Read ejagham Luk, echî 23 Bible Online

Luk, echî 23 - ejagham bible

Luk, echî 23

¹Echəme njí ndə́m á rúi ngyím á kô Jisos á jak mbâ ntûfâm i Piratus.

²Á róghe ebhúbhúm iyîm mbi sê Jisos a yimî kən á fi yê á bha. Sê, “É yen nne nnyó noŋ á jená a kaghá ane akát ka nsi se á káre onyʉk ka eték. A sə́rá ane se á kâ káre ntí-echî mbâ Ntûfâm i Rom. A kí sərâ ane fə́ne se yê a ri Krayis, ntûfâm eróŋ.”

³Piratus a bhə̂p mân Jisos se “We nâ o ri ntûfâm ane Jus a?” Jisos se “Nn̂, é rî ka ekpak o chorê.”

⁴Piratus a kpíghi mân mbâ ane-echî akará-agore Obhasi na ekam njí, a sə́re ábho se, “Mme ń ka yén kpe echî ejûm nji nne nnyó a yimî kən n kí gbut bəre nchot a bhîp yê.”

⁵Kən ekam ane njí á kpô nyeré nchot sê, “Nne nnyó a jên a fáre Judiya ndə́m, a kpî achot mma á kak ane akát ka nsi á káre onyʉk ka eték. A róghe ka Gariri. Yên égyé a sî mfá.”

⁶Nji Piratus a kpô yúk se Jisos a róghe ka Gariri, a bhə̂p ábho ájoé yê a ri nne Gariri. Á kâm.

⁷Ka mfín ányi ntûfâm ebhat í Gariri a kamá se Erot. A bháe erom áji fə́ne ka eték eyúp í Jerusarem. Nji Piratus a yúghi se Jisos a dʉ ebhat nji Erot a ri ntûfâm, a nyáŋe achot áma a káre se Erot a táŋ.

⁸Ebhú Erot a yéne Jisos, ḿbə́ŋé a gyébhe yê kpe-eji, ka yê a ri ágo a wómá mbôp nnyí se yê a yén Jisos nnyo á sə́ra nná. A kí wom fə́ne a yén noŋ Jisos á yimá iyîm okpógha-biji mbi ane á sə́ra sê á yimá.

⁹A gyê mân Jisos bibhə̂p ebhə́bhə́m, kən kpe eyum, Jisos á ka támé.

¹⁰Ane-echî akará-agore Obhasi na atóŋá-ebhín á fâp ochî á kpô róghé esə́rə́m na oyámá-ḿbə́ŋé echî ábho á fíi Jisos.

¹¹Erot na ane-enok abhê á róghe yê ekaghám ntuŋ, á yimá yê noŋ nnyam. Á kâk yê ḿfô noŋ nnyi ntûfâm, á chə́bhe njəm á tûm mbâ Piratus.

¹²Ka ofú ábhi, otem í Piratus na Erot ó róghe. Mbôp nnyí á rî ka ebhan.

¹³Nji á chə́bhe njəm á kô Jisos á bhak, Piratus a bhîŋ ane-echî akará-agore Obhasi na ane-echî Jus na chénchén ane.

¹⁴A chôt se, “Ó raŋ ên mbá kpá ó ko ên nne nnyó ó bha mbâ amé sê á kará onyʉk ka eték. Ó yen ên sê m bûp nchot eye kən ń ka yén kpe echî nji o kí nyeré ên yê achot.

¹⁵N tûm yê fə́ne mbâ Erot. A yéne kpe obhí mbi nne nnyó a yimî, kə́n á ka fe yê mbâ amé. Deê ń sə́ré ên bəre nne nnyó á ka yim kpe ejûm nji o kí səre ên sê á yúí yê.

¹⁶Tîk n káre ikom á tə̂m yê otəm á nyáŋe yê abhô.” [

¹⁷Á fóne erû etat. Kpe njə́n Erom í Ntə̂m Osʉ́ŋ, Piratus a kí yighí nne yót ka ókúmí a káre ábho.]

