Read ejagham Jon, echî 11 Bible Online

Jon, echî 11 - ejagham bible

Jon, echî 11

¹Nne-ndûm yót a ri ka eték í Betani a kamá se Lasaros. A bhâ gbô emaŋé. Betani a ri eték nji Meri na mmon-i-nnyen owe Mata á kúma.

²Nâ Meri nchane yót nnyo a yʉrî nná akʉ́ ka akát í Ńtâ Jisos, a fôn na nnyʉ̂-echî eye ka ekarám ejík. Mmon-i-nnyen owe Lasaros nâ á maŋá áno.

³Abhon-í-nnyen í Lasaros á bhâ tûm otîp mbâ Jisos sê, “Ntûfâm, nne owa nnyo o korê a kí maŋé.”

⁴Nji Jisos a yúghi otîp mbí, a chôt se, “Á bhó kpo ka emaŋé njí, kən ejík tîk é jóe é káre Obhasi. Ka obhô emaŋé njí, Mmon Obhasi tîk a fôn ejík.”

⁵Jisos a fonê okot kpe-eji na Lasaros na abhon-í-nnyen abhê, Mata na Meri.

⁶Kən kpe na okot mbí, nji a yúghi otîp emaŋé Lasaros, a chîk mfín a chîŋ ébháe kən a nyíŋi biji.

⁷Mfín ébháe a kpo to a chíŋ, a sə́re atóbhá abhê se, “É chə́bhe ên njəm nnyi Judiya.”

⁸Kən á bhə̂p yê sê, “Ńsé, mfá-mfá asík ane mba á rî ágo á síghi otúp nná wâ na atáé a? O kí kpo ji ágo a?”

⁹Jisos se, “Á! To ó məŋe ên sê áwa á rî ófó na ábháe mma efín. Nne nnyo á jen na efín, á bhó kobhé ogbo, ka ebhát í ngun nnyí é kí yim yê a yén mbá.

¹⁰Kən nne nnyo á jen na atʉ́, a kí kobhé, ka ebhát njí kpó cháŋ na yê.”

¹¹Nji a túbhi egan njí a káre ábho, a sə́re mân ábho se, “Ntem owəré Lasaros a gbô eyô, n kí ji yê osʉk.”

¹²Kən á bhə̂p yê sê, “Ntûfâm, ájoé á yaá a ri eyô, tîk a rúi ngyím maná.”

¹³Eyô nji Jisos á chorá áno a ri ekʉ̂, kən atóbhá abhê á yóŋa á kera sê mfoné eyô.

¹⁴A sə́re mân ábho jáé se, “Lasaros a kpô.

¹⁵Kən ka echî ejə́né, é gyebhe ə̂m nji ń ka joé ágo ebhú a kpóe. Echî aŋ? Mfá-mfá tîk o kî ên mân ḿbə́ŋé nono na mme. Deê ên kpá é jî ágo.”

¹⁶Kən ḿgbán owe yót a kamá se Tomas, á bhíŋa yê fə́ne sê ofât, a sə́re atem se, “É tóp ên yê é jí kpó eróŋ.”

¹⁷Nji Jisos a síi ágo, a yûk sê á kən Lasaros á ka mfín énî.

¹⁸Ó yəp Betani ó sí Jerusarem, é rî noŋ kpe ntáé ébháe.

¹⁹Ka obhô mbí, ane etî-etî ka ebhat í Judiya á bhak Mata na Meri oyén ka ekʉ̂ mmon-i-nnyen ábho.

²⁰Mata a kpô yúk sê Jisos a kə́ bha, a bhéne a jî kpúghi yê. Meri a kə̂t ka njû.

²¹Mata a sə́re Jisos se, “Ntûfâm, ebhú sê o ri mfá eê, mmon-i-nnyen omé kə́n á ka kpó.

²²Kən ḿ məŋe bəre kpe mfá-mfá njí, nji-nji o bhə́bhe Obhasi, a kí karé wâ.”

²³Jisos se, “Mmon-i-nnyen owa tîk a chə́bhe njəm a nyə́me.”

²⁴Mata se, “Ḿ məŋe bəre mmon-i-nnyen omé tîk a chə́bhe njəm a nyə́me ka ntəma-njəm ofú.”

²⁵Jisos se, “Mme nâ ń sʉghá ane mba á kpóe, n kará ekpin. Kpe énê nnyo á ki ḿbə́ŋé na mme, kpe a kpóe okpó, a kí fon ekpin.

²⁶Nne nnyo a nyə́ne á ka kpó, kən a kî ḿbə́ŋé na mme, á bhó kpo a tán. Ó kam nchot amé a?”

²⁷Mata se, “Ntûfâm, ń kam. Ń kam bəre we nâ o ri Krayis, Mmon Obhasi nnyo á sə́re sê tîk a bhák ka ngun.”

²⁸Mata a kpô chot áno, a mághe a jî bhîŋ mmon-i-nnyen owe Meri kəma-kəma, a sə́re yê se, “Ńtâ Jisos a bhâ, a kí wom a yén wâ.”

²⁹Nji Meri a yúghi, a tə̂m fə́ne a rúi ngyím babhap, a jí kpughi Jisos.

³⁰Jisos a nyə́ne ka eji Mata a jî kpúghi yê, á ka gyé kpá eték.

