Read ejagham Ane rom, echî 3 Bible Online

Ane rom, echî 3 - ejagham bible

Ane rom, echî 3

¹Ka ejoóm nne Jus, nne a fôn mân bhaghé ekəp nji ane mba tat á ká fon? Nkîm nnyi ane Jus á kíma nná, a fonê bhaghé orʉrí kpá títí?

²Ekpatə́m ekəp é rî. Etî-etî orʉrí ó rî. Ejûm nji é fáŋe ofaŋ é rî sê, Obhasi a mághe mfoné otîp obhê ka obhô ábho.

³Kən é jóe sê etʉ̂ ane Jus á yóŋe ḿbə́ŋé nnyi á kíi na Obhasi aŋ, kə́n Obhasi a yóŋe ḿbə́ŋé eye a?

⁴Bhúghí-bhúghí! Obhasi á bhó yoŋe ḿbə́ŋé eye. Kpe ngun ndə́m á chə́bhe ane áfúbhí, Obhasi á bhó yoŋe nji a chimî se yê a kí yim. É rî ka ekpak nji á séŋe á kpê na Obhasi sê, “Kpe bhaghé ejûm nji o chorê, é kí joé fə́ne ka etʉri. Kə́n kpe á kághe wâ ka esup, esup áji é bhó gbo wâ.”

⁵Nne kə́n a tô se, “Kən ájoé obhí obhə́ré ó kí toŋe ekpak Obhasi á yimá iyîm ka nnyen-i-mbá, kə́n e chôt mân sê jen? Sê Obhasi á ka fon ebhíbhím nne nnyo a yimî obhí a?” Ḿfa nâ íkíkéré ngun.

⁶Áno asík, ka é joé ka ekpak njí, Obhasi á ka bhik etáŋám ngun ndə́m.

⁷Nne kə́n a tô mân se, “Ka eji obhí obhámé ó kí toŋe ekpak Obhasi á yimá iyîm ka nnyen-i-mbá, ó kará yê ejík, Obhasi á ka fon ə̂m ebhíbhím se ń yim obhí.”

⁸Nâ é rî ekan-ékân etoóm se, “Deê nne a yim obhí kən ono ó tóp.” Ka etʉri, etʉ̂ ane á kí bhibhâ mbiŋ amé sê mme nâ ń səra ane ntʉ́ghi nchot nnyí. Obhasi a ri a bhíbhí ntʉ́ghi ane mbá ka ekpak a fonê ábho ebhíbhím.

⁹Nâ-ngá êt ane Jus mân kə́n e tô sê e ri nono ka ochî Obhasi e chíŋi ajéné a? Áfúbhí! Ka ekpak nji ń daŋ mbá ń chot bəre chénchén ane, kpe ó jóe Jus, kpe ó jóe njéné, o ri ka ńgyímí obhí eyimím.

¹⁰Á séŋe sê, “Nne kpe yót cháŋ nnyo á ka yim obhí bhúghí-bhúghí.

¹¹Kpe nne yót cháŋ fə́ne nnyo a tʉ́ri oməŋé achot Obhasi, a kí nok se yê a tóp Obhasi.

¹²Chénchén ane á chəp njəm á kare Obhasi, á kət chichi ane. Kpe nne nno cháŋ ka nsi nnyí, kpe yót cháŋ.

¹³Achot mma á fábha nne ka nnyo á rî noŋ egyʉ nji é kí fap ka oyəm í nkə́bha-nsi mbi á maghe fóŋ. Ó koŋ erə́bhe-nchot í nne, o tân mbá. Nchot i mbí nnyi á fabha nne ka nnyo, a bhíbhi noŋ nyui-nkə́m.

¹⁴Nji é fábha nne ka nnyo, é ká chiŋi ekpatə́m atû na ekpatə́m oyámá-ḿbə́ŋé.

¹⁵Oyúa-nne áfo na nne a ri ache.

¹⁶Kpe nne a jiî fan, a kə́ bha yê na oseŋe na ógbó.

