Read ejagham Jon, echî 3 Bible Online

Jon, echî 3 - ejagham bible

Jon, echî 3

¹Ntûfâm ane Jus yót a ri a kamá se Nikodemus. A ri ka echəme ane Jus nji á bhíŋa sê Farasi. A ri fə́ne ka ekumi atáŋá-eték í Jus.

²Atʉ́ mát ntûfâm nnyó a jak mbâ Jisos a jî chôt na yê se, “Ntóŋá, é məŋe sê we a ri nne nnyo Obhasi a túmi se ó bhá kpí ane achot. Nne kpe yót cháŋ nnyo a kí məŋé oyim ntûm okpógha-biji nnyi ó yimá nná təm Obhasi a ri na yê.”

³Kən Jisos a táme yê se, “Deê ń sə́ré wâ ka etʉri bəre nne kpe yót cháŋ nnyo a kí gye otúi Obhasi nji á nyə́ne á ká kpo ji yê.”

⁴Nikodemus a táme se, “Á kí kpo yim nan á jí ékúí nne? Tîk a kpô gye oya nnyen á jí yê ka osúí ntə̂m ébháe a?”

⁵Jisos se, “Deê ń sə́ré wâ ka etʉri bəre nne kpe yót cháŋ nnyo a kí gye otúi Obhasi nji á ká ji yê ka ayép na Ntʉgantʉ Obhasi.

⁶Ka biji, á kí ji nne ojí, kən ejíím nji ńga a ri ka Ntʉgantʉ.

⁷Deê é kâ kpô wâ mân biji nji ń səre wâ bəre á rî á kpó ji wâ.

⁸Mfêp kpe a korê ebhát njə́n a nôk a jak. O kí yuk ejok ejê, kən mbá a dʉ na mbá á jak ó bhó məŋé. Nâ noŋ fə́ne ó bhó məŋé ekpak á kí ji nne ka ńtʉgântʉ.”

⁹Nikodemus a bhə̂p se, “Achot mmá á kí joé nan?”

¹⁰Jisos se, “We a ri ekpatə́m í nne ka Isrel nnyo ó kpik ane achot Obhasi, kən jen ó ka məŋé achot mmá?

¹¹Deê ń sə́ré wâ ka etʉri bəre êt é kpik ane achot mma e məŋê, e sə́rá nji e yéne na amə̂t. Kən ên ó bhó kam ó yúk otîp obhə́ré.

¹²Ájoé ó bhó kam ên sê ń chorá ka etʉri ebhú n kí səre ên achot í ngun nnyí, o kí yim ên nan ó kâm ebhú ń səre ên achot Obhasi?

¹³Məŋê ên sê nne kpe yót nnyo a nok oji ka ochî Obhasi cháŋ təm Mmon-i-ntem-nne nnyo a dʉ ágo a bhák.

¹⁴Ka ekpak nji Mosis a kóe ítí a tʉ́ri nnyô a tʉ́ghi ka ego, nâ noŋ fə́ne á kí tʉghi Mmon-i-ntem-nne.

¹⁵Sê kpe énê nnyo á yuŋ ḿbə́ŋé a kî na yê a ri a fon ekpin ótúm-ótúm.”

¹⁶“Obhasi a fôn okot na ane kpe-eji nji ta a tûm Mmon owe yót-ayorâ ka ngun se kpe énê nnyo á yuŋ ḿbə́ŋé a kî na yê a kâ kpô a tán, kən a fon ekpin ótúm-ótúm.

¹⁷Á ka túm Mmon owe se a bhá bhibhi achot ka ngun. A túmi yê se a bhá joé nne nnyo a kí yim ngun á sém.

¹⁸Kpe énê nnyo á ki ḿbə́ŋé na Mmon Obhasi á bhó bhibhi yê, kən nne nnyo á ka kí, ta á bhibhi yê kpúú. Echî aŋ? Á ka kí ḿbə́ŋé na Mmon yót-ayorâ nnyo Obhasi a fonê.

