Read ejagham 1 Ane korin, echî 11 Bible Online

1 Ane korin, echî 11 - ejagham bible

1 Ane korin, echî 11

¹Tôp ên ekpin ejámé noŋ mme ń tobha nji Jisos Krayis.

²N kí kup ên kpe-eji, ka n di ên ka ḿbə́ŋé chénchén ebhú, o kí fi ên fə́ne ka okpígha-ejûm mbi n karê ên.

³N kí wom ó mə́ŋe ên sê Jisos nâ a gyím ochî nne-ndûm. Nne-ndûm a gyím ochî nkáé owe. Obhasi a gyím ochî Jisos Krayis.

⁴Kpe nnyón nne-ndûm, nnyo kpe á kará otîp Obhasi, kpe á gorá Obhasi, a bhúi kpe ejûm ka echî, á ka jíghí Jisos Krayis.

⁵Kən nne-nkáé nnyo, kpe á kará otîp Obhasi, kpe á gorá Obhasi na echî fóŋ, á ka jíghí fə́ne ndûm. É kí joé noŋ kpe á kpúghi echî nnyo nne-nkáé nnyó okpúghí.[2]

⁶Ájoé nne-nkáé á bhó bhuí echî ejê, nâ deê a gbút nnyʉ̂ a yighí. Kən ájoé nne-nkáé á yen se a ri ejûm ísonê ka egbúrúm nnyʉ̂, nâ deê a bhúi ńnyə́ne.

⁷Kən nne-ndûm á ka fon ka ebhuúm echî ejê, ka Obhasi a yimî yê ka ejímí ejê. A kí toŋe fə́ne ejík Obhasi. Nne-nkáé á toŋá ejík í ndûm owe.

⁸Echî aŋ? Ó məŋe ên sê Obhasi a kóe ékə́p í nne-ndûm a yîm nne-nkáé, á ka kó nji nne-nkáé a yîm nne-ndûm.

⁹Obhasi a yimî fə́ne nne-nkáé ka obhô nne-ndûm, á ka yim nne-ndûm ka obhô nne-nkáé.

¹⁰Nâ ńjə́ne, ka obhô baénjel, é nóbhe nne-nkáé a bhuí echî ejê, é tóŋé sê yê a ri ka óséré ndûm owe.

¹¹Kən kpe noŋ é rî áno, ka ochəma-biji obhə́ré na Jisos Krayis, nne-ndûm cháŋ, nâ nne-nkáé cháŋ, nne-nkáé cháŋ, nâ nne-ndûm eróŋ cháŋ.

¹²E məŋê njí, ka ta ka eróghá-ndə́p, Obhasi a kóe ékə́p í nne-ndûm a yîm nne-nkáé. Nne-nkáé fə́ne nâ á jíi nne-ndûm. Deê e məŋá ên fə́ne sê chénchén ejûm é dʉ̂ mbâ Obhasi.

¹³Ên áfoné, támé ên ebhə̂p njí. Ó kere ên sê é rî nono nji nne-nkáé a kí joé ka echəme atóbhá Jisos, a gorá Obhasi, echî fóŋ a?

¹⁴Ka ekpak Obhasi a yimî iyîm, ó ka məŋé ên sê nne-ndûm á maghé nnyʉ̂ a kúi yê ka echî kpe-eji, a ri ísonê a?

¹⁵Kən mbâ ane-akáé, arâm í nnyʉ̂ a ri ono, ka Obhasi a káre ábho ńnyə́ne se á bhóp ábho echî.

¹⁶Ájoé nne a ri nnyo se achot mmá cháŋ áno, deê a məŋé se êt na ane chénchén ka echəme atóbhá Jisos kpe ka fan, nâ ekpak erû nji e fiî.

¹⁷Nchot a ri nnyi n kí səre ên. Ḿ bó to bəre ó yîm ên nono. Echî aŋ? Ebhú ó chəmé ên sê ó góre Obhasi, ekpin nji ó yimá ên é bhó bha ên na onono, é bhíbha ên obhíbhí.

