Read ejagham Etûm ágbán~í jisos, echî 2 Bible Online

Etûm ágbán~í jisos, echî 2 - ejagham bible

Etûm ágbán~í jisos, echî 2

¹Ka mfín erom efʉ ane Jus nji á bhíŋa sê Pentekos, ane chénchén mba á kíi ḿbə́ŋé na Jisos á chə́me eji jə́t.

²Ka ebhú jə́t, ejok é bhak nnyi ósô noŋ ekpatə́m í mfêp nâ á noghá. Ejok njí é súi njû ndə́m nnyi ábho á kûn.

³Á yéna ejûm noŋ ngûn ń kí ru, ń chât, ń kúmi kpe nnyón nne ábho ka echî.

⁴Obhasi Ebhare Ntʉgantʉ a súi ábho ka biji, á róghe echoróm nyum i nték etat nnyi á ká məŋé. É dʉ̂ ka ikom mfi Ntʉgantʉ a karê ábho.

⁵Ane Jus etî-etî mba á fîk nchot Obhasi nono á rî ka Jerusarem mfín ányi. Á rʉ̂ ka nték i ngun chénchén.

⁶Ebhú ane á yúghi ejok njí, á fâp á bhâ chə́me ka ekpatə́m ekam. É kpô ábho biji kpe-eji nji kpe énê a chə́bhe á yugha nchot atóbhá Jisos ka ejê eyum eték.

⁷Ka okpógha-biji mbí, á kí bhəp sê, “Ane Gariri asík á chóra nná a?

⁸É yími nan e kí yuk ábho, kpe énê ka ejê eyum eték?

⁹E rʉ ka nték ka nték mba Patiya na Mit na Eramayit na Mesopotamiya na Judiya na Kapadosiya na Pontus na Esiya, na

¹⁰Frijiya na Pamfiriya na Ijip na ebhat í Sarin ka Libiya. Mba tat á rʉ̂ Rom,

¹¹etʉ̂ ane Jus, etʉ̂ ajéné mba á chəbhe noŋ ane Jus. Mba tat á rʉ̂ Krit na Arabiya. Êt chénchén, e kí yuk oyúk ane mbá á səra êt ekpatə́m í ntûm Obhasi ka nyum i nték eyəré.”

¹²Kpe énê biji í kpô yê. É chíŋi ábho á chə́bhe á chorá na atem sê, “Ḿfa nâ jen?”

¹³Kən etʉ̂ ane ka okagha-ntuŋ á kí chot sê, “Á gwo aməm á sui ábho biji nâ ńjə́ne á chóra áno.”

¹⁴Kən Pita a fâp mân a gyími na ágbán mba ngá ófó na yót, a kí gyʉí a sə́rá ekam ane njí se, “Atem-ane Jus na chénchén ane mba á kúma ka Jerusarem, kî ên atûŋ yûk ên nchot nnyi n kí chot. Məŋê ên sê,

¹⁵ane mbá á bhó gbo aməm noŋ ó kera ên, ka ńkánínká érôn-énî na ofú a nyə́ne á ka chíŋ.

¹⁶Kən yûk ên ejûm nji nkara-otîp Obhasi éməné nnyo á kamá se Jowel a chorê a kpê na iyîm mbi í chíŋa mfá égyé.

¹⁷Obhasi a chorê se, ‘Ka nsígha-njəm ebhú n kí karé Ntʉgantʉ omé a súi a fûk mbâ ane chénchén. Abhon abhə́né mba ane-arûm na ane-akáé tîk á kará otîp obhámé. Ên abhon aguŋi, tîk n chôt mbâ eyəné ka ndem, ên ane-akúí, tîk n káre ên fə́ne arem.

¹⁸Kpe a ri asʉ́ŋ abhámé, ane-akáé, ane-arûm, tîk n káre ábho Ntʉgantʉ omé a súi a fûk. Ń karé ábho ńnyə́ne, tîk á kará otîp obhámé.

¹⁹Tîk n yîm achot okpógha-biji ka ósô na biriŋ ka nsi. Agyʉ́ŋ na ngûn na átʉ́k tîk í fâp.

²⁰Njúí a rô kpó fon ebhát ejê, nnyam-ósô tîk a bhík noŋ agyʉ́ŋ, kən ekpatə́m ofú ejík mbi Ntûfâm ó sí.

²¹Ka ofú ábhi mân, kpe énê nnyo á bhiŋ mbiŋ i Ntûfâm tîk a sêm.’ ”

²²Pita a kpô chot se, “Ane Isrel, yûk ên nchot nnyi n kí chot. Obhasi a tóŋe se yê nâ a túmi Jisos nnyo nne Nasaret. A tóŋe ka ikom mfi a karê yê se a yîm ntûm okpógha-biji na biriŋ ka étíŋanti ejə́né. Ên áfoné o yên.

²³Jisos nnyó yót, á gbîp á káre ên ka ekpak Obhasi a râŋ mbá a mə́ŋe, a yîm fə́ne se é jóe áno. O kâm ên sê ane abhí á kúm yê ka ego, a kpó.

²⁴Kən Obhasi a yîm yê a nyə́me ka ekʉ̂, a kpât yê a yíghi ka oseŋe ekʉ̂, ka ekʉ̂ é ká kpo bhik yê efiím.

²⁵Debhit a chorê a kpê na Jisos nchane se, ‘N yéne Ńtâ Obhasi mbá-ochî amé chénchén ebhú. Yê a ri ə̂m ka mkpe biji, kpe ejûm nji é kí kpo nyiŋí ə̂m cháŋ.

