Read ejagham Etûm ágbán~í jisos, echî 7 Bible Online

Etûm ágbán~í jisos, echî 7 - ejagham bible

Etûm ágbán~í jisos, echî 7

¹Kən ntûfâm akará-agore Obhasi a bhə̂p Stibhen se, “Nchot nnyi á sə́ra áno mfá sê ó yim, a ri ka etʉri a?”

²Stibhen a táme se, “Atem-abhon-í-nnyen, ásé abhámé, yûk ên nji n kí chot. Ka ebhú éməné, Obhasi, nnyo a fonê ekpatə́m ejík, a fábhe mbâ ńsé éməné owəré Abraham ka ebhú á kumá Mesopotamiya. Kən ebhú Abraham a maghé a jí kumí Aran,

³Obhasi a sə́re yê se, ‘Maghê eték ejâ, maghê ndə́p-i-njû eya, choŋ ebhat í nsi nji n kí toŋe wâ.’

⁴“Abraham a mághe mân nsi Kadiya a jak a jî kúmi ka Aran. Ebhú ńsé owe a kpóe, Obhasi a tûm yê ka nsi nnyí mfá nnyi e kun ên áno égyé.

⁵Obhasi á ka karé kpá yê kpe eji nsi jə́t ebhú áji se a kó. Kpe mô eji á ka karé. Kən a chími se yê tîk a káre. Se tîk nsi nnyí a chə́bhe eye na biyábhé-abhon abhê. Ebhú Obhasi a chimî yê nchot nnyí, kpe mmon yót kpá á ka fon.

⁶Ńgyê ejûm nji Obhasi a sə́re yê: ‘Biyábhé-abhon ibhâ tîk á kúmi ka nték ane etat. Á kí kumí noŋ asʉ́ŋ ka nyâ ntem-esam, á kará ábho ekpatə́m oseŋe.

⁷Kən tîk m kpə́re ane mbá mba á kí tʉk abhon abhâ. Ḿ kpó kpəré ábho, abhon abhâ tîk á mághe eték áji á bhâ jíghi ə̂m ka eji njí.’

⁸Obhasi a bhâ káre mân Abraham nkîm noŋ eriŋ í ńgyímí nnyi yê a fonê nná na yê. “Nji Abraham a fonê mmon owe Isak, a kîm yê nkîm nji mmon a káe ogəm bhə́t. Isak fə́ne a kîm mmon owe Jakop nkîm. Jakop a fonê abhon arûm ófó na ábháe, a kîm fə́ne ábho nkîm. Abhon í Jakop mbá nâ á rî áno ásé ndə́p-i-njû ófó na ébháe ka Isrel.

⁹“Kən abhon mbá mba á chəbhe ásé abhə́ré á kíi mmon-i-nnyen ábho Jusep amə̂t abhí kpe-eji. Á gúri yê noŋ nsʉ́ŋ ka ebhat Ijip. Kən Obhasi a ri na yê,

¹⁰a yíghi yê ka oseŋe fép. “Nji á kóe Jusep á bhak ka ochî ntûfâm i Fero nnyo a fonê ebhat Ijip, Obhasi a káre yê ekpin nji é kí gyebhé nne ka ḿbə́ŋé, a káre yê fə́ne oməŋá-ejûm. Fero a yîm yê enyeré ntûfâm ebhat Ijip a kpó joé nne-echî nnyo á kebha ókʉ́rí obhê.

¹¹“Kən njaé a gboê ka Ijip ndə́m na Kanan, ane á yên oseŋe kpe-eji. Ásé éməné abhə́ré mbá á ká ti kpe nji á kí di.

¹²Kən nji ńsé ábho Jakop a yúghi se édî é rî Ijip, a tûm ábho ágo. Nâ ekpíi ejen nji á jíi ágo.

¹³Á kpó to á jî ka osúí ntə̂m ébháe, Jusep a yîm ábho á mə́ŋe yê. Fero a bhâ mə́ŋe fə́ne ndə́p-i-njû Jusep.

¹⁴Jusep a bhâ tûm mân eyum mbâ ńsé owe Jakop se a kó ndə́p-i-njû chénchén a bhá nnyi Ijip. Á rî nsam ane ésá na ane ekû.

¹⁵Jakop a kô ndə́p-i-njû eye á jak nnyi Ijip. A ri ka Ijip nâ yê na ane-atəm abhə́ré á kpóe.

¹⁶Kən biyábhé-abhon ábho á kə̂n biji ábho á chə́bhe njəm nnyi Sekam, á bhâ kə̂n ka oyəm mbi Abraham a namê na ntí mbâ ndə́p-i-njû Amo.

¹⁷“Nji ebhú é kpíri nji Obhasi a kí yim ejûm nji a chimî Abraham, ane mba Jakop a kóe nná a jak nnyi Ijip á kpô tí.

¹⁸Ebhú é chiŋ é rap nji Jusep a kpóe, kən ntûfâm etat a bhâ kô otúi ntûfâm nnyó, á ka məŋé kpe ejûm a kpe na Jusep.

