Read ejagham Etûm ágbán~í jisos, echî 9 Bible Online

Etûm ágbán~í jisos, echî 9 - ejagham bible

Etûm ágbán~í jisos, echî 9

¹Kən Sol a kə̂t a kará ane mba á tóbha Ńtâ Jisos ńtə́mé, a chimá ábho eyúúm. A jak mbâ ntûfâm akará-agore,

²se a karé yê nwet nnyi a kí yim yê a gyék óchâm Obhasi ane Jus kpe mbə́n kpe mbə́n ka Damakus, a fi ane-akáé na ane-arûm mba á chə́me ka Mbá Ńtâ Jisos. Se a fi ábho a bhá nnyi Jerusarem.

³Kən a kpô yəp a kí ji nnyi Damakus, ta a kpíri eték, a kpó yen ebhát é dʉ̂ ka ósô, é gbo yê áfo ntə̂m yə́t.

⁴A gbô áfo ka nsi, a yûk eyum é bhə̂p se, “Sol, Sol, ó kará ə̂m oseŋe jen?”

⁵Sol a bhə̂p se, “Ntûfâm, we a ri énê?” Eyum njí é fê sê, “Mme a ri Jisos nnyo ó kará áno ńtə́mé ányi.

⁶Kən duî ngyím choŋ ka eték, tîk á sə́re wâ ejûm nji o ri ó yîm.”

⁷Ane mba á jéna nná na Sol á gyími áfo, nchot a chíŋi ábho. Á yûk eyum kən nne nnyo á chorá á ká yen.

⁸Sol a rúi ngyím, a rəbhé amə̂t, kən á ka kpó yen mbá. Á fî yê mân ka obhô ka obhô, á kô ta á gyê eték í Damakus.

⁹Ka mfín ésá, Sol á ka yén mbá, kpe édî fə́ne á ka dí, kpe ejûm á ka gwó.

¹⁰Ntóbhá Jisos yót a ri ka Damakus nnyo á kamá se Ananiyas. A yên ndem, Ńtâ Jisos a bhîŋ yê se, “Ananiyas.” Yê a kâm se, “Ntûfâm, ńgyê mme.”

¹¹Ntûfâm a sə́re yê se, “Duî ngyím choŋ ka mbá nnyi á bhíŋa áno sê Mbá Tə́níní. Choŋ ka njû Juda, bhə̂p nne Tasus etat nnyo á kamá se Sol. A ri ágo a gorá Obhasi.

¹²A yên ejûm noŋ ndem, nne etat a kamá se Ananiyas a gyê a kúni yê obhô ka biji se a yén mbá.”

¹³Ananiyas a táme se, “Ntûfâm, ane etî-etî á səre esə́re Sol nnyó. Á səre ekpak í ndibhí nnyi nne nnyó a yimî na ane abhâ ka Jerusarem.

¹⁴Kpe ebháám ejê mfá, a kóe ikom mbâ atúi-ofâm akará-agore Obhasi se yê a bhá wubhi ane abhâ.”

¹⁵Kən ntûfâm a sə́re yê se, “Choŋ, ka ń saŋ yê bəre a tʉ́k ə̂m. Bəre a yim ane mba Jus asík na atúi-ofâm ábho na ane Isrel, á mə́ŋe ə̂m.

¹⁶Mme ḿfoné, tîk n tóŋe yê chénchén oseŋe mbi a ri a yén ka obhô obhámé.”

¹⁷Ananiyas a yə̂p fə́ne a jî sî njû nnyí a gyê. A kúni obhô obhê mbâ Sol, a sə́re yê se, “Ntem-mmon-i-nnyen Sol, Ńtâ Jisos a tûm ə̂m mbâ eya. A re Jisos yê ḿfoné nnyo a fábhe wâ áno ka mbá nji ó bhak ngá nnyi Damakus. A túmi ə̂m se ḿ bá yîm wâ ó kpó yén mbá, ó fôn Obhasi Ebhare Ntʉgantʉ eróŋ.”

¹⁸Ka ngyím ányi, ejûm noŋ akpághé-osí á fabha Sol ka amə̂t, á gbô ka nsi, a róghe fə́ne mbá eyéném. A rúi ngyím a jak á jî fûk yê ayép.

¹⁹A kpó di édî, ikom í chə́bhe njəm í bhak.

²⁰Pol a kâ ka Damakus na atóbhá Jisos mô mfín a chîŋ, a róghe ntə̂m yə́t egyéém óchâm Obhasi a sə́rá ane nchot i Jisos. Á səra ane se Jisos a ri Mmon Obhasi.

²¹Chénchén ane mba á yúghi yê, biji í kpô ábho kpe-eji. Á kí bhəp sê, “Nne nnyó asík á yua nná ane ka Jerusarem ka á gyím na Jisos a? To a bháe nná mfá a bhá fi ntʉ́ghi ane mbá a jí karé ane-echî akará-agore?”

²²Kən Sol a kə̂t a soná oson ka nchot Obhasi. A yîm ane Jus ka Damakus á nə́me, ekpak á táma yê cháŋ, ka a kí toŋe jáé se Jisos nâ a ri Krayis, nne nnyo Obhasi a túmi se a bhá yim ngun á sém.

