâ jéghe okpó fə́ne.

³³Ka ofú mbi ane chénchén á kí nyəmé ka ekʉ̂, nne-nkáé nnyó a kí joé nnyo énê, ka ábho anígisá á kô yê ebhú á rî mbít.”

³⁴Jisos a táme ábho se, “Ane-arûm na ane-akáé ka ngun nnyí, á kí ko bibháé. Kən ane mba á bhik enyəmə́m ka ekʉ̂, á kpîn ka ngun nnyi a kə́ bha mbá-ochî, á bhó ko ebháé.

³⁵

³⁶Á kí joé noŋ baénjel, ekʉ̂ á bhó kpo. Nji á nyə́me ka ekʉ̂, á chəbhe nâ abhon Obhasi.

³⁷Ebhú Mosis a séŋe a kpê na erəmta-ngûn nji a yéne ka ájé, a tóŋe jáé se nne á kpo, tîk a nyə́me ka ekʉ̂. Ka eji erəmta-ngûn njí, Mosis a bhiŋî Ńtâ Obhasi se, Obhasi Abraham, Obhasi Isak na Obhasi Jakop.

³⁸Nâ é toŋe sê Obhasi á ka joé Obhasi ekʉ̂, kən a ri Obhasi ekpin. Nâ é fap sê ka ochî Obhasi, chénchén ane á rî ka ekpin.”

³⁹Etʉ̂ atóŋá-ebhín á kâm na Jisos sê, “Ńsé, ó tame.”

⁴⁰Nâ ntə̂m, kpe nne yót á ka kpó gaé a bhə́p Jisos ebhə̂p.

⁴¹Jisos a bhə̂p mân ábho se, “É yími nan kən ane á kí səre sê Krayis, nne nnyo Obhasi a túmi se a bhá yim ngun á sém, a ri mmon i Debhit?

⁴²Debhit yê ḿfoné a séŋe ka Nwet i Nkôn se, ‘Ńtâ Obhasi a sə́re ntûfâm omé, se kumî ə̂m mfá ka eji ejík mkpe obhô-orûm,

⁴³ta n yîm ane-ebhan abhâ á kə̂t ekíghá-akát ejâ.’

⁴⁴Debhit a kí bhiŋ Krayis se Ntûfâm. Krayis a kí kpo yim nan a jóe mmon owe?”

⁴⁵Nji ane chénchén á kí yuk achot mma Jisos á chorá, a sə́re atóbhá abhê se,

⁴⁶“Kô ên ebhú na ane abhə́né mba á tóŋa ebhín. Á kóra á jená á fará na awubha-wubha okʉ̂, á korá sê ane á káre ábho ejík ka ndûm éré. Á korá ekumúm ka ngûm ekumi nnyi ejík ka erom na ka óchâm Obhasi.

⁴⁷Á móa ane-akáé ekə́t amoe, kən ngun á yen sê á kí saé ábho. Á yim mân á gyê Obhasi egoróm ntə̂m cháŋ. Na ntʉ́ghi ekpin njí, Obhasi tîk a kpə́re ábho nnyen ekpərə́m.”