Read ejagham Ane rom, echî 11 Bible Online

Ane rom, echî 11 - ejagham bible

Ane rom, echî 11

¹Deê ḿ kpó bhəp ebhə̂p. Nâ-ngá Obhasi a táŋe ane Isrel abhê bhúghí-bhúghí a? Kpák! Obhasi á ka taŋé. Mme ḿfoné a ri nne Isrel. Mme a ri eyábhé-mmon Abraham. N dʉ ka ndə́p-i-njû Benjamen.

²Obhasi á ka taŋé ane abhê mba yê a sáŋe ta ebhú áji. To o nyə́ne o tirá ên ejûm nji á séŋe ka nwet Obhasi á kpê na Erayija? Nâ ebhú Erayija a kí səre Obhasi achot mma ane Isrel á yíma.

³Erayija a sə́re Obhasi se, “Ńtâ Obhasi, ane mbá á yui akará-otîp abhâ, á bhibhi eji nji é jená e jíghá wâ. Ń kət mme átíŋ, á kí wom fə́ne á yúí ə̂m.”

⁴Nji Erayija a sə́re Obhasi nchot nnyí, Obhasi a táme yê se jen? Obhasi a sə́re yê se, “Ń ki ane-arûm ntem-esam ntə̂m-ntə̂m ekû na ábháe na ejûm (7,000) bəre nâ ane abhámé. Ane mbá nâ mba á ká təm arúŋ ebhú áji á káre njom nnyi á kamá se Bal.”

⁵Kpe égyé, ekpak ejûm í nchane jə́t é fap. Mməghe-ane Isrel a kə̂t mba Obhasi a sáŋe ka onobhá-eji obhê.

⁶Esáŋám nji Obhasi a sáŋe ábho, é dʉ̂ ka onobhá-eji. Etûm eno asík nji á yími, ka Obhasi á to se yê a sáŋ a kéré etûm eno, onobhá-eji obhê ó ro kpó fap echî.

⁷Nji é rî mân ka etím a ri se, ekpin ka nnyen-i-mbá nji ane Isrel á wóma, etî-etî á ká fon, kən mkpât mba Obhasi a sáŋe a fôn. Mba ngá chénchén á gbo atáná-amə̂t ka achot Obhasi.

⁸Á séŋe ka nwet Obhasi á kpê na mba á ká fon nná sê, “Obhasi a káre ábho ojan ka achot amê, amə̂t ábho á yáŋa oyaŋé, á chəbhe á kúa atûŋ. Ane mbá á nyə́ne ekpak jə́t ta é si égyé.”

⁹Debhit fə́ne a chorê se, “Deê achot erom mma ábho á ki ḿbə́ŋé sê á faŋ á chiŋ, á jóe noŋ ntám nnyi a kí yim ábho á gbô, Obhasi a kpəré ábho.

¹⁰Deê amə̂t á kə́t á yaŋá ábho oyaŋé. Deê oseŋe ó yîm ábho á kə́t goóŋ noŋ ane á kə́ne ekpatə́m echóé.”

¹¹Deê ḿ bə́p mân bəre nji ane Jus á kóbhe nná á gbo, nâ-ngá kpe ónyáŋe kpó cháŋ na ábho a? Kpák! Á ká gbo ekpak áji. Ogbo ábho ó yim ane nték ajéné á sem. Esémém ábho njí é yim ane Jus á kí ki ábho amə̂t ta á woma eyóŋóm erû.

¹²Kére ên se, ájoé nji ane Jus á yími obhí é tân ábho, Obhasi a káre onono mbâ ane nték ajéné, kən ebhú mân sê ane Jus á yoŋe ekpin bhúghí-bhúghí, onono Obhasi ó bhó chiŋi obhô a?

¹³Ên, ane mba á rî ane nték ajéné, deê ń sə́ré ên bəre mme a ri ḿgbán nnyo Obhasi a túmi se ḿ bá yîm etûm mbâ eyəné. N kí kep etûm ejámé njí bəre ekpatə́m ejûm eyúp.

¹⁴Íkíkéré í rî ə̂m bəre etʉ̂ ane ka eték ejámé tîk á kî amə̂t á kâm na nchot Obhasi.

¹⁵Ájoé etaŋám nji Obhasi a taŋê ábho é yim Obhasi a fôn ekone na ane ngun, ó məŋe ên mân nji é kí fap ebhú Obhasi á chəbhé njəm a bhîŋ ábho á gyê yê ka biji a? Nji é kí fap, áfo nâ nne a kpô kən a chə́bhe njəm ka ekpin.

¹⁶Kən nne a dí édî, ájoé á ko nji ndaŋa-mbá a káre mbâ Obhasi, nâ a káre Obhasi édî njí ndə́m. Ekan-ékân fə́ne noŋ é kó étí. Ó gbut arʉk o káre mbâ Obhasi, nâ ó kare yê arâp eróŋ.

¹⁷Ên ane nték ajéné, o ri ên noŋ arâp mma á dʉ̂ ka étí órif nji é kúa ka etə́m, kpe nne nnyo a bheê cháŋ. Á gbut arâp étí órif nji nne a bheê obhe, á yighi, á ko arâp mma étí nji nne á ka bhe, á to. Mfá-mfá ó chəm ên o kí di ên onono mbi ó dʉ̂ ka étí nji nne a bheê obhe. Étí njí é rî nâ enare nji Obhasi a karê ane Jus.

