Read ejagham Ane rom, echî 8 Bible Online

Ane rom, echî 8 - ejagham bible

Ane rom, echî 8

¹Nâ mân nne kpe nnyón nnyo a chəmê na Jisos Krayis, Obhasi á bhó bhibhi yê.

²Echî aŋ? Ebhín nji Ntʉgantʉ Obhasi a kaghê êt ka ḿbə́ŋé é kare êt ekpin ka obhô Jisos Krayis. É kpat êt é yighi ka ebhín obhí eyimím na nji ekʉ̂.

³Eyighím njí nji ebhín í Mosis é ká məŋé oyim, ka êt a ri ane, ekpak etat cháŋ, Obhasi yê ḿfoné a yîm ńjə́ne. A yimî ńjə́ne nji a túmi Mmon owe nnyo á jíi yê ka nne noŋ êt mba e ri ka ekpin obhí. Ka biji Mmon owe mbi á kúmi ka ego, Obhasi a bhíbhi obhí esup.

⁴Echî a ri jen? A wóme a kó êt noŋ kpe é yim chénchén nji ebhín ejê é wóme. Ebhín ejê njí é rî ka nnyen-i-mbá. É dʉ̂ áfo e kí top mbá Ntʉgantʉ Obhasi, é bhó top mbá obhí.

⁵Ane mba á kí fon ekpin ka ekpak ábho áfoné á wóme, á kéra fə́ne achot ekpin í ngun nnyí. Kən mba á kí fon ekpin ka ekpak Ntʉgantʉ Obhasi a wóme, á kóra achot mma Ntʉgantʉ a korê.

⁶Mba á kí fon íkíkéré ábho fép ka ekpin í ngun nnyí, á tóbha áno ekʉ̂. Kən mba á kí top nji Obhasi Ntʉgantʉ Obhasi a wóme, á kí fon ekpin na enare.

⁷Echî é rî sê, nne nnyo se yê á tobha a ri nji é bhíghi yê ka ḿbə́ŋé, á woma áno a ri ebhan na Obhasi. Ntʉ́ghi íkíkéré áfi í kí yim yê á bhó karé biji a tóp ebhín Obhasi. Ka etʉri, á bhó bhik etóbhóm.

⁸Obhasi á bhó gyebhé ḿbə́ŋé na ane mba á tóbha a ri nji é bhíghi ábho ka ḿbə́ŋé.

⁹Kən ên, ane Obhasi, ájoé ka etʉri Ntʉgantʉ Obhasi nâ a ri ên ka ḿbə́ŋé, yê nâ a kí yim ên etûm ka biji, íkíkéré ḿbə́ŋé ifə́né asík. Ó ka fon fə́ne ńtʉgântʉ Jisos Krayis, ó bhó joé nne owe.

¹⁰Kən ájoé Jisos Krayis a ri ên ka ḿbə́ŋé, kpe noŋ tîk o kpô ên ka biji ka nchot obhí, o kí fon ên ekpin ka ńtʉgântʉ eyəné. Ka nan? Obhasi a kô ekpin ejə́né se é rî ka nnyen-i-mbá.

¹¹Ájoé Ntʉgantʉ Obhasi nnyo a yimî Jisos a nyə́me ka ekʉ̂ a ri ên ka ḿbə́ŋé, nâ yê tîk a yîm ên o fôn ekpin Obhasi ka biji ibhə́né. A ri na ikom í Ntʉgantʉ owe nnyo a ri ên ka ḿbə́ŋé, nâ a kí yim etûm njí.

¹²Atem-abhon-í-nnyen, nâ é gye ên mân arə́m í Ntʉgantʉ Obhasi. Ka obhô mbí, echî cháŋ nji e kí kpo yuk etí ḿbə́ŋé obhí eyəré nnyí.

¹³Ó fon ên ntʉ́ghi ekpin njí, ntə̂m i nchot eyəné a ri ekʉ̂. Kən ájoé na obhô mbi Ntʉgantʉ Obhasi á kaghá ên, ó maghe ên iyîm ibhí mbi ḿbə́ŋé eyəné á səra ên sê ó yîm, tîk o fôn ên ekpin.

