Read ejagham 1 Ane korin, echî 10 Bible Online

1 Ane korin, echî 10 - ejagham bible

1 Ane korin, echî 10

¹Atem-abhon-í-nnyen, ń seŋa iyîm mbí ka n kí wom ń tît ên bəre átʉ́k-í-ngurobhú á bhúi ane-atəm abhə́ré chénchén mba á jéna na Mosis. Á yáŋe aya na akát.

²Á fûk ábho chénchén ayép ka átʉ́k mmá na aya mmá noŋ atóbhá Mosis.

³Ábho chénchén á dî édî Obhasi.

⁴Á gwô ayép Obhasi mma á fábha ka eránám Obhasi nji é jak na ábho. Eránám áji a ri Jisos Krayis yê ḿfoné.

⁵Kpe noŋ Obhasi a nyáŋe ane mbá, etî-etî ábho á yîm iyîm mbi í ká gyebhe Obhasi ka ḿbə́ŋé. Ka obhô mbí, á kpo ka etə́m, biji ábho í kə̂t ka ngûm ka ngûm.

⁶Chénchén iyîm mbí í kí tʉ êt obhô ka otûŋ sê e kâ kôt obhí eyimím noŋ ane-atəm abhə́ré,

⁷e kâ tôp fə́ne ajom noŋ etʉ̂ ábho. Á séŋe ka nwet Obhasi sê, “Ane mbá á kúmi okumí, á dî édî, á gwô aməm, á rúi mân ngyím á kí yim achot akôp.”

⁸Deê êt e kâ gyê ka achot enuŋ akôp noŋ etʉ̂ ábho á yími. Ane mba á kpóe ka ofú bhə́t á kət chiîŋ kən á sí ntem-esam, nsam i ntə̂m ésá (23,000).

⁹Etʉ̂ ábho ebhú áji á gáe Ńtâ Obhasi sê á yén nji a kí yim. Ka obhô mbí, onyô ó yûm ábho ó yúi. Deê êt e kâ gáe ên yê.

¹⁰Etʉ̂ ane mbá ebhú áji á róghe eməmə́m na Obhasi ka ntuŋ. Ka obhô mbí, énjel a yúi ábho. Deê e kâ mə́me na yê ka ntuŋ.

¹¹Iyîm mbí chénchén mbi í fábhe nná ábho a ri eriŋ mbâ ane etat. Mbâ eyəré, á séŋe ḿbə́ne sê á tʉ̂ êt obhô ka otûŋ, ka ntə̂m i ngun a kə́ bha osí.

¹²Ka obhô mbí mân, kpe énê nnyo á kere se yê a ri ngyím, a kó ebhú, a kâ gbô ka egaé.

¹³Kpe egaé nji é tə́ma ên nji é bhó təm ane etat cháŋ. Obhasi a ri nnyen i nne, á bhó kam se ó fôn ên egaé nji é sóne é chíŋi ên. Ó gye ka egaé kpe jə́t, a kí karé wâ ḿbə́ŋé nnyi o kí gyimi akát á sî wâ nsi, egaé njí é chîŋ.

¹⁴Atem í ḿbə́ŋé abhámé, maghê ên mân achot ajom.

¹⁵Êt ánə́mé ane asík, kére ên áfoné ájoé nji ń chorá nná é ká joé ka echî.

¹⁶Ebhú e kí tit ekʉ̂ Jisos Krayis, é kok aməm, e káre ekûp mbâ Obhasi e gwô. To mfá nâ é fap sê é fon nkiri ka agyʉ́ŋ í Jisos Krayis? Édî Obhasi fə́ne nji é yak nná e dî, biji Jisos Krayis asík e chəmê áno e dî a?

¹⁷Ka eji édî nji é rî jə́t, êt mba é dik ńjə́ne e tíi otí, kən é chə́bhe nne yót, ka édî njí é rî jə́t.

¹⁸Kére ên erû ane Jus. Mbâ ábho, ane mba á di édî ekəp nji á túbha mbâ Obhasi, á chəm biji na Obhasi ka eji ekəp etúbhúm.

¹⁹Ńji é toŋe sê jen? Sê njom nâ a ri ejûm kən édî nji á jóma á kará ńnyə́ne nâ é rî ejûm?

²⁰Áno asík. Nji ń woma ên ó mə́ŋe é rî sê, efin nji ane mba á ká məŋé Obhasi á kára a ri mbâ ágbán í Satan, mbâ Obhasi asík. Ń ka wóm ên ó chə̂m biji na ágbán í Satan.

²¹É ká nop sê ó gwó aməm í Ńtâ Jisos na mma ágbán í Satan eróŋ. É ká nop sê ó dí édî na Ńtâ Jisos, ó kúmi ó dí na ágbán í Satan eróŋ.

²²É woma sê Ńtâ Obhasi a yám ḿbə́ŋé a? E kí sê é son é chiŋi yê a?

²³Ane á kí səre sê, “Kpe e korê jen e yîm, nji é gbʉ́a êt cháŋ.” Ka etʉri, kən iyîm chénchén asík mbi nne á yimá nâ í kí nyaŋe yê. Iyîm chénchén asík í kí yim nne na atem abhê á kúí ka achot Obhasi.

²⁴Deê kpe énê a yimá ejûm nji é kí nyaŋe ntem-nne eróŋ. Ka to se ó nyáŋé biji ibhâ we átíŋ.

²⁵Ó nam nnyam ka ogəm o yâm, o dî, áfo nchot asík. Deê iyîm ntʉ́ghi ábhi í kâ kpô karé ên onyʉghá-ḿbə́ŋé sê ó yim ên obhí.

²⁶Ń chorá áno ńji, ka á séŋe sê, “Obhasi nâ a fonê ngun ndə́m na chénchén iyîm mbi í rî ka ńnyə́ne.”

²⁷Nne nnyo á ka kí ḿbə́ŋé na Jisos, á bhiŋ ên édî, o kâm, dî nji-nji a kíi se ó dí ên. Ka fôn ên onyʉghá-ḿbə́ŋé ka edíím édî njí.

²⁸Kən ájoé á səre ên sê édî áji a ri édî efin, ka dí ńjə́ne. Ó maghe ên áno ka obhô nne nnyo a sə́re ên se édî efin, na ka obhô onyʉk efonóm ka ḿbə́ŋé.

²⁹Ń ka to ka ḿbə́ŋé eyəné, kən nnyi ntem nnyo a sə́re ên nná. Nne tîk a bhə̂p se, “Ájoé nne etat a fôn onyʉghá-ḿbə́ŋé ka ejûm, jen é kí yim ə̂m n kâ yîm nji n korê?

³⁰Ájoé ń kup Obhasi ka édî nji ń di, jen ane etat á gə́ma ə̂m ka édî nji n kí karé Obhasi ekûp?”

³¹Nâ kpe jen nji o kí yim, kpe a ri nji díím, kpe a ri nji gwóóm, deê é jóe nji ngun á kí karé Obhasi ejík.

³²Kó ebhú o kâ yîm kpe ejûm jə́t nji é kí choe ntem-nne, kpe a ri nne Jus, kpe njéné, kpe nne echəme ane Obhasi, a yim obhí.

³³Tôp ên ekpin ejámé, ka ń noghá bəre ogyebhá-ḿbə́ŋé ó kâ jóe ó káre ə̂m átíŋ. Ń noghá bəre ó jóe ó káre ane chénchén, ka kpe bhaghé ejûm, á kí ḿbə́ŋé na Jisos, Obhasi a yim ábho á sém.