Read ejagham Etûm ágbán~í jisos, echî 13 Bible Online

Etûm ágbán~í jisos, echî 13 - ejagham bible

Etûm ágbán~í jisos, echî 13

¹Ka echəme atóbhá Jisos ka Antiyok akpíghá-ane achot á rî, akará-otîp fə́ne á rî. Ane noŋ Banabas, na Simun nnyo á bhíŋa yê sê Ényaghé-nne, na Lusiyus nnyo nne Sirin, na Manayen nnyo á gyée ka ókʉ́rí Ntûfâm Erot, na Sol eróŋ.

²Nji echəme ane njí á kí goré Obhasi, á kak njaé sê á jíghí yê, Obhasi Ebhare Ntʉgantʉ a sə́re ábho se, “Sâŋ ên Banabas na Sol, kî ên ə̂m, á yîm etûm nji n kíi mbâ ábho.”

³Echəme ane njí á kâ njaé á góre Obhasi, á kúni Sol na Banabas obhô ka echî á yóre ábho, á tûm ábho se á jí yîm etûm nji Obhasi a túmi ábho.

⁴Nji Obhasi Ebhare Ntʉgantʉ a kpô túm Banabas na Sol ejen, á mághe á jak Serusiya. Á kpó maghé Serusiya á jak aya-áyâ ta á sî Sayiprus.

⁵Á jak Salami á jî gyê áchâm Obhasi ane Jus á sə́re ane achot Obhasi. Jon Mak nâ nkagha-ábho-obhô.

⁶Á jên á fáre nték i Sayiprus a mân. Nji á síi eték í Pafos, á kpúghi nne Jus yót nnyo á yimá ajom a kamá se Bajisos. Ka eyum í Grik sê Erimas. Á səra se yê nkara-otîp Obhasi, kən a ri áfúbhí. Nne nnyó a ri nyima-etûm yót ka ane mba á kágha Ntûfâm Sejiyus Poros obhô. Ntûfâm nnyó a fonê aron kpe-eji. Kən ofú bhə́t ntûfâm nnyó a bhîŋ Banabas na Pol se á bhá sə́ré yê achot Obhasi. Kən nne ajom nnyó, Erimas, a nôk ekpak nji a kí gbʉi ábho se á kâ bhâ oyim ntûfâm nnyó a chəbhé ntóbhá Jisos.

⁷

⁸

⁹Kən Sol, nnyo á kamá fə́ne se Pol, a kêp nne nnyó ka ochî nyamḿ. Obhasi Ebhare Ntʉgantʉ a súi yê ka biji kpúk. A sə́re nne nnyó se,

¹⁰“We mmon i Satan, we nnyo ó bhaná chénchén ejûm nji é rî nono, oka ndibhí mbi ó rî wâ, we nnyo ó noghá ó yóŋé mfoné nchot i Ńtâ Obhasi a chəbhé nnyi áfúbhí.

¹¹Ńtâ Obhasi a kí toŋe wâ indəré mfá-mfá. Amə̂t amâ á kí tan ka ngyím nnyí, ó ro kpó yen ebhát ta ebhú é jak.” Ka ngyím ányi Erimas a yûk noŋ ejûm é bhúi yê amə̂t, a róghe fə́ne ejeném a fará, yê a wóm kpe nne nnyo a kí fi yê na obhô a tóŋá mbá.

¹²Nji ntûfâm nnyó a kpô yén ejûm nji é fábhe, a yûŋ ḿbə́ŋé eye a kî na Jisos. Biji í mân yê na okpígha-ejûm mbi ó kpée Ńtâ Jisos.

¹³Pol na ane mba á jéna na yê á mághe Pafos á jak nnyi Pega ka Pamfiriya, aya-áyâ. Jon Mak a mághe mân ábho áfo a chə́bhe njəm nnyi Jerusarem.

¹⁴Kən Pol na ane mba ngá á yə̂p ka Pega á jak ta á sî Antiyok ka Pisidiya. Ka ofú oyoá-biji, á jak ka óchâm Obhasi, á kúmi.

¹⁵Nji ane á kpó man esə́re Obhasi ka nwet ebhín na nnyi akará-otîp á séŋe, ane-echî óchâm Obhasi mbí á sə́re baPol sê, “Atem-abhon-í-nnyen, ájoé ó fon ên kpe nchot nnyi kə́n o kâk ên êt ḿbə́ŋé, sə́re ên êt.”

¹⁶Pol a rúi fə́ne ngyím a nyíŋi obhô se ane á mághe ejok, a róghe mân echoróm se, “Atem-ane Isrel abhámé na ên ajéné chénchén mba ó jigha ên Obhasi, yûk ên nchot amé.

