Read ejagham Jon, echî 6 Bible Online

Jon, echî 6 - ejagham bible

Jon, echî 6

¹Ńji é kpó chiŋ, Jisos a yáŋe a jak njəm aya Gariri. Á bhíŋa ebhú etat sê aya Tiberiyas.

²Njok ekam ane á tôp yê á jak, ka á yen ntûm okpógha-biji nnyi á yimá na ane bimaŋé.

³Jisos a gyʉ̂t egúí a jî kúmi na atóbhá abhê.

⁵Nji a kun áno ka egúí njí, a kpíghi a yên se ekam ane é kí ti otí é bhak. A bhə̂p Firip se, “E kí nam édî fan nji tîk é tî é bhîk ane mbá chénchén?”

⁶Ńga a chorê áno se yê a gaé Firip, ka yê ta a mə́ŋe nji yê tîk a yîm.

⁷Firip a táme se, “Kpe ntâk i ntí ébháe á bhó nam édî nji kə́n é bhîk ane mbá, kpe á kíri mkpât-mkpât.”

⁸Ḿgbán owe nnyo tat, a kamá se Andru, mmon-i-nnyen i Simun Pita, a chôt se,

⁹“Mmon i ndûm yót a ri mfá nnyo a fonê nsûm i brêt érôn na nsí ébháe, kən áji é fap jen ka ekam ane njí?”

¹⁰Jisos a sə́re ábho se á yîm ane á kúmi okumí ka nsi. Ajé á rî ka eji áji á tî. Ane-arûm ka ekam njí á rî ntem-esam ntə̂m-ntə̂m ófó na ébháe na ejûm (5,000).

¹¹Jisos a kô mân brêt ányi a káre ekûp mbâ Obhasi, a kíri a káre ane chénchén mba á kûn áfo. A kô fə́ne nsí nnyí ébháe, a yîm ekpak njí jə́t. Ane mbá chénchén á dî á gyʉ́ri.

¹²Á kpó di á gyʉ́rí, a sə́re ágbán abhê se á bhúp akpât édî mma á kə́re. Se á kâ bhíbhi édî obhíbhí.

¹³Á bhûp á kâk, akpatə́m í bikáé í súi ófó na íbháe ka abhon í brêt árôn mma ekam ane á díi.

¹⁴Ane mba á rî áfo, á kpó yen etûm okpógha-biji njí, á róghe echoróm sê, “Ka etʉri, ḿfa a ri nkara-otîp nchane nnyo á tóe sê tîk a bhák ka ngun.”

¹⁵Jisos a yên a mə́ŋe se ane mbá á kí kere á fî yê ka ikom á yîm ntûfâm, a bê a jak a jî kə̂t yê átíŋ ebhat agúí-ágúi.

¹⁶Egu é kpó si, ágbán í Jisos á bhə̂t á jak ka aya.

¹⁷Á gyê ka okpi á yáŋe á chə́bhe njəm nnyi Kapanom. Atʉ́ á si, Jisos a nyə́ne á ka bhá a kpúghí ábho.

¹⁸Ekpatə́m í mfêp a róghe eyimím, ayép á róghe fə́ne echubhúm.

¹⁹Ágbán mbá á bhúghi nkóé ń kí si ejûm noŋ ńsá na ńnî. Á kpó to á yén, Jisos a kí jen njəm-ósô ayép a bhák mbâ okpi ábho. Efup é súi ábho biji.

²⁰Kən Jisos a sə́re ábho se, “Ka fûp ên chichi, a ri mme áno.”

²¹Á kâm sê á kó yê a gyé ka okpi, kən ka nkúbhi ebhú áji, okpi ta ó təme ka eji ábho á tími etə́mə́m.

²²Ka ntem-ofú, ekam ane mba á kə́re nná njəm aya nnyi ńgô, á məŋe sê okpi ó kə́re okə́t bhə́t áfo ka egae áji. Á məŋe sê Jisos á ka gye a ji na ágbán abhê, á jíi á mághe yê mbá-njəm.

²³Akpi etat mma á dʉ̂ nnyi Tiberiyas á tə́me ka eji nji Jisos a karê nná ekûp mbâ Obhasi kən ane á dî édî.

²⁴Kən ane mbá á kpó yen sê Jisos na ágbán abhê cháŋ, á gyê akpi mmá á jak nnyi Kapanom á jí wóm yê.

²⁵Ekam ane njí á kpó to á wóm yê á yén njəm aya nnyi ńgô, á bhə̂p yê sê, “Ńsé, bhaghé ebhú nji o yaŋê ngá?”

²⁶Jisos se, “Deê ń sə́ré ên ka etʉri bəre ó woma ên ə̂m áno, ka o díi ên édî o gyʉ́ri ên. Ó bhó wom ên ə̂m ka ntûm okpógha-biji nnyi ń yimá.

