Read ejagham Ane rom, echî 15 Bible Online

Ane rom, echî 15 - ejagham bible

Ane rom, echî 15

¹Êt mba ḿbə́ŋé nnyi e kíi na Obhasi ta a sôn, e ri é nyáŋé mba ḿbə́ŋé ábho a nyə́ne á ka son ka oseŋe ábho mbí. Deê e kâ jóe e kérá a ri biji ibhə́ré ḿbə́ne-mbənê.

²Kən deê nne owəré kpe nnyón a yim ejûm nji é kí gyebhé ntem-mmon-i-nnyen ka ḿbə́ŋé, a nyáŋé yê a son ka nchot Obhasi.

³Ebhú Jisos Krayis a bháe, á ka kéré biji ibhê. Kən ka ekpak á séŋe ebhú áji á kpê na yê sê, “Atû chénchén mma ane á túi Obhasi, á chəbhe amámé mfá-mfá.”

⁴Á séŋe chénchén achot ta ka éməné, á kâk ka nwet Obhasi á kpí êt sê e kâ fôn efup sê Obhasi á bhó yim nji a toê. Echî aŋ? Achot amê á kí yimâ êt e kə́bhá ḿbə́ŋé, á kará êt fə́ne ikom.

⁵Deê Obhasi nnyo á kará ḿbə́ŋé ekə́bhə́m na ikom a nyáŋé ên ó fôn ên ḿbə́ŋé yə́t na atem ka ekpin ejə́né na Jisos Krayis.

⁶Ka ekpak njí, tîk o chə̂m ên eyum jə́t o káre ên nkat mbâ Obhasi nnyo a ri Ńsé Ntûfâm owəré Jisos Krayis.

⁷Kô ên mân atem noŋ Jisos Krayis a kóe ên kən ekûp na ejík é jóe é káre Obhasi.

⁸Məŋê ên sê, Jisos Krayis a bháe a bhá chəbhé noŋ ḿgbán ane Jus ka etóŋóm se, Obhasi á chimí ejûm a káre nne, a kí yim ńjə́ne. A bháe otóŋé mân se nji Obhasi a chimî a káre ane Jus ka ane-atəm, a yîm ńjə́ne ka etʉri.

⁹A bháe fə́ne a bhá yim ane nték ajéné á káre nkat mbâ Obhasi ka nsôn nnyi yê á rik nne. Ka ekpak nji á séŋe sê, “Ńtâ Obhasi, ka obhô mbí, tîk n káre wâ ekûp na ejík ka nték ajéné. Tîk n kôn mbiŋ eya ka nkôn.”

¹⁰Á séŋe fə́ne sê, “Ane nték ajéné, chəm ên na ane mba Obhasi a sáŋe, gyebhê ên ḿbə́ŋé.”

¹¹Á kpô séŋ sê, “Deê chénchén ane nték ajéné á káre ekûp na ejík mbâ Ńtâ Obhasi. Deê ngun á kón ekûp na ejík á káre yê.”

¹²Asaya fə́ne a chorê se, “Eyábhé-mmon í Jesi tîk a bhák, tîk a kúi a chə́bhe Ntûfâm ane nték ajéné. Ábho tîk á kî ḿbə́ŋé na yê.”

¹³Nji o kíi ên ḿbə́ŋé na Obhasi, deê a karé ên chénchén ogyebhá-ḿbə́ŋé na enare í sui. Yê nâ a yimî êt e kébhá mbá-ochî sê tîk e fôn ekpin. Ka ekpak njí, e kí kep mbá-ochî e kúá e jak ochî ka ikom Obhasi Ebhare Ntʉgantʉ.

¹⁴Atem-abhon-í-nnyen, mme ḿfoné ń kam ka etʉri bəre íkíkéré ḿbə́ŋé ifə́né í rî nono. Ó məŋe ên achot ó jeghe ên nji kə́n o kpî ên atem.

¹⁵Kən ka nwet amé nnyí, ń seŋ ń ka fup kpe ejûm é kpê na achot mma tat mma ń tirá ên. Ń son ḿbə́ŋé ányi ń seŋ ka obhô ńgyímí etûm nnyi Obhasi a karê ə̂m.

¹⁶Obhasi a sáŋe ə̂m noŋ nkara-agore nnyo Jisos Krayis. N di ń yîm fə́ne etûm nkara-agore njí, ḿ bá na otîp ogyebhá-ḿbə́ŋé Obhasi mbâ ane nték ajéné. Obhasi Ebhare Ntʉgantʉ tîk a sû mân ábho, akôp á kâ fôn. Tîk á bhîk mân mba Obhasi a kí gyebhe ḿbə́ŋé na ábho.

