Read ejagham Ane rom, echî 1 Bible Online

Ane rom, echî 1 - ejagham bible

Ane rom, echî 1

¹Nwet nnyí a dʉ mbâ amé, Pol, nnyo n di nne-etûm i Jisos Krayis. Obhasi nâ a sáŋe ə̂m a tûm noŋ ḿgbán i Jisos se ń yîm etûm otîp ogyebhá-ḿbə́ŋé ejê.

²A ri otîp mbi ta ka éməné akará-otîp á séŋe ka nwet Obhasi sê Obhasi a chimî se yê a kí tum.

³Otîp mbí ó rî ó kpê na Mmon Obhasi, Ntûfâm owəré Jisos Krayis. Ka nne, á jíi yê ka ndə́p-i-njû Debhit. Ka ńtʉgântʉ eye nnyi á ka fon kpe akôp, á tóŋe na ekpatə́m ejík sê yê a ri Mmon Obhasi. Á tóŋe nji a kpóe a nyə́me ka ekʉ̂.

⁵A ri ka obhô Mmon nnyó nâ Obhasi a tóŋe êt onobhá-eji obhê. A yîm êt fə́ne ágbán abhê. Echî aŋ? Sê é kpí nték i ngun chénchén á yúk yê, á kî ḿbə́ŋé na yê. Tîk ejík é jóe é káre mbiŋ i Jisos Krayis.

⁶Ên eróŋ o ri ên ka ekam ane mba á sáŋe nná sê á chə̂m na Jisos Krayis.

⁷Nâ ńjə́ne n séŋe n tûm mbâ eyəné chénchén ka Rom. Obhasi a tóŋe ên okot, a sâŋ ên se ó jóe ên ane abhê. Deê Obhasi Ńsé owəré na Ńtâ Jisos Krayis á tóŋé ên onobhá-eji, á káre ên fə́ne enare.

⁸Kən ń jî ochî, ń ko mbiŋ i Jisos Krayis ń kúp kpá Obhasi ka obhô obhə́né chénchén. Echî aŋ? Ngun ndə́m á yuk esə́re ḿbə́ŋé nnyi o kíi ên na Jisos Krayis.

⁹Kpe ofú kpe bhə́t ó bhó chiŋ nji ḿ bó tit ên chénchén ka ogora Obhasi omé. Obhasi átíŋ nnyo ń jigha na ḿbə́ŋé amé fép nâ a ri ə̂m ntî-isê. Ń jigha yê ka otîp ogyebhá-ḿbə́ŋé obhê mbi ń tibha ane. Otîp mbi ó rî ó kpê na Mmon owe. Ejûm jə́t nji ń gorá Obhasi é rî sê, deê mfá-mfá yê, ka okorá-ḿbə́ŋé obhê, a kak ə̂m obhô ta ḿ bá ejen mbâ eyəné.

¹¹Echî aŋ? Ń woma kpe-eji ḿ bá yén ên, ń káre ên fə́ne ekəp nji Obhasi a karê. Tîk é dʉ̂ áfo, ḿbə́ŋé eyəné a kpó son nnyen esonóm.

¹²Nji ń chorá áno é rî sê, ebhú ḿ ba, tîk e kâk atem ḿbə́ŋé ka ḿbə́ŋé nnyi e kíi na Jisos.

¹³Atem-abhon-í-nnyen, deê ń yîm ên ó mə́ŋe sê ń timi ntə̂m etî-etî bəre ḿ bá ejen mbâ eyəné kən ta égyé ń ka fon mbá nnyi n kə́ bha. Ń timá bəre kə́n ḿ bá, ń yîm etûm Obhasi ejámé nono ka étíŋanti ejə́né. Tîk é dʉ̂ áfo, ane á kí ḿbə́ŋé na Jisos Krayis noŋ é fábhe ka nték ajéné etat.

¹⁴A ri etûm ejámé ka etíbhím otîp Obhasi mbâ ane ngun ndə́m, kpe á fábhe mbiŋ na á kâ fâp, kpe á mə́ŋe nwet na á kâ mə́ŋe.

¹⁵Yên ńjə́ne nji é kə́na ə̂m bəre ḿ bá fə́ne ejen mbâ eyəné ka Rom, ḿ bá sə́ré otîp ogyebhá-ḿbə́ŋé mbí.

¹⁶Otîp ogyebhá-ḿbə́ŋé Obhasi ó ká joé ejûm ísonê mbâ amé. Echî aŋ? Otîp mbí nâ ó rî ikom mfi Obhasi á kok a yimá chénchén ane mba á kíi ḿbə́ŋé na yê, á sema, é róghé na ane Jus ta o sî ane nték ajéné.

