Read ejagham 1 Ane korin, echî 1 Bible Online

1 Ane korin, echî 1 - ejagham bible

1 Ane korin, echî 1

¹Nwet nnyí a dʉ mbâ amé, Pol, nnyo Obhasi a sáŋe ka okot obhê se ń jóe ḿgbán i Jisos Krayis. A ri mme na ntem-mmon-i-nnyen owəré Sotenes

²nâ e séŋe e tûm mbâ echəme ane Obhasi nji é rî ágo Korin. E túmi fə́ne mbâ ane chénchén mba Jisos Krayis a yimî se á kâ fôn akôp, á bhîŋ ábho sê ane Obhasi. E túmi eróŋ mbâ ane chénchén, kpe á rî ka fan, mba á kí bhiŋ mbiŋ i Ntûfâm Jisos Krayis. Yê nâ a ri Ntûfâm ábho na owəré eróŋ.

³Deê Obhasi Ńsé owəré na Ńtâ Jisos Krayis á tóŋé ên onobhá-eji, á káre ên fə́ne enare.

⁴Ń kubha Obhasi chénchén ebhú ka echî ejə́né. Echî aŋ? A tóŋe ên onobhá-eji ka obhô Jisos Krayis.

⁵Ka ochəma-biji na Jisos Krayis, ó fon ên ekəp ó jeghe ka nchot i nnyo eyəné na oməŋá-ejûm obhə́né.

⁶Nji esə́re Jisos Krayis é fóne áno arʉk ka ḿbə́ŋé eyəné,

⁷kpe ekəp Ebhare Ntʉgantʉ jə́t nji o rô fon ên cháŋ, nji ó chighá ên sê Ntûfâm owəré Jisos Krayis a bhá.

⁸Yê fə́ne tîk a yîm o gyími ên akát á sî ên nsi ta ntə̂m a sî. Tîk é dʉ̂ áfo, á bhó yen kpe obhí ka ekpin ejə́né ka ofú Ńtâ Jisos Krayis ábhi.

⁹Echî aŋ? Ka onyen-ane obhê, Obhasi a bhîŋ ên se ó chə̂m ên biji na Mmon owe Jisos Krayis nnyo a ri Ntûfâm owəré.

¹⁰Atem-abhon-í-nnyen, ka ikom í Ntûfâm owəré Jisos Krayis, n kí goré ên bəre ó jóe ên eyum jə́t kpe ka nnyə́n nchot, achât á kâ gyê ka ekam ejə́né. Joê ên nne yót ka íkíkéré ifə́né. Nji ó fon ên ka ḿbə́ŋé sê o kí yim, deê ên chénchén ó kâm ên ka ńjə́ne.

¹¹Atem-abhon-í-nnyen abhámé, etʉ̂ ane ndə́p-i-njû Kroye á səre ə̂m sê okpóŋe ó rî ka ekam ejə́né.

¹²Ń chorá áno ka etʉ̂ ane ka ekam ejə́né á chorá sê ábho á tóbha Pol, etʉ̂ sê Aporos, mba tat sê Pita na mba tat fə́ne sê ábho á tóbha Jisos Krayis.

¹³Ḿ bə́p ên kpá. Á chəbhe á kirá Jisos Krayis okirá a? A ri mme Pol nâ á kúmi ka ego ka echî ejə́né a? Á fúghi ên ayép ka mbiŋ amé a?

¹⁴Ń kup Obhasi kpe-eji nji ń ka fúk kpe nne owəné ayép é ká chiŋi Kripus na Gayus.

¹⁵Nâ mân nne owəné kpe yót nnyo a kí səre se ń ko mbiŋ amé, mme Pol, ḿ fuk yê ayép cháŋ.

¹⁶N sîk ogyiní, m fûk fə́ne ndə́p-i-njû Stefanas ayép. Ń ka yen nne etat nnyo m fúghi yê ayép.

¹⁷Echî ń ka fúk ane ayép é rî sê, Jisos Krayis á ka túm ə̂m se ḿ bá fúk ane ayép, kən a túmi ə̂m se ń jên ń sə́ré ane otîp ogyebhá-ḿbə́ŋé obhê. Ń ka sə́ré esə́re njí ka oməŋá-ejûm í nne, ka n kí wom bəre ikom mfi í rî ka ekʉ̂ nji Jisos Krayis a kpóe ka ego í yîm etûm ka ḿbə́ŋé ane.