¹⁷Ka ochəma-biji obhámé na Jisos Krayis, ń kere mân bəre ḿ fon echî nji kə́n n yîm nkat ka etûm Obhasi nji n yimî.

¹⁸Ḿ fon osoná-ḿbə́ŋé ta ń chot kən é ká chiŋi ka ejûm nji Jisos Krayis yê ḿfoné a kóe ə̂m a yîm se ane nték ajéné á tóp Obhasi. A yimî nná ka eyum í nnyo ejámé na oyima-ejûm obhámé

¹⁹na ntûm okpógha-biji, é kpê na ikom Obhasi Ebhare Ntʉgantʉ. Nâ ńjə́ne é róghé ta ka Jerusarem, ta é sî nték Irikum, ń jen ń səre otîp ogyebhá-ḿbə́ŋé mbi ó kpée na Jisos Krayis, ń jeghe ojeghé.

²⁰Ka ejen ejámé fép m fonê ka ḿbə́ŋé bəre ń sə́ré otîp mbí ka ngûm nnyi ane á nyə́ne á ká məŋé Jisos Krayis. Echî é rî sê ń ka wóm ń jî ochî na etûm nji ane etat á roghe.

²¹Ń yimá áno ka ekpak nji á séŋe se, “Ane mba á ká nok osə́ré ábho ekpak í nne nnyo yê a ri, tîk amə̂t á rə́bhe ábho. Mba á ká nok oyúk kpe ejûm é kpê na yê, tîk á mə́ŋe nne nnyo yê a ri.”

²²Etûm ejámé na ane nték ajéné ka ebhat njí nâ é gbʉ́i ə̂m áno ntə̂m etî-etî ń ka bhá ejen ágo.

²³Kən m foná ofon ḿbə́ŋé ányi nyâ ka nyâ bəre ḿ bá. Ka eji ń ka kpó fon etûm eyimím ka ebhát njí,

²⁴n kí kere bəre nji n kí ji nnyi Speyin, tîk n yáre ń té ń ká áfo na ên, m fôn ogyebhá-ḿbə́ŋé ó táné ên ajaré ejen amámé.

²⁵Kən mfá-mfá, tîk n jak kpá ń jí nyáŋé ane Obhasi ka Jerusarem na ekəp í ntí.

²⁶Ekəp njí, a ri ane Masedoniya na Akaya nâ á kére na okot ábho sê á túm mbâ atem-abhon-í-nnyen ka Jerusarem mba á rî ka eket.

²⁷Ábho nâ á kóre ekəp njí etúmúm. Kən kpe é rô joé ka okorá-ḿbə́ŋé, ane nték ajéné á fóne ka enyáŋám ane Jus ka iyîm í ngun. Echî aŋ? A ri ka obhô ane Jus nâ ane nték ajéné á kí fon nkiri ekəp Obhasi.

²⁸Ebhú ḿ man achot ka Jerusarem, n káre chénchén ntí mmi á tə́bhe á tûm ábho, n kí maghé mân ń jî nnyi Speyin. Nâ ebhú nji n kí si ên ágo.

²⁹Ḿ məŋe bəre ebhú n kə́ bha, tîk m bák ên na ekpatə́m enare nji Jisos Krayis.

³⁰Atem-abhon-í-nnyen, ń ko mbiŋ i Ntûfâm owəré Jisos Krayis na okot Obhasi Ebhare Ntʉgantʉ ń gore ên bəre ó chə̂m ə̂m é góre Obhasi na ḿbə́ŋé-a-ḿbə́ŋé ka obhô obhámé.

³¹Deê ó góre ên Obhasi sê a nyáŋé ə̂m, ane mba á ká ki ḿbə́ŋé na Jisos á kâ káre ə̂m oseŋe ka eték í Judiya. Gorê ên fə́ne sê deê ane Obhasi ka Jerusarem á tábhe ekəp ábho, abhô ábháe.

³²Ájoé Obhasi a kâm mân, tîk m fôn ekpatə́m ogyebhá-ḿbə́ŋé ka ebhú ḿ ba oyoá-biji obhámé mbâ eyəné ágo.

³³Deê Obhasi nnyo á kará enare a joé na ên chénchén. Áno.