Read ejagham Luk, echî 22 Bible Online

Luk, echî 22 - ejagham bible

Luk, echî 22

¹Mfín a kpíri nnyi Erom Édî Ábhiî-Ábhíi Eyámám. Á bhíŋa fə́ne erom njí sê Ntə̂m Osʉ́ŋ.

²Ka mfín ányi, ane-echî akará-agore Obhasi na atóŋá-ebhín á róghe ewómóm mbá á yúí Jisos ka ebhə̂t, ka á fóne efup na ane eték.

³Ka ebhú njí fə́ne Satan a gyʉ̂t ka echî ḿgbán yót ka ágbán ófó na ábháe mba á tóbha Jisos. Ḿgbán nnyó á kamá se Juda nnyo á bhíŋa se Iskariyot.

⁴A jak a jî chə̂m ndə́p na ane-echî akará-agore Obhasi na abhábhá-ókʉ́rí achot Obhasi. Á kúbhi ka ekpak yê Juda a kí karé ábho Jisos.

⁵É gyébhe ane mbá ḿbə́ŋé kpe-eji, á kâm sê á káre Juda ntí. Juda a kâm na ábho.

⁶A róghe mân mbá ewómóm, yê a gurí Jisos mbâ ábho, ane á kâ yên.

⁷Ka ofú mbi á kí yui mmon-i-njo-mbúi ka Erom í Ntə̂m Osʉ́ŋ, Erom Édî Ábhiî-Ábhíi Eyámám é róghe fə́ne ndə́p.

⁸Jisos a tûm ágbán abhê, Pita na Jon, ka eték. A tíbhi ábho se, “Choŋ otʉrí ên eji, jighî ên ibhə́ré iyîm edíím Erom í Ntə̂m Osʉ́ŋ.”

⁹Á bhə̂p yê sê, “O wóme se é dí ejə́ré erom fan?”

¹⁰A táme ábho se, “Yûk ên. Nji o kí gye ên eték, tîk o kpúghi ên nne-ndûm etat na ebhí ayép ka echî. Tôp ên yê, gyê ên njû-njû nnyi á gye.

¹¹Ebhú ó gye ên, sə́ré ên mfone njû se ńsé owəré se deê ó tóŋé mmon-i-njû nnyo yê a kí di Erom í Ntə̂m Osʉ́ŋ na ágbán abhê.

¹²Mfone njû tîk a tóŋe ên ekpatə́m í mmon-i-njû ka ósô enyóŋ nnyo á tʉri á ki. Yim ên édî njí kî ên áfo.”

¹³BaPita á yə̂p á jak á jî yên fə́ne chénchén iyîm ekan-ékân ka ekpak í ńsé ábho a tíbhi. Á yîm fə́ne édî Erom í Ntə̂m Osʉ́ŋ njí, á tʉ́ri á kî.

¹⁴Ebhú é kpó to é bhík nji á kí di, Jisos a yə̂p a jak a jî kúmi na ágbán abhê ófó na ábháe.

¹⁵A sə́re ábho se, “Ń chik mbôp nnyí na okorá-ḿbə́ŋé bəre ń chə̂m biji na ên é dí Erom í Ntə̂m Osʉ́ŋ kən ń yén oseŋe.

¹⁶Echî aŋ? Kpe ofú bhə́t ń do dí erom njí ta Obhasi a yîm ane á mə́ŋe mfoné-mfoné echî erom í nchane ka otúi obhê.”

¹⁷A yûŋ ńkôp na aməm ka etím, a káre ekûp mbâ Obhasi, a káre mân mbâ ágbán abhê se, “Kó ên gwô, sîk ên atem.

¹⁸É róghé ka égyé, mme ń do gwó aməm mmá kpát ta otúi Obhasi ó bhak.”

¹⁹A kə̂n fə́ne brêt a káre ekûp mbâ Obhasi a kíri a káre ábho se, “Ḿfa nâ biji ibhámé [mbi n kí karé ka echî ejə́né. Deê o yimá ên ka ekpak njí, kən o tirá ên ə̂m.”

