Read ejagham Luk, echî 21 Bible Online

Luk, echî 21 - ejagham bible

Luk, echî 21

¹Jisos a kêp a fáre a yên ekpak nji ane ayúp á kágha ntí ka nkop i ntí ka ókʉ́rí achot Obhasi.

²A yên fə́ne noŋ nne-nkáé ekə́t yót na okpák obhê a túbhi áfu ábháe.

³Nji nne-nkáé nnyó a túbhi ntí mmí, Jisos se, “Deê ń sə́ré ên bəre nne-nkáé ekə́t nnyó na okpák obhê, a tûp ntí ń ti ń chiŋi mmi ane chénchén á túbhi.

⁴Echî aŋ? Ntí mmi ane mba ngá á kághe ka nkop i ntí nnyí a ri mkpât ka mmi á fóne. Kən yê, ka okpák obhê, a kâk chénchén ntí mmi a fonê ka ekpin ejê.”

⁵Etʉ̂ atóbhá abhê á rî á chorá á kpek na ókʉ́rí achot Obhasi sê énoê atáé na bikəp mbi á káre Obhasi í yim njû nchane a nôp a chíŋi ochíŋ. Kən Jisos se,

⁶“To ó yen ên iyîm mbí chénchén, ebhú é kə́ bha nji kpe ntáé yə́t á bhó kət mfá ngyím. Á kí rome chénchén á tûp ka nsi.”

⁷Atóbhá Jisos á bhə̂p yê sê, “Ńsé, achot mmá á kí fap bhaghé ebhú? Bhaghé eriŋ nâ é kí yen kən é mə́ŋe sê ebhú é si?”

⁸Kən Jisos se, “Kó ên ebhú nne a kâ ríri ên. Ane etî-etî tîk á bhak ka mbiŋ amé á səra sê ábho a ri Krayis, nne nnyo Obhasi a túmi se a bhá yim ngun á sém. Sê, ebhú é si. Ka tóp ên ábho.

⁹Deê efup é kâ yîm ên nji ó yuk ên sê enok é gbo, onyʉk ó fap. Iyîm ábhi fép í fóne efábhám kpá, kən ntə̂m á bhó si ebhú jə́t.”

¹⁰A sə́re mân ábho se, “Nték tîk á yə̂m enok na atem, atúi tîk á nôk na atem-atúi.

¹¹Ngun tîk a kə̂t a nyiŋá onyiŋí ka ngûm ka ngûm, njaé na emaŋé eyúp tîk í bhak fə́ne. Biriŋ mbi í chíŋi obhô na iyîm mbi í kára nne ekpatə́m efup tîk í bhak nnyi ósô.

¹²Kən iyîm mbí fép í bhá fap, tîk á tû ên kpe-eji, á taŋa achot amə́né ka áchâm Obhasi á kaghá ên ka ókúmí. Tîk á fî ên á bhak ka ochî atúi eték ka obhô obhámé.

¹³Á fi ên áno, nâ ebhú mân o fonê ên ka egyímím atî-isê abhámé.

¹⁴Kən nne a kâ fûp se yê á bhak ochot nan kən a sém,

¹⁵ka mme ḿfoné tîk n yîm nchot a fábhá ên ka nnyo wát wát. Tîk n káre ên aron mma á kí yim nne-ebhan owəné kpe yót á bhó bhik egyímím a taŋé ejûm nji o kí chot ên.

¹⁶Ásé abhə́né na abhon-í-nnyen abhə́né na ane abhə́né na atem nâ á kí gbip ên á káre, á yúi etʉ̂.

¹⁷Ane chénchén tîk á bhân ên ka obhô obhámé.

¹⁸Chénchén mbi tîk í fâp, kən nne owəné á bhó tane kpe ekát í nnyʉ̂ ejê jə́t.

¹⁹Ebhú achot mmá á kí fap na ên, gyímí ên akát á sí nsi, ka nâ ekpak nji ó kí yim ên kən ó sém ên.”

