Read ejagham 1 Ane korin, echî 12 Bible Online

1 Ane korin, echî 12 - ejagham bible

1 Ane korin, echî 12

¹Atem-abhon-í-nnyen, ń ka wóm ên ó jóe énə́mé-énə́me ka nchot ekəp nji Obhasi Ebhare Ntʉgantʉ á kará.

²Ó məŋe ên sê ka ebhú nji o nyə́ne ó ka joé ên ane Obhasi, á tʉ̂ ên obhô-okáé na obhô-orûm o tân ên mbá o chə́bhe o jíghá ên ajom, ńga ajom á bhó karé ekpin.

³Deê ó mə́ŋe ên mân sê ájoé Obhasi Ebhare Ntʉgantʉ nâ á tʉk nne mbá, nne nnyo a kí chot nchot i mbí a kpe na Jisos Krayis cháŋ. Nne fə́ne nnyo a kí səre se Jisos nâ a ri Ntûfâm owe nji Obhasi Ebhare Ntʉgantʉ á ka tóŋé yê mbá cháŋ.

⁴Bikəp í rî etî-etî mbi Obhasi Ebhare Ntʉgantʉ nnyó yót á kará.

⁵Mkpak i ntûm fə́ne a ri etî-etî nnyi ane á yíma mbâ Ńtâ Jisos nnyó yót.

⁶Mkpak oka a tî otí nnyi ane Obhasi á kôk á yíma ntûm, kən a ri Obhasi nnyó yót nâ á kará ábho.

⁷Obhasi Ebhare Ntʉgantʉ á kará kpe bhaghé énê ejê ekəp egyê se ane á kó á yîm onono ó jóe ó káre ane chénchén.

⁸Obhasi Ebhare Ntʉgantʉ á kará nne etat ikom mfi a kí fon oməŋá-ejûm a kpík ane achot, nnyo tat a káre mfi a kí fon aron a kpík ane.

⁹Ka ikom Ebhare Ntʉgantʉ nnyó yót, ane etat ḿbə́ŋé nnyi á kíi na Jisos Krayis a sôn, mba tat á fon ikom mfi á yíma ane-emaŋé á sôn.

¹⁰Obhasi Ebhare Ntʉgantʉ á kará ane etat ikom mfi á kí yim iyîm okpógha-biji. Etʉ̂ á kí fon ikom mfi á kára otîp Obhasi, mba tat ikom mfi á kí məŋé iyîm mbi í dʉ̂ mbâ Obhasi na mbi í ká dʉ mbâ eye. Etʉ̂ á fóne ikom mfi á kí chot nyum i nték etat nnyi á ká nok oyúk, mba tat mfi á kí səre echî nchot kpe ka njə́n eyum eték.

¹¹Chénchén iyîm mbí, mbi ane á kí yim, a ri Obhasi Ebhare Ntʉgantʉ nnyó yót nâ á kará ane. Á kará kpe énê ejê ekəp egyê ka ekpak nji yê a wóme.

¹²Noŋ ayô á rî egyê-egyê ka biji bhə́t, nâ noŋ êt fə́ne e ri na Jisos Krayis.

¹³Kpe noŋ etʉ̂ ejə́ré e ri ane Jus, etʉ̂ Jus asík, etʉ̂ ejə́ré asʉ́ŋ, etʉ̂ asʉ́ŋ asík, é chəbhe nne yót ka ebhú e fúghi ayép ka Obhasi Ebhare Ntʉgantʉ nnyó yót. A ri Ebhare Ntʉgantʉ nnyó yót nâ a ri êt ka ḿbə́ŋé.

¹⁴Biji nne í ká fon eyô jə́t. Ayô á rî etî-etî.

¹⁵Ájoé mân kpe ekát nâ a toê se yê eyô-biji asík ka yê obhô asík, é ká yim ńjə́ne é kâ kpô joé eyô-biji.

¹⁶Ájoé mân kpe otûŋ nâ a toê se yê eyô-biji asík, ka yê eyə̂t asík, é ká yim ḿbə́ne ó kâ kpô joé eyô-biji.

¹⁷Ájoé eyə̂t ńjə́ne-njənê nâ a ri nná eyô-biji, nne a kí yuk mbá na jen? Ájoé otûŋ átíŋ nâ a ri eyo-biji, nne a kí ko jen a yúk egyʉ?

¹⁸Kən Obhasi á ka yim biji ibhə́ré ka ekpak áji. A kóe ayô ka ayô, a yîm biji ibhə́ré ka ekpak é kóre yê.

¹⁹Ájoé Obhasi a kóe nná eyô jə́t-ajərâ a yîm biji ibhə́ré, kə́n áfo biji asík.

²⁰Kən biji ibhə́ré í rî bhə́t ka ayô, ka ayô.

²¹Ka obhô mbí, eyə̂t á ka fon esə́rə́m obhô se yê á ka wóm yê. Echî fə́ne é ká fon esə́rə́m ekát se yê á ka wóm ekát.

²²Ka etʉri, eyô-biji nji é kí səre ntem ntʉ́ghi nchot ányi cháŋ. Echî aŋ? Ayô mma é kerá sê á ká son, kpe é rô joé na ḿmáne, nchot cháŋ, ḿmáne nâ á fîk êt ekpin.

²³Mma é kerá nná sê á ká fon ejík, nâ é bhó chaghé ache bhúghí-bhúghí e kpek na ḿmáne. Ḿmáne nâ é bhuá nono nne a kâ yên.

²⁴Mma é kerá sê á fóne ejík, nâ é maghá, ane á yén. Obhasi a tʉ́ri biji ibhə́ré mbí se é jíghí ayô mma nne a kí kere se á ká fap kpe ejûm.

²⁵A yimî ka ekpak nji ayô biji á bhó gyimi ka mbi ábho biji kən á joá eji jə́t á nyaŋa atem.

²⁶Nchot á təmá áno eyô jə́t, ayô mma ngá chénchén á yéna áno oseŋe na ntem ábho. Eyô jə́t é fon ejík, atem mba ngá chénchén á fóna ogyebhá-ḿbə́ŋé na ńjə́ne.

²⁷Ên chénchén ó chəm ên ó yîm biji Jisos. Nne kpe nnyón a ri eyô biji mbí bhə́t.

²⁸Ka echəme ejə́ré, ndaŋa-mbá Obhasi a sáŋe etʉ̂ ane se á jóe ágbán í Jisos Krayis, enyeré a sâŋ etʉ̂ se á kará otîp obhê. Ka osúí ásá, a sâŋ mba tat se á kpik ane achot amê. A sâŋ fə́ne etʉ̂ se á yimá iyîm okpógha-biji. A sáŋe etʉ̂ ane se á yíma ane bimaŋé í maná. A sâŋ mba á nyáŋa ane, mba tat se á tóŋa atem mbá, mba tat se á chóra nyum eték etat.

²⁹Ane chénchén asík á rî ágbán í Jisos. Chénchén asík á rî akará-otîp. Chénchén asík á kpîk ane achot. Chénchén asík nâ Obhasi a karê ikom se á yimá ntûm okpógha-biji.

³⁰Chénchén ane asík nâ á yíma ane á soná. Chénchén asík nâ á chóra ka nyum i nték nnyi ane á ká nok oyúk. Chénchén asík nâ á sə́ra nji á chóre ka nyum i nték nnyí.

³¹Kən deê ḿbə́ŋé eyəné a joé se á káre ên nnyen i bikəp. Mfoné-mfoné nnyen ekəp a ri nji n kí səre ên nná mfá-mfá.