Read ejagham Etûm ágbán~í jisos, echî 14 Bible Online

Etûm ágbán~í jisos, echî 14 - ejagham bible

Etûm ágbán~í jisos, echî 14

¹Ebhú Pol na Banabas á síi Ikoniyum, á gyê óchâm Obhasi ane Jus ka erû ábho. Á kpî ane achot Obhasi nnyen ekpíím ta ekpatə́m ekam ane á yûŋ ḿbə́ŋé á kî na Jisos, ane mba Jus oo, ajéné oo.

²Kən etʉ̂ ane Jus á táŋe ḿbə́ŋé ekíím na Jisos. Á kâk etʉ̂ ajéné mba á nyə́ne á ká kam na Obhasi achot ka oya, á tûp nchot na atem-abhon-í-nnyen.

³Kən baPol á ká maghé. Á kə̂t áfo ebhú é râp, á kpik ane achot í Ńtâ Obhasi, efup á bhó fon. Obhasi fə́ne a tóŋe jáé se otîp onobhá-eji obhê mbi á kpîk, ó rî ka echî. A tóŋe ka ikom mfi a karê mba Pol á yimá iyîm okpógha-biji na biriŋ.

⁴Ane ka eték á kíri, etʉ̂ á gyím na ane Jus, etʉ̂ na mba Pol, ka ágbán í Jisos.

⁵É bhâ sî mân ane Jus na etʉ̂ ajéné na ane-echî ka eték á chə̂m ndə́p sê á tə̂m ábho, á túp ábho na atáé.

⁶Kən baPol á yûk nchot nnyí, á bê á jak nnyi Litra na Debe, nték nnyi a ri ebhat Likawoniya. Á jak fə́ne nték nnyi a ri ebhat áji.

⁷Á kô otîp ogyebhá-ḿbə́ŋé á jak á jî sə́re ka ngûm nnyí.

⁸Nne yót a ri ka Litra, á jíi yê ka obhə́né, ejen á ka nok ojen.

⁹Nji nne nnyó a ri áfo a yúghá okpígha-ejûm í Pol, Pol a yên se nne nnyó a kî ḿbə́ŋé na Jisos, kə́n á yîm yê a sôn. Pol a kêp yê ka ochî,

¹⁰a sə́re yê ka ekûk se, “Duî ngyím.” Mbə́né nnyó fə́ne a tə̂m a rúi ngyím, a róghe ejeném.

¹¹Ekam ane njí á kpó yen ejûm nji Pol a yimî nná, á kí kuk ka eyum í Likawoniya sê, “Ajom á kpighi ka ane á bhət á bha êt ngá oo.”

¹²Á chə́bhe á bhiŋá mba Pol ka mbiŋ ajom ábho. Á bhîŋ Pol sê Emis, ka á kará otîp ábho, á bhîŋ Banabas sê Sus.

¹³Njoma-efin Sus nnyo njû njom eye a ri ka echî-mbá, a kô ofoŋ na itam etat mfi á tʉ́ri na mfem-étí, se á bhá jôm efin á káre baPol.

¹⁴Kən baPol á kpó məŋé sê nâ ejûm nji ane mbá á wóme á yîm, á fî ḿfô ábho, ábho áfoné, á wáre noŋ eriŋ, á bhéne á jî kpúghi ábho á kugha sê,

¹⁵“Atem, bhaghé achot nâ ó yimá ên áno. Êt a ri ane fə́ne noŋ ên. E bháe na otîp ogyebhá-ḿbə́ŋé Obhasi sê é bhá séré ên ó mághe ên achot í chichi mmá sê ajom, ó tóp ên mfoné-mfoné Obhasi. Yê nâ a yimî ósô na nsi, a yîm aya na chénchén nji é rî ka ḿmáne.

¹⁶Éməné a maghê nték i ngun chénchén se á yîm ka ekpak á kóre.

¹⁷Kən a tóŋe biji ibhê ka ono mbi á yimá a kará ên. A yimá mbúta a nak, a yimá iyîm mbi o bheê ên í kua nono ka nnyen ebhú, a kará njí o kí di ên, a kará ên ogyebhá-ḿbə́ŋé.”

¹⁸Kən ane mbá á ká wom á yúk. BaPol a kpô nok ta á mághe á ká jom efin í nchane.

¹⁹Etʉ̂ ane Jus á bhak nnyi Antiyok Pisidiya na Ikoniyum. Á bhâ nôk á ríri ane á kâm na ábho. Á tûp Pol na atáé, á tʉ̂ yê á jî tûp ka echî-mbá, á kera sê a kpô.

²⁰Kən nji atóbhá Jisos á fáre yê á kâk, a rúi ngyím a chə́bhe njəm a gyê eték. Ntem-ofú á mághe na Banabas á jak nnyi Debe.

²¹BaPol á kpô sə́re otîp Obhasi ka Debe, á yîm ane etî-etî á chə́bhe atóbhá Jisos. Á bhâ mághe mân á chə́bhe njəm nnyi Litra na Ikoniyum na Antiyok Pisidiya.

²²Á jená á fará ngûm nnyí á kaghá atóbhá Jisos ḿbə́ŋé. Á səra ábho sê á kâ mághe nchot Obhasi. Sê a ri achot mma á tə́ma áno ábho etî-etî nâ nne a ri a yén kən a gyé otúi Obhasi.

²³Á bhâ sâŋ ane-echî echəme atóbhá Jisos ka ngûm nnyí, á góre Obhasi ka obhô ábho, á kak njaé, sê Ńtâ Jisos nnyo ábho á kíi ḿbə́ŋé a kak ábho obhô.

²⁴Á mághe, á chîŋ nnyi Pisidiya, á sî Pamfiriya.

²⁵Á kpó man esə́rə́m otîp ogyebhá-ḿbə́ŋé mbí ka Pega á jak nnyi Atariya.

²⁶Á kpó maghé Atariya, á mághe nnyi aya-áyâ á jak Antiyok. Antiyok mmá a ri eji nji á káre nná ábho mbâ Obhasi sê a tóŋé ábho onobhá-eji ka etûm nji á jéghe nná mfá-mfá.

²⁷Nji á síi Antiyok, á chə́me ane echəme atóbhá Jisos á sére chénchén etûm nji Obhasi a kóe ábho a yîm na ekpak a kamê se kpe ane mba Jus asík eróŋ á kí ḿbə́ŋé na yê á sém.

²⁸Á kâ mfá ebhú ta é râp orap na atóbhá Jisos.