Read ejagham Jon, echî 8 Bible Online

Jon, echî 8 - ejagham bible

Jon, echî 8

¹Nji ane á kʉ́ri, Jisos a jak ka Egui Orif.

²Na ofú-ofú ntem-ofú, a chə́bhe njəm a jak ka ókʉ́rí achot Obhasi. Ekpatə́m ekam ane é bhâ fáre yê é kâk. A kúmi fə́ne a róghe ekpíím achot Obhasi.

³Kən atóŋá-ebhín na ane echəme Farasi á kô nne-nkáé etat nnyo sê a gboê ekun a bhâ gyími áfo ka ochî ane.

⁴Á bhîŋ Jisos á sə́re sê, “Ńsé, nne-nkáé nnyó a gbô ekun. E fiî yê ofi.

⁵Ka ebhín í Mosis á túbha ntʉ́ghi nne-nkáé nnyó atáé ta a kpô. Kən we ó kere se jen?”

⁶Ebhə̂p njí a ri oka mbi sê á fî Jisos kən á sə́ré sê a yîm obhí. Kən Jisos a kə́bhe nkə́p a róghe eséŋém ejûm etat ka nsi na indəré.

⁷Nji á rî áfo, á bhəbha yê bibhə̂p, Jisos a rúi ngyím a sə́re ábho se, “Nne owəné kpe yót nnyo á ka yim obhí kpe bhə́t, a raŋ mbá a túp nne-nkáé nnyó na ntáé.”

⁸A kpô kə́bhé a kí seŋ ka nsi.

⁹Nji ane mbá á yúghi ejûm nji Jisos a chorê, á róghe emaghám yóré-yóré, ane-akúí nâ á ráŋe mbá, abhóné á tobha. Á jak fép á mághe nne-nkáé nnyó áfo ngyím na Jisos.

¹⁰Jisos a rúi ngyím, a bhə̂p nne-nkáé nnyó se, “Nne-nkáé, ane mbá chénchén á ji fan? Nne ábho kpe yót á ka kə́t obhíbhí wâ a?”

¹¹Nne-nkáé nnyó fə́ne a táme se, “Ńsé, kpe nne ábho yót á ka kə́t a bhíbhí ə̂m.” Jisos a sə́re yê mân se, “Kpe mme ḿ bó bhibhi wâ. Choŋ kʉ́ri, kən o kâ kpô yim obhí.”][2]

¹²Jisos a kpô sə́ré ane se, “Mme nâ n di ebhát ngun. Kpe énê nnyo á top ə̂m a kí fon ebhát nji é kí karé yê ekpin. Ntʉ́ghi nne ányo a rô kpo yim ekpin noŋ nne nnyo a ri ka ejírim.”

¹³Kən ane echəme Farasi sê, “Ágo nâ eya we átíŋ, nji ó chorá áno noŋ ntî-isê biji ibhâ, nkamá, nâ énê?”

¹⁴Jisos a táme se, “Kpe é joé sê n kí ko biji ibhámé ntî-isê, nji ń chorá é rî ka echî. Ka nan? Ḿ məŋe mbá n dʉ na mbá ń jak, kən ên ó ka məŋé.

¹⁵Ên ó taŋá ên ane ka ebho ngun, kən mme ḿ bó taŋ nne kpe yót.

¹⁶Kən ájoé kpe sê ń táŋ nne, akôp á bhó joé. Echî aŋ? Ń ka joé mme átíŋ, kən ńsé nnyo a túmi ə̂m a ri na mme.

¹⁷Á séŋe fə́ne ka ebhín ejə́né sê otî-isê ane ábháe nâ ó rî mfoné otî-isê.

¹⁸Mme ń gyimi ntî-isê biji, Ńsé fə́ne nnyo a túmi ə̂m a kpô gyímí ntî-isê omé.”

¹⁹Á bhə̂p mân yê sê, “Ńsé owa a ri fan?” Jisos se, “Ó ka məŋé ên ə̂m, kpe Ńsé omé ó ka məŋé ên. Ebhú sê o məŋê ên mme eê, kə́n o kí məŋé ên fə́ne Ńsé omé.”

²⁰A ri ka ebhú nji Jisos á kpik ane achot ka ókʉ́rí achot Obhasi nâ a chorê achot mmá chénchén. A gyím kpít na eji á kîk ntí a chorá, kən kpe nne nnyo a raŋê yê obhô cháŋ. Echî aŋ? Ebhú ejê é nyə́ne kpá é ká si.