¹⁸Ka erom njí mfá, nne etat a kamá se Barabas a ri ka ókúmí. Barabas a gyée ókúmí ka obhô oyúá-nne na onyʉk etat mbi ó fábhe ka eték. Ebhú Piratus a sə́re ábho se yê a kí nyaŋé Jisos abhô, ekam ane njí ndə́m á gyʉ́i sê, “Yúi yê! Nyaŋê Barabas abhô.”

¹⁹

²⁰Kən ka ngyím eye a ri se a kí nyaŋé Jisos abhô, a kpô goré ábho a kpê.

²¹Kən ekam ane njí a kûk káŋ káŋ káŋ sê, “Kúm yê ka ego! Kúm yê!”

²²Piratus a kpô chot ka osúí ntə̂m ésá se, “Nne nnyó a yimî bhaghé obhí? Ń ka yén kpe ejûm nji a gboê kən sê á yúí yê. Tîk n tə̂m yê otəm n nyáŋe abhô.”

²³Kən ane mbá á ká kam. Á kpô gyʉí na ikom sê ábho á woma owóm sê á kûm Jisos ka ego. Piratus á ka məŋé kpe ejûm nji a kí yim.

²⁴A kâm se á kúm Jisos ka ekpak ane á wóme.

²⁵A yíghi fə́ne Barabas ka ókúmí nnyo ábho á wóme. Barabas a gyée ókúmí ka obhô oyúá-nne na onyʉk etat mbi ó fábhe ka eték. A kô mân Jisos a káre ábho.

²⁶Ane-enok á kô fə́ne Jisos á kí ji. Nji á jâk áno, á kpúghi nchíŋa-mbá yót, nne Sarin, a kamá se Simun. Nne nnyó á jak nnyi Jerusarem. Á fî yê á chə́me yê ego Jisos sê a kə́n á tóp Jisos.

²⁷Njok ekam ane á tôp Jisos á jak. Ka ekam áji etʉ̂ ane-akáé á chə́me abhô ka echî á rʉra á tobha.

²⁸Kən Jisos a kpíghi a sə́re ábho se, “Ane-akáé Jerusarem! Deê o kâ rʉ́ri ên ə̂m. Rʉ́ri ên biji ibhə́né na abhon abhə́né,

²⁹ka mme ń yen bəre ebhú é kə́ bha osí nji ane tîk á kûk sê, ofa ee, na ane mba á nyə́ne á ká ji abhon, na mba á ká yabhe abhon, na mba tat mba á kət ogum!

³⁰Tîk á tô fə́ne sê, é nop é chiŋ sê agúí ayúp á gbô á nyére êt, mma chiîŋ á bhúi êt.”

³¹A chôt mân se, “Ékpoê étí é ru ngûn é chiŋi étí mbít. Ájoé mme, nnyo n di noŋ étí mbít, ngun á kí seŋé ə̂m nná, kən ên mân?”

³²Nji á jâk á jí kúm Jisos, á kô fə́ne ayimá-obhí ábháe sê á jí kúm.

³³Nji á síi ka egúí nji á bhíŋa sê Ékə́p-Echî, á kûm yê. Á kûm fə́ne ayimá-obhí ábha, kpe nnyón ka ejê ego á tə̂p, yót mkpe obhô-orûm í Jisos, nnyo tat mkpe obhô-okáé.

³⁴[Jisos a chôt mbâ eye se, “Ńsé, ri nsôn su obhí ábho, ka á ká məŋé ejûm nji á yíma áno.”] Ane-enok mbá á kô ḿfô eye á tûp ebháŋé á mə́ŋe ekpak á kí kirí á kó.

³⁵Ekam ane é gyím áfo é yena iyîm mbi á yíma mbâ Jisos. Ane-echî Jus á gyê yê ntuŋ ekaghám sê, “Yê nnyo á chorá se yê a ri Krayis, nne nnyo Obhasi a túmi se a bhá yim ngun á sém, a yîm ane etat á sem, a yim máná biji ibhê eróŋ.”

³⁶Ane-enok fə́ne ka mbí ábho okagha-ntuŋ á kô ekâ aməm á bhâ káre yê sê a gwó.

³⁷Á chôt na yê sê, “Ájoé we nâ o ri ntûfâm ane Jus, séme biji ibhâ.”