¹⁸Ka ndaŋa-mbá, n kí yughâ sê ebhú ó chəmé ên, ó kumá ên ka nkam ka nkam, ekam njí sê ńnyô nne cháŋ na êt, ńnyo nâ a ri nne owəré. Nchot nnyí á bhó re ejoóm ka etʉri.

¹⁹To nâ noŋ o kí yim ên kən nne a mə́ŋe nne nnyo a ri ka mbá, na nne nnyo cháŋ.

²⁰Ń yen bəre nji ó chəmá ên eji jə́t, édî Ńtâ Jisos asík nâ ó dik ên.

²¹Ń chorá áno, ka nji o kí di ên édî njí, kpe énê á kí di, ntem ka ochî á bhó kep. Ka ekpak njí, etʉ̂ ane á kí ji njaé, etʉ̂ á gwô á gbok.

²²Bhaghé ntʉ́ghi ejûm! Ojû nâ ó ka fon ên mbi o kí dik ên o gboghá ên ágo a? Átíŋ ó timá ên otimí sê ó tú ên echəme ane Obhasi, ó yimá ên fə́ne ane mba á ká fon nji ábho, á fôn oyúbhá-echî. Ó woma ên sê ntʉ́ghi nchot nnyí ń chôt nan? Ń sə́ré ên bəre ó yim ên nono a? Kpák, mme asík.

²³Echî aŋ? Nji n kóe mbâ Ńtâ Jisos nâ n karê ên fə́ne. N sə́re ên bəre kən á bhá gúri Ńtâ Jisos, ka nkúbhi atʉ́ áma, a kô édî,

²⁴a káre ekûp mbâ Obhasi a yâ ńjə́ne a chôt se, “Ḿfa a ri biji ibhámé mbi n kí karé ka echî ejə́né. Yim ên ka ekpak njí, o tirá ên ə̂m.”

²⁵Nji á díi édî, a kô fə́ne nkôp na aməm ka etím a chôt se, “Ńkôp nnyí a ri ńgyímí mfê nnyi Obhasi a kpó gyim na ane ka obhô agyʉ́ŋ amámé. Ebhú-ebhú o gwóe ên ḿmáne, deê o tirá ên ə̂m.”

²⁶É rî sê ebhú-ebhú o díi ên édî njí, o gwô ên aməm mmá, o kí tirâ ên ekʉ̂ ejê tata ofú ó sî mbi yê a kí chəbhé njəm a bhák.

²⁷Kpe énê mân nnyo á digha édî njí, a wók aməm mmá ka mbá nnyi a kí karé Ńtâ Jisos atû, a yîm obhí a kpê na biji Ntûfâm na agyʉ́ŋ amê.

²⁸Nne nnyo se yê a kí di mân édî njí, a wôk aməm mmá, a ri a kép kpá biji ibhê nono ájoé a bhîk edíím.

²⁹Echî aŋ? Nne nnyo á bhó yubhi echî biji Ńtâ Jisos, kən a kí di édî njí a wók aməm mmá, a yîm se Obhasi a kpə́re yê ka édî nji á dik nná, na aməm mma á wok.

³⁰Nâ ejûm é yími áno etî-etî ên o kí maŋâ ên, etî-etî ikom cháŋ, mba kpóóm á kí kpo.

³¹Ájoé é taŋ biji nono, nne nnyo a kí kpo taŋ esup ejə́ré cháŋ.

³²Kən ebhú Ńtâ Jisos á taŋ esup ejə́ré, a kpə́re êt, á toŋá áno êt obhí obhə́ré se ofú ábhi esup é kâ bhíbhi êt nji é bhîp ngun.

³³Atem-abhon-í-nnyen, deê ń sə́ré ên mân bəre ó kpo chəm ên sê ó di ên édî Ńtâ Jisos, chik ên atem chénchén.

³⁴Nne á joé nnyo njaé a kí yam yê, deê a raŋ kpá mbá a dí édî ka njû kən a bhá. Ó yim áno, tîk ekpin ejâ ka echəme é bhó joé nji Obhasi a kí bhibhi wâ. Tîk n tâ ên etí nji tat ka achot mma ngá ebhú ḿ bá m kpúghi ên ágo.