¹⁴Kpe énê nnyo Ntʉgantʉ Obhasi nâ á tʉk yê mbá a chə́bhe mmon Obhasi.

¹⁵Ntʉgantʉ nnyó á ka joé ńtʉgântʉ nnyo a kí karé ên ka osʉ́ŋ, a kaghá efup ka ekpin ejə́né, kən a ri Ntʉgantʉ nnyo a kí yim ên ebhú jə́t o chə́bhe ên abhon Obhasi. Ntʉgantʉ nnyó a kí yim êt e bhiŋá Obhasi kpe efup é bhó fon sê, “Ńsé omé, Ńsé omé.”

¹⁶Ntʉgantʉ Obhasi yê ḿfoné a yîm êt é məŋe ka etʉri sê êt a ri abhon Obhasi.

¹⁷Ka eji e ri abhon abhê, tîk e fôn énoê iyîm mbi yê a kíi mbâ ane abhê. Tîk e chə̂m fə́ne na Jisos Krayis e fôn nji Obhasi a kíi yê. E kí chəm na Jisos Krayis ka bhaghé ngyím? Ájoé é fon nkiri ka oseŋe obhê, e kí fon fə́ne nkiri ka ogyebhá-ḿbə́ŋé obhê.

¹⁸Ń gaé oseŋe mbi é yena áno mfá-mfá na ogyebhá-ḿbə́ŋé mbi Obhasi a kíi êt kən a nyə́ne kpá á ka tóŋé êt, oseŋe mbí a ri mmon ejûm.

¹⁹Obhasi a yîm ngun na chénchén iyîm mbi í rî ka ósô na ka nsi. Ngun nnyí na chénchén iyîm á kí chik na obhô ka ḿbə́ŋé sê yê a tóŋé abhon abhê á yén.

²⁰Echî aŋ? Ngun nnyí na chénchén iyîm á bhó joé na ogyebhá-ḿbə́ŋé. É ká joé ka ekpak ábho á wóme. É kí joé ka ekpak Obhasi a gaê a kî. A gaê áno se a ri ori á tirá

²¹sê ofú bhə́t tîk a yíghi ngun na chénchén iyîm mbí ka osʉ́ŋ ekʉ̂, á chə̂m na abhon Obhasi, á fôn nkiri ka ogyebhá-ḿbə́ŋé mbi sê á mân ka osʉ́ŋ mbí.

²²É məŋe sê ta é si égyé, iyîm chénchén mbi Obhasi a yimî í rî ka ekpatə́m oseŋe noŋ nne-nkáé á suma ojî.

²³Kən kpe ḿbə́ne átíŋ asík, êt fə́ne mba Obhasi a káre kpá Ebhare Ntʉgantʉ owe, e ri na onoghá-ḿbə́ŋé. E kí chik sê Obhasi a kó êt noŋ abhon abhê, a yim êt é sém ka oseŋe mbí.

²⁴A ri Obhasi nnyo é chighá nná, nâ a yimî êt é sem. Kən ájoé é fon ejûm nji é chighá, é ro kpó yim ka etʉri. Echî aŋ? Énê nâ kə́n a chîk ejûm nji ta a fôn?

²⁵Kən sê é chîk ejûm é fôn, kpe jen kpe jen, é chighá áno na ḿbə́ŋé eyəré nyamḿ kən e fôn ńjə́ne.

²⁶Ka ekpak njí jə́t, na oyúbhá-ḿbə́ŋé obhə́ré ngá, Obhasi Ebhare Ntʉgantʉ a kə́ bha a bhâ kâk êt ikom. É ka məŋé ekpak nji e kí goré Obhasi, kən Ebhare Ntʉgantʉ yê ḿfoné a kí goré yê na ḿbə́ŋé-a-ḿbə́ŋé a káre êt. A kí goré ka ekpak nji nne á bhó məŋé osə́ré.