²¹Jisos a kpô sə́ré ábho se, “Mme n kí maghé ên. Tîk o wôm ên ə̂m kən o kí kpo ên ka obhí obhə́né. Ó bhó bhik ên ebháám mbá n jiî.”

²²Atúi-ofâm ane Jus á chə́bhe á bhəbha atem sê, “Nâ-ngá a kí wom a yúí biji tîk? Nâ echî á chorá se mbá yê a kí ji, nne nnyo a bhighî ejiím cháŋ a?”

²³Jisos a jak ochî na nchot eye se, “Ên o dʉ ka ngun nnyí, kən mme n dʉ mbâ Obhasi. Ên a ri ane ngun, kən mme n dʉ mbâ Obhasi.

²⁴Ń səre ên kpá bəre o kí kpo ên ka obhí obhə́né ájoé ó ka kam ên sê nâ mme nná. Ka etʉri, o kí kpo ên ka obhí obhə́né.”

²⁵Kən á bhə̂p yê sê, “We nâ énê kpá títí?” A táme ábho se, “Mme a ri yê nnyo n sə́re ên ta ka eróghá-ndə́p.

²⁶Iyîm etî-etî í rî mbi kə́n n chôt m bíbhi ên kən nchot cháŋ. Nne nnyo a túmi ə̂m á ka joé nne áfúbhí. Nji n yúghi ka nnyo imê, nâ ńjə́ne n kí səre fə́ne ngun ndə́m.”

²⁷Kən ane á ká ki echî á mə́ŋe sê Jisos á chorá á kpek na Obhasi Ńsé owe.

²⁸Jisos a sə́re mân ábho se, “Ebhú ó tʉghi ên Mmon-i-ntem-nne ka ego, tîk o mə́ŋe ên mân sê nâ mme nná. Tîk o mə́ŋe ên fə́ne sê ḿ bó yim ejûm kpe jə́t ka ikom ifámé. Nji-nji n kí chot a ri Ńsé omé nâ a kpíi ə̂m.

²⁹Yê fə́ne nnyo a túmi ə̂m a ri na mme, á ka maghé ə̂m átíŋ, ka ń yimá kpe jen nji é gyébha yê ka ḿbə́ŋé.”

³⁰Ane etî-etî mba á yúghi achot mmá, á yûŋ ḿbə́ŋé á kî na yê.

³¹Jisos a sə́re mân ane Jus mba á yúŋi ḿbə́ŋé á kî na yê se, “Nne nnyo á yim ka ekpak ń səra ên nâ a ri mfoné-mfoné ntóbhá omé.

³²Ntʉ́ghi nne ányo tîk a mə́ŋe mfoné nchot Obhasi. Ńnyə́ne nâ a kí yim yê a sém.”

³³Kən ane á bhə̂p yê sê, “Êt a ri biyábhé-abhon Abraham, osʉ́ŋ í nne asík e noghê ogbo. É yími nan o kí səre se tîk e sêm?”

³⁴Jisos a táme mân ábho se, “Deê ń sə́ré ên ka etʉri bəre kpe nnyón nne nnyo á yimá obhí, a gbô osʉ́ŋ a káre obhí.

³⁵Mmon nâ a fonê ndə́p-i-njû, a ri eye ta ngun a mân, kən nsʉ́ŋ á ka fon mfoné efə́k-eji.

³⁶Ka obhô mbí, ájoé Mmon á yim wâ o sêm, məŋê se ó sem ka etʉri.

³⁷Ḿ məŋe bəre ên a ri biyábhé-abhon Abraham, kən o kí wom ên ó yúí ə̂m, ka nchot amé kpe yə́t nnyi a gyée ên ka echî cháŋ.

³⁸Achot mma ń chorá nná chénchén, m kpíi mbâ Ńsé omé, kən ên ó yimá ên achot mma ńsé owəné á kpíi ên.”

³⁹Ane mbá á kpô sə́ré Jisos sê, “Abraham nâ a ri ńsé owəré.” Jisos se, “Ájoé sê ên a ri abhon Abraham kə́n o yimá ên ekpin noŋ yê a yimî.

⁴⁰Kən ńgyê mme n gyím n sə́rá ên mfoné nchot nnyi a dʉ mbâ Obhasi, kən o kí wom ó yúí ên ə̂m. Abraham á bhó yim ntʉ́ghi ekpin njí.

