Read ejagham Jon, echî 17 Bible Online

Jon, echî 17 - ejagham bible

Jon, echî 17

¹Jisos a kpo man nchot eye, a yûŋ echî a kêp ósô, a góre Obhasi se, “Ńsé, ebhú é si, yim Mmon owa a fon ejík kən a yîm ejík é bhá mbâ eya.

²We nâ o karê ə̂m ikom í ngun nnyi ndə́m se ń káre ekpin ótúm-ótúm mbâ chénchén ane mba o karê ə̂m.

³Ekpin ótúm-ótúm nji é rî sê ngun á mə́ŋe wâ noŋ mfoné-mfoné Obhasi, á mə́ŋe ə̂m fə́ne, Jisos Krayis, nnyo we o túmi.

⁴Ń yim mbiŋ eya a fôn ejík ka nsi nnyí, ka ejeghém etûm nji o túmi ə̂m ḿ bá yîm.

⁵Ńsé, yim ə̂m ḿ fôn ejík ka ochî obhâ mfá-mfá, ekpak ejík nji m fonê ebhú áji kən kpe ngun a róghé.”

⁶Jisos a góre Obhasi se, “Ń yim ane mba o kóe ka ngun nnyí o káre ə̂m, á məŋe wâ. We nâ o fonê nná ane mbá kən o kô o káre ə̂m. Ane mbá á kí yim ka ekpak o wóme.

⁷Á məŋe mân mfá-mfá sê chénchén nji o karê ə̂m é dʉ̂ mbâ eya.

⁸Nan? Ḿ kpi ábho okpígha-ejûm mbi ó dʉ̂ mbâ eya. Á ko ḿbə́ne, á məŋe ka etʉri sê n dʉ mbâ eya m bák. Á kam sê we nâ o túmi ə̂m.

⁹“N kí goré wâ ka echî ábho. Ń ka goré mbâ ngun ndə́m, é ká chiŋi mba o karê ə̂m, ka a ri ane abhâ.

¹⁰Chénchén nji m fonê a ri ejâ, chénchén ejâ fə́ne a ri ejámé. Ábho nâ á tóŋa ejík ejámé.

¹¹Mfá-mfá n kí chəbhé njəm mbâ eya. Mme ḿ man ka nsi nnyí, kən ábho á nyə́ne. Obhasi Ńsé nnyo a ri ka Ósô, ka ikom mfi í rî ka mbiŋ eya nnyi o karê ə̂m, ka kâm ejûm é yîm ábho. Ka ekpak njí, tîk á chə́bhe nne yót noŋ we na mme.

¹²Ebhú n di na ábho n kí bhabhe ábho na ikom í mbiŋ eya nnyi o karê ə̂m. Ḿ fi ábho nnyen efiím, kpe nne ábho yót á ka tán é ká chiŋi nnyo a fonê ka etánám. A tân fə́ne noŋ á séŋe ka nwet eya.

¹³“Mfá-mfá n kí chəbhé njəm mbâ eya. Nji n nyə́ne mfá ka ngun, ń səra ábho achot mmá bəre á fôn ogyebhá-ḿbə́ŋé obhámé ó súi ó fuk.

¹⁴Ń səre ábho nji o sə́re ə̂m se ń sə́ré. Ka obhô mbí, ngun a kô ábho ka ebhan, ka á rî noŋ mme, á ká joé ane ngun.

¹⁵Ń ka goré wâ bəre ó yíghi ábho ka ngun nnyí kən ń gorá bəre o kâ kâm Ntûfâm Obhí a yim ábho ejûm.

¹⁶Ábho á rî noŋ mme, ane ngun asík.

¹⁷Deê ó kó mfoné nchot ó tʉ̂ ábho á gyé wâ ka biji. Nchot eya nâ a ri mfoné nchot.

¹⁸Ekpak nji we o túmi ə̂m ka ngun nâ ekpak nji mme eróŋ ń tum ábho ka ngun.

¹⁹Ka echî ábho ń kare biji ibhámé mbâ eya bəre ábho fə́ne á káre biji á jóe mfoné-mfoné ane abhâ.”

²⁰Jisos a góre Obhasi se, “Ane mbá ḿbáne-mbanê asík nâ ń gorá wâ, n kí goré fə́ne mbâ mba tîk á kî ḿbə́ŋé na mme ebhú á yuk otîp ane mbá.

²¹N kí goré bəre deê ábho chénchén á jóe nne yót. Ńsé, ekpak nji mme n di na we, we fə́ne o rî na mme, deê ábho chénchén á chə̂m na êt é chə́bhe nne yót. Tîk ngun á kâm sê we nâ o túmi ə̂m.

²²Ń kare ábho ekpatə́m ejík nji o karê ə̂m bəre á jóe nne yót ekpak êt e ri.

²³N kí chəm biji na ábho é jóe nne yót noŋ we o ri na mme. Ka ekpak njí, chénchén ábho tîk á chə́bhe nne yót, achât á bhó joé. Ngun tîk á mə́ŋe mân sê we nâ o túmi ə̂m. Á mə́ŋe fə́ne sê ó kot ábho noŋ o korê ə̂m.

²⁴“Ńsé, n kí wom bəre ábho mbá mba o karê ə̂m á jóe na mme ka eji n di kən á yena ejík nji o karê ə̂m, ka o korê ə̂m okot kən kpe ngun a róghé.

²⁵“Ńsé, we nnyo ó yimá iyîm ka nnyen-i-mbá, ngun á ká məŋé wâ, kən mme ḿ məŋe wâ. Ágbán mbá eróŋ á kam sê we nâ o túmi ə̂m.

²⁶Ń yim ábho á məŋe wâ. N kí kət n yimá ábho á mə́ŋe wâ kən okot mbi o fonê na mme ó jóe na ábho eróŋ. Mme fə́ne ń jóe na ábho.”