²⁶Nâ echî ḿbə́ŋé a kí gyebhé ə̂m kpe-eji, n chorá na ogyebhá-ḿbə́ŋé. Kpe n di áno nne, ń yuŋ ḿbə́ŋé ń ki na yê,

²⁷ka we, Obhasi, tîk ó bhó maghé ńtʉgântʉ amé ka ekʉ̂, ó bhó kam fə́ne se mme, nnyo a ri Obhô-orûm obhâ, a kpó a chá.

²⁸Ó yim ə̂m ḿ məŋe ekpak n kí fon ekpin. Nji o ri mfá na mme, tîk o káre ə̂m ogyebhá-ḿbə́ŋé ó súi ó fûk.’ ”

²⁹Pita a kpô chot se, “Atem-abhon-í-nnyen kə́n n sə́re ên, efup ḿ bó fon, bəre Debhit nnyo a ri ńsé owəré yót ka éməné, a kpô, á kə̂n yê, oyəm obhê ó rî mfá na êt na égyé-égyê.

³⁰Ebhú áji yê a ri nkara-otîp Obhasi, a mə́ŋe se Obhasi a chími se yê a kí yim eyábhé-mmon i Debhit yót a kó otúi obhê.

³¹Debhit a yên nji Obhasi a kí yim mbá-ochî, a chôt a kpê na enyəmə́m ka ekʉ̂ nji Krayis, nne nnyo Obhasi a kí tum se a yim ngun á sém, se á ka maghé yê ka ekʉ̂, á ka kam se a kpó a chá.

³²Jisos nnyó, Obhasi a yîm yê a nyə́me ka ekʉ̂, êt chénchén a ri atî-isê.

³³Nji Obhasi a kô yê a jî ka ósô, a káre yê ekumi ejík mkpe obhô-orûm eye. A káre yê fə́ne Ebhare Ntʉgantʉ nnyo a chimî êt. Jisos Krayis a káre êt mân Ntʉgantʉ nnyó a súi a fûk. A ri etûm Ebhare Ntʉgantʉ nnyó nâ ó yugha ên áno na atûŋ, o yéná ên na amə̂t.

³⁴Debhit yê ḿfoné á ka ji nnyi ósô ka ekpak í Jisos a jiî, kən a chôt ka imê nnyo se, ‘Ńtâ Obhasi a sə́re ntûfâm omé se, “Kumî ə̂m mfá ka ekumi ejík mkpe obhô-orûm,

³⁵ta n yîm ane-ebhan abhâ á chə́bhe ekíghá-akát ejâ.” ’

³⁶“Deê mân ane Isrel ndə́m á mə́ŋe sê Obhasi a yîm Jisos nnyo o kúmi ên ka ego, Ntûfâm. A yîm yê fə́ne Krayis, nne nnyo a túmi se a bhá yim ngun á sém.”

³⁷Ane á kpó yuk nchot nnyí, efup é gyê ábho, á bhə̂p Pita na ágbán mba ngá sê, “Atem-abhon-í-nnyen, e kí yim mân nan?”

³⁸Pita a sə́re ábho se, “Deê nne owəné kpe nnyón a yóŋé ḿbə́ŋé a maghé obhí obhê, a fúk ayép ka mbiŋ i Jisos Krayis. Tîk Obhasi a rî nsôn a sû obhí obhê. Tîk a káre ntʉ́ghi nne ányo Obhasi Ebhare Ntʉgantʉ noŋ ekəp.

³⁹Echî aŋ? Obhasi nâ a chimî a káre ên na abhon abhə́né, na chénchén ane mba á rî ka nték nnyi ehʉʉ́t, mba Ntûfâm owəré Obhasi a bhîŋ se á bhá yê mbá biji.”

⁴⁰Pita a sə́re ábho achot etî-etî, a chóá ábho se, “Nyáŋe ên biji ibhə́né o kâ jóe ên ka ekam ane ndibhí mbá mba Obhasi a kí kpəré.”

⁴¹Etî-etî ábho á yûk nchot i Pita, á fûk ayép. Ane á sî kpe ntem-esam ntə̂m-ntə̂m enígisá na ejûm (3,000) mba á chə́me ekam ane mba á káme na mbiŋ i Jisos ofú ábhi.

⁴²Á káre biji á kpik achot mma ágbán í Jisos á kpik ábho. Á chəmá biji, á dik Édî Obhasi á gorá yê.

⁴³É chíŋi ane na ntûm okpógha-biji etî-etî na biriŋ mbi ágbán í Jisos á yíma.

⁴⁴Chénchén ane mba á kíi ḿbə́ŋé na Jisos, á kə̂t ka ochəma-biji, á kirá iyîm ábho na atem.

⁴⁵Á gurá iyîm ábho, á kirá ntí na atem mba é fóghe ábho.

⁴⁶Chénchén ofú á kí chəmé ka ekam jə́t ka ókʉ́rí achot Obhasi, kən á chəmá fə́ne ka ojû atem, á dik édî ábho na nji Obhasi. Á dik na ogyebhá-ḿbə́ŋé na ḿbə́ŋé ábho jáé.

⁴⁷Á kará nkat mbâ Obhasi, ane chénchén á gyebhá ḿbə́ŋé na ábho. Ńtâ Jisos a kpek ka ekam ábho ane mba á kí ki ḿbə́ŋé na yê ka ofú ka ofú.