⁴¹Ó yimá ên áno ekpin noŋ ńsé owəné á yimá.” Ane mbá á sə́re yê sê, “Êt é ka joé abhon mba á ká məŋé ńsé. Obhasi átíŋ nâ a ri Ńsé owəré.”

⁴²Jisos se, “Ebhú sê Obhasi nâ a ri Ńsé owəné ka etʉri, kə́n o fôn ên okot na mme, ka n dʉ mbâ Obhasi m bák mfá. Mme asík ka biji ibhámé n sə́re bəre n kə́ bha. Yê nâ a túmi ə̂m.”

⁴³A bhə̂p mân ábho se, “Ó məŋe ên ejûm nji nchot amé á bhó gye ên ka echî a? Ó ka wóm ó yúk ên ńnyə́ne.

⁴⁴Ntûfâm obhí nâ a ri ńsé owəné, ó korá ên fə́ne o yimá ên nji yê a wóme. Ta ka eróghá-ndə́p yê a ri nyúa-nne. Á ka nok oməŋé nchot ka echî. Nchot ka echî na yê cháŋ bhúghí-bhúghí. Ebhú a kí səre áfúbhí, é ká joé yê kpe ejûm etat, ka nâ ekpin ejê. Yê a ri nne áfúbhí, ńsé nnyo a fonê áfúbhí chénchén.

⁴⁵Ń chorá nchot amé ka echî, nâ ńjə́ne ó bhó kam ên na mme.

⁴⁶Énê owəné nnyo kə́n a tóŋe se mme nyima-obhí? Jen mân nji ń səre ên nchot ka echî ó bhó kam ên na mme?

⁴⁷Nne Obhasi á korá nchot Obhasi eyúghúm. Ó taŋé ên eyúghúm é rî a ri sê ên ane Obhasi asík.”

⁴⁸Ane Jus mbá á sə́re Jisos sê, “É ka sə́ré áfúbhí nji e chorê sê we nne Samariya nnyó, ojê obhâ ó faŋ ó chiŋ.”

⁴⁹Jisos se, “Ń ka fon ojê, ń jigha Ńsé omé kən o kí wom ó bhíbhí ên mbiŋ amé.

⁵⁰É ká joé sê kpe ń woma ejík ejámé mme ḿfoné. Nne a ri nnyo á woma ńjə́ne a karé ə̂m. Nne nnyó nâ a kí taŋ achot á nôp ə̂m.

⁵¹Deê ń sə́ré ên ka etʉri bəre nne nnyo á yuk nchot amé, á bhó yen ekʉ̂ na amə̂t.”

⁵²Kən ane Jus mbá sê, “É məŋe mân mfá-mfá sê ojê nâ ó kára wâ oseŋe. Abraham a kpô, akará-otîp Obhasi á kpô, kən we o kí səre ane se nne nnyo á kam na otîp obhâ á bhó kpo.

⁵³Ńsé owəré Abraham a kpô, é kere sê ó bhó kep biji se ó faŋ ó chiŋi Abraham. Átíŋ nâ noŋ ó kera? Akará-otîp Obhasi eróŋ á kpo, we nâ énê?”

⁵⁴Jisos se, “Ebhú sê ń woma ejík ejámé mme ḿfoné, kə́n áfo a ri chichi. Kən Ńsé omé nâ á kará ə̂m ejík. Yê títí nnyo ó səra ên áno sê Obhasi owəné.

⁵⁵Nne owəné nnyo a noghê oməŋé yê cháŋ, kən mme ḿ məŋe. Ń səre bəre ń ka məŋé yê, n kí səre áfúbhí noŋ ên. Ḿ məŋe yê, ń yimá nji yê a wóme na ḿbə́ŋé amé yə́t.

⁵⁶Ńsé owəné Abraham a fonê ekpatə́m ogyebhá-ḿbə́ŋé ebhú áji se yê tîk a yên ebhú n kə́ bha. A yên fə́ne, é gyébhe yê kpe-eji.”

⁵⁷Ane Jus á bhə̂p yê sê, “We kpe nsam i nyâ ébháe na ófó ó ka sí, se ó yen Abraham a?”

⁵⁸Jisos se, “Deê ń sə́ré ên ka etʉri bəre kən á bhá jí Abraham, mme n di.”

⁵⁹Ane mbá á bhûp mân atáé sê á túp yê, kən Jisos a bhə̂t biji a ruá ka ókʉ́rí achot Obhasi mbí.