Read ejagham Etûm ágbán~í jisos, echî 12 Bible Online

Etûm ágbán~í jisos, echî 12 - ejagham bible

Etûm ágbán~í jisos, echî 12

¹A ri ka ebhú njí nâ Ntûfâm Erot a róghe ekpatə́m onyʉk ekarám mbâ etʉ̂ atóbhá Jisos.

²A fî Jems nnyo mmon-i-nnyen i Jon, a gbût echî.

³A kpô yén se ejûm nji yê a yimî é gyebhe ane Jus ka ḿbə́ŋé, a sə́re se á fî Pita fə́ne. Á fíi Pita ka ebhú Erom Édî Ábhiî-Ábhiî Eyámám.

⁴Á kô yê á kâk ka ókúmí. A kî ane-enok ánî-ánî, nkam énî sê á bhabha yê ka ńgyímí ka ńgyímí. Erot a wóme se yê a táŋ esup í Pita ebhú erom í Ntə̂m Osʉ́ŋ é man.

⁵Á kî mân yê ka ókúmí, kən ane echəme atóbhá Jisos á gyê Obhasi egoróm na ḿbə́ŋé-a-ḿbə́ŋé sê a nyáŋé Pita.

⁶Na atʉ́ kən ó ché mbi Erot a kí ko Pita a fáp ka ochî esup, Pita a nuŋ ka étíŋanti ane ábháe mba á bhábha yê. Á bhôp yê na mkpokobhé ébháe. Ane etat á gyím fə́ne ka nnyo-mbá ókúmí á bhabha.

⁷Ka ngyím ányi, énjel a fâp áfo ka ókúmí, ebhát é gbô ka mmon-i-njû nnyo á kíi nná Pita. Énjel nnyó a jak a jî nyíŋi Pita ka efâŋ, a sʉ̂k yê se, “Duî ngyím babhap, choŋ fâp.” Ka nkúbhi ebhú áji, mkpokobhé nnyi á bhóbhe nná yê, a kîm, a gbô.

⁸Énjel nnyó a sə́re yê se, “Kak nkʉ̂ na iyîm-akát.” Pita a yîm fə́ne ka ekpak njí. A kpô sə́ré se, “Kô kût, buî ka biji, tóp ə̂m bhák é jî.”

⁹A tôp fə́ne yê á fabha ka njû ókúmí. Á ka kam se ejûm nji énjel á yimá áno é rî ka echî, kən a kí kere a ri se yê á yena ndem.

¹⁰Yê na énjel nnyó á chîŋ ndaŋa-mbá eji nji abhábhá-ókúmí á gyím, á chîŋ enyeré, á bhâ fâp ka nnyo-mbá nsené mmi ó chiŋ kən o gyê eték. Nnyo-mbá mmí ń də́bhe ka biji ibhê. Á fâp á jak ebhát í mbá etat kən énjel nnyó a mághe yê mân áfo.

¹¹É bhâ jáe mân Pita a chôt se, “Ḿ məŋe mân ka etʉri bəre Ńtâ Jisos a tûm énjel owe a bhâ nyáŋe ə̂m ka obhô Erot na chénchén nji ane Jus á kére sê tîk é fâp na mme.”

¹²Nji é kpô jáé yê nná, a chîŋ a jak ka njû Meri nnyo nnyen i Jon Mak. Ane etî-etî á rî áfo á gorá Obhasi.

¹³A sûm itə̂m. Mmon i nkáé etat a kamá se Roda a bhák a bhá yen nne nnyo á suma.

¹⁴Nji a kpo yúk eyum í Pita a mə́ŋe, ka ogyebhá-ḿbə́ŋé a mághe itə̂m erəbhə́m, a bhéne a chə́bhe njəm a jî sə́re ane mba á rî nná ka njû se Pita a gyím ka itə̂m.

¹⁵Kən á nyân yê onyán sê a kí gbe ekí tîk. Kən mmon nnyó a ri ori a sə́rá ábho se Pita a gyím ka itə̂m. Á kére mân sê ebhú tat é bhâk ojoé a ri énjel nnyo a fonê Pita.

¹⁶Kən Pita a ri ori a súmá ka itə̂m. Á kpó rəbhé á yén yê, biji í kpô ábho.

¹⁷Kən a bhúi ábho obhô ka nnyo se á kâ yîm ejok. A sə́re fə́ne ábho ekpak í Ńtâ Jisos a yighî yê ka ókúmí. A sə́re ábho se á sə́ré Jems na atem-abhon-í-nnyen. A mághe mân ábho áfo a jak ebhat etat.

¹⁸Ofú ó kpó che, ekpatə́m í nchot a gbô ka njû ókúmí, abhábhá-ókúmí á kí bhəp nji é fábhe na Pita.

¹⁹Erot a káre ikom se á wóm mbâ Pita a jiî, kən á wôm á ká yen. A fî abhábhá-ókúmí mbá á bhə̂p bibhə̂p, kən a káre ikom se á yúí ábho. Erot a mághe mân a jak nnyi Judiya, a kâ ka eték í Sesariya.

²⁰Nji Erot a ri ka Sesariya, a fôn okpóŋe na ane eték í Taya na Sidon. Nték nnyí ébháe á chə̂m eji jə́t, á jí yén Erot. Nji á síi ágo, á nôk ta nne-echî ókʉ́rí Ntûfâm Erot a kamá se Bratus, a kâm na ábho. Á tûm mân ane á bhâ táŋ achot okpóŋe mbí ó mân. Echî é rî se nték nnyí á fóna édî ábho ka eték Erot.

²¹Á kî ofú á kí taŋ achot. Ofú ábhi ó kpó si, Erot a kâk oguŋi otúi obhê, a fâp a kúmi ka ekumi otúi kən a kí chot mbâ ane.

²²Kən ane á kí kuk sê, “Eyum, ḿfa a re Obhasi nâ á chorá, nne asík.”

²³Kən Erot á ka jíghí Obhasi ebhú ane á kúgha áno. Ka ngyím ányi mân, énjel a tûp Erot emaŋé. Adʉ á dî yê, a kpô fə́ne.

²⁴Nchot Obhasi a kə̂t a jená a jabhá ngûm, a kúá.

²⁵Banabas na Sol á jak nnyi Jerusarem. Etʉri-étʉ́ri nji á jéghe etûm ábho, á kô Jon Mak á chə́bhe njəm nnyi Sesariya.