Read ejagham Ane rom, echî 10 Bible Online

Ane rom, echî 10 - ejagham bible

Ane rom, echî 10

¹Atem-abhon-í-nnyen, ka ndə́p-i-ḿbə́ŋé amé, ń woma kə́n bəre Obhasi a yim ane Isrel abhámé á sém ka oyámá-ḿbə́ŋé obhê. N kí goré Obhasi ka obhô mbí kpe-eji.

²Kə́n n gyími ntî-isê n chôt bəre ḿbə́ŋé nnyi ane abhámé á fóne sê á tóp Obhasi, a sôn kpe-eji. Kən á ká tʉrí oməŋé ekpak eyimím.

³Á ka məŋé noŋ Obhasi á kok ekpin í nne se é rî ka nnyen-i-mbá. Á ká karé fə́ne biji se Obhasi a tóŋé ábho mbá. Á kí top mân a ri íkíkéré ábho sê á nôk Obhasi a kó ekpin ábho se é rî ka nnyen-i-mbá.

⁴Kən Jisos Krayis a bhâ jéghe nji ebhín é wóme, ikom ebhín í man. Ka obhô mbí, kpe énê nnyo á ki ḿbə́ŋé na yê, Obhasi a kí ko ekpin í nne ányo se é rî ka nnyen-i-mbá.

⁵Ka nchot se nne a fôn ekpin ka nnyen-i-mbá, Mosis a séŋe a kpê na ebhín efiím se, “Nne nnyo á yimá chénchén nji ebhín é wóme, á foná ekpin fə́ne na ńjə́ne.”

⁶Kən ka nchot se Obhasi a kí ko se ekpin í nne é rî ka nnyen-i-mbá, nne a ri a kí ḿbə́ŋé na Jisos Krayis. Á séŋe sê, “O kâ bhə̂p ka ḿbə́ŋé eya se, ‘Énê nâ tîk a jak ka ósô?’ ” Se a jí ko Jisos Krayis, a bhət a bhá.

⁷Sê “O kâ bhə̂p fə́ne se, ‘Énê nâ tîk a jak ka eték akə́bha-nsi?’ ” Se a jí sʉk Jisos Krayis a bhá.[2]

⁸Nji é rî ka etím a ri sê, “Otîp Obhasi ó ká rap mbá na we, ó rî ka nnyo imâ na ḿbə́ŋé eya.” Otîp mbí a ri ḿbə́ŋé ekíím na Jisos. E sə́re ên nná sê,

⁹ó səre ka nnyo imâ se Jisos nâ a ri Ntûfâm, o kâm ka ḿbə́ŋé eya se Obhasi a yim yê a nyəmé ka ekʉ̂, Obhasi tîk a yîm wâ o sêm.

¹⁰Echî aŋ? O kí ki ḿbə́ŋé na Jisos kən Obhasi a kô se ekpin ejâ é rî ka nnyen-i-mbá. É kí dʉ fə́ne ka esə́rə́m njí ka nnyo imâ kən Obhasi a yîm wâ o sêm.

¹¹Obhasi a sə́re ka nwet eye se, “Kpe énê nnyo á ki ḿbə́ŋé na yê, tîk á bhó to se, ‘A tok ə̂m eé.’ ”

¹²Ka nan? Ka nchot nnyí, ane Jus na ajéné chénchén á rî ekan. Obhasi a ri Ntûfâm ane chénchén. A kí karé enare joók mbâ ane chénchén mba á góra yê.

¹³Ka ekpak nji yê a chorê ka nwet eye se, “Kpe énê nnyo á goré Ńtâ Obhasi, tîk á yîm yê a sêm.”

¹⁴Kən tîk nne a yîm nan a góre Obhasi nji á ka kí ḿbə́ŋé na yê. Nne a kí yim nan a kí fə́ne ḿbə́ŋé nji á bhó yuk otîp obhê. Nne a kí yim nan a yúk otîp obhê nji á ká səre yê.

¹⁵Á kí yim nan fə́ne á sə́ré otîp í nchane nji á ká tum ane á jí sə́ré. Á séŋe ka nwet Obhasi sê, “Ane á kí fon ekpatə́m ogyebhá-ḿbə́ŋé á kpê na ane mba á bháe ábho na otîp ogyebhá-ḿbə́ŋé Obhasi.”

¹⁶Kən chénchén ane asík mba á yúghi otîp mbí nâ á fóne ebhú na ḿbə́ne. Ka ekpak nji Asaya a séŋe se, “Ńtâ Obhasi, ane ábhík nâ á yuk okpígha-ejûm obhə́ré á kam na ḿbə́ne?”

¹⁷Nâ é rî sê kən nne a kí ḿbə́ŋé na Jisos Krayis, a râŋ mbá a yûk otîp obhê. Nne a kí yuk otîp mbí nji á səre yê ḿbə́ne.

¹⁸Deê ḿ bə́p ên kpá ebhə̂p. É rî ka etʉri sê á ká yuk otîp Obhasi a? Nne nnyo a rô yúk cháŋ. Á séŋe ka nwet Obhasi sê, “Okpígha-ejûm ábho ó jen ó jabhe ngun ndə́m. Ayum í nchot ábho á si ntə̂m i ngun.”

¹⁹Ḿ kpó bhəp ebhə̂p jə́t. Nâ-ngá nji ane Isrel á yúghi otîp mbí, ó ká jáé ábho a? Ó jáe ábho, ka Mosis se Obhasi a toê se, “Tîk n yîm ên o kî ên amə̂t na nték etat nnyi ó kebha ên sê á ká fap kpe ejûm. Tîk n yîm ên o fôn ên oyámá-ḿbə́ŋé na nték etat nnyi kpe ejûm á ká məŋé.”

²⁰Ka ofaŋá-ḿbə́ŋé mbi ó chiŋi ochíŋ, Asaya a sêŋ fə́ne se Obhasi a toê se, “Mba kpe enóróm á ká not ə̂m, á məŋe ə̂m. Ḿ fap ka ochî ane mba kpe ebhə́bhə́m á bhó bhəp sê á yén ə̂m.”

²¹Kən a sêŋ a kpê na ane Isrel se Obhasi a toê se, “Ń kət n nyoghá biji bəre é jóe ka ekone na ane mba á bhó yuk ə̂m, kən á gyíma a ri ngyím i nchot na mme.”