¹⁹A gyê ane abhə́ré emoóm, a seŋá ábho, a yimá ábho á bhumá abhon ábho á kpó.

²⁰“A ri ka ebhú njí nâ á jíi Mosis, énoê mmon nnyo Obhasi a korê. Ane abhê á gyée yê ka nnyam-ósô ésá ka njû ábho,

²¹kən á yíghi yê á mághe ka éré. Kən mmon i ntûfâm i Fero yót nnyo nne-nkáé, a jî tî yê, a kô yê á gyê noŋ mmon owe.

²²Á kpî Mosis achot Ijip chénchén, a kúi a chə́bhe ndûm i nne ka nchot-i-nnyo eye na oyima-ejûm obhê.

²³“Nji a síi nsam i nyâ ébháe, a yə̂p a ji ejen mbâ atem-ane Isrel, ane abhê.

²⁴A kpo yén nne Ijip a kí karé nne owe oseŋe, a yúi nne Ijip nnyó a káre nne owe.

²⁵A kérá se ane abhê á kí məŋé sê Obhasi a kí ko yê a yim ábho á sém, kən á ká ki echî á mə́ŋe.

²⁶Ntem-ofú, a kpo to a bhá, a yên ane Isrel ábháe á kí nok, kən a jî gyê a sə́re ábho se, ‘Yûk ên! Ên a ri abhon-í-nnyen. Echî nji o kí karé ên atem oseŋe a ri jen?’

²⁷“Kən nnyo á təmá ntem a chóe Mosis a kî ka mkpe a sə́re yê se, ‘Énê nnyo a kíi wâ ntûfâm se ó táŋ achot amə́ré?

²⁸O kí wom ó yúí ə̂m noŋ o yúi nne Ijip ényané?’

²⁹Nji Mosis a yúghi ntʉ́ghi nchot nnyí, a bê a jak nnyi eték ajéné etat nji á bhíŋa se Midiyan. Ágo nâ a kóe nkáé á fôn abhon arûm ábháe.

³⁰“Nyâ a kpô chíŋ nsam ébháe, ka etə́m kpírí-kpírí na Egui Sanayi, énjel a fâp Mosis ka ochî ka erəmta-ngûn nji é rûk ka echʉt-ájé etat.

³¹Biji í kpô Mosis ka ekpak ejûm nji a yéne. Nji a kí jen a kpírá se yê a jí yen, a yûk eyum í Ńtâ Obhasi ekpak a chorê se,

³²‘Mme a ri Obhasi nnyo ásé éməné abhâ á jígha, Obhasi Abraham, Obhasi Isak na Obhasi Jakop.’ Mosis a kə̂t a choghá ka biji a yíghi amə̂t á ka kam a kpó kep ka ngûn mmí.

³³“Kən Ńtâ Obhasi a kpô sə́ré yê se, ‘Yighî iyîm-akát ibhâ, eji nji o gyím áno a ri ejámé, mme Obhasi.

³⁴Ka etʉri, ń yen ekpak á kára ane abhámé oseŋe ka eték Ijip. Ń yuk ofiná-ḿbə́ŋé ábho. Nâ ńjə́ne m bərê m bák bəre ń yîm ábho á sém. Bhák mân, ń túm wâ nnyi Ijip.’

³⁵“Nkúbhi Mosis nnyó nâ ane abhê á táŋe nná ka ebhú á sə́re yê sê, ‘Énê a sáŋe wâ noŋ nne-echî se o táŋá achot amə́ré?’ Yê mân nâ Obhasi a túmi noŋ nne-echî, nnyo a kí yim ane abhê á sém. Énjel nnyo a fábhe yê ka ochî ka echʉt-ájé njí na ngûn, nâ a kí kak Mosis obhô ka etûm njí.

³⁶Mosis nâ a kóe ane mbá á mághe Ijip. A yîm iyîm okpógha-biji, a tóŋe biriŋ ka Ijip na ka Ébhí Aya na ka etə́m ka nsam i nyâ ébháe.

³⁷“Nâ Mosis nchane nnyo a sə́re ane Isrel se Obhasi tîk a tûm ábho nkara-otîp noŋ yê ḿfoné Mosis. Se nkara-otîp nnyó a kí fap ka ekam ane Isrel ábho áfoné.

³⁸Kən Mosis a ri ka etə́m na ásé éməné abhə́ré na chénchén ane Isrel ta ebhú áji. A jóe fə́ne na énjel nnyo a chorê mbâ eye ka Egui Sanayi. A kô esə́re Obhasi nji é kára ekpin se yê a bhá karé êt.

³⁹“Kən ásé éməné abhə́ré á táŋe eyúghúm yê, á chóe yê á tə̂n ka mkpe, á korá se kə́n á chə́bhe njəm nnyi Ijip.

⁴⁰Á bhâ sə́re mân Eron sê, ‘Tʉrî êt ajom á tóŋé êt mbá. Nne nnyó nnyo a yimî nná êt ta é maghe Ijip sê-sê Mosis, é ka məŋé ejûm nji é fábhe na yê.’