¹⁷Obhasi ane Isrel nâ a sáŋe ásé abhə́ré éməné a yîm ábho ekpatə́m ane nji á rî ka ojéné ka nsi Ijip. Na ekpatə́m ikom ifê, a yíghi ábho nji á jóe ka osʉ́ŋ ka eték Ijip.

¹⁸A kə̂p ḿbə́ŋé na ekpin ábho ka nsam i nyâ ébháe nnyi á rî ka etə́m.

¹⁹A bhíbhi ane nték anígisá ka nsi Kanan, a kô nsi nnyí a káre ábho ka ane abhê.

²⁰Achot mmá chénchén á kóe nyâ ntem-esam na ejûm (450). “Nji achot mmá á máne, a káre ábho atáŋá-eték mba á kí toŋe ábho mbá ta é si ka ebhú Samuwel nnyo nkara-otîp Obhasi.

²¹Ane mbá á bhâ bhə̂p mân se ábho á kí wom ntûfâm nyúp nnyo á fik ábho fép. Obhasi a káre ábho Sol nnyo mmon i Kis. A ri nne ndə́p-i-njû Benjamen. Sol a fî otúi ka nsam i nyâ ébháe.

²²A kpô yighí Sol ka otúi, a kâk Debhit. Yê ḿfoné Obhasi nâ a sə́re ka nnyo imê se, ‘Ń yen Debhit nnyo mmon i Jesi, a gyê ə̂m ka ḿbə́ŋé. A kí yim chénchén nji n wóme.’

²³A ri ka biyábhé-abhon í Debhit nâ Obhasi a sáŋe nne nnyó sê Jisos, se a yim ane Isrel á sém ka ekpak nji yê a chimî.

²⁴Kən Jisos nnyó a bhá, Jon a raŋê mbá a sə́re ane Isrel se á yóŋé ḿbə́ŋé, á mághe obhí ábho, á fûk ayép.

²⁵Nji Jon a kə́ bha ojeghé etûm ejê, a bhə̂p ane se, ‘Ó kera ên sê mme a ri énê? Mme nne ányo asík. Kpák! Yê ḿfoné a kə́ bha ə̂m mbá-njəm. Ń ka bhik nnyo ḿ kpará kpe arík iyîm akát ibhê.’

²⁶“Atem-abhon-í-nnyen abhámé mba o ri ên abhon Abraham, na ên ajéné chénchén mba ó jigha ên Obhasi, Obhasi a tûm ane mbâ eyəré na otîp mbi ó kí yim êt é sém.

²⁷Ane Jerusarem na atúi-ofâm ábho á ká kam sê yê nâ Obhasi a túmi se a bhá yim ngun á sém. Á bhíbhi esup ejê sê á yúi yê. Ka ekpak njí nâ é yími kən achot mma akará-otîp Obhasi á séŋe á fâp ekan-ékân. Kpe á bhíŋa achot mmá chénchén ka ofú oyoá-biji, echî á bhó məŋé.

²⁸Kpe ejûm ebhí á ká yen nji a yimî, kən á sə́re Piratus sê a yúí yê.

²⁹Á kpo jeghé eyimím achot chénchén á fáp noŋ akará-otîp Obhasi á séŋe á kpê na nne nnyó, á yíghi yê ka ego njí, á kə̂n.

³⁰Kən Obhasi a yîm yê a nyə́me ka ekʉ̂.

³¹Ka mfín etî-etî nji a nyəmê ka ekʉ̂, a fâp ka ochî ane mba á dʉ̂ na yê nnyi Gariri á bhak nnyi Jerusarem. Ane mbá mfá-mfá nâ á rî atî-isê abhê mbâ ane Isrel.

³²“Nâ ńjə́ne é ko otîp ogyebhá-ḿbə́ŋé mbí é bha mbâ eyəné. Otîp mbí Obhasi a chími a káre ásé abhə́ré.

³³Ńgyê ḿbə́ne a yîm a kpô karé êt, abhon ábho, ka nji a yimî Jisos a nyə́me ka ekʉ̂. Nâ noŋ fə́ne á séŋe ka osúí nkôn ébháe ka Nwet i Nkôn Obhasi sê, ‘We a ri Mmon omé. Égyé, ń chəbhe Ńsé owa.’

³⁴Nji Obhasi a yimî Jisos a nyéme ka ekʉ̂, á ka kpó a chá, Obhasi se, ‘Tîk n káre wâ enare áji nji kpe akôp cháŋ, echáám, ó bhó cha. Ńjə́ne nâ n karê Debhit.’

