Read ejagham Jon, echî 7 Bible Online

Jon, echî 7 - ejagham bible

Jon, echî 7

¹Ḿma á kpó to á chíŋ, Jisos a jená a fárá nték i Gariri. Kən á ka ji ebhat í Judiya, ka atúi-ofâm ane Jus á kí wom á yúí yê.

²Kən erom ane Jus nji á kâk ka ntəm é kpíri.

³Abhon-í-nnyen í Jisos á bhâ sə́re yê sê, “Maghê choŋ nnyi Judiya, ane mba á tóbha wâ á yén ntûm nnyi ó yimá.

⁴Nne nnyo a kí wom se ngun á mə́ŋe yê á bhó yim iyîm ka ebhə̂t. Ka eji o kí yim iyîm mbí, choŋ ngun á yén wâ.”

⁵Kpe mba á rî abhon-í-nnyen í Jisos á ká ki ḿbə́ŋé na yê.

⁶Nji á chóre nchot nnyí, Jisos a sə́re ábho se, “Ebhú ejámé é nyə́ne é ká si, kən ejə́né é rî kpe bhaghé ebhú.

⁷Ejûm ngun á kí bhan ên cháŋ, kən á kí bhan ə̂m, ka n kí toŋe jáé bəre á yíma obhí.

⁸Ên choŋ ên erom, kən mme ḿ bó bha, ka mfoné ebhú ejámé é nyə́ne é ká tʉrí osí.”

⁹Nji Jisos a sə́re ábho áno, a kə̂t fə́ne ka Gariri, á ka ji nnyi Judiya.

¹⁰Abhon-í-nnyen í Jisos á kpó ji erom ka Jerusarem, Jisos a mághe fə́ne a jak, kən a ri ka ebhə̂t, ane á kâ mə́ŋe.

¹¹Atúi-ofâm ane Jus á róghe yê ewómóm ka erom njí sê, “Nne nnyó a ri fan?”

¹²Ane á kə̂t á chəmá ka nkam ka nkam á gəmá yê. Etʉ̂ sê yê a ri nnyen i nne, kən etʉ̂ sê a ri nne nnyo á jená a rirá ane.

¹³Kən kpe nne nnyo a kí chot jáé cháŋ, ka á kí fup atúi-ofâm ane Jus.

¹⁴Nji ta erom é si étíŋanti, Jisos a jî gyê ókʉ́rí achot Obhasi, a róghe ane achot ekpíím.

¹⁵É kpô atúi-ofâm ane Jus biji kpe-eji sê, “Nne nnyó a məŋê achot mmá nan nji kpe njû-osêŋ á ka ji?”

¹⁶Kən a táme ábho se, “Achot mmá ḿ kpik nná á ká dʉ mbâ amé, á dʉ̂ mbâ nne nnyo a túmi ə̂m.

¹⁷Kpe énê nnyo á kam se yê tîk a yîm ka ekpak nji Obhasi a wóme, tîk a mə́ŋe ájoé achot mmá ḿ kpik ane á dʉ̂ mbâ amé, na kpe ebhú tat mbâ Obhasi.

¹⁸Ájoé nne á chorá achot amê yê ḿfoné, á woma a ri ejík ejê. Kən ájoé á chorá se ejík é jóe é káre a ri nne nnyo a túmi yê, ntʉ́ghi nne ányo nne áfúbhí asík. Ekpin ejê é rî ka nnyen-i-mbá.

¹⁹To Mosis a karê ên ebhín, kən kpe nne owəné nnyo á kik ebhín cháŋ. Ó woma ên jen ó yúí ên ə̂m?”

²⁰Ekam ane njí á bhə̂p yê sê, “Ojê ó kí karé wâ oseŋe tîk? Énê nnyo á woma wâ eyúúm?”

²¹A táme ábho se, “Ka obhô etûm bhə́t-abhərâ o kí kuk ên.

²²Kən ên, o kí kimâ ên abhon arûm abhə́né nkîm kpe na ofú oyoá-biji, ka Mosis a karê ebhín í nkîm. Nchot i nkîm nnyí á ka róghé kpe na Mosis. A róghe na ane-éməné.

²³Ájoé mân o kí kimâ ên nkîm ka ofú oyoá-biji sê o kâ gbô ên ebhín í Mosis, ó yama ên mân ḿbə́ŋé na mme jen ka n yimî nne a sôn a chə́bhe njəm ka biji ka ofú oyoá-biji?

²⁴Deê o bhíbhá ên mbiŋ i nne nji á gbo ka etʉri. Ka kpó bhibhi ên mbiŋ i nne nji á ka yim ejûm ebhí.”

²⁵Etʉ̂ ane Jerusarem á róghe echoróm sê, “Nne nchane nná asík nnyo á wóma nná á yúí a?

²⁶Ńgyê noŋ á chorá ka éré kpúŋúnúŋ, nne nnyo á chorá kpe ejûm na yê cháŋ. Nâ-ngá ane-echî abhə́ré á məŋe sê yê a ri Krayis, nne nnyo Obhasi a túmi a bhá yim êt é sém tîk?

²⁷Kən á séŋe sê ebhú nne nchane á bha, kpe nne nnyo á məŋá ebhat a dʉ cháŋ. Kən êt é məŋe ebhat í nne nnyó a dʉ.”