²³Mfín a kpô chíŋ kpe áno, ane Jus á chə́me, á tími sê á yúí Sol.

²⁴Kən ane á jʉ̂ á sə́re yê. Na atʉ́ na efín ane Jus á rî á bhabha onyo-mbá eték sê á chiŋ, á yúí yê.

²⁵Atʉ́ mát ane abhê á kô yê á kâk ka ekáé á bhî njəm ébhághé-njû nji é fáre eték, a bê a jak nnyi Jerusarem.

²⁶Nji a síi Jerusarem, a nôk se yê a chəm atóbhá Jisos. Á ká kam sê yê a chə́bhe nne ábho, á jóe á fubhá yê.

²⁷Kən nne yót a kamá se Banabas a bhâ nyáŋe yê. A kô yê a jak mbâ ágbán í Jisos. A sə́re ábho ekpak nji Sol a yéne Ńtâ Jisos ka mbá ejen, yê Jisos a chôt na Sol. A sə́re fə́ne ekpak nji Sol a kpíi ane achot Obhasi ka Damakus ka mbiŋ i Jisos, á ka fon kpe efup.

²⁸Ka obhô mbí, á kâm mân Sol ka ekam ábho. A róghe mân ejeném a fará nték i Jerusarem chénchén a kpík ane achot Obhasi ka mbiŋ i Ńtâ Jisos, efup á bhó fon.

²⁹A kubhá na ane Jus mba á chóra eyum í Grik, a fírá áfírí na ábho. Kən ane á kére sê á yúí yê.

³⁰Atem-abhon-í-nnyen á kpó yuk íkíkéré mfí, á kô Sol á jak nnyi Sesariya kən á tûm mân yê nnyi Tasus.

³¹Echəme atóbhá Jisos ka Judiya ndə́m na Gariri na Samariya é bhâ jóe mân nchot á ká kpo fon ka mfín ányi. É róghe ekúúm é bhak, é jigha Ńtâ Jisos, Obhasi Ebhare Ntʉgantʉ a kaghá fə́ne ábho obhô á gyími.

³²Pita a jenê ngûm a mân ka obhô nchot Obhasi. Ebhú jə́t a jak eték í Lida se yê a jí yen ane Obhasi mba á rî ágo.

³³Nji a síi ágo, a kpúghi nne etat nnyo a gbô obhə́né nyâ a sî enígisá. Kpe á jak fan, á kə́na okə́n. Nne nnyó á kamá se Aneyas.

³⁴Pita a bhîŋ se, “Aneyas, Jisos Krayis a yîm wâ ó son. Duî ngyím, tʉrî enuŋ ejâ.” Mbə́né nnyó fə́ne a tə̂m a rúi ngyím.

³⁵Chénchén ane ka Lida na Saron á kpó yen nne nnyó a sôn, á kâm na Ńtâ Jisos.

³⁶Ka eték í Jopa nne-nkáé yót a ri nnyo a kíi ḿbə́ŋé na Jisos, a kamá se Tabita. Ka eyum í Grik á bhíŋa sê Dokas. Nne-nkáé nnyó a korê onobhá-eji eyimím kpe-eji, a nyáŋá akpák.

³⁷Ka ebhú njí, nne-nkáé nnyó a gbô emaŋé, a kpô. Á yúmi yê ayép á núŋi ka mmon-i-njû ka ósô enyóŋ.

³⁸Eték í Jopa é ká rap mbá na Lida. Atem-abhon-í-nnyen ka Jopa á kpó yuk sê Pita a ri ka Lida, á tûm ane ábháe na otîp mbâ eye sê a bhá nnyi Jopa, a kâ bhíbhi ebhú.

³⁹Nji á sə́re Pita, a tʉ́ri fə́ne biji a jak na ábho. Nji á síi, á kô Pita á gyʉ̂t ka mmon-i-njû nnyo á núŋi Dokas. Ane-akáé ekə́t chénchén á fáre Pita á kâk á rʉra nne-nkáé nnyó, á toŋa ḿfô nnyi a jəmê a kə̂p ábho ebhú a ri mbít.

⁴⁰Pita a sə́re kpe énê a fábhá ka éré, a tə̂m achî-arúŋ ka nsi, a góre Obhasi. A kpíghi mân mbâ nkə́bha-nsi nnyó a chôt se, “Tabita, duî ngyím.” Nne-nkáé nnyó a rə́bhe amə̂t. A kpo yén Pita, a rúi ngyím a kúmi.

⁴¹Pita a kâk yê obhô, a rúi ngyím, a gyími. A bhîŋ mân chénchén atem-abhon-í-nnyen na ane-akáé ekə́t á bhak. A kô nne-nkáé nnyó mbít a káre ábho.

⁴²Esə́re é jábhe Jopa ndə́m, ane etî-etî á bhâ kî mân ḿbə́ŋé na Ńtâ Jisos.

⁴³Pita a kâ áfo Jopa mfín a râp. A kumî na nyima-etûm agu-onyam yót a kamá se Simun.