Read ejagham Etûm ágbán~í jisos, echî 24 Bible Online

Etûm ágbán~í jisos, echî 24 - ejagham bible

Etûm ágbán~í jisos, echî 24

¹Mfín a kpo chíŋ érôn, ntûfâm akará-agore Obhasi a kamá se Ananiyas na etʉ̂ ane-akúí eték na ntóŋa-ebhín yót a kamá se Teturus á jak nnyi Sesariya, á jí sə́ré Ntûfâm i Feris obhí Pol.

²Nji á síi, Ntûfâm i Feris a bhîŋ Pol a bhák, kən Teturus a fâp a kí səre obhí Pol se, “Ntûfâm, ka ekpak ó kok o fik êt, é fon enare ka eték ebhú é rap. O kí yimâ fə́ne bibhín mbi í kə́ bha na onono ka eték ejə́ré.

³Ntʉ́ghi ekpin ejâ njí êt e kí kam kpe bhaghé ebhú kpe fan kpe fan. E kí kup wâ fə́ne ka ńjə́ne.

⁴Ń ka wóm ḿ bíbhí ebhú ejâ kpe-eji, kən n kí goré wâ bəre ó nâ biji ó yúk mô ekîm í nchot nnyi é bhak osə́ré wâ.

⁵É yen sê nne nnyó a ri mfoné-mfoné nkara-oseŋe. Kpe a jiî fan, yê nâ á yimá ane Jus á kará onyʉk ka ngun ndə́m. Yê a ri ka ekam ane Nasaret áji.

⁶A nôk se yê a nyóbhé ókʉ́rí achot Obhasi obhə́ré kən e fî yê áno. [E wóme sê é táŋ nchot eye ka ekpak ebhín ejə́ré é fíi.

⁷Kən Lisiyas nnyo ntûfâm ane-enok a bhâ tábhe yê ka ikom.

⁸Nji a tabhê yê, a sə́re a ri se êt é bhá mbâ eya.] We ḿfoné, ó bhəp yê, tîk o mə́ŋe se achot mma é səra sê a yîm, a ri ka echî.”

⁹Ane Jus mbá chénchén á kâm sê nchot nnyi Teturus a chorê a ri ka echî.

¹⁰Ntûfâm nnyó a kpíghi a sə́re Pol se a sə́ré ejê erə́bhe nchot. Pol a róghe se, “Ḿ məŋe bəre we ó taŋ achot ka eték njí mfá ebhú é rap. Ka obhô mbí, ḿ fon ogyebhá-ḿbə́ŋé nji ń gyimi ka ochî obhâ, ḿ búp amé nchot.

¹¹Kə́n o yên se mfín á ka chíŋi ófó na ébháe nnyi n jiî Jerusarem bəre ń kare ejík mbâ Obhasi.

¹²Ane Jus mbá á ká kpughi ə̂m m fírá áfírí na nne ka ókʉ́rí achot Obhasi. Á ka yén ə̂m n kaghá ane akát ka nsi ka óchâm Obhasi ka ngûm na kpe ka eji etat ka Jerusarem bəre á káre onyʉk ka eték.

¹³Á ká bhik etóŋóm jáé ájoé iyîm mbi á sə́re nná sê ń yim, í rî ka echî.

¹⁴Kən n kí kam ka ochî obhâ bəre ń jigha Obhasi nnyo ásé abhə́ré á jígha, kən noŋ nne nnyo á tobha Mbá nnyi Jisos nnyi ábho sê a ri áfúbhí. Ń kam na chénchén achot mma á rî ka onwet ebhín í Mosis na mbi akará-otîp Obhasi.

¹⁵Ń yuŋ fə́ne ḿbə́ŋé n kî na Obhasi nnyo kpe ábho áfoné á káme, bəre ane abhí oo, ane ano oo, tîk chénchén á nyə́me ka ekʉ̂.

¹⁶Nâ ńjə́ne é yími ə̂m bəre ń nôk m foná ḿbə́ŋé amé jáé ka ochî Obhasi na atem-ane.

¹⁷“Ḿ maghe Jerusarem nyâ a râp kən bəre ń jî káre ntí mbâ akpák ka ejámé eték, n káre fə́ne Obhasi ekəp.

¹⁸Nji n di n yimá iyîm mbí, ane mbá á yéne ə̂m ka ókʉ́rí achot Obhasi, nâ ebhú ḿ man agore osugha-biji. Kpe á ká yen ə̂m na ekam ane. Á ká kpughi kpe nchot yə́t.

¹⁹Kən etʉ̂ ane Jus mba á dʉ̂ nnyi ebhat Esiya á rî áfo. É nóbhe kə́n ábho á fâp ochî obhâ á bhá sə́ré ejûm ebhí nji á yéne ə̂m n yîm.

²⁰Kpe ane mbá, bhə̂p ábho á sə́ré wâ ejûm ebhí nji echəme Atáŋá-eték á yéne sê ń yim.

²¹Təm nchot yə́t nnyi n táme ebhú á táŋa ə̂m bəre, ‘Égyé, ên ó kak ên ə̂m ka esup o kí taŋ ên nchot amé, ka n kamê bəre mba á kpóe okpó tîk á nyə́me ka ekʉ̂.’ ”

²²Nji Pol a chorê nchot eye a mân, Ntûfâm Feris ngá a mə́ŋe nono a kpê na nchot i Mbá nnyi Jisos. A sə́re ane mbá se á chîk, ebhú Lisiyas nnyo nne-echî ane-enok á bha, yê tîk a gbût nchot.

²³A sə́re fə́ne ntûfâm ane-enok se a kó Pol, a bhábhá yê nono, a kâ gáre okí yê amə̂t ka biji. Se a kâ gbʉ́i fə́ne atem í Pol nji á bha yê oyén na ogye.

²⁴Mfín a kpo chíŋ kpe áno, Feris na nkáé owe, Drusiriya, á bhîŋ Pol sê a jí kpi ábho nchot i ḿbə́ŋé ekíím na Jisos Krayis nono. Nkáé Feris a ri nne-nkáé Jus.

²⁵A fíri na ábho a kpê na nchot i iyîm eyimím ka nnyen-i-mbá, ofigha-biji na etáŋám nji Obhasi a kí taŋ ane ka nsígha-njəm ebhú. Efup é gyê Feris nji a yúghi nchot nnyí, a chôt mbâ Pol se, “É bhik! Choŋ kpá, ebhú ḿ kpo fon ebhú, tîk n tûm á kô wâ obhák.”

²⁶Á kera ngá fə́ne se Pol tîk a chîŋ obhô njəm a káre yê. Ka obhô mbí, a kí tum á bhiŋá Pol a bhák chénchén ebhú, á kubhá na atem.

²⁷Nyâ a kpo chíŋ ébháe, Posiyus Festus a kô ekumi-otúi Feris. Feris á woma yê a yim ejûm nji é kí gyebhe ane Jus ḿbə́ŋé, a mághe mân Pol ka ókúmí.