¹⁷Á ká məŋé okumí ka ekone na ntem-nne.

¹⁸Á bhó fup Obhasi kpe mkpât.”

¹⁹É məŋe sê chénchén nji á séŋe nná ka ebhín Obhasi, é fíi é káre mbâ ane mba á fóne ńjə́ne. Nne á bhó kpo fon mân nnyo mmi a kí taŋ biji. É fap sê chénchén ane ka ngun nnyí, Obhasi tîk a tâŋ ábho.

²⁰Nâ mân nne kpe yót cháŋ nnyo Obhasi a kí ko se a fôn ekpin ka nnyen-i-mbá nji nne á fi ebhín ńjə́ne-njənê. Obhasi a karê ebhín ejê se a nyáŋé nne a məŋé obhí mbi a yimî.

²¹A ri mfá-mfá Obhasi a tóŋe ane mbá jáé nnyi á kí chiŋ kən a kó ekpin ábho se é rî ka nnyen-i-mbá. É ká joé ka ebhín efiím. Ebhín Obhasi na akará-otîp Obhasi á gyimi atî-isê mbá nnyí.

²²Mbá nchane a ri ḿbə́ŋé ekíím na Jisos Krayis. Obhasi a kí ko chénchén ane mba á kíi ḿbə́ŋé na Jisos Krayis se á fon ekpin ka nnyen-i-mbá. A kí ko á bhó kep nne ka ochî.

²³Echî aŋ? Ngun ndə́m á yim obhí, á ká kpo bhik efonóm ejík ka ochî Obhasi.

²⁴Kən Obhasi a tóŋe ngun onobhá-eji obhê, kpe ejûm á ka bhə́p. Na onobhá-eji obhê, a kí ko ane se á fon ekpin ka nnyen-i-mbá. Á yimá njí ka obhô Jisos Krayis nnyo á yimá êt e sémá.

²⁵Obhasi a káre Jisos Krayis se, ka obhô agyʉ́ŋ ekʉ̂ Jisos, yê tîk a rî nne nsôn a sû obhí obhê. É kí dʉ ka ḿbə́ŋé nnyi nne a kíi na Jisos Krayis. Obhasi a yimî njí a tóŋé se yê a fôn ekpin ka nnyen-i-mbá. Éməné, Obhasi a kí kəp ḿbə́ŋé, a janá obhí ane.

²⁶Kən mfá-mfá, a kí toŋe se yê á yimá iyîm ka nnyen-i-mbá. A kí toŋe fə́ne se yê a kí ko kpe énê nnyo a kíi ḿbə́ŋé na Jisos se a fôn ekpin ka nnyen-i-mbá.

²⁷Kpe ejûm etat cháŋ mân nji nne a kí sum obhô ngaŋ. Echî é rî sê, Obhasi a kóe nne se a fôn ekpin ka nnyen-i-mbá, cháŋ ka ebhín ekíím. É dʉ̂ ka ḿbə́ŋé nnyi nne a kíi na Jisos Krayis.

²⁸É məŋe sê Obhasi a kí ko se nne a fôn ekpin ka nnyen-i-mbá, cháŋ ka eyimím iyîm mbi ebhín é fíi, kən a ri ka obhô ḿbə́ŋé ekíím na Jisos Krayis.

²⁹Obhasi á ka joé a káre ane Jus átíŋ, a ri Obhasi ane nték ajéné eróŋ,

³⁰ka Obhasi a ri yót. Ájoé ane Jus na erû nkîm ábho á ki ḿbə́ŋé na Jisos Krayis, Obhasi a kí ko ekpin ábho se é rî ka nnyen-i-mbá. Ane nték ajéné fə́ne, kpe á ká fon erû njí, á kî ḿbə́ŋé, Obhasi a kí ko ábho ekan-ékân.

³¹É ka to sê ḿbə́ŋé ekíím a yîm ebhín Obhasi é kət chichi ejûm. Áno asík. Ḿbə́ŋé ekíím a kí jeghé ebhín njí ojeghé.