³⁸Á kô ekpághé-étí á sêŋ ka ńjə́ne sê, “Ḿfa a ri ntûfâm ane Jus.” Á kûm ńjə́ne njəm-ósô ego Jisos.

³⁹Nyima-obhí yót nnyo a tʉ́k ka ejê ego a bhə̂p Jisos se “To we nâ Krayis, nne nnyo Obhasi a túmi nná se ó bhá yîm ngun á sém? Yim máná ó sém na êt eróŋ.”

⁴⁰Kən ntem owe nnyo ngá a nyân yê se, “We efup é bhó yim wâ na Obhasi a? Kpe noŋ êt fép e ri ka ekʉ̂ njí jə́t,

⁴¹ejə́ré ekʉ̂ é fon echî. Obhí obhə́ré mbi e yimî ó bhik ekʉ̂ nji é kpok nná. Kən yê a kí kpo ekʉ̂, ejûm ebhí á ka yim.”

⁴²A kpíghi mân a chôt mbâ Jisos se “Jisos, deê o kâ gyíni ə̂m ebhú nji ó chəbhé njəm o bhák noŋ ntûfâm.”

⁴³Jisos a táme se, “Deê mme ń sə́ré wâ ó yúk bəre ka ofú mbi égyé, we o kí joé na mme ka Eték Obhasi.”

⁴⁴Nji ńkánínká a síi ófó na ébháe nnyi nchên, njúí a tân. Ejírim é bhúi eték ndə́m tata ńkánínká a sî ésá nnyi egu.

⁴⁵Íkpéghé mfi á bhúi nná ka nnyo-mbá ókʉ́rí achot Obhasi í yâ mbat ébháe.

⁴⁶Jisos a gyʉ́i se, “Ńsé! Ń kare ńtʉgântʉ amé ka obhô obhâ.” A kpo to a chot, a kpô fə́ne.

⁴⁷Nji ntûfâm ane-enok a yéne nji é fábhe, a kâm ka ngyím ányi na nkat mbâ Obhasi se “Ka etʉri, nne nnyó a ri nnyen i nne.”

⁴⁸Ekam ane nji á chə́me nná áfo fə́ne á yena ejûm nji é fábhe á kʉ́ra na ekpatə́m ofiná-ḿbə́ŋé.

⁴⁹Ane chénchén mba á mə́ŋe Jisos nono é kpê na mba ane-akáé mba á róghe yê etóbhóm ta ka Gariri á gyími nyáŋé-nyáŋé á yéna achot mmá.

⁵⁰Kən nne-ndûm etat a ri nnyo á kamá se Jusep, a dʉ ka eték Arimatiya ka ebhat í Judiya. Nne-ndûm nnyó a ri nnyen i nne eróŋ nnyo a fonê ejík ka biji ibhê. A nyə́ne a chighá mbôp nnyí se mfín otúi Obhasi ó bhâk a sí. Yê a ri fə́ne ka echəme Atáŋá-eték, kən ta ka eróghá-ndə́p yê á ka kam na otáŋá-nchot ábho na ekúmúm nji á kúmi Jisos ka ego.

⁵¹

⁵²A jak mbâ Piratus a jî kô ikom se yê a kí yighí Jisos. Piratus a káre yê ikom.

⁵³A jî yíghi mân ékpoê Jisos ka ego. A bhôp na ébháré-éfô a jî kə̂n ka mfúk mmí ta á sə̂m á kí ka eránám. Á ká nok okə́n kpe nne ka mfúk ámi.

⁵⁴Ofú ábhi a ri egu ofú oyoá-biji mbi ane Jus.

⁵⁵Ane-akáé mba á dʉ̂ na Jisos ta ka Gariri, á tôp Jusep eróŋ ta á yên eránám nji a kə́ne Jisos. Á yên fə́ne ebho a kə́ne yê kən á kʉ́ra.

⁵⁶Á bhâ kô akʉ́ mma á fóne énoê egyʉ mma ábho tîk á jak á jî chóme ka ékpoê-biji Jisos. Ofú oyoá-biji ó sî, ane-akáé mbá á yóe biji ka ekpak ebhín é fíi.