²⁷Nne a kâ kî ḿbə́ŋé ka édî nji kpe é káe nan é kí bhip. Kî ên ḿbə́ŋé ka édî nji é bhó bhip ka ótúm-ótúm. Ntʉ́ghi édî njí nâ Mmon-i-ntem-nne a kí karé ên. A fôn ikom ka ekarám ńjə́ne, ka Obhasi Ńsé yê ḿfoné a kâm ta a tóŋe eriŋ.”

²⁸Á bhə̂p mân yê sê, “E kí yim nan kən e yimá ntûm nnyi Obhasi a wóme?”

²⁹A táme se, “Ńgyê etûm nji Obhasi a wóme ên se ó yîm. Yuŋ ên ḿbə́ŋé kî na nne nnyo yê a túmi.”

³⁰Á kpô bhə́p yê sê, “Bhaghé etûm okpógha-biji nji kə́n o yîm mfá kən é yén é kâm na we. O kí yim bhaghé ejûm?

³¹Ane-éməné abhə́ré á díi édî nji á bhíŋa sê mána ka etə́m. Nâ noŋ fə́ne á séŋe ka nwet Obhasi sê, “A káre ábho édî nji é dʉ̂ ka ósô se á dí.”

³²Jisos a táme se, “Deê ń sə́ré ên ka etʉri bəre édî nji Mosis a karê ane-éməné abhə́né mfoné-mfoné édî Obhasi asík. Yê nnyo a ri Ńsé omé nâ á kará mfoné édî nji é dʉ̂ ka obhô obhê.

³³Ka nan? Édî nji Obhasi á kará a ri nne nnyo á dʉk ka ósô se a bhá karé ekpin ka ngun nnyí.”

³⁴Á táme yê sê, “Ńsé, karâ êt édî njí chénchén ebhú.”

³⁵Kən Jisos a sə́re ábho se, “Mme nâ n di édî ekpin. Nne nnyo á bha mbâ amé, njaé a rô kpó yam yê bhúghí-bhúghí. Nne nnyo á yuŋ ḿbə́ŋé a kî na mme, a rô fon ekot kpe ka ejûm jə́t.

³⁶Kən ka ekpak nji ta ń səre ên, ó yen ên ekpak nji n yimî, kən ó bhó yuŋ ên ḿbə́ŋé ó kí na mme.

³⁷Kpe énê nnyo Ńsé omé a karê mbâ amé, a kə́ bha mbâ amé. Nne fə́ne kpe nnyón nnyo á bhak mbâ amé, ḿ bó bhim yê a chəbhé njəm.

³⁸Echî aŋ? N dʉ mbâ Obhasi Ósô, m bák. Ń ka bhá bəre ḿ bá yîm nji é kóre ə̂m ka ḿbə́ŋé, kən m báe bəre ḿ bá yîm nji é kóra nne nnyo a túmi ə̂m.

³⁹Ńgyê ejûm nji nne nnyo a túmi ə̂m á korá. Se ka ane mba yê a karê ə̂m, n kâ yîm kpe yót a tán. Se fə́ne kpe á kpóe okpó, deê ń kó ábho á bhá ka ekpin ka nsígha-njəm ofú.

⁴⁰Ka etʉri, ejûm nji Ńsé omé a wóme é rî sê, kpe énê nnyo a yéne Mmon owe, a yûŋ ḿbə́ŋé a kî na yê, a kí fon ekpin ótúm-ótúm. Mme tîk n yîm yê a chə́bhe njəm ka ekpin ka nsígha-njəm ofú.”

⁴¹Ane Jus á róghe egəmə́m yê, ka a chorê se yê a ri édî Obhasi nji é dʉ̂ nnyi ósô.

⁴²Sê, “Jisos nnyo mmon i Jusep nná asík a? É məŋe ńsé, é məŋe nnyen. É kí yim nan a kpó səre se yê a dʉ mbâ Obhasi a bhák?”

⁴³Jisos se, “Maghê ên ogəm mbí.

⁴⁴Kpe nne yót nnyo a kə́ bha mbâ amé cháŋ, təm Ńsé nnyo a túmi ə̂m a tʉ̂ yê a bhák. Nne fə́ne nnyo á bha mbâ amé, n kí yim yê a chə́bhe njəm ka ekpin ka nsígha-njəm ofú.

⁴⁵Akará-otîp Obhasi á séŋe sê, ‘Obhasi nâ a kí kpi ane chénchén ejûm.’ Nne kpe nnyón mân nnyo á yugha nji Obhasi Ńsé á kpik, a yimá ka ekpak a yúghi, nâ a kə́ bha mbâ amé.

⁴⁶É ká fap sê kpe nne a yên Obhasi Ńsé. Nne nnyo a yéne yê a ri yót. Nne ányo a ri yê nnyo a dʉ mbâ Obhasi Ńsé yê ḿfoné.

⁴⁷Deê ń sə́ré ên ka etʉri bəre nne nnyo a yuŋî ḿbə́ŋé a kî na mme, a kí fon ekpin ótúm-ótúm.

⁴⁸Mme nâ n di édî ekpin.

⁴⁹Kpe noŋ ásé éməné abhə́né á díi mána ka etə́m, nne ábho nnyo a rô kpó cháŋ.

