Read ejagham Jon, echî 16 Bible Online

Jon, echî 16 - ejagham bible

Jon, echî 16

¹Jisos se, “N sə́re ên achot mmá bəre o kâ yíghi ên ḿbə́ŋé nnyi o yuŋî ên o kî na mme.

²Á kí bhim ên, óchâm Obhasi ó ro gyé ên. Ebhú tîk é sî nji nne á yui ên, é kí gyebhé yê se á yimá a ri etûm Obhasi.

³Á kí yim ên achot mmá, ka kpe Ńsé omé, kpe mme ḿfoné, á ká məŋé.

⁴N sə́re ên áno achot mmá bəre ebhú é kpo si, tîk o tît ên sê ta ń raŋ mbá ń səre ên.” Jisos se, “Ń ka sə́ré ên achot mmá ta ka eróghá-ndə́p, ka mme n di na ên.

⁵Kən mfá-mfá n kí ji mbâ yê nnyo a túmi ə̂m. Kən kpe nne owəné nnyo á bhəbha ə̂m mbá ń jak cháŋ.

⁶Nsae a súi óbhə́ŋé obhə́né, ka ń səre ên achot mmá.

⁷Kən ḿ bó səre ên áfúbhí. Ń jak áno ka onono obhə́né. Ka nan? Ń do ji, Nkagha-ên-obhô nnyó á bhó bha. Ń ji, tîk n tûm yê a bhák mbâ eyəné.

⁸Ebhú á bha, tîk a tóŋe ngun jáé se á gbo ka íkíkéré ábho é kpê na obhí, na ekpin nji é rî ka nnyen-i-mbá na fə́ne ekpak Obhasi a kí taŋ ngun.

⁹Á gbóe ka nchot obhí, ka á ká ki ḿbə́ŋé na mme.

¹⁰Á gbóe ka nchot ekpin nji é rî ka nnyen-i-mbá, ka n kí chəbhé njəm mbâ Ńsé omé, ó ro kpó yen ên ə̂m.

¹¹Á gbóe fə́ne ka nchot otáŋá-ngun Obhasi, ka ta esup é bhîp ntûfâm obhí.

¹²“Iyîm í nyə́ne etî-etî mbi n kí səre ên, kən mfá-mfá nji tîk í tî í chíŋi ên ka eyúghúm.

¹³Kən ebhú Ntʉgantʉ nnyó á bha, a kí toŋe ên nne nnyo Obhasi a ri. Tîk a yîm ên o mə́ŋe ên mfoné nchot Obhasi chénchén. Ntʉgantʉ nnyó á bhó səre achot mma á dʉ̂ yê ka ḿbə́ŋé, a kí chot a ri mma a yúghi. Tîk a sə́re ên achot mma á kə́ bha mbá-ochî.

¹⁴Ntʉgantʉ nnyó tîk a tóŋe ejík ejámé. Ka nan? Ka chénchén nji a sə́re ên a yúghi mbâ amé.

¹⁵Iyîm í Ńsé omé chénchén a ri ibhámé. Nâ ńjə́ne n sə́re ên bəre chénchén nji Ntʉgantʉ a kí kpi ên, a yúghi mbâ amé.”

¹⁶Jisos a kpô chot na ágbán abhê se, “Mkpât ebhú ó ro yén ên ə̂m. É kpo kət fə́ne mkpât ebhú tîk o kpô yén ên ə̂m.”

¹⁷Etʉ̂ ágbán abhê á kí bhəp atem sê, “Á woma a sə́ré êt kpá jen títí? Se mkpât ebhú é ro yén yê, kən é kpo kət, tîk e kpô yén yê. Se yê a kí ji mbâ Ńsé owe.

¹⁸Mkpât ebhú nchane nâ nnyə́n. Ntʉ́ghi nchot nnyí é ka məŋé kpá.”