¹⁹Ńgyê noŋ á kí bhibhi nne nchot. Ebhát é bha ka ngun, kən ane á kóra ekpin ejírim, á ka kot ebhát, ka á yíma iyîm ibhí.

²⁰Kpe énê nnyo á yimá iyîm ibhí, á bhó kot ebhát, á bhó bha fə́ne ka ebhát ka a kí fup se achot abhí amê á kâ fâp ka éré jáé.

²¹Kən nne nnyo á yimá ono, á jená ka ebhát se ebhát é tóŋé jáé se yê a yîm ka ekpak Obhasi a wóme.”

²²Ńji é kpó chiŋ, Jisos na ágbán abhê á jak ebhat í Judiya. Nji á síi ágo, a kə̂t na ábho, a fúghá ane ayép.

²³Jon a ri fə́ne ka eték Enon a fúghá ane ayép, ka ayép á rî ebhat áji etî-etî. Enon é ká rap mbá na Sarim. Ane á jak, Jon a fúghá ábho ayép.

²⁴(Á nyə́ne á ká kak Jon ka ókúmí ebhú áji.)

²⁵Áfírí á bhâ gbô, atóbhá Jon na nne Jus yót. Á fíri nchot akôp eyighím ka ekpak ebhín í Mosis é fíi.

²⁶Atóbhá Jon á jî sə́re yê sê, “Ntóŋá, o nyə́ne o tirá nne nnyo o ri nná na yê njəm aya Jodan nnyi ńgô a? Nne nnyo o chorê nná nchot o kpê na yê. Ńgyê yê á fugha ane ayép. Kpe énê a chə́bhe mân a jak mbâ eye.”

²⁷Jon a táme ábho se, “Kpe nne yót cháŋ nnyo a kí fon kpe ejûm jə́t nji Obhasi á ka karé yê.

²⁸Ên áfoné a ri atî-isê abhámé ebhú nji n sə́re bəre mme Krayis asík, Ntûfâm nnyo Obhasi a túmi se a bhá yim ngun á sém. Á túmi ə̂m sê ḿ bá tʉ́ri mbá ń kí ntûfâm i nchane.

²⁹Nkáé nnyo á kí ko, a fonê a karé ndûm nnyo á kok yê, ntem i ndûm á gyima ka mkpe a yúghá oyúk. A kí fon ekpatə́m ogyebhá-ḿbə́ŋé ebhú nji á yuk eyum í ntem owe. Ekpak ogyebhá-ḿbə́ŋé mbí ń jeghe ofon mfá égyé.

³⁰Mbiŋ eye a kí kət a gyʉ́rá ogyʉ́t, amé a bhərá obhə́t.”

³¹Nne nnyo a dʉ ka ochî Obhasi a bhák a chíŋi ane mba ngá chénchén. Nne nnyo á jíi yê ka ngun nnyí, a dʉ ka ngun, á korá fə́ne achot í ngun nnyí. Kən nne nnyo a dʉ ka ochî Obhasi, a chíŋi mba ngá.

³²Á gyima ntî-isê achot mma yê a yéne na mma a yúghi ágo, kən kpe nne nnyo á kamá na otîp obhê cháŋ.

³³Kpe énê nnyo á kam na otîp obhê a kí toŋe jáé se nchot Obhasi a ri ka echî.

³⁴Yê nnyo Obhasi a túmi á chorá achot Obhasi, ka Obhasi a káre yê ńtʉgântʉ eye chénchén.

³⁵Obhasi Ńsé a kôt Mmon owe, a káre achot chénchén ka obhô obhê.

³⁶Kpe énê nnyo á yuŋ ḿbə́ŋé a kî na Mmon Obhasi, a kí fon ekpin ótúm-ótúm. Nne nnyo se yê á bhó yuk Mmon Obhasi, á bhó fon ekpin njí. Nji a kí fon a ri oyámá-ḿbə́ŋé Obhasi.