Read ejagham Luk, echî 3 Bible Online

Luk, echî 3 - ejagham bible

Luk, echî 3

¹Ka ebhú áji, eyum Obhasi é gyê Jon ka biji. Jon a ri mmon i Sakariya. Nâ osúí nyâ ekû nnyi Taberiyus a ri Ntûfâm i Rom. Pontus Piratus a ri ntûfâm eték ka ebhat í Judiya, Erot a fôn otúi ebhát í Gariri. Mmon-i-nnyen owe nnyo á kamá se Firip a ri fə́ne ntûfâm ebhat í Ituriya na Trakonitus. Otúi ebhat Abiren ó fóne Lisaniyas ebhú áji. Ka ebhú njí, a ri Anas na Kayifas nâ á rî ane-echî akará-agore Obhasi. Ebhú eyum Obhasi é gyée Jon ka biji, a ri ka etə́m.

³A bhâ mághe mân etə́m, a jená a fárá nték fép nnyi a ri ebhat aya Jodan, a sə́rá otîp Obhasi mbâ ane se á yóŋe ḿbə́ŋé, á mághe obhí ábho, a fúk ábho ayép, tîk Obhasi a rî nsôn a sû obhí ábho.

⁴Achot mmá á fap fə́ne ka ekpak nji nkara-otîp nnyo á kamá se Asaya a séŋe se, “Nne yót a ri ka etə́m, a bhíná a sə́rá ane se, ‘Tʉrî ên mbá ntûfâm, ka yê a kə́ bha. Yim ên ebhə̂k é jóe tə́níní nji yê a kí chiŋ.

⁵Kpúghi ên ábhírí chénchén, cherê ên abhon agúí na mma yúp. Eji nji é jíi nchík, deê ó tə́né. Nji é rî gbúghí-gbughí, deê o kók ên é jóe goghéé.

⁶Tîk ane chénchén á yên ekpak nji Obhasi a kí yim ane abhê á sém.’ ”

⁷Nji Jon á kará áno otîp mbí a jak, ekam ane á fâp á bhak mbâ eye sê á bhá fúk ayép. Kən Jon a chôt mbâ ábho se, “O ri ên ńgô, ekpin noŋ efomnté! Énê a sə́re ên se kə́n o bê ên oyámá-ḿbə́ŋé Obhasi mbi ó kə́ bha.

⁸Ájoé ó səre ên sê ó yoŋe ḿbə́ŋé, ó maghe ên obhí obhə́né, nâ yim ên ekpin nji nne a kí yen sê ó yoŋe ên ka etʉri. O kâ kére ên sê Ńsé owəné Abraham a ri ágo, nchot cháŋ! N kí səre ên bəre Obhasi kə́n a kô atáé mmá a yîm á chə́bhe biyábhé-abhon Abraham.

⁹Kpe mfá-mfá, efúk é rî ka obhô nji á kí gbut átí na arʉk-arʉk, á túp ka nsi. Kpe njə́n étí mân nji é ká kap nnyen i nkap, á kí gbut á túp ka erəmta-ngûn.”

¹⁰Nji Jon á chorá áno, ane á bhə̂p yê sê, “Kən tîk e yîm mân nan?”

¹¹Jon a táme ábho se, “Deê kpe énê nnyo a fonê nkʉ̂ ébháe, a karé yə́t mbâ nne nnyo á ka fon, nne nnyo a fonê édî, a kirí na ntem.”

¹²Etʉ̂ abhə́bhá-ntí-echî mba á bháe ayép ofúk, á bhə̂p Jon sê, “Ńsé, êt e kí yim nan?”

¹³Jon a sə́re ábho se, “Ka kó ên ntí-echî mbâ ane ń chíŋi ekpak nji ebhín é fíi.”

¹⁴Etʉ̂ ane-enok á bhə̂p Jon sê, “Êt mân, tîk e yîm nan?” Jon a sə́re ábho se, “Ka ko ên ntí mbâ ane ka ikom, ka nyére ên nne nchot ka echî nnyi á ka yim. Deê mô ntí nnyo á kára ên ka emané nnyam-ósô a bhik ên.”

¹⁵Nji Jon á chorá áno achot mmá chénchén, óbhə́ŋé ane ó rúi ngyím, á róghe ekérém sê, “Nâ-ngá Jon nnyó a ri Nne nchane nnyo Obhasi a túmi se a bhá yim ngun á sém tîk.”