²⁰Á kpó to á mân edíím édî, a kpô yuŋ ńkôp na aməm ka etím, a sə́re ábho se, “Ńkôp nnyí a ri ńgyímí mfê nnyi Obhasi a kpó gyim na ane ka obhô agyʉ́ŋ amámé. Ḿmáne tîk á gbô ka nsi ka echî ejə́né.”][9]

²¹“Kən deê mme ń sə́ré en bəre nne nnyo a gurî ə̂m a ri mfá ka ekumi njí na mme.

²²Mmon-i-ntem-nne tîk a kpô ka ekpak Obhasi a gaê a kî, kən tîk é bhîp é chîŋ na nne nchane nnyo a kí gurí yê.”

²³Nji ágbán abhê á yúghi ejûm nji a chorê nná, á róghe ebhə́bhə́m atem sê, “Énê nnyo a ri ka ekam ejə́ré njí nnyo a kí yim ntʉ́ghi ejûm njí?”

²⁴Ka ebhú njí, ágbán í Jisos á róghe áfírí mma nnyón nne ábho nnyo á kí jighi noŋ nne-echî.

²⁵Nji Jisos a yúghi áfírí ábho, a bhîŋ ábho a tâ etí se, “Atúi-ofâm í ngum nâ á fóna ikom eték. Kpe nnyón ntûfâm nnyo a fonê ane ka óséré obhê á woma fə́ne sê ane á kón onobhá-eji obhê.

²⁶Kən nne owəné nnyo a kí joé nne-echî tîk á bhó fi ntʉ́ghi otúi ngun mbí. Nne-echî owəné a ri a joé noŋ mmonche ka ekpin. Ntʉ́ghi nne ányo a ri a joé noŋ ḿgbán.

²⁷Énê a faŋê a chíŋi ntem? Nne nnyo á kí jighí yê édî ojighí sê a dí, kən yê nnyo á jighá áno ojighí? A ri yê nnyo á jighá yê édî. Kən mme ń ka kumí bəre á jíghi ə̂m édî. Ń ki biji ibhámé noŋ ḿgbán.

²⁸“N kí səre ên mân bəre mbôp ane ngun á róghe ə̂m enyʉghʉ́m, o nyə́ne ó ka maghé ên ə̂m.

²⁹Ka obhô mbí, tîk n káre ên ikom ka edíím otúi ka ekpak í Ńsé omé a karê ə̂m.

³⁰Tîk o dî ên o gwô ên na mme ka otúi obhámé. Tîk o kúmi ên fə́ne noŋ atúi-ofâm o tâŋ ên ndə́p-i-njû ófó na ébháe nnyi abhon Isrel.”

³¹Jisos a bhîŋ mân Pita se, “Simun! Simun! Yûk, deê ń sə́ré wâ bəre Satan a kô ikom se yê a kak ên ka egaé, a yighí ḿbə́ŋé eyəné mbâ Obhasi noŋ nne-nkáé á saŋá átép a yighá ka nkon.

³²Kən ń gore Obhasi bəre deê a kak wâ obhô o kâ yíghi ḿbə́ŋé na yê. Ó chəbhé njəm mân mbâ amé, deê ó kâk atem abhâ osoná-ḿbə́ŋé.”

³³A táme Jisos se, “Ńsé, kpe ókúmí, kpe ekʉ̂, ń kam na we.”

³⁴Jisos se, “Kêp ngá. Deê ń sə́ré wâ bəre kən nkok echî-ofú a bhá kuk, we o kí taŋé ntə̂m-ntə̂m ésá se ó ka riŋí ə̂m.”

³⁵Jisos a bhə̂p mân ágbán abhê se, “Nji ofú ábhi n túmi ên ejen, kpe ntí ó ka fi ên, kpe ekup ó ka kə́n ên, kpe iyîm-akát ó ka kak ên, o jóe ên ka eket ejûm kpe jə́t a?” Á táme sê, “Kpák!”

