Read ejagham Etûm ágbán~í jisos, echî 15 Bible Online

Etûm ágbán~í jisos, echî 15 - ejagham bible

Etûm ágbán~í jisos, echî 15

¹Etʉ̂ ane á bhak áfo ka Antiyok á dʉ̂ nnyi Judiya. Nji á bháe á bhâ jóe á kpik atem-abhon-í-nnyen sê, “Ó ro kim ên nkîm ka ekpak ebhín í Mosis é fíi, ó bhó sem ên.”

²Nchot nnyí a bhák na ekpatə́m ejok. Kən Pol na Banabas á fíri na ane mbá kpe-eji. Ane Obhasi á bhâ kâm mân sê á túm Pol na Banabas é kpê na etʉ̂ atem-abhon-í-nnyen ka Antiyok á jí kpúghí ágbán í Jisos na ane-echî ka echəme atóbhá Jisos ka Jerusarem, á kêp nchot nnyí.

³Ane echəme atóbhá Jisos á tûm mân ábho ejen njí. Nji á jâk ka mbá, á chîŋ ka Fonisiya na Samariya á səra ekpak nji Obhasi a kâm se kpe ajéné eróŋ á kí ḿbə́ŋé na yê á sém. Esə́re njí é bhak na ekpatə́m ogyebhá-ḿbə́ŋé mbâ chénchén atem-abhon-í-nnyen.

⁴Á kpó to á sí Jerusarem, ágbán í Jisos na ane-echî na ane echəme atóbhá Jisos etat á tábhe ábho na ogyebhá-ḿbə́ŋé. BaPol fə́ne á sə́re chénchén nji Obhasi a yimî a káre ajéné.

⁵Kən etʉ̂ atóbhá Jisos mba á rî ka echəme ane Farasi á rúi ngyím á chôt sê é nóbhe sê á kím ajéné nkîm, á sə́re ábho sê á tóbha ebhín í Mosis.

⁶Ágbán í Jisos na ane-echî á chə́me á kéré nchot nnyí.

⁷Á kpó to á chôt nchot nnyí tata, Pita a rúi ngyím a sə́re ábho se, “Atem-abhon-í-nnyen, ó məŋe ên sê ofú ábhi, Obhasi a sâŋ ə̂m ka echəme ejə́né se ń jî na otîp ogyebhá-ḿbə́ŋé obhê mbâ ajéné, á yúk, á kí ḿbə́ŋé na yê.

⁸Yê fə́ne nnyo a məŋê ekpak í ḿbə́ŋé nne a ri, a tóŋe se yê a kâm na íkíkéré mfí, a káre ábho Obhasi Ebhare Ntʉgantʉ noŋ a karê êt.

⁹Obhasi á ka sáŋ se êt e ri egyê, ane etat egyê. Kən a sû obhí ábho a yíghi, ka á kíi ḿbə́ŋé na yê.

¹⁰Jen mân nji o kí wom ó gáe ên Obhasi ka echə́mə́m atóbhá Jisos mbá echóé nji kpe ásé abhə́ré éməné na êt, é ka bhik ekə́nə́m?

¹¹Êt é kam sê ka onobhá-eji Ńtâ Jisos, Obhasi á kí yim êt e sémá noŋ fə́ne ábho á kí sem.”

¹²Pol na Banabas á chôt mân na ábho. Echəme njí ndə́m á kə̂t nyamḿ, á yugha ekpak í biriŋ na iyîm okpógha-biji mbi Obhasi a yimî ábho á yîm ka nték ajéné.

¹³Á kpó to á mân esə́rə́m, Jems a rúi ngyím a chôt se, “Atem-abhon-í-nnyen, yûk ên nchot nnyi n kə́ bha ochot.

¹⁴Simun a sə́re êt mfá ekpak Obhasi a jiî mbâ ajéné mbá ka ndaŋa-mbá ebhú, a jí saŋ ane abhê.

¹⁵Ńji fə́ne é fap ekan-ékân noŋ akará-otîp Obhasi á séŋe sê, Obhasi a chorê se,

¹⁶‘Mfín á kpo chiŋ, tîk n chə́bhe njəm m bák m bâ yûŋ ndə́p-i-njû Debhit nnyi a gboê. Tîk m fê nji é bhíbhi, n chə́bhe njəm m gbê ńnyə́ne a gyími.

¹⁷Echî é rî sê chénchén ane etat tîk á wôm ə̂m, mme Ntûfâm ábho, ńga a ri ajéné mba n kí bhiŋ bəre ane abhámé. A ri mme Ntûfâm nâ n chorê njí,

¹⁸nji á yími ane á mə́ŋe ta éməné.’ ”

¹⁹Jems a kpô chot se, “Ka obhô mbí mân, ka ifámé íkíkéré, e kâ káre ńtə́mé mbâ ajéné mbá mba á kə́ bha mbâ Obhasi.

