Read ejagham Jon, echî 14 Bible Online

Jon, echî 14 - ejagham bible

Jon, echî 14

¹Jisos a sə́re ágbán abhê se, “Ka fôn ên nsae ka ḿbə́ŋé. Kî ên ḿbə́ŋé na Obhasi, o kî ên na mme eróŋ.

²Abhon-ojû á ti otí ka njû Ńsé omé, tîk n tʉ́ri ên eji ágo. É rô joé se asík eê, kə́n ḿ bó səre ên.

³Ń ji, ń jí tʉ́ri eji ń kí ên. Tîk n chə́bhe njəm m bâ kô ên o jóe ên na mme, ka eji n di.

⁴Ó məŋe ên noŋ o kí yim ên kən ó sí ka eji ń jak.”

⁵Kən Tomas a bhə̂p yê se, “Ntûfâm, eji ó jak é ka məŋé, e kí yim nan é mə́ŋe mbá?”

⁶Jisos se, “Mme nâ n di mbá. Mme a ri mfoné nchot Obhasi. Mme a ri ekpin. Nne kpe yót nnyo a kí si mbâ Ńsé nji á ka chíŋ mbâ amé cháŋ.

⁷O məŋê ên ə̂m eê, kə́n ó məŋe ên Ńsé omé. Kən é róghé ka mfá-mfá, ó məŋe ên Ńsé omé, ó yen ên yê.”

⁸Firip se, “Ntûfâm, ejûm etat é woma cháŋ, é ká chiŋi a ri sê ó tóŋé êt Ńsé owəré.”

⁹Jisos a bhə̂p yê se, “Nâ njok ebhú nji n kumî áno na ên, we Firip o nyə́ne ó ka məŋé ə̂m a? Nne nnyo á yen ə̂m, a yên Ńsé. Echî mân nji o kí to se ń tóŋé wâ Ńsé a ri jen?

¹⁰Átíŋ we Firip ó ka kam se mme na Ńsé a ri nne yót?” A sə́re mân ágbán abhê se, “Məŋê ên sê chénchén nji n sə́re ên é ká dʉ mbâ amé. A ri Ńsé nnyo a ri na mme nâ á yimá áno etûm ejê.

¹¹O ri ó kâm ên sê mme n di na Ńsé, Ńsé fə́ne a ri na mme. Ájoé kpe echî etat cháŋ nji o kí kam ên sê ń chorá ka etʉri, deê ntûm nnyi ń yimá nná a yim ên ó kâm.

¹²Deê ń sə́ré ên ka etʉri bəre kpe énê nnyo á yuŋ ḿbə́ŋé a kî na mme a kí yim ntûm nnyi ń yimá nná. Ka etʉri, a kí yim nnyi a faŋê a chíŋi nnyí. Echî aŋ? Mme n kí ji mbâ Ńsé omé.

¹³Ebhú ń ji, ejûm-ejûm nji ó kí bhəp ên ka mbiŋ amé, n kí yim o fôn ên ńjə́ne, ejík é jóe é káre Ńsé ka obhô Mmon owe.

¹⁴Kpe énê nnyo á ko mbiŋ amé a bhə̂p ə̂m ejûm kpe njə́n, n kí yim ńjə́ne.”

¹⁵Jisos a kpô chot na ágbán abhê se, “Nne nnyo á kot ə̂m a kí yim ekpak nji n wóme.

¹⁶Tîk m bə̂p Ńsé omé a tûm ên nkagha-ên-obhô nnyo a kí toŋe ên mfoné nchot Obhasi jáé. Nne nnyó a kí joé na ên ka ótúm-ótúm.

¹⁷Yê nâ a ri Ntʉgantʉ nnyo a kí toŋe mfoné nchot Obhasi jáé. Ngun á ká bhik ekóóm Obhasi Ebhare Ntʉgantʉ nnyó, a kak ábho obhô. Echî aŋ? Á bhó yen yê, á ká məŋé fə́ne yê. Kən ên ó məŋe ên yê, ka a ri na ên, a kí kət na ên.

¹⁸“Tîk ḿ bó maghé ên átíŋ noŋ akʉ́ghá-ane. N kí chəbhé njəm ḿ bá.

¹⁹É kət mkpât ebhú, ngun á ro kpó yen ə̂m. Kən ên tîk o yéná ên ə̂m. Ka eji n kí fon ekpin ka ótúm-ótúm, ên fə́ne tîk o fôn ên.

²⁰Ofú ábhi ó si, tîk o mə́ŋe ên mân sê mme na Ńsé a ri nne yót. O kí məŋé ên fə́ne sê mme na ên a ri nne yót.

²¹“Kpe énê nnyo á kí yuk nji n chorê, a yîm fə́ne ka ekpak a yúghi, nâ a kôt ə̂m. Kpe énê nnyo á kot ə̂m, Ńsé omé tîk a kôt yê. Mme eróŋ n kí kot ntʉ́ghi nne nnyó, n tóŋe ekpin ejámé mbâ eye.”

²²Juda, kən Juda Iskariyot asík, a bhə̂p Jisos se, “Ntûfâm, o kí yim nan ó tóŋé êt ekpin ejâ nji ngun ndə́m á bhó yen?”

²³Jisos se, “Kpe énê nnyo á kot ə̂m, a kí yim ka ekpak nji m kpíi yê. Ńsé omé tîk a kôt yê. Mme na Ńsé omé tîk e bhâ jóe ka ekpin ejê.

²⁴Kpe énê nnyo á ka kot ə̂m, á bhó yim ka ekpak nji m kpíi yê. Nji m kpíi ên, kpe ejámé asík. É dʉ̂ mbâ Ńsé omé nnyo a túmi ə̂m.”

²⁵“Ń səre ên achot mmá mfá-mfá nji n nyə́ne na ên.

²⁶Nkagha-ên-obhô, Obhasi Ebhare Ntʉgantʉ nnyo Ńsé tîk a tûm ka mbiŋ amé, tîk a kpî ên achot chénchén. A kí yim ên fə́ne o tirá chénchén achot mma n sə́re ên.

²⁷Ḿ maghe ên enare, a ri enare ejámé nâ m maghê ên áno. Ń kare ên enare ejámé nji ngun á ká bhik ekarám. Deê efup é kâ yîm nne, ka fon ên nsae ka ḿbə́ŋé.

²⁸“Ń səre ên bəre n kí ji, kən tîk n chə́bhe njəm m bák mbâ eyəné. Ájoé ó kot ên ə̂m, kə́n o kí fon ên ogyebhá-ḿbə́ŋé nji ó yuk ên sê n kí ji mbâ Ńsé omé, ka Ńsé omé a fâŋ a chíŋi ə̂m.

²⁹“Ń səre ên achot mmá á nyə́ne á ká fap. Ebhú á fap, tîk o kî ên mân ḿbə́ŋé na mme ka etʉri.

³⁰Ń do kpó chot na ên ebhú é râp. Echî aŋ? Ntûfâm obhí a ri ka mbá. Mme cháŋ ka óséré obhê.

³¹Kən ngun á rî á mə́ŋe sê ń kot Ńsé omé. Á rî á mə́ŋe sê ń yimá áno ka ekpak nji yê a sə́re ə̂m se ń yîm. Bhák ên é jî.”