Read ejagham Luk, echî 8 Bible Online

Luk, echî 8 - ejagham bible

Luk, echî 8

¹Nji achot mmá á chíŋi, Jisos a jên a fáre ka nték nnyi yúp na abhon í nték a sə́rá otîp ogyebhá-ḿbə́ŋé otúi Obhasi. Ágbán abhê ófó na ábháe á jená na yê.

²Mba ane-akáé mba Jisos a yighî ojê ka ḿbə́ŋé na mba a yimî bimaŋé í mân á rî na ábho. Meri nnyo Jisos a yighî mkpak ojê enígisá ka ḿbə́ŋé a ri ka ekam ane-akáé mbá.

³Jowana nnyo nkáé Kusa a ri eróŋ. Kusa a ri nne nnyo á kebha chénchén iyîm ka ókʉ́rí Ntûfâm Erot. Susana na ane-akáé mba tat etî-etî á rî ka ekam ane njí. Nâ ane-akáé mba á bhíbha ntí ábho sê á kâk Jisos na ágbán abhê obhô ka etûm ábho.

⁴Ane mba á dʉ̂ ka nték na nték, á bhak mbâ Jisos. Nji á chə́me etî-etî, a tûp egan a káre ábho se,

⁵“Ofú bhə́t, nyima-ebhin yót a jak a jí bhe nkap ka ebhin ejê. Ebhú a kí bhe nkap nnyí, aməghe mma tat á gbô ka mbá, ane á chêm, nnón fə́ne ḿ bâ dî.

⁶Etʉ̂ á gbô ka ngûm atáé-átáe. Nji á dʉ́i, á kpô, ka nsi á ka nop ka ngûm nnyí.

⁷Etʉ̂ á gbô ka ajoŋe, ajoŋe á kúi á nyére.

⁸Kən mma tat á gbô ka nsi édî, á kúi nono, á kâp, á káre aməghe jok jok.” Jisos a sə́re mân ábho se, “Deê nne mân nnyo a fonê atûŋ mma á yugha mbá, a yúk.”

⁹Atóbhá Jisos á bhə̂p yê sê a sə́ré echî egan ejê.

¹⁰A táme ábho se, “Obhasi a káre ên aron se ó mə́ŋe ên ejûm ebhə̂t nji otúi obhê, kən ane mba tat tîk á yugha a ri ka ngan. Echî é rî se, ‘Á kep, á bhó yen, á yuk, é bhó jae ábho.’ ”

¹¹“Ḿfa nâ echî egan í nyima-ebhin. Nkap nnyí nâ otîp Obhasi.

¹²Nnyi a gboê ka akpe obhá nâ ane mba á kí yuk otîp Obhasi, kən Satan a bhâ yíghi ḿbə́ne ka ḿbə́ŋé ábho se á kâ kâm na ḿbə́ne á sém.

¹³Nnyi a gboê ka ngûm atáé-átáe nâ ane mba á kí yuk otîp Obhasi, á kô ḿbə́ne na ogyebhá-ḿbə́ŋé. Kən otîp mbí ó bhó fon arʉk ka ḿbə́ŋé ábho. Ekamám ábho é bhó rap mbá. Ka nan? Ebhú egaé é bha, á kí tʉ biji.

¹⁴Nnyi a gboê ka ngûm ajoŋe nâ ane mba á kí yuk, kən íkíkéré ngun na ekot í ntí na énoê ekpin edíím í bhó karé mbá ḿbə́ŋé ábho nnyi a fonê na Obhasi a kúí nono.

¹⁵Nnyi a gboê mân ka nsi édî nâ ane mba á kí yuk otîp Obhasi, á tábhe ḿbə́ne na ḿbə́ŋé ábho jáé, á kaghá biji sê á nôk ta á káre nnyen i nkap.”

¹⁶Jisos se, “Kpe nne cháŋ nnyo kə́n a nyóe ńtʉ́ríkáŋ, a kô ejûm a bhúi na kpe ebhú tat a kî a ri ka esə́n enuŋ. A nyoê ńtʉ́ríkáŋ nnyí se yê a kí ka echî ébhúní, ane á gye, á yên ebhát.

¹⁷Kpe ejûm nji é kí kət ka ebhə̂t, é bhó fap jáé ane á yén cháŋ. Kpe nchot fə́ne cháŋ nnyi a kí kət á bhó fap kpúŋúnúŋ ofú bhə́t.