⁴¹Nâ ebhú ane mbá á yími mân njom etat noŋ mfoŋ á kî áfo. Á jomá njom ábho nnyí. Á bhâ fî mân erom á gyébhe ḿbə́ŋé ka ejûm nji ábho á yími na abhô.

⁴²“Kən Obhasi a bhâ kpíghi njəm a káre ábho se kpe á kóre ńdʉnândʉ ka ósô, deê á jíghí. Nâ noŋ fə́ne á séŋe ka onwet akará-otîp sê, ‘Ane Isrel, yûk ên. Ka nsam i nyâ ébháe ka etə́m, ó ka karé ên ə̂m bikəp, ó ka yúí ên onyam o káre ə̂m.

⁴³O kə́ne ên a ri njû ekumi nnyi njom i Morok na efóŋé írʉnândʉ nji njom i Refan. Nâ amə́né ajom mma o yimî ên sê o jíghá. Ka obhô mbí, n kí bhim ên ta ó jî ó chíŋí ên ebhat í Babiron.’ ”

⁴⁴Stibhen a kpô chot se, “Ásé éməné abhə́ré á fôn Njû Otî-isê Obhasi na ábho ka etə́m. Á gbê njû nnyi na ḿfô. Mosis a yimî ńnyə́ne ka ekpak nji Obhasi a sə́re yê se a yim, ka ekpak á tóŋe yê fə́ne.

⁴⁵É kpó kət, ásé éməné abhə́ré mbá á káre Njû Otî-isê Obhasi nnyí mbâ abhon ábho. Josuwa nâ a kóe ábho na Njû Otî-isê a jak ka eték nji Obhasi a bhími ane mba á fóne. Njû Otî-isê nnyí á kə́re áfo kpát ta é sî ebhú ntûfâm i Debhit.

⁴⁶Debhit a yîm ekpin, Obhasi a kôt yê. A sə́re mân Obhasi Jakop se a kam yê a gbe njû eye.

⁴⁷Kən Obhasi á ka kam. Nji Debhit a kpóe, mmon owe Soromon a gbê mân njû nnyí.

⁴⁸“Kən Obhasi ósô á bhó kumí ka njû nnyi ane á yími. Nâ noŋ nkara-otîp Obhasi a sə́re se, Obhasi se,

⁴⁹‘Ósô nâ ó rî ekumi otúi ejámé, nsi nâ ekíghá-akát. O kí gbe mân bhaghé ntʉ́ghi njû ó kí ə̂m? N kí yoé biji fan?

⁵⁰Mme ḿfoné asík na abhô amámé nâ n yimî nná iyîm mbí chénchén a?’ ”

⁵¹Stibhen a kpô chot se, “Bhaghé osoná-echî na ên? Ḿbə́ŋé na Obhasi ó bhó ki ên, nchot eye ó bhó yuk ên ka jen? Ó gbʉi ên Obhasi Ebhare Ntʉgantʉ a kâ yîm etûm ejê, noŋ ásé abhə́né ebhú áji á yími fə́ne.

⁵²Nkara-otîp Obhasi a ri ágo nnyo ásé abhə́né á ká karé onyʉk a? Á yúi ane Obhasi mba ebhú áji á sə́ra sê yê nnyo ekpin ejê é rî ka nnyen-i-mbá á kə́ bha. Ên mân ó bha guri ên yê, ó yui ên yê.

⁵³Ên mba baénjel nâ á káre ên ebhín Obhasi, kən ńjə́ne, ó bhó ki ên.”

⁵⁴Atáŋá-eték mbá á kpó yuk nchot i Stibhen nnyí, é yâm ábho é kpô, amə̂t á bhî ka echî.

⁵⁵Kən ikom Obhasi Ebhare Ntʉgantʉ í súi Stibhen ka biji kpúk, Stibhen a yûŋ amə̂t ka ósô, a yên ekpatə́m ejík Obhasi, a yên Jisos a gyím ka eji ejík ejê, mkpe obhô-orûm Obhasi.

⁵⁶A chôt se, “Ńgyê, ń yen noŋ á rəbhe nnyo-mbá eték Obhasi, Mmon-i-ntem-nne a gyím ka eji ejík ejê, mkpe obhô-orûm Obhasi.”

⁵⁷Kən ane mbá á kûk káŋ káŋ káŋ, á bhúi abhô ka atûŋ sê á kâ kpô yúk. Á bhéne ntə̂m yə́t á jî wúbhi Stibhen

⁵⁸á kô á jak ka echî-mbá eték, á róghe yê etúbhúm na atáé. Atî-isê áfúbhí á mághe okʉ̂ ábho mbâ nguŋi yót nnyo á kamá se Sol, sê a kép.

⁵⁹Nji ane mbá fép á túbha mân Stibhen na atáé, Stibhen a bhîŋ se, “Ńtâ Jisos, tabhê ńtʉgântʉ amé.”

⁶⁰A tə̂m achî-arúŋ ka nsi a kûk káŋ káŋ káŋ se, “Ńtâ Obhasi, ri nsôn su obhí ábho mbí.” Nji a kpô chot nchot nnyí, a kpô fə́ne.