²⁰“Ebhú ó yen ên ane-enok á fáre Jerusarem á kâk, məŋê ên sê ebhú é si nji á kə́ bha yê obhíbhí.

²¹Ka ebhú áji, deê ane mba á rî ka ebhat í Judiya á bé á jî ebhat agúí, mba á rî ka mbin, deê á kâ gyê eték. Ane mba á rî ka etím eték, deê á bé eróŋ.

²²Echî aŋ? Obhasi a kí kpəré ngun ka mfín nnyí kən nchot nnyi á séŋe ka nwet a joé ka etʉri.

²³Tîk é bhîp é chîŋ ka mfín ányi na ane-akáé oya na mba á kí yabhe abhon. Ekpatə́m oseŋe tîk ó bhak ka ngun nnyí, Obhasi tîk a tóŋe oyámá-ḿbə́ŋé obhê mbâ ane mbá.

²⁴Tîk á yúi etʉ̂ ábho na akparanja, á nyáne etʉ̂ ka ojû ókúmí ka nték i ngun chénchén. Ajéné tîk á jóghe Jerusarem, á sə́ne na akát ta ebhú ábho é chîŋ.”

²⁵“Biriŋ tîk í jóe ka njúí, í jóe ka nnyam-ósô na ka ńdʉnândʉ ósô. Ka ngun, chénchén nték tîk á yíghi ḿbə́ŋé á fôn efup na erəmə́m nji aya á kí rəm, na ébhúghí-aya nji é kí joé.

²⁶Nji ane á kí joé á chighá ejûm nji é kí fap ka ngun ndə́m, efup tîk é kêt ábho akôn, ka nkom chénchén ka ósô ń kí yoŋe bibhə̂k ábho.

²⁷Mmon-i-ntem-nne tîk a fâp mân ka ebhú njí, a bhərá a bhák ka átʉ́k í ngurobhú na ikom na ekpatə́m ejík.

²⁸Ebhú iyîm mbí í roghe efábhám, deê ó yûŋ ên amə̂t ó kí sê ebhú é kpiri nji Obhasi a kí yim ên ó sém.”

²⁹Jisos a tûp mân egan se, “É kó egaé ka átí etə́m chénchén, títí noŋ kpe étí fîk.

³⁰Ó yen ên ájé ka étí á roghe efə́mə́m, məŋê ên sê enae é kí si.

³¹Ka ekpak njí eróŋ, ó yen ên iyîm mbí í kí fap, məŋê ên sê ebhú é kpiri nji otúi Obhasi ó kə́ bha.

³²Deê ń sə́ré ên bəre kən ane mba á rî nná ka ekpin mfá-mfá á kpó, iyîm mbí fép í fap.

³³Ósô na nsi tîk í chîŋ, kən ejámé nji ń chot ka nnyo, é bhó chiŋ bhúghí-bhúghí.”

³⁴“Fiî ên biji ibhə́né o kâ kâk ên echî kpe-eji ka íkíkéré ngun nnyí, na énə́mé aməm egwóóm na achot erom edíím. Ó kət ên o yimá ka ekpak njí, ofú ábhi tîk ó kpúghi ên gbantə́m noŋ ntam,

³⁵ka ó bhâk mbâ ane chénchén ka ngun ndə́m.

³⁶Kô ên ebhú, o gorá ên Obhasi chénchén ebhú sê a karé ên ikom, achot mmá á kâ fâp na ên kpát ta o gyími ên ka ochî Mmon-i-ntem-nne.”

³⁷Ka mfín ányi, Jisos a kə̂t a kpík ane achot ka ókʉ́rí achot Obhasi. Na egu a kí maghé a jî kâ ka Egui Orif.

³⁸Kən na ofú-ofú, ane chénchén á kí chəmé ka ókʉ́rí achot Obhasi, á yugha okpígha-ejûm obhê.