Read ejagham Etûm ágbán~í jisos, echî 23 Bible Online

Etûm ágbán~í jisos, echî 23 - ejagham bible

Etûm ágbán~í jisos, echî 23

¹Nji á kóe Pol á bhak ka ochî echəme njí, a yûŋ amə̂t a kêp ane mbá nyamḿ, a róghe echoróm se, “Atem-abhon-í-nnyen, ta é si ofú mbi égyé, ekpak ekpin ejámé nji m fiî ka ochî Obhasi na ḿbə́ŋé amé jáé ń ka fon efup.”

²Nji Pol a chorê áno, ntûfâm akará-agore Obhasi a kamá se Ananiyas a sə́re ane mba á rî kpít na Pol se á súm yê ka nnyo.

³Kən Pol a sə́re yê se, “Obhasi tîk a sûm wâ a fê, nne áfúbhí! O kun o táŋá ə̂m ka ekpak ebhín é fíi, o gbok ebhín njí jə́t ka esə́rə́m ane se á súm ə̂m.”

⁴Ane mba á gyími á kpíri Pol á sə́re sê, “O kí tu ntûfâm akará-agore Obhasi a?”

⁵Kən Pol se, “Atem-abhon-í-nnyen, m məŋê fan bəre nâ ntûfâm akará-agore Obhasi? To á séŋe nná ka nwet Obhasi sê, ‘Deê nne a kâ chôt obhí a kpe na nne nnyo á kíi ntûfâm a bhábhá ane abhê chénchén?’ ”

⁶Nji Pol a məŋê se etʉ̂ ane ka echəme njí a ri ane echəme Farasi, etʉ̂ mba echəme Sadusi, a kûk se, “Atem-abhon-í-nnyen, mme a ri nne echəme Farasi. Ásé abhámé á rî ka echəme Farasi. Égyé ń gyimi mfá á kí taŋ ə̂m, ka n yuŋî ḿbə́ŋé n kî bəre ane mba á kpóe okpó tîk á nyə́me ka ekʉ̂.”

⁷Etʉri-étʉ́ri nji Pol a chorê ejûm njí, achât á gbô ka ekam njí. Ane echəme Farasi na mba Sadusi á róghe ekpóŋóm na atem.

⁸Echî aŋ? Ane echəme Sadusi á ká kam sê, nne á kpo, tîk a nyə́me ka ekʉ̂. Á ká kam sê ejûm etat é rî á bhiŋá sê baénjel, na ńtʉgântʉ eróŋ. Kən ane echəme Farasi á káme sê chénchén iyîm mbí í rî ka echî.

⁹Okpóŋe ó bhə̂t. Etʉ̂ atóŋá-ebhín ka echəme ane Farasi á rúi ngyím á kí tup áfírí sê, “É ka yén kpe ejûm nji nne nnyó a yimî. É joé áfo ka etʉri sê ebhú tat énjel na kpe ebhú tat ńtʉgântʉ etat ágo a sə́re yê ejûm mân aŋ?”

¹⁰Okpóŋe mbí ó kí son oson ó bhak, kən ntûfâm ane-enok a kére se ane mbá tîk á rât Pol rat-rat, a yíghi ane-enok abhê a tûm se á jí kó Pol ka ikom á bhá ka ebhám ábho.

¹¹Atʉ́ á kpó nyak, Ntâ Jisos a bhâ gyími ka mkpe biji Pol a sə́re yê se, “Fon ḿbə́ŋé, ka eji ó gyimi ntî-isê omé ka Jerusarem, o ri ó gyímí fə́ne ka Rom.”

¹²Ntem-ofú, ane Jus á kô óŋwóŋe ka ebhə̂t sê ta ábho á yúí Pol, kpe édî nne ábho á bhó di, kpe ejûm á bhó gwo.

¹³Á rî ábho á chíŋi kpe nsam ébháe mba á kóe óŋwóŋe mbí.

¹⁴Á jak mbâ ane-echî akará-agore Obhasi na ane-akúí eték á jî sə́re ábho sê, “É ko óŋwóŋe sê ta e yúi Pol, édî fə́ne é bhó di bhúghí-bhúghí.

¹⁵Deê ên na echəme Atáŋá-eték ndə́m ó túm ane á sə́ré ntûfâm ane-enok a túm Pol a bhá. Yim yê a kéré se o kí nok ó mə́ŋe ên mfoné-mfoné echî nchot. Á kam a tûm yê, se a bhá si êt e gyím ka mbá, tîk e yúi yê.”

