Read ejagham Jon, echî 21 Bible Online

Jon, echî 21 - ejagham bible

Jon, echî 21

¹Ńji é kpó chiŋ, Jisos a kpô fáp ka ochî atóbhá abhê ka aya Tiberiyas. Yên ekpak é fábhe.

²Simun Pita na Tomas nnyo á bhíŋa sê Ofât na Nataniye nnyo a dʉ eték í Kana ebhat í Gariri na abhon í Sebedi na atóbhá Jisos ábháe mba tat, á chə́me ka eji jə́t.

³Simun Pita a sə́re atem se yê a kí ji otúp osí. Atem fə́ne sê ábho tîk á jak na yê. Á jî gyê okpi á jak. Atʉ́ ndə́m kpe ejûm á ká wubhi.

⁴Ebhú njúí a róghe efábhám, Jisos a bhâ gyími ka mkpe ayép kən atóbhá abhê mbá á ká məŋé sê a ri yê.

⁵Jisos a bhə̂p ábho se, “Abhon abhámé, ó wubhi ên kpe ejûm a?” Á táme sê, “Kpe ejûm.”

⁶A sə́re ábho se, “Tûp ên ntûfúk ebhat obhô-orûm, tîk o wúbhi ên osí.” Nji á túbhi, á nôk etʉʉ́m á yíghi kən é chíŋi ábho, ka osí ó ti ó chiŋ mbi á wúbhi.

⁷Kən ḿgbán nnyo Jisos a korê nná kpe-eji a sə́re Pita se, “Nne ányo a ri Ńtâ Jisos.” Nji Pita a yúghi nná se a ri Ńtâ Jisos, a kô éfô a kâk, ka a ri biji mbít. A nyə̂p a gbô ka ayép, a kí ji mbâ eye.

⁸Atem abhê mba ngá á bhugha okpi á tobha, á tʉk ntûfúk nnyí na osí kpúk, á jak. Mbâ ábho á rî na egae, á ka rap, a ri ejûm noŋ nsam abhô érôn.

⁹Á kpó to á sí mkpe etə́m, á yên édî áfo na ngûn mmi á yími na ákáré. Osí ó rî ka ákáré ngun mmá.

¹⁰Jisos a sə́re ábho se, “Kô ên etʉ̂ osí mbi o wúbhi ên mfá-mfá bhák.”

¹¹Simun Pita a chə́bhe njəm a jak ka okpi a jî tʉ̂ ntûfúk nnyí a bhák ka mkpe. Ntûfúk a súi kpúk na osí oyúp. Nsí a ri nsam enígisá na ófó na ésá. Kən kpe noŋ ó tíi áno, ntûfúk nnyí á ka wáré.

¹²Jisos a bhîŋ ábho se, “Bhák é dí ên édî.” Kpe nne ábho nnyo a gaê ebhə̂p se kpe, “We énê?” cháŋ, ka á məŋe sê a ri Ńtâ Jisos.

¹³Jisos a jî bhûp mân édî njí na osí mbí a káre ábho á dí.

¹⁴Nâ osúí ntə̂m ésá nnyi Jisos a tóŋe biji mbâ atóbhá abhê, ebhú a chəbhê njəm ka ekpin.

¹⁵Nji á díi édî é mân, Jisos a bhə̂p Simun Pita se, “Simun, mmon i Jon, ó kere se ó kot ə̂m ó chiŋi ekpak atem mba ngá chénchén á kóre ə̂m a?” Simun a táme se, “Nn̂, Ntûfâm, we ó məŋe se ń kot wâ.” Jisos se, “Nâ gyeê abhon abhámé.”

¹⁶Jisos a kpô bhə́p yê se, “Simun, mmon i Jon, ó kot ə̂m a?” Simun a táme se, “Nn̂, Ntûfâm, we ó məŋe se ń kot wâ.” Jisos se, “Nâ bhábhe ane abhámé.”

¹⁷Ka osúí ntə̂m ésá Jisos a kpô bhə́p Pita se, “Simun, mmon i Jon, ó kot ə̂m a?” Nsae a súi Pita ka ḿbə́ŋé nji Jisos a bhə́bhe yê ebhə̂p njí jə́t ntə̂m ésá. A sə́re Jisos se, “Ntûfâm, we ó məŋe chénchén ejûm, ó məŋe se ń kot wâ.” Jisos a chôt mân se, “Nâ gyeê ane abhámé.

¹⁸Deê ń sə́ré wâ bəre ebhú o ri ka obhóné, o kí bhop ekandá ejâ we ḿfoné o jak mbá-mbá o korê. Kən ó kui, o kí tən abhô amâ, nne etat a bhôp ḿmáne, a tʉ̂ wâ o jak mbá ó ka kot ejiím.”

¹⁹Nji a chorê nchot nnyí a tóŋé ekpak ekʉ̂ nji Pita a kí kpo, a karé ejík mbâ Obhasi. A chôt mân se, “Ka mághe ə̂m etóbhóm.”

²⁰Pita a kpíghi a yên ḿgbán nnyo Jisos a korê nná, noŋ á bhak. Ḿgbán nnyó nâ a nuŋî nná a kúni Jisos echî ka ngaŋ ka ebhú á dîk édî. Yê yót nâ a bhə́bhe nná Jisos se, “Ntûfâm, énê nnyo tîk a gúri wâ?”

²¹Nji Pita a yéne yê, a bhə̂p Jisos se, “Ntûfâm, kən ntem ńnyô fə́ne aŋ?”

²²Jisos a bhə̂p yê Pita se, “Ájoé ń woma bəre a joé ta ń chə́bhe njəm ḿ bá, nchot eya ka etím a ri jen? We, tóp ə̂m!”

²³Nji Jisos a chorê áno se ḿgbán nnyo yê a korê á bhó kpo, atóbhá abhê chénchén á bhâ yûk nchot nnyí. Kən Jisos á ka to se á bhó kpo. Nji a chorê é ká chiŋi a ri se, “Ájoé ń woma bəre a joé ta ń chə́bhe njəm ḿ bá, nchot eya ka etím a ri jen?”

²⁴A ri ḿgbán i Jisos nnyó nâ a sə́re achot mmá. Yê fə́ne nâ a séŋe ḿmáne. É məŋe sê nji a séŋe é rî ka echî.

²⁵Iyîm í rî etî-etî mbi Jisos a yimî. Ájoé á séŋe ḿbə́ne chénchén jə́t na jə́t, ń kere bəre ngun ndə́m á bhó bhik ekə́nə́m onwet mbi kə́n á sêŋ.