¹⁸Kak ên mân achot mma o yúghi ên ka echî, ka nne nnyo a fonê ofon á kí kpe yê, kən yê nnyo á ka fon, kpe mkpât ányi nnyi yê a kí me ḿbə́ŋé se yê a fôn á kí tabhé.”

¹⁹Nji nnyen i Jisos na abhon-í-nnyen á bháe yê obhiŋ, á dâŋ kən á ká si yê, ka ane etî-etî á bhui yê á kak ka étíŋanti.

²⁰Nne yót a sə́re Jisos se, “Nnyen owa na abhon-í-nnyen abhâ á rî ka éré, á kí wom á yén wâ.”

²¹Kən Jisos a táme se, “Nnyen omé na abhon-í-nnyen abhámé nâ ane mba á kí yuk otîp Obhasi, á yimá fə́ne ekpak nji Obhasi a wóme.”

²²Ofú bhə́t Jisos a sə́re atóbhá abhê se, “É yáŋe njəm aya nnyi ńgô.” A gyê ka okpi na ábho á róghe ebhúghúm á jak.

²³Jisos a gbô eyô. Ekpatə́m í mfêp a róghe enoghóm. A yîm ayép á róghe egyéém ka okpi nji kpe onyáŋé cháŋ.

²⁴Ane mba á tóbha yê á bhâ sʉ̂k yê sê, “Ńsé! Ńsé! E kə́ bha otán ka aya.” Jisos a rúi ngyím a nyân mfêp na ébhúghí-aya, í kími, ngûm a nâ.

²⁵A bhə̂p mân ábho se, “Ḿbə́ŋé nnyi o kíi ên na Obhasi a ri fan?” Kən á fôn efup, biji í mân ábho kpe-eji. Á kí bhəp atem sê, “Énê nná nnyo kpe a nyáne mfêp na kpe ébhúghí-aya, í yûk yê?”

²⁶Nji mfêp a kími, Jisos na ane abhê á bhúghi á yáŋe aya mmá á sî ebhat í Gerasin, Gariri a kə̂t njəm aya nnyi ńgô.

²⁷Nji Jisos a fábhe ka okpi, nne-ndûm eték í Gerasin yót a jî gbə́me yê. Ojê ó kára yê oseŋe kpe-eji. Nne nnyó a jên oyán ebhú é rap, ka njû a rô kpó kumí təm ka ebhat ayəm-áyə̂m.

²⁸Nji a yéne Jisos, a gbô yê ka akát, a kûk káŋ káŋ káŋ se, “Wóó Jisos, Mmon Obhasi ósô, ó woma jen na mme? Ń gore wâ, ka kpə́re ə̂m.”

²⁹Nne-ndûm ányo á chorá áno, ka Jisos a nyân ojê obhê mbí se ó fáp ó mághe yê. Nji ojê mbí ó rui nne-ndûm nnyó ngyím, kpe á bhóbhe yê akát á bhôp abhô na mkpokobhé, ane á bhabha yê, á kí kim, ojê ó bhîm yê a gyê etə́m. É fap áno ntə̂m a tî.

³⁰Jisos a bhə̂p yê mân se, “Ó kamá se jen?” A táme se, “Ń kamá bəre Nchəme-ojê.” A kamê áno, ka ojê ó ti yê ka ḿbə́ŋé.

³¹Nchəme-ojê nnyí á góre Jisos sê a kâ tûp ábho ka ókímánkí[5] mbi ó rî áfo.

³²Ekpatə́m ekam akûk é rî áfo é dik édî ka mkpe egúí. Ojê mbí ó góre Jisos sê a túm ábho á gyé akûk mmá. Jisos a kâm.

³³Nji ó mághe nne-ndûm nnyó ó gyê akûk, akûk mmá chénchén á bhéne á bhə̂t ḿkpábhé egúí ányi, á gbô ka aya á tân.

³⁴Nji ane mba á bhábha akûk áma á yéne nji é fábhe, á bê, á jak, á jî sə́re ka eték na mbin chénchén á fáre.

³⁵Ane á fâp sê á bhá yén ejûm nji é fábhe. Nji á bhâ kpúghi Jisos, á yên nne nnyó, á ka kpó fon ojê, a chə́bhe njəm ka nne, a kun áfo ka akát í Jisos. Efup é gyê ábho.

³⁶Ane mba á yéne oyén na amə̂t, á sə́re mba á bháe, ekpak nji Jisos a yimî nne ányo a sôn.

