Read ejagham Ane rom, echî 5 Bible Online

Ane rom, echî 5 - ejagham bible

Ane rom, echî 5

¹É yen sê ḿbə́ŋé nnyi e kíi na Obhasi nâ a yimî yê a kô ekpin ejə́ré se é rî ka nnyen-i-mbá. Mfá-mfá mân e ri ka ekone na yê ka obhô Ntûfâm owəré Jisos Krayis.

²A ri Jisos Krayis nâ a yimî kən e kí joé mfá-mfá ka onobhá-eji na Obhasi, ka e kíi ḿbə́ŋé na yê. É fon ekpatə́m ogyebhá-ḿbə́ŋé mân nji é məŋe sê tîk e fôn nkiri ka ejík Obhasi.

³E kí gyebhé fə́ne ḿbə́ŋé ka oseŋe mbi ó tə́ma êt. Echî aŋ? É məŋe sê oseŋe mbí nâ ó kára êt okə́bhá-ḿbə́ŋé.

⁴Okə́bhá-ḿbə́ŋé mbí ka biji ibhê nâ Obhasi a kóe a gáe êt, a kâm se é bhik. Ekamám Obhasi nâ é káre êt ikom kən é kí fon ḿbə́ŋé sê Obhasi a kí yim nji a chorê.

⁵É ka fon ḿbə́ŋé nnyí ka chichi, ka Obhasi a tóŋe êt okot obhê ó man oman. A ri na Ebhare Ntʉgantʉ nnyo a karê êt nâ a kóe a tóŋe êt okot mbí.

⁶Ebhú nji êt ka ayimá-obhí e ri mbá ónyáŋe é ka fon, nji ebhú Obhasi é bhíghi, a yîm Jisos Krayis a kpô ka echî ejə́ré.

⁷Kpe ntem á kik ebhín, kən nne a kam a kpó ekʉ̂ ka echî ejê, a ri ejûm eyúŋi kpe-eji. A ri kə́n o fôn etʉ̂ ane mba kə́n á kâm á kpô ekʉ̂ ka echî ntem nnyo a fonê nnyen erû.

⁸Kən Obhasi a tóŋe êt ekpak nji yê a korê êt. Nan? A ri ebhú nji êt e nyə́ne ka obhí nâ Jisos Krayis a kpóe ekʉ̂ ka echî ejə́ré.

⁹Ka eji agyʉ́ŋ amê á bhə́re ka nsi ka echî ejə́ré, a yîm Obhasi a kô ekpin ejə́ré se é rî ka nnyen-i-mbá. Nji é chíŋi obhô mân é rî sê a kí nyaŋe êt ka ofú Obhasi a kí ko oyámá-ḿbə́ŋé a tâŋ ngun nnyí.

¹⁰Ájoé ebhú nji e ri ka ebhan na Obhasi, a chə́bhe njəm a kô êt ka ekone, nji Mmon owe a kpóe ka echî ejə́ré. Mfá-mfá mân nji Mmon a ri mbít, é joe ka ekone na Obhasi, esémém ejə́ré tîk é jóe nan?

¹¹É ká man njí, é fon fə́ne ogyebhá-ḿbə́ŋé na Obhasi ka obhô Ntûfâm owəré Jisos Krayis, nnyo a yîm êt mfá-mfá é kət ka ekone na Obhasi.

¹²Deê ń sə́ré ên mân sê nne yót nâ a bháe na obhí ka ngun nnyí. Nji obhí ó bháe, ekʉ̂ fə́ne é tôp. Ekʉ̂ mân é jábhe áno ngun, ka kpe énê ka ngun a yîm obhí.

¹³Obhí ó raŋ mbá ka nsi nnyí kən Obhasi a karé ebhín ejê mbâ Mosis. Nji ebhín é ro joé, nne nnyo a kí gbo ebhín cháŋ.

¹⁴Kən kpe noŋ é rî áno, é róghé ta ka ebhú Adam ta o sî ebhú Mosis, ekʉ̂ a fôn ikom a chíŋi nne. A fonê ikom na chénchén ane, kpe na mba á ká yim ekpak obhí nji Adam a yimî. Obhí Adam ó rî sê á ká yim ekpak nji Obhasi a sə́re yê. Adam na Jisos Krayis nnyo a fonê ka ebháám, á sik ojoé ekan,

¹⁵kən á ká joé. Echî aŋ? Ekəp Obhasi é ká joé noŋ obhí Adam. É rî ka etʉri sê etî-etî ane á kpo ka obhí nne nnyó yót, kən onobhá-eji Obhasi ó faŋ ó chiŋ. Obhasi a kə̂p nne ekəp, kpe ejûm á ka bhə́p, ka obhô onobhá-eji nne yót. Nne nnyó a ri Jisos Krayis.

¹⁶Nji é fábhe ka ekəp Obhasi é faŋ fə́ne é chiŋi nji é fábhe ka obhí nne yót. Ka nji nne nnyó yót a yimî obhí mbí bhə́t, esup Obhasi é bhîp ane. Kən ebhú Obhasi á toŋe onobhá-eji mbâ ane, kpe á yíma obhí nan, esup ejê é kí nop ábho.

¹⁷Á joé é rî ka etʉri sê ekʉ̂ é fóne ikom ka nsi nnyí ka obhô obhí nne yót, nâ é rî ekpatə́m ejûm nji é chiŋi abhô sê ka obhô nne yót, Jisos Krayis, ane á rî ka ekpin nji yúp na Obhasi. Ane mbá nâ mba á tábhe ekpatə́m onobhá-eji Obhasi na ekəp ejê nji a kô ekpin ábho se é rî ka nnyen-i-mbá.

¹⁸É yen mân sê ka ekpak nji obhí bhə́t mbi nne yót ó yim Obhasi a tô se ane chénchén á gbo, ono bhə́t fə́ne mbi nne yót ó yim esup Obhasi é kí nop ane. Ó bha ábho fə́ne na ekpin.

¹⁹Ka eji okúá-atûŋ mbi nne yót ó yim ane etî-etî á chəbhe ane abhí, ekpin í nne yót nji á bhó ku atûŋ, tîk é yîm Obhasi a kô ekpin ane etî-etî se é rî ka nnyen-i-mbá.

²⁰Ebhín é bháe é bha yim obhí eyimím ó tí. Kən obhí kpe ó tíi nan, onobhá-eji Obhasi ó ti ó chiŋ.

²¹É yen mân sê ka eji obhí ó fon ikom ó bha na ekʉ̂, onobhá-eji Obhasi fə́ne ó fon ikom ó bha na ekpin efonóm ka nnyen-i-mbá. Nâ ekpin nji é kára êt ekpin ótúm-ótúm ka obhô Ntûfâm owəré Jisos Krayis.