⁵⁰Kən ńgyê édî nji é dʉ̂ mbâ Obhasi é bhak ka nsi, nne a kí di, á bhó kpo a tán.

⁵¹Mme nâ n di édî nji é kára ekpin. N dʉ mbâ Obhasi m bák ka nsi. Kpe énê mân nnyo á di édî njí, a kí fon ekpin ótúm-ótúm. Édî njí a ri biji ibhámé mbi n kí karé bəre ane ngun á fôn ekpin.”

⁵²Kən ane Jus á róghe mân ekpóŋóm ábho-ábhô sê, “Nne nnyó a kí yim nan a sə́ré se yê a kí karé êt biji ibhê é dí?”

⁵³Jisos se, “Deê ń sə́ré ên ka etʉri bəre nne á ro di biji Mmon-i-ntem-nne, a gwô agyʉ́ŋ amê, á bhó fon ekpin.

⁵⁴Nne kpe nnyón nnyo a dî biji ibhámé, a gwô agyʉ́ŋ amámé, a kí fon ekpin ótúm-ótúm. N kí yim yê fə́ne a nyə́me ka nsígha-njəm ofú.

⁵⁵Echî aŋ? Biji ibhámé nâ í rî mfoné édî, agyʉ́ŋ amámé mfoné ayép.

⁵⁶Nne nnyo á di biji ibhámé, a gwô agyʉ́ŋ amámé, ekpin ejê é rî na mme, mme fə́ne n di ka ekpin ejê.

⁵⁷Mfoné Obhasi Ńsé nnyo á kará ekpin nâ a túmi ə̂m. Yê nâ á kará ə̂m ekpin. Kpe énê fə́ne nnyo á di ə̂m, n kí karé yê ekpin njí.

⁵⁸Ḿfa mân nâ édî nji é dʉ̂ mbâ Obhasi é bhak ka nsi. Cháŋ noŋ mána nnyi ane-éməné abhə́né á díi, kən kpe nne ábho nnyo a nyə́ne ka ekpin cháŋ. Kpe énê mân nnyo á di édî njí, a kí fon ekpin ótúm-ótúm.”

⁵⁹Jisos a kpíi achot mmá chénchén ka óchâm Obhasi ka Kapanom.

⁶⁰Atóbhá Jisos á yûk achot mma yê a chorê nná, kən etî-etî biji í kpô ábho kpe-eji. Á chə́bhe á chorá sê, “Ntʉ́ghi mbí okpígha-ejûm ó chíŋi êt kpá. Énê nnyo kə́n a kâm na achot ntʉ́ghi mmá?”

⁶¹Kən Jisos a mə́ŋe se á kí gəm yê, a bhə̂p ábho se, “O kí yam ên ḿbə́ŋé na nchot amé tîk?

⁶²Ájoé ńji é kí yam ên ḿbə́ŋé, kən ebhú ó yen ên mân Mmon-i-ntem-nne a kí gyʉt a jak mbâ Obhasi ka eji nji a ri ofú ábhi.

⁶³Nji é kára ekpin a ri ńtʉgântʉ Obhasi. Ń ka chot nchot mfoné ngu-biji edíím, kən achot mma ń səra ên áno nâ á kí karé ên ńtʉgântʉ Obhasi na ekpin.

⁶⁴Kən kpe noŋ o yúghi ên áno, etʉ̂ ên ó bhó ki ên ḿbə́ŋé na mme. Nâ echî é yími kən n sə́re ên bəre kpe nne yót cháŋ nnyo a kə́ bha mbâ amé nji Obhasi á ka kak yê obhô.” Ta ka eróghá-ndə́p, Jisos a mə́ŋe ane mba tîk á bhó ki ḿbə́ŋé na yê, na nne nnyo tîk a gúri yê.

⁶⁵

⁶⁶Okpígha-ejûm í Jisos ó yîm etî-etî ane mba á tóbha yê á mághe yê etóbhóm.

⁶⁷Jisos a bhə̂p mân ágbán abhê ófó na ábháe se, “Ên fə́ne aŋ? O kí wom ó mághe ên ə̂m eróŋ a?”

⁶⁸Kən ḿgbán owe yót a kamá se Simun Pita a táme se, “Ntûfâm, e kí kpo maghé wâ é jî mbâ énê? We nâ o fonê nchot nnyi a kí karé ekpin ótúm-ótúm.

⁶⁹Êt fə́ne é ki ḿbə́ŋé na we. É məŋe sê we a ri obhô-orûm Obhasi. O dʉ mbâ eye o bhák.”

⁷⁰Jisos a bhə̂p ábho se, “To mme nâ n sáŋe ên ófó na ábháe? Deê ń sə́ré ên bəre nne owəné yót a ri ndûm i nyima-obhí.”

⁷¹A chorê áno a kpê na Juda nnyo mmon i Simun Iskariyot. Kpe noŋ yê eróŋ a ri ḿgbán yót ka ágbán ófó na ábháe mba á tóbha Jisos, yê nâ a kí gurí Jisos.