Read ejagham Etûm ágbán~í jisos, echî 22 Bible Online

Etûm ágbán~í jisos, echî 22 - ejagham bible

Etûm ágbán~í jisos, echî 22

¹A róghe echoróm se, “Atem-abhon-í-nnyen na ásé abhámé, yûk ên nchot nnyi ń səra ên ka etáŋám biji ibhámé.”

²Nji ane mbá á yúghi a kí chot na ábho a ri na eyum í Ibru, ngûm a kpére mân a nâ chák.

³A jak ochî se, “Mme a ri nne Jus. Á jíi ə̂m ka eték í Tasus ka Sirisiya. Kən a ri mfá ka Jerusarem nâ á gyée ə̂m. Gamariye nâ a kpíi ə̂m ebhín ásé abhə́ré, ache á ka chaghé. Mme ń ka chaghé fə́ne ache ka nchot ebhín Obhasi ka ekpak ên égyé o ri ên áno.

⁴Ofú ábhi ń ka kot ane mba á tóbha Mbá nnyi Jisos nnyí, n kará ane mbá ekpatə́m oseŋe kpát ta mba tat á kpok. M fik ane-akáé na ane-arûm n kaghá ka ókúmí.

⁵Ntûfâm akará-agore Obhasi na echəme Atáŋá-eték ndə́m a ri atî-isê abhámé. Á sêŋ nwet mbâ atem ábho ka Damakus á káre ə̂m. N jak bəre ń jí fî ane mba á rî ka Mbá nnyi Jisos mba á rî ágo ḿ bá nnyi Jerusarem á bhá kpə́re ábho.

⁶“Nji n yəbhê n kí si Damakus na nchên, ekpatə́m ebhát é dʉ̂ nnyi ósô é gbô ə̂m áfo ebhú jə́t.

⁷M gbô áfo ka nsi, n yûk eyum é bhə̂p se, ‘Sol, Sol, ó kará ə̂m oseŋe jen?’

⁸“Kən n táme bəre, ‘Ntâ, we a ri énê?’ “A sə́re ə̂m se, ‘Mme a ri Jisos, mmon i Nasaret, nâ ó kará áno oseŋe mbí.’

⁹Ane mba á rî na mme á yên ebhát njí kən á ká məŋé eyum í nne nnyo á chorá na mme.

¹⁰“Nji eyum njí é chóre nná na mme, m bə̂p mân bəre, ‘Ntâ, ń yîm jen?’ “A sə́re ə̂m se, ‘Duî ngyím, choŋ nnyi Damakus. Tîk nne a sə́re wâ chénchén nji Obhasi a sáŋe wâ sê ó yîm ágo.’

¹¹“Ebhát é tan ə̂m amə̂t. Ka obhô mbí, ane mba á jî na mme á fíi ə̂m ofi ka obhô ta n sî eték í Damakus.

¹²“E kpô sí Damakus, nne yót a kamá Ananiyas a ri áfo. Nne nnyó á bhó chaghé ache na nchot ebhín, kpe nnyón nne Jus ka eték áji á chorá se a fôn nnyen erû.

¹³“Kən nne nnyó a bhâ gyími ə̂m ka kpe biji a chôt se, ‘Mmon-i-nnyen omé, Sol, deê amə̂t á rə́bhe wâ ó kpó yen mbá.’ Ka nkúbhi ebhú áji, amə̂t á rə́bhe ə̂m, n yên yê fə́ne.

¹⁴“Nji amə̂t á rə́bhe ə̂m, a sə́re ə̂m se, ‘Obhasi nnyo ásé abhə́ré á jígha a sâŋ wâ se ó mə́ŋe nji yê a wóme. Se ta ó yén Obhô-orûm obhê, ó yúk fə́ne eyum í nchot nji é dʉ̂ yê ka nnyo.

¹⁵Echî aŋ? We o kí joé ntî-isê owe mbâ ane chénchén ó sə́ré nji o yéne na nji o yúghi.

¹⁶Ó chighá mân jen? Duî ngyím, á fúk wâ ayép, á sû obhí obhâ á yíghi ka nji ó kam ka mbiŋ eye.’

¹⁷“Ebhú m kpô chəbhé njəm nnyi Jerusarem, n kí goré Obhasi ka ókʉ́rí achot obhê, n yên ndem.

¹⁸N yên Ńtâ Jisos a kí səre ə̂m se, ‘Yim babhap, maghê eték í Jerusarem, ka tîk á bhó kam, kpe o sə́re ábho jen o kpê na mme.’

¹⁹“N sə́re yê fə́ne bəre, ‘Ntûfâm, ó məŋe se ábho áfoné á məŋe sê kpe ka mbə́n óchâm Obhasi ń təmá ane mba á yúŋi ḿbə́ŋé á kî na we, n kaghá ábho ka ókúmí.

²⁰Kpe ebhú á yúi ntî-isê owa, Stibhen, mme n di áfo na ábho, n kâm na ane mbá. Mme fə́ne nâ n kíi ḿfô ane mba á yúi yê oyúí.’

²¹“Ntûfâm a sə́re ə̂m mân se, ‘Maghê eji njí, ka n kí tum wâ ka nték ajéné.’ ”

²²Mbôp nnyí nji Pol á chorá áno na ábho á rî nyamḿ á yugha, kən a kpo bhiŋ nná a ri nnyi ajéné Jus nnyí, á chə́bhe á kugha sê, “É nóbhe á yúí ntʉ́ghi nne nnyó oyúí. Á ka joé nne nnyo kə́n á mágha yê ka ekpin.”

²³Nji ane á kí kuk ka ekpak njí, á faghá ḿfô ábho ka ósô, á tubha ebhəm ka ósô,

²⁴ntûfâm ane-enok nnyó a sə́re ane abhê á kó Pol á jí kak ka ebhám ábho. A sə́re se á tə̂m yê tata a sə́re ejûm nji yê a yimî kən ane á kí kuk sê á yúí yê.

²⁵Kən á kpó bhop yê na arík sê á tə̂m, Pol a bhə̂p nne nyúp ane-enok yót nnyo a gyím áfo se, “Ebhín í Rom é kam se ó tə̂m nne Rom nji á ká bhup kpá nchot a gbo yê a?”

²⁶Nji Pol a bhə́bhe ebhə̂p njí, nne nyúp ane-enok nnyó a jak a jî bhə̂p ntûfâm ábho nnyo se á tə̂m Pol se, “O sə́re nná se á yîm jen? Á tə̂m nne Rom a?”

²⁷Kən ntûfâm ábho nnyó a bhák mbâ Pol a bhâ bhə̂p yê se, “Sə́re ə̂m, we a ri nne Rom a?” Pol a kâm.

²⁸A sə́re Pol se, “Mme ḿfoné, kən ḿ bá kâm nne Rom, n namê onam na ekpatə́m í ntí.” Kən Pol se, “Mme a ri mfoné mmon-i-nsi Rom.”

²⁹Ane mba á síghi nná Pol otəm á tʉ̂ biji ebhú jə́t. Ntûfâm ábho fə́ne efup é gyê yê, ka a kâm ta á bhôp Pol, ka mmon-i-nsi Rom.

³⁰Ntem-ofú, ntûfâm ane-enok nnyó á woma owóm yê a məŋé ejûm nji Pol a yimî kən ane Jus á kí nok yê eyúúm. A yíghi mân Pol ka ókúmí, a chə́me chénchén ane-echî akará-agore na ane echəme Atáŋá-eték, a kô Pol a bhák ka ochî ábho.