Read ejagham Etûm ágbán~í jisos, echî 4 Bible Online

Etûm ágbán~í jisos, echî 4 - ejagham bible

Etûm ágbán~í jisos, echî 4

¹Pita na Jon á nyə́ne áfo á səra ane nchot i Jisos. Kən akará-agore Obhasi na nne-echî abhábhá-ókʉ́rí achot Obhasi na ane echəme Sadusi á fə̂n á bhak.

²É yáme ábho ka Pita na Jon á kí sərâ ane sê Jisos a nyə́me ka ekʉ̂. Nâ é toŋe sê nne á kpo, a kí nyəmé ka ekʉ̂.

³Á fî ábho á jî fîn ta ntem-ofú na egu.

⁴Kən ane etî-etî mba á yúghi okpígha-ejûm mbi Pita, á kâm na ḿbə́ne. Ka ekpak njí, ane mba á kíi ḿbə́ŋé, á chíŋi kpe ntem-esam ntə̂m-ntə̂m ófó na ébháe na ejûm (5,000).

⁵Ofú ó kpó che, ane-echî na ane-akúí eték na atóŋá-ebhín, á chə́me ka eték í Jerusarem.

⁶Á jî kpúghi Anas nnyo ntûfâm akará-agore Obhasi na Kayifas na Jon etat na Areksanda na ane mba tat mba ndə́p-i-njû Anas.

⁷Á kpó chəmé, á yíghi mba Pita á bhak ka ochî ábho. Á bhə̂p ábho sê, “Énê a karê ên ikom kən o yimá ên iyîm mbí? Ka mbiŋ énê nâ ó yimá ên ḿbə́ne?”

⁸Kən Obhasi Ebhare Ntʉgantʉ a súi Pita ka biji, Pita a táme ábho se, “Atúi-ofâm, ane-akúí ane, yûk ên.

⁹O kí bhəp ên êt bibhə̂p ka onobhá-eji mbi e yimî e káre mbə́né, ekpak e yimî kən a sôn a?

¹⁰Deê ên chénchén na Isrel ndə́m á mə́ŋe sê a ri ikom mfi í rî ka mbiŋ i Jisos Krayis nnyo nne Nasaret nâ í yími nne nnyó a sôn nnyen esonóm ta a gyím áno mfá égyé. A ri Jisos nchane nnyo o kúmi ên nná ka ego kən Obhasi a yîm yê a nyə́me ka ekʉ̂.

¹¹Yê a ri ‘Isôk mfi ên agbeghá-ojû o bhumî ên sê í ká nop njû egbeém, ḿfə́ne nâ í bhâ chə́bhe mfoné-mfoné isôk mfi í fíi njû.’

¹²Məŋê ên sê kən nne a sém ka obhí, á chiŋa mbâ Jisos, mbá etat cháŋ. Ka ngun ndə́m, mbiŋ etat cháŋ nnyi Obhasi a karê se a yim ane á sém, é ká chiŋi ńnyə́ne.”

¹³Nji ane echəme Atáŋá-eték á yéne Pita na Jon á chorá na osoná-ḿbə́ŋé, kpe nwet á ká məŋé, kpe ejûm á ká fap, ókerê ó fî atáŋá-eték mbá. Á bhâ tît mân sê a ri ane mba á tóbha Jisos ebhú áji.

¹⁴Á kpó yen nne nnyo á yími nná a sôn a gyím áfo kpít na Pita na Jon, á ká kpo fon kpe jə́t nji á kí chot.

¹⁵Á sə́re mân ábho sê á mághe kpá óchâm esup. Á róghe echoróm ábho-ábhô sê,

¹⁶“E kí yim nan na ane mbá éé? Kpe énê ka Jerusarem a mə́ŋe se ábho nâ á yími ntʉ́ghi ekpatə́m ejûm okpógha-biji njí. Nne owəré nnyo a kí firi cháŋ.

¹⁷Kən é yîm nchot nnyí a kâ jábhe ngûm, deê é tʉ̂ ane mbá obhô ka otûŋ á kâ kpô kpí ane ka mbiŋ i Jisos Krayis.”

¹⁸Á bhîŋ mân Pita na Jon á tʉ̂ ábho obhô ka otûŋ sê á kâ kpô gaé sê á kpí nne kpe ejûm ka mbiŋ i Jisos.