²⁸Jisos a nyə́ne a kpík áfo ka ókʉ́rí achot Obhasi, kən a kûk se, “Nâ ngá ó məŋe ên ə̂m ka etʉri a? Ó məŋe ên mbá n dʉ m bák a? Ń ka bhá ka ikom ifámé. Yê nnyo a túmi ə̂m nne áfúbhí asík. Ó ka məŋé ên yê.

²⁹Mme nâ m məŋê yê, ka n dʉ mbâ eye. Yê nâ a túmi ə̂m.”

³⁰A kpo to a chot áno, ane á nôk yê efiím kən kpe nne nnyo a kí raŋ yê obhô cháŋ, ka ebhú ejê é nyə́ne é ká si.

³¹Kən ábho etî-etî á kî ḿbə́ŋé na yê. Á bhəbha biji sê, “Ebhú nne nchane nnyo Obhasi a kí tum á bha, a kí kpo yim bhaghé ntʉ́ghi ntûm okpógha-biji nnyi a kí chiŋi nnyi nne nnyó a yimî nná?”

³²Ane Jus mba echəme Farasi á yûk ogəm mbi ane á gə́ma Jisos. Á jak mân á jî chə̂m ndə́p na ane-echî akará-agore Obhasi, á tûm abhábhá-ókʉ́rí achot Obhasi á jí fî yê.

³³Kən Jisos a sə́re ane se, “Ebhú é ká kpo rap nji n kí joé na ên kən ń chə́bhe njəm mbâ nne nnyo a túmi ə̂m.

³⁴Tîk o wôm ên ə̂m, kən ó bhó yen. Mbá n kí joé, ó bhó bhik ên ebháám.”

³⁵Atúi-ofâm ane Jus mân á róghe atem ebhə́bhə́m sê, “Nne nnyó á jak fan nji é bhó yen yê? A kí ji ka nték ajéné nnyi ane Jus á rî tîk? A kí ko achot amê a jí kpi ajéné tîk?

³⁶Echî nchot eye a ri jen nnyi se, ‘Tîk o wôm ên ə̂m ó bhó yen. Mbá n kí joé, ó ka bhik ên ebháám.’ ”

³⁷Ntə̂m ofú erom nâ a faŋê a chíŋi ochíŋ. Ka ofú mbí títí, Jisos a gyími a kí kuk se, “Kpe énê nnyo ayép á kí kot yê, deê a bhá mme ń káre yê a gwó.

³⁸Ka ekpak á séŋe sê, ‘Nne nnyo á yuŋ ḿbə́ŋé a kî na mme, tîk ayép ekpin á sek yê ka biji noŋ mmon ayép oyum.’ ”

³⁹Ayép mma Jisos á chorá áno a ri ńtʉgântʉ Obhasi nnyo ane mba á yuŋ ḿbə́ŋé á kî na yê á kí fon. Ta é si ebhú njí, ane á nyə́ne á ká fon ńtʉgântʉ nnyó, ka Obhasi a nyə́ne á ka yuŋ Jisos a karé ekumi otúi.

⁴⁰Ane etî-etî á yûk achot í Jisos á kâm sê yê a ri nkara-otîp Obhasi nchane ka etʉri.

⁴¹Etʉ̂ sê Jisos a ri Krayis, nne nnyo Obhasi a túmi a bhá yim ábho á sém. Kən etʉ̂ ane á kí bhəp sê, “Krayis a kí yim nan a dʉ eték í Gariri?

⁴²To á séŋe ka nwet Obhasi sê Krayis, nne nnyo Obhasi a kí tum a bhá yim êt é sém, a kí joé eyábhé-mmon í Debhit? Á kí ji yê ka Betrehem, eték nji Debhit a dʉ?”

⁴³Achât á bhâ gbô mân ka ekam njí ka obhô Jisos.

⁴⁴Etʉ̂ ane á wóma kə́n sê á fî yê, kən kpe nne nnyo a kí raŋ yê obhô cháŋ.

⁴⁵Abhábhá-ókʉ́rí á chə́bhe mân njəm á jak mbâ ane-echî akará-agore Obhasi na ane echəme Farasi. Atúi-ofâm mbá á kí bhəp ábho sê, “É yími nan kən ó ka fi ên nne nnyó ó bhá ên?”

⁴⁶Á táme sê, “Nne kpe yót nnyo a nôk ochot ka ekpak nji nne ányo á chorá nchot cháŋ.”

⁴⁷Ane echəme Farasi á bhə̂p ábho sê, “Nne nnyó a ríri ên fə́ne a?

⁴⁸Ó nok oyén ên kpe nne echəme Farasi yót, kpe nne-echî yót a kâm na nne nnyó a?

⁴⁹Bhúghí-bhúghí! Ekam njí á ká məŋé kpe ejûm á kpê na ebhín Obhasi. A ri enyo nji Obhasi a toê ábho.”

⁵⁰Nne yót a ri ka echəme Farasi a kamá se Nikodemus. A râŋ mbá kpá a jî mbâ Jisos. Nikodemus a bhə̂p ábho se,

⁵¹“Nâ-ngá ebhín ejə́ré é kam sê é bhíbhí nne nji é ka yúk ejûm nji nne a yimî, e bhə̂p yê fə́ne ejûm nji a yimî a?”

⁵²Kən á bhə̂p yê fə́ne sê, “Átíŋ we eróŋ o dʉ Gariri? Bhiŋ nwet Obhasi eya nono, tîk o mə́ŋe se kpe nkara-otîp yót nnyo a kí dʉ Gariri cháŋ.” [

⁵³Kpe énê mân a mághe a kʉ́rá ka eye njû.