³⁶A sə́re ábho se, “Kən mfá-mfá, nne nnyo a fonê ntí, deê a fi. Nnyo a fonê ekup, deê a kə́n. Nnyo a rô fon akparanja, deê a gurí kût eye a kó ntí a nam.

³⁷Deê ń sə́ré ên bəre ebhú é bhik nji achot amámé fép mma á séŋe ka nwet Obhasi á kí fap ka ekpak á séŋe. Á seŋ sê, tîk á sə́re sê yê a ri nyima-obhí eróŋ.”

³⁸Kən ágbán abhê sê, “Ntûfâm, é fon akparanja ábháe mfá.” Jisos se, “É bhik.”

³⁹Jisos a mághe mân áfo a jak ka Egui Orif nji á jená kpe bhaghé ebhú. Ágbán abhê á jak na yê.

⁴⁰Á kpó to á sí ágo, a sə́re ábho se, “Gorê ên Obhasi sê á kâ kâk ên ka egaé.”

⁴¹Yê ḿfoné a mághe ábho a jak mbá-ochî mkpât a jî tə̂m arúŋ ka nsi a róghe Obhasi egoróm se,

⁴²“Ńsé, a ri ikom ifâ, ifámé asík. Ájoé ó kot, deê oseŋe mbi n kə́ bha nná oyén ó fúní ə̂m.” [

⁴³Nji á gorá áno Obhasi, énjel a fâp ka eji áji chak, a bhâ kâk yê ḿbə́ŋé.

⁴⁴Na ekpatə́m nsae ka ḿbə́ŋé a góre Obhasi, a góre tata nyúbhí a súi biji ta a yʉrá ka nsi noŋ agyʉ́ŋ mma á dʉ̂ ka efú.]

⁴⁵A kpo to a ruí ngyím a bhá, ágbán abhê á ket á man oman ka obhô nsae, á kí yae.

⁴⁶A sʉ̂k ábho a bhə̂p se, “Ó yaá ên jen? Duî ên ngyím, gorê ên Obhasi sê ó fôn ên osoná-ḿbə́ŋé ka oseŋe mbi ó kə́ bha.”

⁴⁷Nji á chorá áno, ḿgbán yót ka ágbán abhê ófó na ábháe a kamá Juda, a kíri ka eji áji na ekam ane. Juda a bhák a bhá tamé Jisos ngaŋ.

⁴⁸Kən Jisos a bhîŋ yê a bhə̂p se, “Juda, a ri na ngaŋ etamám nâ o kí ko Mmon-i-ntem-nne ó guri a?”

⁴⁹Nji ágbán í Jisos á yéne sê ekpatə́m í nchot a kə́ bha ofáp, á bhə̂p yê sê, “Ńsé, nâ-ngá e kâ yə̂p akparanja amə́ré, é róghé enok a?”

⁵⁰Nsʉ́ŋ i ntûfâm akará-agore Obhasi a ri áfo. Ḿgbán i Jisos yót a yə̂p akparanja, a gbût otûŋ obhô-orûm obhê.

⁵¹Kən Jisos a sə́re ane abhê se, “Maghê ên ábho.” A kô obhô obhê a kúni ka otûŋ í nsʉ́ŋ nnyó, a yîm yê a sôn.

⁵²A kpíghi mân mbâ ane-echî akará-agore Obhasi na ane ayúp abhábhá-ókʉ́rí achot Obhasi na ane-akúí ane mba á chə́me ekam nji á bháe yê ofi. A bhə̂p ábho se “O bháe ên ə̂m áno ofi na akparanja na akpûn noŋ ó tobha ên nnyágha-ejʉ̂ a?

⁵³Ka mfín na mfín, n kúmi na ên ka ókʉ́rí achot Obhasi, o rô fi ên ə̂m jen? Kən atʉ́ mmá a ri ebhú ejə́né na ebhú ikom í Satan, ntûfâm ejírim.”

