Read ejagham Jon, echî 2 Bible Online

Jon, echî 2 - ejagham bible

Jon, echî 2

¹Mfín a kpo to a chíŋ ébháe, erom ebháé é gbô ka eték í Kana ebhat í Gariri. Nnyen i Jisos a jak erom njí.

²Á yâk fə́ne Jisos na ágbán abhê.

³Ane á kpó gwo aməm á mân, nnyen i Jisos a sə́re yê se, “Aməm á man, ane á ká kpo fon mma tat mma gwóóm.”

⁴Kən Jisos a táme yê se, “Ńnâ, we asík ó səra ə̂m ejûm nji n kí yim. Ebhú ejámé é nyə́ne é ká si.”

⁵Nnyen a sə́re mân ane mba á kíra aməm se, “Yim ên kpe jen nji a sə́re ên se ó yîm.”

⁶Ane Jus á fóne ebhín sê ta o sû biji ibhâ, o sû njí, o sû ńjî, o kí fon akôp ka ochî Obhasi. Ka obhô mbí, á kíi ábháŋáwa aságasá mma á kágha ayép ka njû nnyí. Kpe njə́n ébháŋáwa é rî nji kə́n é kô atʉ aməm á sî ejûm noŋ ófó.

⁷Jisos a sə́re ane mba á kíra aməm se, “Kak ên ayép á súí ábháŋáwa áma chénchén.” Á kô á kâk mobhéé.

⁸A sə́re ábho se, “Kô ên etʉ̂ ayép áfo, choŋ okaré ên mbâ mfone erom a gwó.” Á kô á jî káre yê.

⁹Nne nnyó a yúŋi ayép mmá, mma á kpighi ka aməm. É chíŋi yê kpá, ka á ka məŋé mbá aməm mmá á dʉ̂. Kən ane mba á káre yê á mə́ŋe. A bhîŋ nkógha-nkáé nnyó

¹⁰a sə́re yê se, “Kpe énê á fon erom, a kí raŋ mbá a bhák na aməm mma no. Ane á kpo gwo aməm á gyê biji, o kí ko mân kpe mmán o bhák. Kən we ó ki nnyen aməm, ó ko mân ḿmáne ó bha mfá-mfá.”

¹¹Nâ ndaŋa-mbá eriŋ nji Jisos a tóŋe. A tóŋe ńjə́ne ka eték í Kana ka ebhat í Gariri se ane á yén ekpatə́m ikom ifê na ejík. Ágbán abhê á bhâ kî mân ḿbə́ŋé na yê mfoné-mfoné ekíím.

¹²Achot mmá á kpó to á chíŋ, Jisos na nnyen owe na abhon-í-nnyen abhê na ágbán abhê á jak nnyi Kapanom kən á ká garé oká ágo.

¹³Ebhú erom í Ntə̂m Osʉ́ŋ ane Jus é kə́ bha osí, Jisos a yə̂p a jak Jerusarem.

¹⁴Nji a síi ágo, a jî gyê ka ókʉ́rí achot Obhasi, a yên ane á gurá ofoŋ na obhúi na mbʉ́í. Ayóŋá-ntí á kûn fə́ne ka ngûm ábho, á yoŋa.

¹⁵A kô aríghí nâ íkpá, a bhîm chénchén obhúi mbí na ofoŋ ka ókʉ́rí mbí. A róme átí mma ayóŋá-ntí á kíi á yoŋa ntí ábho, a tûp ka nsi, ntí ń nyáne.

¹⁶Kən a kpô sí mbâ agurá-mbʉ́í, a sə́re ábho se, “Kə́n ên ḿmə́ne, fáp ên mfá. O kâ yîm ên njû Ńsé omé éré ogəm!”

¹⁷Ágbán abhê á tît mân sê á seŋ ka nwet Obhasi sê, “Ńsé, n kí kpo ka okot í njû eya.”

¹⁸Kən atúi-ofâm ane Jus á bhâ bhə́p yê sê, “O kí yim bhaghé eriŋ nji é kí toŋe sê ó fon ikom mfi kə́n o yîm ntʉ́ghi ejûm nji ó yimá nná?”

¹⁹Jisos a táme ábho se, “Bhíbhi ên ókʉ́rí achot Obhasi mbí, n kí chəbhé njəm m gbê mbi tat ka mfín ésá.”

²⁰Kən atúi-ofâm mbá sê, “Ókʉ́rí mbi e kóe nsam i nyâ ébháe njəm nyâ eságasá kən e gbê, ḿbə́ne nâ o toê se o kí gbe ka mfín ésá a?”

²¹Kən ókʉ́rí mbi Jisos á chorá áno a ri biji ibhê.

²²Ebhú nji a kpóe, Obhasi a yîm yê a nyə́me ka ekʉ̂ ka osúí mfín ésá, ágbán abhê á tît sê Jisos ta a chôt nchot nnyí. Nji á tíri, á kâm mân na achot mma á séŋe ka nwet Obhasi. Á kâm fə́ne na ejûm nji Jisos a chorê.

²³Nji Jisos a nyə́ne ka Jerusarem ka edíím erom í Ntə̂m Osʉ́ŋ, ane etî-etî á kî ḿbə́ŋé na yê. Echî aŋ? Á yéne ntûm okpógha-biji nnyi á yimá.

²⁴Kən Jisos á ka karé biji mbâ ábho, ka a mə́ŋe erû ane chénchén.

²⁵Kpe nne nnyo a kí kpo səre yê kpe ejûm a kpe na nne kpe yót cháŋ, ka yê ḿfoné a mə́ŋe ntit i ḿbə́ŋé ane.