Read ejagham Ane rom, echî 4 Bible Online

Ane rom, echî 4 - ejagham bible

Ane rom, echî 4

¹É ko ên kpá Abraham, ńsé owəré éməné nnyo ndə́p-i-njû eyəré ane Jus. Bhaghé ejûm é fábhe na yê?

²Ebhú sê Obhasi a kóe yê se a fôn ekpin ka nnyen-i-mbá, a tʉ̂ yê a kâk ka biji, ka ono mbi Abraham a yimî, kə́n Abraham a sûm obhô ngaŋ. Kən á ka bhik esúmúm ka ochî Obhasi.

³Echî aŋ? Nwet Obhasi a sə́re se Abraham a kíi ḿbə́ŋé na yê. Ka ḿbə́ŋé nnyí, Obhasi fə́ne se ekpin Abraham é rî ka nnyen-i-mbá.

⁴Nne nnyo a kí yim etûm mbâ nne, kpe bhaghé ntí mmi á kí karé yê, á bhó kep se ekəp. A kí kep se a ri nyúbhí eye.

⁵Kən ebhú nne á gyiní se yê a yîm etûm eno, a yûŋ ḿbə́ŋé a kî na Obhasi nnyo a kí ri nsôn a sû obhí ane, Obhasi a kí ko ḿbə́ŋé nnyi nne a kíi nná, a sə́re se nne a fôn ekpin ka nnyen-i-mbá.

⁶Debhit a chôt fə́ne nchot nnyí yə́t a kpê na ane mba á fon ogyebhá-ḿbə́ŋé ka Obhasi, a kô ekpin ábho se é rî ka nnyen-i-mbá, á ka kóŋ etûm nji á yími ka nsi nnyí.

⁷Á séŋe sê, “Deê ogyebhá-ḿbə́ŋé ó jóe na ane mba Obhasi a rî nsôn a sû obhí ábho, a rô kpó ki echî ka ḿbə́ne.

⁸Deê ogyebhá-ḿbə́ŋé ó jóe na ane mba Ńtâ Obhasi a jáne obhí ábho.”

⁹Nâ-ngá ogyebhá-ḿbə́ŋé mbi Debhit á chorá nná ó kí joé ó káre a ri ane mba á kími nkîm ḿbáne-mbanê a? Áfúbhí! Ogyebhá-ḿbə́ŋé mbí ó kí joé ó káre ane chénchén kpe á kím nkîm na á kâ kîm. Ta é bhiŋ ka nwet Obhasi é səre ên sê, “Abraham a kíi ḿbə́ŋé na Obhasi. Ka obhô mbí, Obhasi a kô ekpin ejê se é rî ka nnyen-i-mbá.”

¹⁰Nchot Abraham nnyí a fábhe nná ebhú ta a kîm nkîm kən á ka kím? A fábhe ebhú Abraham a nyə́ne á ka kim nkîm.

¹¹Nkîm eye a ri eriŋ nji é tóŋe sê Obhasi a kóe ekpin Abraham se é rî ka nnyen-i-mbá ka ḿbə́ŋé nnyi Abraham a kíi na yê ebhú a nyə́ne á ka kím nkîm. Nâ ńjə́ne Abraham a ri nâ ńsé ane fép mba Obhasi a kóe ekpin ábho se é rî ka nnyen-i-mbá ka ḿbə́ŋé nnyi á kíi na yê, nkîm á ká kim.

¹²Abraham a ri ńsé fə́ne nnyo ane mba á kími nkîm sê á jíghí Obhasi. Á ka joé ńsé ábho ka á kími nkîm. A ri ńsé ábho ka á kíi ḿbə́ŋé noŋ yê ḿfoné nnyo a kíi ḿbə́ŋé na Obhasi kən a bhá kim nkîm.

¹³Obhasi a timî se ngun a kí joé nnyi Abraham na biyábhé-abhon ibhê, é ká dʉ sê ka Abraham a kíi ebhín. É dʉ̂ ka ḿbə́ŋé nnyi a kíi na yê, kən yê fə́ne a kô ekpin Abraham se é rî ka nnyen-i-mbá.

¹⁴Nan? Ájoé ngun a ri sê nnyi ane mba á kíi ebhín átíŋ, ḿbə́ŋé ekíím á ka kpó fon echî. Nji Obhasi a timî fə́ne é ká kpo fap ejûm.

¹⁵Echî aŋ? Ebhín é jéna na akpəre. Ebhín é ro joé, ebhín egboóm fə́ne é bhó joé.

¹⁶Nâ ńjə́ne nji Obhasi a timî, a fî a kî noŋ ekəp onobhá-eji mbâ ane mba á kíi ḿbə́ŋé na yê. Ejûm njí é rî é káre biyábhé-abhon Abraham chénchén, cháŋ sê mba á fóne ebhín í Mosis átíŋ. É rî é káre eróŋ mba a kíi ḿbə́ŋé na Obhasi noŋ Abraham nnyo a ri nâ ńsé owəré chénchén.

¹⁷Ka ekpak nji Obhasi a chorê ka nwet se, “We, Abraham, ń yim ane ka nték i ngun etî-etî á bhîŋ wâ se ńsé ábho.” Abraham a ri ńsé owəré ka ochî Obhasi nnyo yê a kíi ḿbə́ŋé. A ri Obhasi nnyó yót nâ a kí sʉk nne ka ekʉ̂. Yê nâ a kí ko eyum í nnyo ńjə́ne-njənê a chôt, ekpak ejûm nji nne á ka nok oyén, é fâp.

¹⁸Ane etî-etî kə́n á fûp, kən Abraham á ka fon efup kpe ofú bhə́t. A kâm na ḿbə́ŋé-a-ḿbə́ŋé se Obhasi tîk a yîm ejûm nji a chorê. Ka obhô mbí, a bhâ chə́bhe fə́ne ńsé ane ka nték i ngun etî-etî noŋ Obhasi a chimî. Obhasi a chimî yê se, “Abhon-í-njəm abhâ tîk á tî.”[1]

¹⁹Kpe na íkíkéré mfi se, “Na nyâ amé a kə́ bha osí nsam érôn, ń kui ń chiŋ, nkáé omé Sara fə́ne ngá a mân nne-nkáé nnyo a kí kpo fon mmon.” Abraham á ka yighí ḿbə́ŋé a to se nji Obhasi a timî é bhó fap.

²⁰Kən ka eji Obhasi a chimî, Abraham á ka fon efup. Ḿbə́ŋé nnyi a kíi nná, a káre yê ikom, a yimá yê fə́ne a kará ekûp na ejík mbâ Obhasi.

²¹Ḿbə́ŋé á ka rəm Abraham kpe mkpât, kən a kâm se Obhasi a bhîk eyimím nji a chimî.

²²Ntʉ́ghi ḿbə́ŋé nnyí ekíím nâ a yimî áno Obhasi a kô ekpin Abraham se é rî ka nnyen-i-mbá.

²³Nji Obhasi a chorê se, “Ń ko ekpin ejê bəre é rî ka nnyen-i-mbá,” á ka chot mbâ Abraham yê átíŋ.

²⁴A chorê mbâ eyəré eróŋ se yê a kí ko ekpin ejə́ré se é rî ka nnyen-i-mbá. A ri êt mba e kíi ḿbə́ŋé na yê nnyo a yimî Ntûfâm owəré Jisos a nyə́me ka ekʉ̂.

²⁵A ri Jisos nnyo a kpóe ekʉ̂ ka obhô obhí obhə́ré kən Obhasi a yîm yê a chə́bhe njəm ka ekpin se é fôn ekpin ka nnyen-i-mbá.