⁵⁴Á fî mân Jisos á kô á jak ka ókʉ́rí ntûfâm akará-agore Obhasi. Pita a tóbhá ábho nyáŋé-nyáŋé a jak.

⁵⁵Erəmta-ngûn é rî ka étíŋanti ókʉ́rí mbí. Pita a jî chə̂m biji na ekam ane nji é kûn é fáre ngûn mmí.

⁵⁶Kən ḿgbán yót ka ókʉ́rí mbí, nnyo nne-nkáé, a kpo to a yén Pita a kun ebhat ebhát í ngûn ń gbôk, a kêp yê nyamḿ a chôt se, “Nne nnyó eróŋ a ri na Jisos.”

⁵⁷Kən Pita se, “Mmon i nsop, kép, mme ń ka məŋé yê.”

⁵⁸Kpe é ká kət, nne-ndûm yót a yên Pita, a bhə̂p yê se, “To we eróŋ a ri ḿgbán i Jisos yót.” Pita se, “Ebhúk óó!”

⁵⁹Kpe áwa mát á ká tʉrí ochíŋ, nne-ndûm etat a kpô chot se, “Nji táŋám mfá cháŋ. Yê a ri ḿgbán i Jisos, ka a dʉ fə́ne ebhat í Gariri.”

⁶⁰Kən Pita se, “Kép, ntem, ntʉ́ghi nchot nnyi ó chorá áno, mme ń ka riŋí.” Ka nkúbhi ebhú áji nji a nyə́ne áno a chorá, ndûm nkok a kûk.

⁶¹Ńtâ Jisos a fáre echî, amə̂t ábho na Pita á gbô. Pita a tît mân ejûm nji Ńtâ Jisos a sə́re yê ebhú áji se, “Kən ndûm nkok echî-ofú a bhá kuk, we, Pita, tîk o táŋe se ó ka riŋí ə̂m ntə̂m-ntə̂m ésá.”

⁶²Nji Pita a tirî nchot nnyí, a rúi ngyím a fábhá ka eyâ-eték a gárá na ekʉ̂, a jak.

⁶³Á kíi Jisos na ane-enok sê á bhábhé. Ane-enok mbá á róghe mân yê etəmə́m, á kaghá yê ntuŋ.

⁶⁴Á bhôp yê na éfô ka amə̂t, á bhúri na egba. Á bhə̂p mân yê sê, “We nne nnyo ó yena kpe bhaghé ejûm, tak nne nnyo a bhúri wâ.”

⁶⁵Ane-enok mbá á tû yê, á sû osu.

⁶⁶Nji ofú ó chée, ane-akúí ane na ane-echî akará-agore Obhasi é kpê na atóŋá-ebhín, á chə́me á bhúp nchot i Jisos. Nji á kóe yê á bhak ka ochî echəme Atáŋá-eték,

⁶⁷á bhə̂p yê sê, “We nâ Krayis, nne nnyo Obhasi a túmi se a bhá yim ngun á sém a?” A táme ábho se, “Ájoé mme ń sə́ré ên, tîk ó bhó kam ên na mme.

⁶⁸Ḿ bəp ên áfo ebhə̂p, tîk ó bhó tame ên fə́ne.

⁶⁹Kən Obhasi ósô a kî Mmon-i-ntem-nne ekumi ejík, mkpe obhô-orûm obhê. É róghé ka égyé, a kí kumí ka ńjə́ne.”

⁷⁰A kpo chot áno, chénchén ábho á bhə̂p yê mân sê “Nńn, nâ we mân a ri Mmon Obhasi a?” Jisos se, “Nchot eyəné a ri ka echî.”

⁷¹Ane mbá á kí chot mân na atem sê, “E kí kpo chik é yúk bhaghé ejûm etat kən é kâm sê nne nnyó a gbô? É ko atûŋ amə́ré é yuk fép achot mmá á fábhe ka nnyo imê.”