¹⁸Echî a ri jen? Ane mba á kí kpo á tán á kôk otîp mbi Jisos a kpóe ka ego sê énə́mé. Kən mbâ eyəré mba e kí semâ, otîp mbí a ri ikom Obhasi.

¹⁹Á séŋe se Obhasi a chorê se, “N kí bhibhi oməŋá-ejûm ane mba á fóne ḿbə́ne. Mba á fóne aron, n kí yim ḿmáne á kə́t chichi.”

²⁰Ka íkíkéré mfí mân, mməŋa-ejûm a fábhe jen? Ane mba á kpîk ane achot í ngun, ábho á mə́ŋe jen? Á fíra áfírí mma sê á məŋe ejûm, áfírí mmá á kí karé ábho jen? Obhasi á ka tóŋé nná jáé se oməŋá-ejûm í ngun nnyí a ri chichi ejûm a?

²¹Echî é rî sê, Obhasi, ka oməŋá-ejûm obhê, á ka kam se ane ngun á kó mbi ábho oməŋá-ejûm, á mə́ŋe yê. A wóme se a ri achot mma é kpik nâ á kí yim ane mba á kíi ḿbə́ŋé na ḿmáne á sém, kpe ane á kera sê a ri ánə́mé achot.

²²Ane Jus á wóma sê ta á tóŋé ábho eriŋ kən á kí ḿbə́ŋé na Jisos Krayis, kən ane nték ajéné á wóma oməŋá-ejûm.

²³Kən êt é kpik ane Jisos Krayis nnyo á kúmi nná ka ego. Okpígha-ejûm mbí ó yama ane Jus ka ḿbə́ŋé, ane nték ajéné á kok sê a ri ánə́mé achot.

²⁴Kən ane mba Obhasi a sáŋe ábho, ane Jus oo, ane nték ajéné oo, achot mma é kpik nná a ri Jisos Krayis. Yê nâ a ri ikom Obhasi, a ri oməŋá-ejûm Obhasi.

²⁵Deê ó mə́ŋe ên kpe noŋ ane á chóra áno, sê nne kpe yót nnyo oməŋá-ejûm obhê ó síi nji kə́n á bhîŋ sê énə́mé Obhasi cháŋ. Nne fə́ne kpe a fonê ikom nan, í ká si mfi kə́n á bhîŋ sê ogóŋ Obhasi.

²⁶Atem-abhon-í-nnyen, tit ên kpá ebhú Obhasi a sáŋe ên nná. Ane ka echəme ejə́né mba á fóne oməŋá-ejûm í ngun, á ká ti. Mba á fóne mbiŋ na ńgyímí ka amə̂t ane ngun, á ká ti.

²⁷Kən Obhasi a sáŋe achot mma ngun á kébha sê énə́mé, yê a soné ane mba ngun á sə́ra sê á mə́ŋe ejûm. Obhasi a sáŋe iyîm mbi ngun á kôk sê agóŋ, yê a soné agban.

²⁸Obhasi a sáŋe iyîm mbi í ká fap kpe mbiŋ, na mbi ngun á kébha ńgô chichi, na mbi í ká fon ńgyímí, se yê a bhíbhí mbi ngun á kéra sê í chiŋ ochíŋ.

²⁹Nâ é fap mân sê nne nnyo a kí sum obhô-ngaŋ cháŋ ka ochî Obhasi.

³⁰A ri ka obhô Obhasi nâ é chəm áno biji na Jisos Krayis. Yê nâ a yimî se Jisos Krayis a yim êt é mə́ŋe mfoné-mfoné oməŋá-ejûm. A ri ka obhô Jisos nâ Obhasi a kô êt fə́ne se ekpin ejə́ré é rî ka nnyen-i-mbá. A yîm êt é chəbhe ane abhê, a yîm êt é sem.

³¹Nâ ekpak á séŋe fə́ne sê, “Nne nnyo a kí sum obhô-ngaŋ, deê a súm ka mbiŋ i Ńtâ Obhasi.”