Read ejagham Etûm ágbán~í jisos, echî 5 Bible Online

Etûm ágbán~í jisos, echî 5 - ejagham bible

Etûm ágbán~í jisos, echî 5

¹Nne yót a ri a kamá se Ananiyas, nkáé owe a kamá se Safira. Nne nnyó a gúri nsi ábho,

²kən a kô etʉ̂ ntí a bhə̂t, a káre mmi ngá mbâ ágbán í Jisos. Nkáé owe a mə́ŋe.

³Pita a bhîŋ yê a bhə̂p se, “Ananiyas, o yimî nan o kâm Satan a súi wâ ka ḿbə́ŋé, a yîm wâ ó sə́ré áfúbhí mbâ Obhasi Ebhare Ntʉgantʉ? Ntí mmi o gurî nsi eya, ó ki etʉ̂ mbá-njəm ó ko mân mmí ó bha.

⁴Nsi a ri eya, ntí mmi o gurî, a ri imâ. Echî mân nji o kére se ó yîm ntʉ́ghi ejûm njí a ri jen? Məŋê se o sə́re áno áfúbhí mbâ Obhasi, mbâ ntem-nne asík.”

⁵Ananiyas a kpo yúk nchot nnyí, a gbô a kpô.

⁶Kpe énê nnyo a yúghi se Ananiyas a kpô, efup é fî yê. Abhon aguŋi á gyê á kə̂n Ananiyas á bhôp, á jî kə̂n.

⁷Áwa á kpó chiŋ á sí kpe ásá, nkáé a bhák, kən á ka məŋé ejûm nji é fábhe na ndûm owe.

⁸Pita a bhə̂p yê se, “Sə́re ə̂m, nâ ntí chénchén mmi we na ndûm owa o fonê ên ka nsi nnyi o gurî ên a?” Nne-nkáé nnyó a kâm se ḿmə́ne áno chénchén.

⁹Pita a bhə̂p yê mân se, “Jen kən we na ndûm owa ó kam ên sê ó gáe ên Ntʉgantʉ Obhasi? Yûk, n kí səre wâ bəre ane mba á kə́ne ndûm owa á rî ka nnyo-mbá, á kí kən wâ eróŋ á jî.”

¹⁰Ka ngyím ányi, nne-nkáé nnyó a gbô yê áfo ka ochî, a kpô. Abhon aguŋi á kpó bha á yên nne-nkáé nnyó a kpô, á kə̂n fə́ne á jî kə̂n kpít na eji á kə́ne ndûm owe.

¹¹Chénchén ane echəme atóbhá Jisos na ane etat mba á yúghi nchot nnyí, efup é fî ábho.

¹²Ágbán í Jisos á róghe eyimím iyîm okpógha-biji na biriŋ etî-etî, ane á yena. Chénchén ane Obhasi á chə́me ka Agbá-njû Soromon.

¹³Ane mba cháŋ ka ekam ábho á fûp ka echə́mə́m na ábho, kən ane chénchén á kâm eróŋ sê ane Obhasi á fôn nnyen erû.

¹⁴Ane á kə̂t á chəmá ekam njí, ane-akáé na ane-arûm mba á yúŋi ḿbə́ŋé á kî na Ńtâ Jisos.

¹⁵Ka ntûm nnyi ágbán í Jisos á yíma, ane á chə́bhe á kəna ane emaŋé á kik ka obhá, ka binuŋ na mkpa. Sê ebhú Pita a kí chiŋ, kpe ńtʉgântʉ eye a gbo ábho ka biji.

¹⁶Nkam ane a dʉk nték nnyi a ri a kpíri Jerusarem a bhák na ane emaŋé ábho, na mba ojê ó kára oseŋe. Á yîm chénchén ane mba á bháe á sôn.

¹⁷Nji ágbán í Jisos á yíma nná iyîm mbí toŋ ntûfâm akará-agore Obhasi na ane echəme Sadusi mba á rî na yê, á kí ki ábho amə̂t na oyámá-ḿbə́ŋé.

¹⁸Á kpó kumí cháŋ, á fî ágbán í Jisos mbá á kâk ka ókúmí eték.

¹⁹Kən atʉ́ á kpó nyak, énjel Ńtâ Obhasi a bhâ rə́bhe njû ókúmí, a kô ábho á fabha, a sə́re ábho se,

²⁰“Choŋ ogyímí ên ka ókʉ́rí achot Obhasi, sə́re ên ane nchot ekpin efê nji é bháe nná, kpe jə́t o kâ mághe ên mbá-njəm.”

²¹Ofú ó kpó che, ágbán í Jisos á gyê fə́ne ókʉ́rí achot Obhasi, á róghe ane achot ekpíím ka ekpak nji énjel a sə́re ábho. Na ofú ábhi, ntûfâm akará-agore Obhasi na ane abhê á bhak ka ókʉ́rí, á bhîŋ ane echəme Atáŋá-eték ndə́m, á fî ekumi. Á tûm sê á kó ágbán í Jisos ka njû ókúmí, á bhá ka ochî ábho.

²²Kən á kpó ji á ká yen ábho, á chə́bhe fə́ne njəm, á bhâ sə́re ane mba á túmi ábho sê,

²³“Nji e jiî e yên njû ókúmí, á fin nono, abhábhá-bhábhá á gyím áfo. Kən e kpô rəbhé, é ka yén kpe nne ka etím.”