¹⁸O kâ yûŋ ên mân afâŋ sê ó chiŋi ên arâp mma á yíghi oyighí. Echî aŋ? Arâp asík nâ á fíi arʉk, kən arʉk nâ á fíi arâp.

¹⁹Ebhú tat tîk o tô ên sê á gbúri arâp áma á yíghi sê á kó ên á tó.

²⁰Ka etʉri, á gbúri ábho á yíghi, ka á ká ki ḿbə́ŋé na Obhasi. Ên ó ki ḿbə́ŋé na yê, nâ ńjə́ne o ri ên áno ka eji ábho. O ri ên nji ó foná ên efup ka ntʉ́ghi nchot nnyí. Ó ka bhik ên biji eyuŋúm.

²¹Echî aŋ? Ka eji Obhasi a gbût ane Jus mba á rî mfoné arâp átí amê a yíghi, deê ó mə́ŋe ên mân sê ó ka kpó ki ên ḿbə́ŋé na yê, Obhasi a kí gbut ên eróŋ a yíghi.

²²Deê ó mə́ŋe ên mân sê ebhú etat Obhasi a kí toŋe onobhá-eji. Kən ebhú etat, nsôn cháŋ. Obhasi á bhó toŋe nsôn mbâ ane mba á gbo. Kən a kí toŋe onobhá-eji mbâ eyəné ájoé ó kət ên o tóbhá okot obhê. Kən se ó ka yim ên ka ekpak njí, tîk á gbût ên eróŋ á yíghi.

²³Ane Jus fə́ne, sê á maghe obhí ábho á ki ḿbə́ŋé na Obhasi, tîk a chə́bhe njəm á fê ábho ka eji a yíghi ábho. Obhasi a bhîk ábho eféém ka eji njí.

²⁴Ka nan? Ên ane nték ajéné, o ri ên noŋ arâp étí órif nji é kúa ka etə́m, kpe nne nnyo a bheê cháŋ. Á gbût á bhâ tô mân ka étí órif nji á bhêk obhe. Ên ane nték ajéné, mfoné étí njí ejə́né asík. Ane Jus nâ á rî afoné étí njí nji á bhée obhe. É ká yuŋí Obhasi a gbút ên ka etə́m a bhá to ên ka étí njí. Nâ məŋê ên mân sê a ri mô ejûm mbâ eye ka eféém arâp í mfoné étí njí ka eji a gbúri ḿmáne.

²⁵Atem-abhon-í-nnyen, ejûm é rî ágo ka etím achot mmá fép. N kí wom bəre ó ríŋi ên, o kâ kére ên áfo sê ó məŋe ên ó chiŋi abhô. Ejûm í nchane é rî sê okúá-atûŋ mbi etʉ̂ ane Isrel ka achot Obhasi, ó bhó kət áno. Tîk ó mân ebhú ekam ane nték ajéné nji é kíi ḿbə́ŋé na Obhasi é bhik.

²⁶Ebhú ekam ane nték ajéné njí é bhik, Obhasi tîk a yîm mân ane Isrel chénchén á sêm fə́ne. É rî ka ekpak nji á séŋe sê, “Nne nnyo a kí yim ane á sém, tîk a dʉ nnyi Sayon a bhák. Ebhú á bha, tîk a yíghi obhí biyábhé-abhon í Jakop.

²⁷Obhasi a toê se, ‘Ńgyê ńgyímí nnyi n kí fon na ábho ebhú ń yighí obhí ábho.’ ”

²⁸Nji ane Jus á táŋe otîp ogyebhá-ḿbə́ŋé Obhasi á chə́bhe ane-ebhan abhê, ên ane nték ajéné, ofa ó gbô ó káre ên. Kən ka eji á rî ane mba Obhasi a sáŋe, á nyə́ne ane okot abhê ka obhô ásé ábho éməné.

²⁹Echî é rî sê, Obhasi á bhó yoŋe ḿbə́ŋé eye nji á saŋ nne a chími onono.

³⁰Ebhú áji, ên ó bhó yuk nchot Obhasi. Kən mfá-mfá, Obhasi a rî ên nsôn, ka ane Jus á ká yuk yê.

³¹Ka ekpak njí fə́ne, ka obhô nsôn nnyi Obhasi a rî ên, ane Jus á bhó yuk Obhasi. Tîk Obhasi a rî fə́ne ábho nsôn.

³²Echî é rî sê, Obhasi a kâm se kpe énê a kə́t ka okúá-atûŋ, yê a ri chénchén ane nsôn.

³³Ekpatə́m onono jen mbi Obhasi a yimî a káre êt! Aron amê á son á chiŋ. Oməŋa-ejûm obhê ó fon arʉk. Énê kə́n a bhîk esə́rə́m ekpak Obhasi a kí ko eye ńgyímí ka achot? Énê nnyo kə́n a mə́ŋe ekpak nji Obhasi á yimá iyîm ibhê?

³⁴Noŋ ekpak nji á séŋe sê, “Énê nnyo a məŋê ḿbə́ŋé Ńtâ Obhasi? Énê nnyo kə́n a bhîk yê etí etáám?

³⁵Énê nnyo a nôk okaré yê kpe ejûm jə́t, kən se Obhasi a fé?”

³⁶Echî aŋ? Yê nâ a yimî iyîm í ngun chénchén. Yê á kará ekpin mbâ chénchén iyîm. Iyîm mbí fə́ne í kpína í kará yê. Deê ejík é jóe é káre Obhasi ka ótúm-ótúm. Áno.