³⁵Nâ ńjə́ne fə́ne nne a chorê ka eji etat sê, Obhasi, ‘Nne owa ányo nnyo Obhô-orûm obhâ, tîk ó bhó maghé yê a kpó a chá.’

³⁶Ka ekpin í Debhit, nji a jeghê etûm nji Obhasi a wóme yê a yim ka nsi nnyí ka ebhú ejê, a kpô a tôp ásé abhê. Á kə̂n yê. A kə̂t a châ.

³⁷Nne nnyo Obhasi a yimî a chə́bhe njəm ka ekpin, á ka ka oyəm, a tán.”

³⁸“Atem-abhon-í-nnyen, nâ məŋê ên mân sê ka obhô nne nnyó Jisos nâ á kí səre áno ane otîp mbi sê Obhasi a kí ri nsôn a su obhí ane.

³⁹Məŋê ên fə́ne sê nne nnyo á yuŋ ḿbə́ŋé a kî na yê, tîk a sêm ka chénchén obhí mbi ebhín í Mosis é bhó bhik oyim yê a sém.

⁴⁰Kó ên mân ebhú, ejûm nji akará-otîp Obhasi á chóre é kâ fâp na ên.

⁴¹Á chóre nná sê, ‘Ên mba ó kaghá ên atem-ane ntuŋ, biji tîk í kpô ên kpe-eji kən o kpô ên. Echî aŋ? N kí yim ejûm ka ebhú ejə́né nji kpe kə́n á sə́re ên osə́ré, ó bhó kam ên sê kə́n á yîm ntʉ́ghi ejûm áji.’ ”

⁴²Nji Pol a manê na achot mmá, yê na Banabas á róghe emaghám óchâm mbí sê á jî, kən ane ábha á góre ábho sê á kpó səre ábho achot mmá ka ofú oyoá-biji mbi ochî.

⁴³Ekumi é kpó to é chát, ane Jus etî-etî na ajéné mba á chəbhe á tobha Obhasi ka mbá ane Jus, á chə̂m baPol, á kubhá á jak. Pol na Banabas á səra ábho á kpek sê deê á fî ka onobhá-eji Obhasi mbi a tóŋe ábho.

⁴⁴Ofú oyoá-biji ó kpó si, ane á bhak, á sîk obhik eték í ndə́m, á jí yúk otîp í Ńtâ Jisos.

⁴⁵Kən ane Jus á kpó yen ekam ane njí ndə́m, é chəbhe é yama ábho ḿbə́ŋé kpe-eji na baPol, á kə̂t á tuk ábho, á yoá okpígha-ejûm ábho.

⁴⁶Kən Pol na Banabas á chôt, kpe efup á ká fon, sê, “E fonê ka esə́rə́m ên otîp Obhasi kpá, kən ó taŋe ên ḿbə́ne. Məŋê ên mân sê ka etaŋám njí, ó ka kpó kep ên biji sê ó bhik ên efonóm ekpin ótúm-ótúm. Êt e kí ko mân otîp mbí é jî mbâ ajéné.

⁴⁷Ńgyê ebhín nji Ńtâ Obhasi a karê se, ‘Ń ki wâ bəre ó jóe noŋ ebhát mbâ ajéné, ó tóŋe mbá ngun ndə́m á sém.’ ”

⁴⁸Ajéné á kpó yuk nchot nnyí, é gyébhe ábho é kpô. Á káre Ńtâ Obhasi ekûp ka otîp obhê mbí. Nchot nnyí a kpô fáp áno, ane chénchén mba Obhasi a sáŋe se tîk á fôn ekpin ótúm-ótúm, á kî ḿbə́ŋé na yê.

⁴⁹Nchot Obhasi a jên mân a jábhe kpe bhaghé eji ka ebhat áji.

⁵⁰Kən ane Jus á kâk anyoghe na etʉ̂ ane-ayúp mba ane-akáé mba á jígha Obhasi, é kpê na ane-echî ka eték, á tûp nchot ta á bhîm Pol na Banabas ebhat áji.

⁵¹BaPol á bhûk ebhəm ebhat áji á mághe mbá-njəm noŋ eriŋ sê Obhasi tîk a kpə́re ane mbá. Á bhâ mághe mân á jak nnyi Ikoniyum.

⁵²Kən atem-abhon-í-nnyen ka Antiyok á fôn ekpatə́m ogyebhá-ḿbə́ŋé, Obhasi Ebhare Ntʉgantʉ a ri na ábho tə́mé-tə́mé.