²⁴Ntûfâm abhábhá-ókʉ́rí achot Obhasi na ane-echî akará-agore Obhasi á kpó yuk nchot nnyí, é chíŋi kpá ábho, á róghe ekérém ekpak ejûm nji é fábhe na ágbán í Jisos.

²⁵Kən nne etat a bhâ sə́re ábho se, “Yûk ên! Ane mba o kaghê ên ka ókúmí á rî ńgô ka ókʉ́rí achot Obhasi á kpik ane achot.”

²⁶Ntûfâm abhábhá-ókʉ́rí achot Obhasi á yə̂p mân na ane abhê á jî kô ágbán í Jisos mbá á bhak. Á ka yim ka ikom, ka á kí be sê ane á kâ tûp ábho na atáé ka obhô ágbán mbá.

²⁷Nji á kóe ágbán í Jisos mbá á bhak, á kô ábho á jak ka ochî echəme Atáŋá-eték. Ntûfâm akará-agore Obhasi a bhə̂p ábho se,

²⁸“É tʉ ên obhô ka otûŋ sê o kâ kpô kpí ên ane o bhiŋá ên mbiŋ i nne nnyó, kən ó bhó yuk ên. Ó jabhe ên Jerusarem ndə́m na esə́re nne nnyó. O kí wom ên sê ane á sə́ré sê êt nâ e yúi yê asík a?”

²⁹Kən mba Pita á táme fə́ne sê, “E ri é yúk a ri nchot Obhasi, nnyi ntem-nne asík.

³⁰Nji o yúi ên Jisos ka ekúmúm ka ego, Obhasi nnyo ásé abhə́ré á jígha a yîm yê a nyə́me ka ekʉ̂.

³¹A káre yê ekumi otúi, mkpe obhô-orûm obhê, a tóŋe se Jisos a ri Nne-echî, a ri nne nnyo á yimá êt e sémá. Echî aŋ? Se ájoé ane Isrel abhê á yoŋe ḿbə́ŋé á mághe obhí ábho, tîk yê a rî nsôn a sû ḿbə́ne.

³²Êt na Obhasi Ebhare Ntʉgantʉ a ri atî-isê ka achot mmá chénchén. Obhasi Ebhare Ntʉgantʉ a ri ekəp nji Obhasi á kará ane mba á kí yuk yê.”

³³Echəme Atáŋá-eték njí é kpó yuk nchot nnyi ágbán mbá á chóre, é yâm ábho é kpô, á chími sê á kí yui ábho.

³⁴Kən nne echəme Farasi yót ka echəme Atáŋá-eték njí, a kamá se Gamariye, a rúi ngyím a sə́re se á kó ágbán í Jisos á fáp ka éré ka mô ebhú. Gamariye a ri ntóŋa-ebhín nnyo a fonê ejík ka amə̂t ane chénchén.

³⁵Nji á kóe ágbán mbá á jak ka éré, a sə́re Echəme Atáŋá-eték ábho njí se, “Ane Isrel, yûk ên. Kó ên ebhú, nne a kâ yîm ane mbá ejûm oyim-óyîm.

³⁶Éməné ńgô nne etat a kamá se Teyuda a fâp a sə́rá mfá se yê a chíŋi abhô. Ane á sî kpe ntem-esam mba á káme na yê, á chə́bhe á tobha yê. Kən nji á yúi yê, ane fép mba á tóbha yê á bê, echəme ejê é chât.

³⁷É kpó kət fə́ne nne Gariri etat a kamá se Juda, a fâp ka ebhú ofana-ane. A yîm fə́ne ane á kpighi ntûfâm eték njəm, á tobha a ri yê. Á kpó yui yê, echəme ejê é chât.

³⁸Ka nji é kpo bhá áno mfá, n kí səre ên bəre o kâ yîm ên kpe ejûm na ane mbá, maghê ên ábho, ka ájoé achot mmá na ntûm nnyi ábho á yíma áno a ri íkíkéré ntem-nne, í kí tan áno.

³⁹Kən ájoé í dʉ̂ mbâ Obhasi, kpe o noghê ên áfo nan, ó bhó fon ên érûm. Ebhú tat ó ro məŋé ên áfo ó noghá ên áno a ri na Obhasi.”

⁴⁰Echəme Atáŋá-eték njí á yûk nchot i Gamariye. Á kô ágbán í Jisos mbá á tə̂m ábho otəm, kən á tʉ̂ ábho obhô ka otûŋ sê á kâ kpô kpí ane ka mbiŋ i Jisos. Á nyáŋe mân ábho abhô, á jak.

⁴¹Ágbán mbá á mághe mân echəme njí á jak na ekpatə́m ogyebhá-ḿbə́ŋé sê Obhasi a yên se ábho á bhik mba ane á kí soné ka obhô mbiŋ i Jisos.

⁴²Á kə̂t mân kpe bhaghé ofú ka ókʉ́rí achot Obhasi na ka ojû ane, á səra ane otîp ogyebhá-ḿbə́ŋé sê Jisos a ri Krayis, nne nnyo Obhasi a túmi a bhá yim ngun á sém.