²⁷Nji Ntʉgantʉ a kí goré Obhasi, Obhasi nnyo a məŋê íkíkéré ifə́ré, a kí məŋé nji Ntʉgantʉ a wóme. Echî aŋ? Ntʉgantʉ nnyó a fábhe ochî a kí goré Obhasi mbâ ane Obhasi ka ekpak nji Obhasi a wóme fə́ne.

²⁸É məŋe sê ka chénchén achot, Obhasi a kí yim onono ó tôp ane mba á kóre yê, mba yê a sáŋe a bhîŋ ka ejûm nji yê a chimî.

²⁹Ane mbá nâ mba yê ta a sâŋ mbôp nnyí a kî se á fóŋé Mmon owe kpe ka jen. Mmon owe fə́ne a jóe nâ mmon-i-nnyen nnyo nne-nkúí mbâ atem etî-etî.

³⁰Mba Obhasi a sáŋe, a bhîŋ se á jóe ane abhê. Mba yê a bhiŋî, a yíghi ábho se á fon ekpin ka nnyen-i-mbá. Mba yê a yighî, a kâm se á jóe na yê ka ekpatə́m ejík ejê.

³¹E kí kpo chot jen etat é kpê ka achot mma é chot nná? Énê nnyo a kí bhik egyímím ngyím enok na êt nji Obhasi a ri njəm eyəré?

³²Ka eji Obhasi á ka ri Mmon owe nsôn, a kô yê a káre se a kpó ekʉ̂, êt chénchén é fôn ekəp, deê é kâm mân sê ka eji a karê êt ntʉ́ghi ekəp njí, tîk á bhó taŋé êt ekarám kpe jen nji yê a kíi êt.

³³Énê nnyo kə́n a sə́re se ane mba Obhasi a sáŋe á yim njí, á yim ńjî? Nne cháŋ. A ri Obhasi nâ a kóe ekpin ane abhê sê é rî ka nnyen-i-mbá.

³⁴Énê mân nnyo kə́n a fíri se á gbo? Nne cháŋ. Echî aŋ? Jisos Krayis a ri ágo a gorá Obhasi ka echî ejə́ré. A ri Jisos nnyó nnyo a kpóe ka echî ejə́ré, kən Obhasi a yimî yê fə́ne a nyə́me ka ekʉ̂, a karê yê ekumi ejík mkpe obhô-orûm obhê.

³⁵Énê mân nnyo a kí bhibhi okot mbi Jisos Krayis a fonê na êt? Nne cháŋ. Kpe e ri ka oseŋe, kpe ḿbə́ŋé nâ á nyʉghá êt, kpe á bhíbhi êt, kpe e rô fon édî, kpe e ri akpák, kpe a ri á kí to sê “Tîk e yîm yê,” kpe á yúi êt oyúí, Jisos Krayis á bhó re êt ekoróm.

³⁶Ka ekpak njí, á séŋe sê, “Obhasi, ka obhô obhâ, á wóma êt eyúúm chénchén ebhú. Á kət á chorá sê, ‘Tîk o yên ên, tîk o yên ên,’ noŋ obhúi mbi á kíi sê á yúí.”

³⁷Kən kpe na achot mmá fép, érûm a ri ejə́ré. E fonê ńjə́ne ka obhô yê nnyo a tóŋe êt okot.

³⁸Ka nan? Ḿ məŋe ka etʉri bəre kpe nji é kí bhibhi okot Obhasi na êt kpó cháŋ: kpe ekʉ̂, kpe ekpin, kpe baénjel, kpe ojê, kpe ikom mfə́n-mfə́n, kpe ngun nnyi mfá-mfá, kpe nnyi a kə́ bha mbá-ochî.

³⁹Kpe ósô na nsi, kpe jə́t cháŋ nji Obhasi a yimî nji tîk é bhîk ebhíbhím okot obhê na êt. A tóŋe êt okot mbí jáé ka ekpin í Ntûfâm owəré Jisos Krayis nnyo a ri mmon owe.