Read ejagham Jon, echî 15 Bible Online

Jon, echî 15 - ejagham bible

Jon, echî 15

¹Jisos se, “Mme nâ n di mfoné-mfoné esə́n-étí, Ńsé omé ntʉrá-tʉ́rá.

²Kpe nnyə́n ndâp nnyi á bhó kap, Ńsé omé a kí gbut a yíghi. A tʉ́ri ndâp nnyi á kabhá okap se a kap a kpe okpe.

³Kən ên, ta á tʉri á ki na otîp mbi ń kará ên nná.

⁴Nâ yâk ên mân na mme, mme fə́ne tîk n yâk na ên. Ekpak nji ndâp á bhó joé ka biji ibhê ta a bhá chiŋ a kap, a ri a yák na esə́n-étí, ên eróŋ ó bhó bhik ên ekabhám ta o yâk ên na mme.

⁵“Mme nâ n di esə́n-étí, ên arâp. Kpe énê nnyo a kə́re na mme, mme eróŋ n kí kət na yê. A kí kap jok-jok. Ó ro kət ên na mme, kpe ejûm jə́t ó bhó bhik ên eyimím.

⁶Kpe énê nnyo á ka kə́t na mme, a ri noŋ ndâp-étí nnyi á gbut á yighi. A kí kpo. Arâp chénchén mma á gbut nná, á kí chəmé á tûp ka ngun, á ríghi.

⁷“Kən ên, ájoé ó kət ên na mme, eyum ejámé eróŋ é kət na ên, o kí bhəp ên kpe bhaghé ejûm nji o korê ên, o ri ó fôn ńjə́ne.

⁸Ájoé o kí fon ekpin nji Obhasi a korê, tîk ejík é jóe mbâ Ńsé omé. Ka ekpak njí, o kí joé ên ane mba á kí top ə̂m.

⁹“Ka ekpak nji Ńsé omé a korê ə̂m, nâ noŋ n korê ên fə́ne. Kə̂t ên na okot obhámé.

¹⁰Ó ki ên ebhín ejámé, okot obhámé ó kí kət na ên. Nâ noŋ mme n kíi áno ebhín í Ńsé omé, kən ń kət áno na okot obhê.

¹¹“Ń səra ên áno achot mmá bəre ogyebhá-ḿbə́ŋé obhámé ó jóe na ên, ó yîm obhə́né ó tí ó kpê.

¹²Ebhín ejámé é rî sê, ‘Deê ó kôt ên atem noŋ mme n korê ên.’

¹³Mfoné-mfoné okot mbi nne kə́n a kôt ntem, a ri ekpóóm ekʉ̂ ka echî ntem.

¹⁴Ó yim ên nji n sə́re ên bəre ó yîm, nâ ên a ri atem abhámé.

¹⁵Ń do kpó bhiŋ ên bəre ágbán abhámé, ka ḿgbán á bhó məŋé ejûm nji Ńsé a kí yim. N kí bhiŋ ên bəre atem, ka ń səre ên chénchén nji n yúghi mbâ Ńsé omé.

¹⁶Ên asík o sáŋe ə̂m, mme nâ n sáŋe ên n tûm bəre ó jí yîm ên etûm ejámé. Etûm nji o kí yim ên, é bhó bhip ka ótúm-ótúm. Ka ekpak njí, Ńsé omé tîk a káre ên kpe bhaghé ejûm nji o bhə́bhe ên yê ka mbiŋ amé.

¹⁷Ńgyê mân ebhín ejámé, ‘Kot ên atem.’ ”

¹⁸Jisos a kpô chot se, “Ngun á bhan ên, məŋê ên sê á raŋ mbá á bhan ə̂m.

¹⁹Sê o ri ên noŋ ábho eê, kə́n á kôt ên fə́ne noŋ ane ábho. Kən ên ane ábho asík. Esáŋám nji n sáŋe ên, é yighi ên ka ekam ábho. Nâ ńjə́ne á bháne ên.

²⁰Deê ó tît ên nji n sə́re ên bəre nsʉ́ŋ kpe yót nnyo a kí faŋ a chíŋi ńsé cháŋ. Ájoé á karé ə̂m oseŋe, á kí karé ên eróŋ. Á yuk nji ḿ kpik ábho, á kí yuk fə́ne nji o kí kpi ên ábho.

²¹“Á kí karé ên oseŋe mbí, ka ên a ri ane abhámé. Á ká məŋé yê nnyo a túmi ə̂m.

²²Kə́n á ká kam sê á yim obhí ájoé ń ka bhá ḿ bá sə́ré ábho. Mfá-mfá echî cháŋ nji á kí to sê, ‘É ka məŋé.’

²³Nne kpe nnyón nnyo á bhan ə̂m, nâ a bhân fə́ne Ńsé omé.

²⁴N dô yim ntûm nnyi nne etat á ka nok oyim asík, nne ábho nnyo kə́n á kí səre se a yîm obhí cháŋ. Kən mfá-mfá á yen ntûm nnyi n yimî, á chəm á chəbhe á bhaná ə̂m na Ńsé omé.

²⁵Nâ noŋ é fóne ka ejoóm kən ejûm nji á séŋe ka nwet ebhín ábho é fáp noŋ á seŋe sê, ‘Á bhána ə̂m ka chichi.’

²⁶Nkagha-ên-obhô tîk a bhák, nnyo a kí rəbhé mfoné nchot Obhasi a tóŋe ên. Ntʉgantʉ nnyó a dʉ mbâ Ńsé omé. Tîk n tûm ên yê. A ri Ntʉgantʉ nnyó nâ a kí gyimi ə̂m ntî-isê.

²⁷Ên eróŋ o ri ó gyímí ên ə̂m ntî-isê, ka o róghe ên na mme ta ka eróghá-ndə́p.”