¹⁹Jisos a mə́ŋe se á kí wom á bhə́p yê ebhə̂p, a chôt mân se, “Ń səre ên bəre mkpât ebhú ó ro yén ên ə̂m. É kpo kət mkpât ebhú, tîk o yên ên ə̂m. To nâ nji ó chorá ên áno na atem?

²⁰Deê ń sə́ré ên ka etʉri mân bəre tîk o rʉ́ri ên obhə́bhe ó sek, kən ngun tîk á gyebhá ḿbə́ŋé. Ên tîk nsae a súi ên ka ḿbə́ŋé kən nsae eyəné nnyí tîk a chə́bhe ogyebhá-ḿbə́ŋé.

²¹Nne-nkáé nnyo a kə́ bha mmon ojí, á foná nsae ka ebhú oseŋe ó bha. Kən ebhú á kpo ji mmon, a tûp ngá, ogyebhá-ḿbə́ŋé se nne mfê a bhâ ka ngun, ó kí yim yê a gyíni oseŋe mbi yê a yéne.

²²Nâ noŋ é rî fə́ne na ên. Mfá-mfá nsae a súi ên ḿbə́ŋé, kən ebhú ḿ kpo yen ên, tîk o fôn ên ekpatə́m ogyebhá-ḿbə́ŋé. Ntʉ́ghi ogyebhá-ḿbə́ŋé mbi nne kpe yót á ka bhik okpó tabhé mbâ eyəné.

²³“Ofú ábhi ó si, mme asík o kí kpo bhəp ên sê ń káre ên kpe ejûm. Deê ń sə́ré ên ka etʉri bəre kpe jen nji o bhə́bhe ên Ńsé omé ka mbiŋ amé, a kí karé ên ńjə́ne.

²⁴Ta é si égyé ó ka nok obhə́p ên Ńsé omé a karé ên ejûm ka mbiŋ amé. Bhə̂p ên mân, tîk o fôn ên, ogyebhá-ḿbə́ŋé obhə́né ó súi ó fûk.”

²⁵Jisos se, “Mbôp nnyí n nyə́ne n sə́rá ên achot mmá chénchén ka ngan. Kən ebhú é kə́ bha nji ń do chot ka ngan. Ebhú áji é bha, tîk n sə́rá ên achot jáé á kpek na Obhasi Ńsé.

²⁶Ofú ábhi ó si, o kí bhəp ên Obhasi Ńsé ejûm ka mbiŋ amé, ḿ bó səre ên bəre n kí bhəp ka echî ejə́né.

²⁷Echî ḿ bó bhəp ka echî ejə́né é rî sê Obhasi Ńsé yê ḿfoné a fôn okot na ên, ka ó fon ên okot na mme. Ó kam ên fə́ne sê n dʉ mbâ eye m bák.

²⁸N dʉ mbâ Obhasi Ńsé m bák ka ngun nnyí. Mfá-mfá n kí maghé ngun nnyí ń chə́bhe njəm mbâ eye.”

²⁹Ágbán abhê sê, “Ńgyê mân mfá-mfá o kí chot nchot jáé, ó ro kpó chot ka ngan.

³⁰É məŋe mân mfá-mfá sê ó məŋe chénchén ejûm, echî nji e kí kpo bhəp wâ kpe ejûm cháŋ. Ńji é yim êt é kam sê we o dʉ mbâ Obhasi o bhák.”

³¹Jisos a bhə̂p ábho se, “Ó kam ên mân a?

³²Deê ń sə́ré ên bəre ebhú é kə́ bha, ń tô bəre ta é si chén nji á kí chat ên, kpe énê a jak eye mbá. O kí maghé ên ə̂m átíŋ. Kən ń ka joé mme átíŋ, ka Obhasi Ńsé a ri na mme.

³³Ń səra ên áno achot mmá chénchén bəre ó chə̂m ên ə̂m ó fôn ên enare. O kí fon ên oseŋe ka ngun kən fon ên ḿbə́ŋé, ka mme ń ko érûm ka ngun nnyí.”