¹⁷A ri otîp Obhasi mbí nâ ó kí toŋe êt ekpak Obhasi á chəbhá njəm a fik ane a kaghá ka biji se á jóe ka nnyen-i-mbá na yê. É rî a ri ka ekíím ḿbə́ŋé na Obhasi ka eróghá-ndə́p tata o sî ntə̂m. Nwet Obhasi se, “Nne nnyo á ki ḿbə́ŋé na Obhasi, nâ Obhasi a kí ko ekpin ejê se é rî ka nnyen-i-mbá.”

¹⁸Obhasi ósô a kí toŋâ jáé se ḿbə́ŋé a kí yam yê kpe-eji na obhí chénchén mbi ane á yíma, é kpê na ejík nji á bhó karâ yê. Echî aŋ? Obhí mbí ó kí yim ane á kâ mə́ŋe mfoné nchot eye.

¹⁹Obhasi tîk a kpə́re ane ntʉ́ghi mbá. Ka jen? Achot Obhasi mma kə́n ane á mə́ŋe á rî jáé. Obhasi yê ḿfoné nâ a tóŋe jáé. Kən ábho á ká top.

²⁰Ta nji Obhasi a yimî ngun, nne nnyo a nok oyén yê na amə̂t cháŋ. Kən ekpak nji yê a ri, na ikom ifê mfi í rî ka ótúm-ótúm, na ńgyímí eye noŋ Obhasi, í toŋe jáé ka iyîm mbi a yimî. Nâ ńjə́ne Obhasi tîk á bhó ri ane abhí nsôn.

²¹Ane mbá á məŋe Obhasi kən á ten yê ekarám ejík nji a bhighî efonóm. Kpe ekûp-ékûp á bhó karé yê. Á maghe á chəbhe á kera noŋ onyam. Ḿbə́ŋé ábho a kə̂t jabha-jabha noŋ ejírim nâ é gbóe ka eji.

²²Á sə́ra sê ábho á fon aron, kən a ri ánə́mé ane.

²³Ka énə́mé ábho, á maghe ejík ekarám mbâ Obhasi nnyo a kí fon ekpin ka ótúm-ótúm, á chəbhe á jigha a ri ajom. Etʉ̂ ajom á tʉ́ri noŋ nne, etʉ̂ noŋ nnón na onyam na onyô.

²⁴Ka eji ane ngun á ki biji ábho nâ onyam, Obhasi eróŋ a kpére a mághe ábho se á yîm kpe bhaghé obhí mbi á kére ka ḿbə́ŋé. Se á yîm achot akôp na atem.

²⁵Á maghe mfoné nchot Obhasi, á top achot áfúbhí. Á chəbhe á jigha iyîm mbi Obhasi a yimî, á maghe ejíghím Obhasi yê ḿfoné nnyo a bhighî ábho ejík ekarám ka ótúm-ótúm. Áno.

²⁶Ka eji ane ngun á mághe Obhasi ábho ekébhém ka ochî, Obhasi a mághe ábho se á yîm ńtúm mmi-mmi á wóme eyimím. Ńtúm noŋ sê ane-akáé á mághe enuŋúm na ane-arûm á gyê achot abhí etat eyimím na biji ábho.

²⁷Ka ekpak njí jə́t, ane-arûm á maghe na ane-akáé enuŋúm, á chəbhe á tobha atem ta é fubha ábho ofúp. Ntem-nne-ndûm na ntem á yîm iyîm ísonê mbí, Obhasi a kí kpəré ábho fə́ne ka okpəra-ejûm mbi ó bhíghi obhí ábho.

²⁸Ka ekpeém áfo, Obhasi a mághe ábho na íkíkéré ibhí se deê á yîm iyîm mbi í ká bhik, ka á ká kere sê Obhasi eməŋə́m a ri ejûm.

²⁹Nâ ńjə́ne oya ábho ó sui kpúk na nchəme obhí noŋ amoe mma se ḿ gbô efaŋ, ekpatə́m í ndibhí na ntem-nne, ekíím ntem-nne amə̂t ka biji, oyúá-nne, okpóŋe na eriri na óríghi.

³⁰Ane mbá nâ á bhíbha obhiŋ atem, á bhaná Obhasi, á yíma nnyo, á kamá ńkamê. Ntit etat á ká fon é ká chiŋi ekpak á kí yim obhí, á bhó jighi ásé.

³¹Echî é bhó yup ane mbá kpe ka ejûm jə́t. Á yóŋa achot ka nnyo. Á bhó toŋe onobhá-eji, na kpe á fôn nsôn na ntem-nne.

³²A ri ane mbá á məŋe sê ebhín Obhasi é rî se ane mba á yim ekpak ekpin njí, á bhíghi ekpóóm, kən á rî á yimá ńjə́ne. Nji é bhíbhi mân é chîŋ a ri nji á chóa atem á tóp erû ábho.