¹⁶Nji ane mbá á tími áno achot mmá, mmon nnyo nne-ndûm nnyo mmon-i-nnyen i Pol nnyo nne-nkáé a yûk, a jak fə́ne ka ebhám ane-enok a jî sə́re Pol.

¹⁷Pol fə́ne a bhîŋ nne nyúp ane-enok yót a sə́re yê se, “Kó mmon i nguŋi nnyó choŋ mbâ ntûfâm owəné. A fôn ejûm nji a kí səre yê.”

¹⁸Nne nnyó a kô yê a jak a jî sə́re ntûfâm ábho se, “Pol nnyo e kaghê ka ókúmí a bhiŋî ə̂m a sə́re se ń kó mmon i nguŋi nnyó ḿ bá mbâ eya, ka a fôn ejûm nji a kí səre wâ.”

¹⁹Ntûfâm nnyó a fî mmon nnyó ka obhô á jak ka eji átíŋ, a bhə̂p yê se, “O fonê jen nji o wóme ó sə́ré ə̂m?”

²⁰A táme se, “Ane Jus á kubhi sê á sə́ré wâ ó kó Pol ó jî ójô ka echəme Atáŋá-eték nâ ábho á kí wom á mə́ŋe mfoné-mfoné echî nchot.

²¹Kən we, ka kâm na ábho, ka ane ábho á sî kpe nsam ébháe mba á chígha ka mbá sê á yúí yê. Ane mbá á kóe óŋwóŋe sê ábho kpe édî á bhó di, kpe ejûm á bhó gwo ta á yúi Pol. Á tʉri biji ábho á ki. Á kpok áno ochik wâ ó túm Pol.”

²²Ntûfâm nnyó a sə́re mmon nnyó se, “Choŋ kʉ́ri, kən ka kâm kpe nne yót a məŋé se ḿ məŋe nchot nnyí.”

²³Ntûfâm ane-enok a bhîŋ ane ayúp ane-enok abhê ábháe a sə́re ábho se, “Tʉrî ên biji ka ńkánínká érôn-énî nnyi atʉ́ mma égyé, kó ên ane-enok nsam kpe ófó, mba á jéna ka njəm ofoŋ nsam ésá na ófó, mba á nógha enok na árôp nsam ófó, choŋ ên ta ó sí Sesariya.

²⁴Nôt ofoŋ mbi Pol a kí bhughi ta ó kó ên yê, kpe ejûm é kâ yîm yê ta ó sí ên mbâ Ntûfâm i Feris.”

²⁵A sêŋ fə́ne nwet a káre ábho se á káre mbâ Feris.

²⁶A séŋe se, “Mme, Krodiyus Lisiyas, nâ ń tuma áno nwet nnyí mbâ eya, Feris, Ekpatə́m í Ntûfâm Ejík. N kí kup wâ na ejík.

²⁷Ane Jus á fíi nne nnyó á sîk oyúí kən n kô ane-enok abhámé m bâ nyáŋe yê, ka n yúghi sê yê a ri mmon-i-nsi Rom.

²⁸Bəre ń nôk ḿ mə́ŋe nchot nnyi á bháre yê, n kô yê mân n jak ka echəme Atáŋá-eték ábho.

²⁹N nôk m mə́ŋe bəre á fíi yê ka achot ebhín ábho, kən kpe ejûm á ka yim nji kə́n á yúi yê na kpe á kâk yê ka ókúmí.

³⁰Á kpó səre se ane mbá á kí nok mbá nnyi á kí yui yê, nâ ńjə́ne ń tum yê áno mbâ eya ntə̂m yə́t, ń səre fə́ne ane mba á tóe sê yê a yîm obhí, á bhá sə́ré obhí obhê ka ochî obhâ.”

³¹Ane-enok mbá á yîm fə́ne ka ekpak á sə́re ábho, á kô Pol na atʉ́ á sî ka Antipatris.

³²Ofú ó kpó che, á chə́bhe njəm, kən á mághe mba á bhúgha ofoŋ á kô yê á jî ochî.

³³Á kpó si Sesariya, á káre nwet nnyí mbâ ntûfâm nnyó, á kô fə́ne Pol á káre yê.

³⁴Ntûfâm a kpo bhiŋ nwet nnyí, a bhə̂p Pol ebhat nji a dʉ. Pol a sə́re se a ri ebhat í Sirisiya.

³⁵Ntûfâm nnyó mân se yê tîk a yûk achot ábho ebhú ane mba á sə́ra sê yê a yîm obhí á bha. A sə́re fə́ne á kô yê á jî kâk ka ókʉ́rí ntûfâm etat nnyo á kamá se Erot á bhábha yê.