³¹Nji Meri a ruî ngyím ntə̂m yə́t a kí ji, ane mba á rî áfo á fik yê ekʉ̂, á rúi fə́ne ngyím, á kí top. Echî aŋ? Á kéra sê a kí ji orʉ́rí ekʉ̂ ka oyəm.

³²Meri a jak a jí kpughi Jisos. Nji a yéne yê etʉri, a gbô yê ka akát, a sə́re yê se, “Ntûfâm, ebhú sê o ri mfá eê, mmon-i-nnyen omé kə́n á ka kpó.”

³³Nji Jisos a yéne Meri na ane mba á tóbha yê Meri, á kí rʉri ekʉ̂, nsôn a yîm yê kpe-eji, a fâk echî.

³⁴A bhə̂p ábho se, “O kə́ne ên yê fan?” Á sə́re yê sê, “Ntûfâm, bhák ó jí yén.”

³⁵Obhə́bhe ó súi Jisos amə̂t.

³⁶Ane á kpó to á yén á chə́bhe á chorá sê, “A kôt yê oó, a kôt yê oó.”

³⁷Kən etʉ̂ ábho á rî áfo mba á chóra sê, “To a rə́bhe amə̂t í ntána-amə̂t? Jen á ka gbʉ́í nne nnyó a kâ kpô?”

³⁸Nsôn a kpô yim Jisos kpe-eji, a jak ka oyəm mbí. Oyəm mbí a ri mfúk ka eránám mmi á bhúi ntáé ka nnyo.

³⁹Nji a síi ka eji oyəm mbí, a sə́re ane se, “Yighî ên ntáé ányi.” Kən Mata, nnyo mmon-i-nnyen i Lasaros, a táme se, “Ntûfâm, á yighí ntáé ányi, egyʉ tîk é tî é chîŋ, ka á kən yê á ka mfín énî.”

⁴⁰Jisos se, “To ń səre wâ bəre ó ki ḿbə́ŋé, tîk o yên ikom Obhasi?”

⁴¹Á yíghi ntáé nnyí ka nnyo oyəm. Jisos a yûŋ mân amə̂t a kêp ósô, a chôt se, “Ńsé, ń kup wâ ka ó kam na mme.

⁴²Ḿ məŋe bəre we ó kamá na mme chénchén ebhú. Kən ń chorá áno ka obhô ane mba á gyím nná á fáre, bəre á kâm sê we nâ o túmi ə̂m.”

⁴³A kpo to a chot áno, a kûk káŋ káŋ káŋ se, “Lasaros, duî ngyím bhák.”

⁴⁴Lasaros a fâp fə́ne a kə́ bha ekpak á fə́re yê á bhôp akát na abhô na ochî, kən á kə̂n. Nji a fábhe, Jisos a sə́re ane se á kpát yê a ji.

⁴⁵Ane Judiya etî-etî mba á bháe Meri oyén, á yên ejûm nji Jisos a yimî, á yûŋ ḿbə́ŋé á kî na yê.

⁴⁶Kən etʉ̂ ábho á jak mbâ ane echəme Farasi á jî sə́re ejûm nji Jisos a yimî.

⁴⁷Nji á sə́re ábho, ane echəme Farasi na ane-echî akará-agore Obhasi, á bhîŋ echəme Atáŋá-eték. Nji á chə́me, á kí bhəp sê, “É bhak oyim nan na nne nnyó ka ntûm okpógha-biji nnyi á yimá nná?

⁴⁸É maghé sê yê a ji ochî, ane chénchén á kí yuŋ ḿbə́ŋé á kî na yê. Ńji tîk é yîm ane Rom mba á fíi ikom eték á bhíbhi ókʉ́rí achot Obhasi obhə́ré, á yúi êt chénchén.”

⁴⁹Kən nne ábho yót a kamá se Kayifas nnyo a ri ntûfâm akará-agore eya áji, a sə́re ábho se, “O kí nəme ên.

⁵⁰Ó ka məŋé ên sê é nop sê nne yót a kpó ka echî ane chénchén na nji á yúi ane chénchén a?”

⁵¹Kayifas a chorê áno nchot nnyí fóŋ. Á ka məŋé se noŋ ntûfâm akará-agore Obhasi a sə́re noŋ nkara-otîp Obhasi se Jisos tîk a kpô ekʉ̂ ka echî ane Jus chénchén.

⁵²Á bhó kpo ka echî ane Jus átíŋ, a kí kpo fə́ne se yê a chuí abhon Obhasi mba á rî nyáné-nyáné ka ngun á chə́bhe ejûm jə́t.

⁵³É róghé ta ka ofú ábhi, atúi-ofâm ane Jus á bhôp ekubhi á kî sê á yúí Jisos.

⁵⁴Jisos a bhâ kə̂t mân a jená ka ebhə̂t ka Judiya. A mághe a jak ka eték Efrem, nji é rî kpít na etə́m. A kúmi ágo na ágbán abhê.

⁵⁵Erom í Ntə̂m Osʉ́ŋ é kpiri. Ane etî-etî á maghe á ji nnyi Jerusarem sê á jî sû biji kən á dí erom áji.

⁵⁶Á róghe Jisos ewómóm. Á chúi ka ókʉ́rí achot Obhasi á kí bhəp sê, “Ó kere ên sê nne nnyó tîk a bhák erom njí ka etʉri a?”

⁵⁷Kən ane-echî akará-agore na ane echəme Farasi ta á kare ikom sê kpe nne a yéne Jisos fan, a sə́ré ábho, á jí fî yê.