¹⁶Kən Jon a sə́re ábho se, “Mme n kí fuk ên a ri ayép, kən nnyo a faŋê a chíŋi ə̂m a kə́ bha. Ń ka bhik nnyo n kí kpat kpe arík iyîm-akát ibhê. Nne nnyó a kí fuk ên na Obhasi Ebhare Ntʉgantʉ na erəmta-ngûn.

¹⁷A fî nchekere nnyi tîk a châk átép a yíghi ka nkap. Á chak, a kí ko mfoné nkap a kî ka ókpáré, a ríghi átép ka ngûn mmi etánám, ḿ bó tan.”

¹⁸Ka mkpak etî-etî, Jon a kaghá ane ḿbə́ŋé, a sə́rá ábho otîp ogyebhá-ḿbə́ŋé Obhasi.

¹⁹Kən Jon a bhâ gyê Ntûfâm Erot ka ndə́p, ka a tabhê Erodiyas nnyo nkáé mmon-i-nnyen owe, a kô. Erot a yîm mkpak obhí nnyi tat a tî.

²⁰Nji Jon á səra yê se a yîm obhí, Erot a kpére a yîm mân obhí mbi ó chíŋi obhô: a fî Jon a kâk ka ókúmí.

²¹Kən Jon a gyé ókúmí, ane chénchén á jâk mbâ eye a fúghá ábho ayép. Jisos a jak eróŋ. Ebhú á fúgha yê ayép, Jisos a róghe egoróm Obhasi, ósô ó rə́bhe.

²²Obhasi Ebhare Ntʉgantʉ a kí bhət a bhák mbâ eye noŋ ibhʉ́í. Eyum é fâp nnyi ósô se, “We a ri Mmon okot omé nnyo ḿ foná ekpatə́m ogyebhá-ḿbə́ŋé.”

²³Ebhú Jisos a róghe etûm Obhasi ejê, a sî ejûm noŋ nyâ esam njəm ófó. Ane á sə́ra sê yê a ri mmon i Jusep, nnyo mmon Eri

²⁴nnyo mmon i Matat, nnyo mmon i Libhayi, nnyo mmon i Merechi, nnyo mmon i Janayi, nnyo mmon i Jusep,

²⁵nnyo mmon i Matatiyas, nnyo mmon Amos, nnyo mmon i Nayum, nnyo mmon Esri, nnyo mmon i Nagayi,

²⁶nnyo mmon i Mat, nnyo mmon i Matatiyas, nnyo mmon i Semeyin, nnyo mmon i Josek, nnyo mmon i Joda,

²⁷nnyo mmon i Joyanan, nnyo mmon i Resa, nnyo mmon i Serubabe, nnyo mmon i Seyatiye, nnyo mmon i Neri,

²⁸nnyo mmon i Merechi, nnyo mmon Adi, nnyo mmon i Kosam, nnyo mmon Emadam, nnyo mmon Ere,

²⁹nnyo mmon i Josuwa, nnyo mmon Eriyesa, nnyo mmon i Jorim, nnyo mmon i Matat, nnyo mmon i Libhayi,

³⁰nnyo mmon i Simun, nnyo mmon i Juda, nnyo mmon i Jusep, nnyo mmon i Jonam, nnyo mmon Eriyakim,

³¹nnyo mmon i Mereya, nnyo mmon i Mena, nnyo mmon i Matata, nnyo mmon i Natan, nnyo mmon i Debhit,

³²nnyo mmon i Jesi, nnyo mmon Obet, nnyo mmon i Boyas, nnyo mmon i Saramun, nnyo mmon i Nason,

³³nnyo mmon Aminadap, nnyo mmon i Ram, nnyo mmon Esron, nnyo mmon i Peres, nnyo mmon i Juda,

³⁴nnyo mmon i Jakop, nnyo mmon Isak, nnyo mmon Abraham, nnyo mmon i Tera, nnyo mmon i Nayo,

³⁵nnyo mmon i Seruk, nnyo mmon i Reyu, nnyo mmon i Perek, nnyo mmon Ebe, nnyo mmon i Sera,

³⁶nnyo mmon i Kayinan, nnyo mmon Afasat, nnyo mmon i Sem, nnyo mmon i Nowa, nnyo mmon i Lamek,

³⁷nnyo mmon i Metusera, nnyo mmon Enok, nnyo mmon i Jaret, nnyo mmon i Mayarari, nnyo mmon i Kenan,

³⁸nnyo mmon Enos, nnyo mmon i Set, nnyo mmon Adam, nnyo mmon Obhasi.