Read ejagham 1 Ane korin, echî 13 Bible Online

1 Ane korin, echî 13 - ejagham bible

1 Ane korin, echî 13

¹Kpe m fonê ikom mfi n kí chot nyum i nték chénchén ka ngun, kpe ń yugha nyum i nchot baénjel, ń do fon okot na atem-ane, n di noŋ ebhuk nji é kára ejok. N di noŋ ńkánínká nnyi á bhó gyebhé eyum.

²Kpe m fonê ikom mfi n kí səre otîp Obhasi, kpe oməŋá-ejûm obhámé ó fáŋe nan, kpe achot á rî ka ebhə̂t m mə́ŋe, kpe ḿbə́ŋé nnyi n kíi na Obhasi a sonê, a bhîk nji n kí mək egúí n tûp, ń do fon okot na atem-ane, mme a ri chichi nne.

³Kpe n kóe iyîm ibhámé chénchén, n kə̂p akpák, kpe n kamê m kpô ekʉ̂ ngûn, ájoé ń ka fon okot na atem-ane, orʉrí obhámé áfo ka etím cháŋ.

⁴Nne á fon okot, á kok nchot ka tebhe, á toŋa onobhá-eji, á bhó kighâ atem amə̂t, á bhó sumâ obhô-ngaŋ, á bhó yuŋâ fə́ne biji.

⁵Nne nnyo á fon okot, á bhó saŋâ esaŋ, á bhó nyəmâ ofî, á bhó fubhâ ḿbə́ŋé, á bhó kaghâ obhí mbi ntem a yimî yê ka ḿbə́ŋé.

⁶Nne nnyo á fon okot, á bhó gyebhé ḿbə́ŋé nji nne á yim obhí, a kí fon ogyebhá-ḿbə́ŋé na achot mma á rî ka echî.

⁷Nne nnyo á fon okot, á kamá oseŋe. Kpe é foghe yê nan, ḿbə́ŋé nnyi a kíi na Obhasi a kə́rá esonóm, á məŋá se Obhasi nâ tîk a káre yê nji á chighá, a kí kəbhâ fə́ne ḿbə́ŋé.

⁸Okot ó bhó man bhúghí-bhúghí. Kən ebhú é kə́ bha nji Obhasi a rô kpó yim ane á kára otîp obhê. Ebhú é kə́ bha nji Obhasi a rô kpó yim ane á chôt ka nyum i nték etat. Ebhú é kə́ bha nji Obhasi a rô kpó yim ane á mə́ŋe oməŋá-ejûm obhê.

⁹Echî aŋ? Oməŋa-ejûm obhə́ré na otîp Obhasi mbi ane á kára mfá-mfá, ó rî ebhat.

¹⁰Ebhú Obhasi á ko mbi ó bhik obhik ó bhak, mbi mfá-mfá mbí ó kí tan.

¹¹Ebhú áji nji n di mmonche, ń chorá nchot obhóné, ḿbə́ŋé amé a ri nnyi obhóné, íkíkéré ifámé fə́ne mfi mmonche. Kən m kpô kúí, m mághe chénchén achot obhóné áma.

¹²Ebhú e kí yen iyîm mfá-mfá, é joá êt áno noŋ é kebha ka efe nji é bhó tʉrí ochî oyén. Iyîm í nyə́ne mbi é ka məŋé, kən ka ofú ábhi ó si, e kí yen yê na ochî na ochî. E nyə́ne é ka məŋé é jéghe, kən ka ofú ábhi, kpe bhaghé ejûm é kí jae êt ekan noŋ Obhasi a məŋê ə̂m a jéghe.

¹³Iyîm í rî ísá mbi í bhó man oman. Iyîm mbí a ri ḿbə́ŋé ekíím na Jisos Krayis, na eməŋə́m se Obhasi tîk a káre êt nji êt é chígha, na okot. Ka mbí ísá, nji é chíŋi ochíŋ a ri okot.