²⁰Kən deê é séŋ nwet é túm ábho sê á kâ dî édî efin kpe jə́t, á yíghi biji ka enuŋ ka mbá énə́mé, á kâ dî nnyam nnyi a kpóe agyʉ́ŋ á ká gbo ka nsi, á kâ dî agyʉ́ŋ.

²¹Echî aŋ? Ta ka ebhú áji, ane mba á kpîk ebhín í Mosis á rî kpe ka bhaghé eték, á kí bhiŋâ fə́ne bibhín mbí á səra ane jáé ka óchâm Obhasi kpe bhaghé ofú oyoá-biji.”

²²Ágbán í Jisos na ane-echî é kpê na echəme atóbhá Jisos ndə́m, á bhâ kére sê á sáŋ ane ka ekam ábho á túm na Pol na Banabas nnyi Antiyok. Á sâŋ Juda nnyo á kamá fə́ne Basabas é kpê na Sayiras, á kâk na baPol. Juda na Sayiras a ri atem-abhon-í-nnyen mba á fóne ejík kpe-eji ka amə̂t atem.

²³Nji á séŋe ka nwet á tûm a ri sê, “Êt atem-abhon-í-nnyen chénchén na ágbán í Jisos na ane-echî nâ e séŋe nwet nnyí. E kí tum ńnyə́ne mbâ ên, ane nték ajéné, mba o ri ên ka Antiyok Siriya na ebhat í Sirisiya. Ó chəbhe ên atem-abhon-í-nnyen abhə́ré. E kí kup ên.

²⁴“É yuk sê ane abhə́ré etat á kí karé ên obhúrá-echî na achot mma kpe êt asík e túmi ábho sê á bhá sə́ré ên.

²⁵Ka obhô mbí, é kere sê nji é chot nná é ki eyum jə́t, deê é sáŋ ane é kpê na Pol na Banabas mba á rî ane okot abhə́ré. É sáŋ ábho é túm ágo mbâ eyəné.

²⁶A ri baPol nâ á kam nná ekʉ̂ ka obhô ntûfâm owəré Jisos Krayis.

²⁷É tum mân Juda na Sayiras sê á sə́ré ên fə́ne achot mma e séŋe nná ka mbi ábho onyo.

²⁸Echî aŋ? Obhasi Ebhare Ntʉgantʉ na êt eróŋ é kere sê eji e kí chəme ên echóé eyúp njí cháŋ. A ri nji o ri ó fî ên ka ńjə́ne é rî sê:

²⁹Édî njom, nne a kâ dî; agyʉ́ŋ, nne a kâ dî; nnyam nnyi a kpóe agyʉ́ŋ á ká si nsi, nne a kâ dî. Yighî ên biji ka enuŋ ka énə́mé mbá. Ó yighí ên biji ibhə́né ka erû njí, tîk é jóe nono é káre ên. Deê ó jóe ên ka osoná-biji.”

³⁰Echəme ane njí mân á tûm baPol na nwet nnyí á jak. Á jak á sî Antiyok, á chə́me atem-abhon-í-nnyen chénchén á kô fə́ne nwet nnyí, á káre ábho.

³¹Á kpó to á bhîŋ á sə́ré ane, é gyébhe ábho ḿbə́ŋé kpe-eji ka okaghá-ḿbə́ŋé mbi á kághe ábho.

³²Juda na Sayiras mba á rî fə́ne akará-otîp ábho áfoné, á sére fə́ne ane achot etî-etî á kaghá ábho ḿbə́ŋé, á kaghá ábho ikom.

³³Á kpó ka na ábho mô ebhú á jak, atem-abhon-í-nnyen á mághe ábho mân á chə́bhe njəm mbâ ane mba á túmi ábho ka ekone. [

³⁴Kən Sayiras a kére se yê a kə́t áfo.]

³⁵Pol na Banabas á kə̂t áfo ka Antiyok eróŋ na ane etî-etî, á səra otîp Ńtâ Jisos, á kpik ane achot amê.

³⁶Mfín a kpo to a chíŋ, Pol a sə́re Banabas se, “É chə́bhe njəm ka chénchén nték nnyi e kpíi achot Obhasi, é jí yén ekpak atem-abhon-í-nnyen á rî.”

³⁷Banabas se á kó Jon Mak á jî na yê.

³⁸Kən Pol á ka kam. Echî aŋ? Jon Mak a yighî biji ibhê na ábho ka Pamfiriya, á ka kam a tóp ábho á jî jéghe etûm.

³⁹Ka obhô mbí, áfírí a bhâ gbô, ta á kíri. Banabas a jak na Jon Mak nnyi aya-áyâ ta a sî Sayiprus.

⁴⁰Kən Pol a sâŋ Sayiras. Atem-abhon-í-nnyen á góre fə́ne biji sê Obhasi a tóŋé ábho onobhá-eji ka ejen nji á bhâk oji.

⁴¹Á jak nnyi Siriya na Sirisiya, á kpik ane achot, á kaghá ane echəme atóbhá Jisos ikom ka ḿbə́ŋé nnyi á kíi na yê.