¹⁹Kən mba Pita á táme sê, “Ên áfoné, sə́re kpá êt ejûm nji é rî nono ka ochî Obhasi: eyúghúm ên kən Obhasi.

²⁰É ka yén ekpak nji êt e kí maghé echoróm ejûm nji e yúghi oyúk, e yên oyén.”

²¹Atáŋá-eték á bhâ tʉ̂ ábho obhô ka otûŋ kən á nyáŋe ábho obhô. Á ká yen kpe echî nji á kí kpəré ábho ka ane chénchén á kí karé nkat mbâ Obhasi ka ejûm nji é fábhe.

²²Echî aŋ? Nne nnyo á yími nná yê etûm okpógha-biji njí ka biji kən a sôn, a chíŋi nsam i nyâ ébháe.

²³Nji á nyáŋe Pita na Jon abhô, ka ngyím ányi á bhak á bhâ sə́re ane ekam ábho ejûm nji ane-echî akará-agore Obhasi na ane-akúí eték á chóre.

²⁴Nji á yúghi nchot nnyí, ekam ábho njí ndə́m á chə́me, á góre Obhasi sê, “Ńtâ Obhasi, we nnyo o yimî ósô na nsi, o yîm aya na chénchén nji é rî ka etím.

²⁵Ka ikom Obhasi Ebhare Ntʉgantʉ, o chôt éməné ka nnyo nne-etûm owa Debhit se, ‘Ane mba á ká məŋé Obhasi á yáma kpá ḿbə́ŋé jen? Á chəmá kpá á fígha achot í chichi jen?

²⁶Atúi-ofâm í ngun á bhop ekubhi, ane mba á fíi ikom eték á chəme achî sê tîk á yîm Ńtâ Obhasi na Ntûfâm nnyo Obhasi a sáŋe a káre otúi.’

²⁷Erot á chə́me achî mfá ka Jerusarem, yê na Pontus Piratus na ane Isrel é kpê na ane mba Jus asík. Á chə́me achî á fôn ekubhi ábho kən á yúí Jisos, ḿgbán owa nnyo á ka fon kpe akôp. Yê nnyo o sáŋe o káre otúi.

²⁸Kən ejûm nji á yími nná, a ri ka ekpak nji we ta ó kam se á yîm. O kamê ka ikom ifâ na okorá-ḿbə́ŋé obhâ.

²⁹Ńtâ Obhasi, mfá-mfá mân kére efup nji á kágha êt nná ka ḿbə́ŋé. Nyáŋe êt ka ane etûm abhâ, é sə́ré otîp obhâ, efup e kâ fôn.

³⁰Nyáŋe êt, tə́ne obhô obhâ o yimá ane á soná. Nyáŋe êt e yimá ntûm okpógha-biji na biriŋ ka mbiŋ i Jisos, ḿgbán owa nnyo á ka fon kpe akôp.”

³¹Nji á máne Obhasi egoróm, njû nnyi á chə́me nná a nyíŋi. A kpo to a nyiŋí, Obhasi Ebhare Ntʉgantʉ a súi chénchén ábho biji, á kə̂t á səra otîp Obhasi, efup á ro fon.

³²Atóbhá Jisos chénchén ka ebhú áji, á fóne ḿbə́ŋé ábho yə́t na atem, kpe yót nnyo á səra se, “Ńgyê ejûm ejámé nná, ńgyê ejâ nná,” cháŋ. Á kíra chénchén iyîm ábho mbi á fóne na atem.

³³Na ekpatə́m ikom, ágbán í Jisos á səra fə́ne noŋ atî-isê mba á yéne Ńtâ Jisos a nyə́me ka ekʉ̂. Obhasi a tóŋá fə́ne ekpatə́m onobhá-eji ka echəme ábho.

³⁴Kpe nne ka ekam ábho nnyo a ri ka eket ejûm kpe jə́t cháŋ. Ka ebhú ka ebhú, mba á fóne mbin na kpe ojû, á kí gurí á kô ntí á bhak,

³⁵á bhâ káre ágbán í Jisos. Ábho á kí ko fə́ne ntí mmí á kíri mbâ ane mba á rî ka eket iyîm.

³⁶Ta nne ndə́p-i-njû Libhayi yót a jî gúri ebhin ejê a kô ntí a bhâ káre ágbán í Jisos. Á jíi nne nnyó ka Sayiprus, a kamá se Jusep. Ágbán í Jisos á bhíŋa nne nnyó sê Banabas, nâ se Nkagha-ntem Ikom.