³⁷Chénchén ane mba á dʉ̂ ka ebhát í Gerasin, á sə́re Jisos sê a maghé nték ábho ka á chəbhe á fubhá ofup. Jisos fə́ne a jî gyê okpi a mághe ebhat áji.

³⁸Nne nnyo á ka kpó fon nná ojê, a góre se yê a tóp Jisos, kən Jisos á ka kam.

³⁹A tûm yê a kʉ́rá se a jí səre ejûm nji Obhasi a yimî a káre yê. Nne nnyó fə́ne a jak ka eték, a jên a fáre, a sə́rá ejûm nji Jisos a yimî a káre yê.

⁴⁰Ebhú Jisos a chəbhê njəm ka njəm aya nnyi ńgô, ane etî-etî á tábhe yê na ogyebhá-ḿbə́ŋé, ka á rî mbôp nnyí á chighá yê.

⁴¹Ka ngyím ányi, nne-echî etat ka óchâm Obhasi, a kamá Jayirus, a bhâ gbô yê ka akát a góre se Jisos a bhá ka njû eye,

⁴²ka mmon owe yót nnyo nne-nkáé a kí kpo. Mmon nnyó a ri nyâ ófó na ébháe. Nji Jisos á jená a jak, ane mba á tóbha yê á nyoghá, á bhuá yê, kpe ebhaŋe cháŋ.

⁴³Nne-nkáé yót a ri áfo nnyo á maŋá emaŋé etat nji agyʉ́ŋ á fábha yê ka biji. Emaŋé njí é ka nyâ ófó na ébháe. Nne nnyo a məŋê yê oyim a son cháŋ.

⁴⁴Nne-nkáé nnyó a bhák njəm-ńjə̂m, á bhâ kə́me nkuŋi-nkʉ̂ Jisos, agyʉ́ŋ mmá á kími ntə̂m yə́t, emaŋé é mân.

⁴⁵Jisos a bhə̂p se, “Énê a kəmê ə̂m?” Kpe nne nnyo a kamê cháŋ. Kən Pita nnyo ḿgbán owe a táme se, “Ńsé, o kí yim nan ó bhə́p ntʉ́ghi ebhə̂p njí ka ekam ane nji é bhúi wâ nná?”

⁴⁶Kən Jisos se, “Ń diŋi bəre nne a kə́me ə̂m, ka ń yuk noŋ ikom í rúi ə̂m ka biji.”

⁴⁷Nji nne-nkáé nnyó a yéne se Jisos a mə́ŋe, a bhâ gbô yê ka akát a kə̂t a choghá ka biji. Nne-nkáé nnyó a sə́re ka ochî ane chénchén ejûm nji é yími kən yê a kə́me Jisos na ekpak emaŋé ejê é máne ntə̂m yə́t.

⁴⁸Jisos a sə́re yê se, “Mmon omé, ḿbə́ŋé eya nnyi o kíi, a yîm wâ ó sem. Choŋ kʉ́ri, deê Obhasi a joé na we.”

⁴⁹Nji Jisos a nyə́ne a chorá áno, nne yót a dʉ ka njû nne-nyúp nnyó, a bhâ sə́re yê se mmon owe a kpô, a kâ kpô karé Ńtâ Jisos ńtə́mé.

⁵⁰Jisos a kpo to a yúk, a sə́re Jayirus se, “Ka fûp, kî a ri ḿbə́ŋé, mmon owa tîk a sôn.”

⁵¹Nji Jisos a síi ka njû Jayirus, á ka kam se kpe nne etat a gyé ka etím na yê é ká chiŋi Pita na Jon na Jems na ńsé na nnyen i mmon ányo.

⁵²Kpe énê nnyo a ri áfo a kí rʉri a gbok a fíná nji mmon nnyó a kpóe. Jisos a sə́re ábho se, “Ka kpó rʉri ên chichi, mmon nnyó á ka kpó, á yaá a ri eyô.”

⁵³Kən ane chénchén á yóe yê a ri amə̂ŋ, ka á məŋe sê mmon a kpô.

⁵⁴Kən Jisos a fî mmon nnyó ka obhô a sə́re yê se, “Mmon omé, duî ngyím.”

⁵⁵Eyô mmon nnyó é chə́bhe njəm, a tə̂m fə́ne a rúi ngyím ntə̂m yə́t. Jisos a sə́re mân ane abhê se á kó édî á káre mmon nnyó a dí.

⁵⁶Biji í kpô ńsé na nnyen i mmon nnyó kpe-eji. Kən Jisos a bhîn a káre ábho se á kâ sə́re nne kpe yót ejûm nji é fábhe.